لوبيا ماشطو من مطبخي بطريقة جديدة ولذيذة

[Nada perla]

لوبيا ماشطو من مطبخي بطريقة جديدة ولذيذة جدا شفتها ف المنتدى من فترة طويلة

السلام عليكم ورحمة الله تعالى وبركاته
اليوم جبتلكم طريقة جديدة باش اتحضري لوبيا ماشطو وعلى ضمانتي راهي اتجيك بزاف بنينة متقدريش اتقاومي الطعم الرااااااااااائع

نبداو بسم الله بالمقادير

لوبيا ماشطو على حسب افراد عائلتك
ثلاث حبات بصل كبار
اربع حبات طماطم طازجة
كمية من اللحم المرحي
شوية ارز
شوية معدنوس
خمس حبات بيض
شوية فرينة
شوية شابلوغ
فرماج غابي
ملح وتوابل على حسب ذوقك
زيت للقلي

طريقة التحضير
تنقي اللوبيا ماشطو ديالك وقطعيلها غير الاطراف وغليها نص طياب وصفيها وخليها تبرد
اللحم تاعنا اندوزنوه مع الروز والمعدنوس والملح والفلفل الاسود وانديرولو حبة بيض
نحكمو كمشة لوبيا ماشطو تكون عندها نفس الطول نستفوها وانحطو داخلها شوية لحم مرحي على شكل صباع ونغلقو عليها ونربطوها بخيط الطهي وانقطعو الاطراف اللي خارجين باش اتجي متساوية وهكذا حتى انكملو اللوبيا تاعنا كامل

ملاحظة رح تلقاي حبيبات لوبيا ماشطو يتفتتولك او يفضلولك
متتقلقيش
انتي رايحة اتطيبيهم
احكمي البصل قطعيه طويل جمريه ف الزيت وضيفيلو الطماطم بعدما تكوني رابيتيها وخليهم يتجمرو مليح ثم مرقيهم وكي يغلي المرق ارمي الداخل هدوك اللوبيا اللي فضلولك وتاني اللوبيا اللي حشيناها بالفيونداشي
نغلقو الكوكوطة تاعنا ومنطولوش عليها قيسما يطيب برك اللحم اللي داخل
كي يطيب كلش انحو اللوبيا اللي فارصيناها بالفوينداشي وانخلوها تبرد ثم انحولها الخيوط كامل
نرمدوها ف الفرينة ثم البيض ثم الشابلوغ والى المقلة اللي انكونو سخنا فيها الزيت وانقصولهم النار وانخلوهم يتحمرو
كي تكملي كامل اللوبيا تاعك خليهم يقطرو ثم ديريهم ف بلا تاع الفور وحطي فوقهم فرماج رابي وحطيهم شوية ف الفور
ثم قدميهم مع لاصوص تاع البصل والطومعطيش

ان شاء الله انكون وفقت في ايصال الوصفة بكل خطواتها وان شاء الله تعجبكم وتجربوها خاطر راهي بنينة بزاف واللي ميحبش اللوبيا ماشطو رايح يولي ياكلها بهاذ الوصفة
ايا بصحتكم كامل انخليكم مع الصور اللي ان شاء الله رايحة اتوضح اكتر طرق التحضير بصح كنت شوية مزروبة مصورتش كلش
واللي عندها اي استفسار ان شاء الله راني رايحة انرد عليها وانفهمها
متنساونيش من دعواتكم وردودكم الجميلة

بالهناء والشفاء

http://www.up.djelfa.info/uploads/139785290507071.jpg

http://www.up.djelfa.info/uploads/139785293702121.jpg

http://www.up.djelfa.info/uploads/139785296861581.jpg

http://www.up.djelfa.info/uploads/13978529910471.jpg

http://www.up.djelfa.info/uploads/139785301374011.jpg

http://www.up.djelfa.info/uploads/139785305185971.jpg

http://www.up.djelfa.info/uploads/139785307839911.jpg

http://www.up.djelfa.info/uploads/1397853104571.jpg

http://www.up.djelfa.info/uploads/139785312858271.jpg

http://www.up.djelfa.info/uploads/139785316028611.jpg

[ام هدولة]

يعطيك الف صحة على الوصفة الرائعة انا نموووت عليها ناكلها في مرق او سلطة او سوتي نجربها في اقرب وقت انشاء الله

[أم يحي صهيب]

ماشاء الله نفس طريقتي وتجي هبال
شهاني في نص الليالي

[أم إناس]

يعطيك الصحه وطبق يشهي
بارك الله فيك

[x ام رحاب x]

يعطيك الصحة يالشاطرة تبارك الله

[زهرة الربيييع]

رائعة شهتيني فيها

[دائمة الحمد]

بارك الله فيك طريقتك في العمل منظمة تعجبني

[imene mimicha 05]

هايلة يعطيك الصحة

[Nada perla]

شكرا لكم جميعا ربي يخليكم ليا ويعطيكم الصحة وفيكم البركة ربي يسلمكم من كل شر هذا شرف ليا

[سارية الأثرية]

بارك الله فيك اختي
يعطيك الصحة

[أم همام 2015]

ما شاء الله

[zahra rose]

يعطيك الصحه وطبق يشهي ما شاء الله
بارك الله فيك

[Nada perla]

تسلمولي ربي يخليكم ليا

[خيروشة]

ميرسيييييييييييييي كتير

[lمنال]

والله فكرة هايلة ;)

[عطرالذهب]

شكرا بارك الله فيك

[om roumaissa]

ممممممممم بشهي يعطيك الصحة رانب سجلتها باش نجربها ان شاء الله

[Nada perla]

ربي يسلمكم حبيباتي ان شاء الله اتجربوها وتعجبكم

[R I A D]

يعطيك الصحة ندى و تسلم الايادي حنونة

[Nada perla]

يعطيك الصحة ندى و تسلم الايادي حنونة


الله يسلمك حبيبتي ربي يخليك

[iaman.fr]

يعطيك الصحه

[Nada perla]

الله يسلمك حنونة

[نور الهدى06]

شهيتينا فكرة هايلة

[srour]

يعطيك الصحة تحفة نجربهم انشاء الله

[Nada perla]

ان شاء الله اتجربوها وتعجبكم

[oum malek]

بارك الله فيك ان شاء الله مأجورة

[فاصلة]

يعطيك الصحة على الوصفه