*-*وين راكم يا العنابيات الشاطرات *-*أم كوثر وينك*-* [الأرشيف] - منتديات الجلفة لكل الجزائريين و العرب

مشاهدة النسخة كاملة : *-*وين راكم يا العنابيات الشاطرات *-*أم كوثر وينك*-*

*بيتي مملكتي*

2014-04-06, 08:57

السلام1

رحت ليامات اللي فاتو لعنابة و كليت في وحد المطعم الشخشوخة المفتتة

يا ويلي يا ويلي كيما تقولوها نتوما هايلة و بنينة عجبتني بزاف

حوست عليها عند اللي يبيعو الكسرة و الحلويات التقليدية قالولي روحي للمارشي نتاع الحطاب الحطاب تلقايها

كنا زعمة مروحين ولينا رحنا للمارشي ولقيتها و شريتها

بصح للأسف متا نعرفش كيفاش طيب

أنا نعرف شخشوخة الظفر نتاع قسنطينة بصح هذي ماعندي عليها حتى فكرة

هل طريقة طبخها كيما نتاع الظفر و لا كيفاش

يا ريت تحطولنا الطريقة و إذا ممكن حتى طريقة صنع الشخشوخة في حد ذاتها

و لقيت ثاني وحد العجين يتباع مفتول كيما الفارميسال بصح خشين عليه شوي يبانلي واسمو القريتلية ولا ما نعرف نسيت

ثاني إذا ممكن طريقة تحضير العجين و الطبخة كاملة

راح نتعبكم بصح والله نحب نجرب أكلات شعبية نتاع ولايات أخرى

و رغم اني ما شفتش الشخشوخة المفتتة بصح قلت نجربها و تجربتي ما راحتش في الباطل عجبتني يميم

هاي ليكم الصورة نتاعها

http://im48.gulfup.com/ja2Pha.jpg (http://www.gulfup.com/?Yc8kZB)

http://im48.gulfup.com/YnjOA1.jpg (http://www.gulfup.com/?sgpEQ5)

أم محمد تاج

2014-04-06, 09:00

احلى سلام لاغلى صديقة والله دخلت نجري كي لقيتك طالبة مساعدة وياريت صورتي الشخشوخة بالاك تختلف الاسامي من منطقة لاخرى ونقدر نساعدك يالغالية
نشالله يساعدوك العنابيات ونستفادو في جرتك وزورينا لهيه ركي عمبالك ربي يوفقك حنونتي

أم ياسين الزهراء

2014-04-06, 09:00

اهلا بالحبيبة والله فرحت كيشفت اسمك عنابة رجعتلك لينا على سلامتك لكان غير صورتيها نشوفوها بلاك نسموها اسم اخر

*بيتي مملكتي*

2014-04-06, 09:11

أهلين بالحبايب الحلوين توحشتكم غالياتي و حبيباتي و رفيقاتي أم محمد و أم ياسو

يا رب تكونو بألف خير و عافية

هاي ليكم الصور عزيزاتي والله جبدتها من الكونجيلو لاخاطر ماشي يابسة تتباع مندية

http://im48.gulfup.com/YnjOA1.jpg (http://www.gulfup.com/?sgpEQ5)

http://im48.gulfup.com/ja2Pha.jpg (http://www.gulfup.com/?Yc8kZB)

أم محمد تاج

2014-04-06, 10:40

الله يخليك يالغالية وحنا كاين منطقة في باتنة يديروه اسمو الباطوط وطريقتو ساهلة حنونتي
مرقي مرقة حمرا خاثرة على تاع الشخشوخة وكثريلها الدواوات والحروووور والحمورية والطماطم والبصل والثوم وكاين لي يديرها باللحم وثاني بلا لحم وتحي بالخضرة برك تهبل تهبل وطريقة العجين ثاني نعرف نخدمو والشخشوخة ماتفوريها ماديريلها والووو غير سقيها كيما الشخشووخة وتجي حارة ممممممم فكرتيني في الباطوووط كاش نهار نديرو موضوع للاستفادة
نشالله نكون ساعدتك يالغالية سلامي الحاااار كيما حرارة الباطووووووط ههههههههه

أم ياسين الزهراء

2014-04-06, 13:25

حبيبتي راهي تشبه كيما قالت ام محمد وتقدري ديريها كيما هدا ونستناو ام كوثر بلاك عندهم طريقة اخرى اما القريتيلية نضن كيما التليتلي غير يخدموها باليد

تفضلي هدا وانت شوفي

http://www.djelfa.info/vb/showthread.php?t=1449294

*بيتي مملكتي*

2014-04-06, 14:15

شكرا حبيباتي أم محمد و أم ياسو

علابالك المرة لولة استغربت كي قلتيلي الباطوط لأنو حنا الباطو عندنا في بسكرة حاجة أخرى خلاص

و كي قريت الطريقة فهمت بلي هذي تسمية نتاع هذي الشخشوخة عندكم

لكن الشخشوخة كانت كيما نتاع الظفر كي شغل مجمرة بالمرق و من بعد سقاوها على هذيك بانتلي يديروها كيما شخشوخة الظفر يعني يفوروها آخر تفويرة بعد ما يشمخوها بالمرق

وهذي اللي شريتها تبان ناقصة طياب تسمى لازمها تزيد طيب شوية

حبوبة أم ياسو هذاك محكوك حتى حنا نديروه فقط ما نديرولوش الخضرا كيما انتوما حنا نكثرولو البصل خاصة كي يكون وقت البصل الأخضر

قبل كنت ما نعرفوش المحكوك نتاعكم لكن تعلمتو من دار شيخي و وليت حتى أنا نديروا

*بيتي مملكتي*

2014-04-06, 14:17

أم محمد تاج

2014-04-06, 15:27

حبيبتي ام اياد حتى حنا الشاوية عندنا الباطوط لي تهدري عليه تاع المهراس والطماطم والكسرة وووووووو والباطوط لي قتلك عليه راه تاع الباريكية
نشالله يدخلو العنابيات ويفيدونا
بالتوفيق حنونتي

*بيتي مملكتي*

2014-04-06, 18:57

هذاك هوا اللي حسبتك تهدري عليه المرة لولة حبوبة أم محمد

أم شيماءْ

2014-04-07, 11:27

صباح الخير ام اياد وشراكي حبيبتي

حبيبتي حنا نديرها كيما الشخشوخة عادي نديرو مرق خاثر ونجمروها ممكن طريقة العنابيات تختلف راني نستنى معاك في الطريقة هههههههه:1::1::1:

شاوية حرة 05

2014-04-07, 13:42

هذيك نسميوها شخشوخة الضفر ندير سميد ارطب و ماء وملح و نعجنها ونقرصها قرصات و نطيبها في طاجين تاع الحديد ولازم تبقى بيضة ومن بعد نفتوها ونخلويها تيبس

شاوية حرة 05

2014-04-07, 13:47

و المرق تاعها نديروه باالجاج او اللحم مع الحمص و البطاطا وكي نحب نلوحها نديرها زبدة ولا زيت ونفورها مرتين ونجمرها في الصوص وتقدري تريني الصحن باالبيض كيما التلتلي

mistral288

2014-04-07, 15:45

السلام عليكم ام اياد انا من ولاية قالمة وانديروها ادا حبيتي نمدلك الطريقة

*بيتي مملكتي*

2014-04-07, 15:55

أكيد عزيزتي ميسترال يا ريت تحطيلي طريقتك

قالمة رااااااااائعة و المناظر فيها تهبل في هذا الفصل غير نهار الخميس و الجمعة اللي فاتو كنت فيها ماشاء الله

و كانت أول زيارة لي لمدينة قالمة و حمام الدباغ روعة فعلا روعة

هداية الروح

2014-04-07, 16:36

:dj_17:السلام عليكمالاخت ام اياد
هدا شئ يشرفنا انه فى كل ولاية من بلادنا الجبيبة كاين عادات وتقاليد
انا من ولاية عنابة و راح تجاوبك على سؤال
هدى الشخشوخة ديريلها صلصة حمرة تكون باللحم والا الدجاج والبصل والحميصة والطماطم كعب مع طماطم مصيرة وتفليها مليح وتمرقي غير بالشوية اما الشحشوحة تفوريها 2تفويرات الاولى غير بالزيت فقط
والتانية بشوية من المرقة الحمرة متكتريش غير بالشوية وبعد التفويرة الثانية ضفيها شوية زبدة وتسقيعا بالصوص وهى فلا الكسكاس ان شاء الله تكونى فهمتى الطريقة

نيفرتيتي.

2014-04-07, 17:31

هذه كليتها عند جالاتي قالمية متزوجة في عنابة واش نقلك راح نموت عليها ولت عاودت دارتها وبعثتهالي
واش عجبني فيها تجي خفيفة

أم أسامة 07

2014-04-07, 20:08

اولا حمدا لله على سلامتك
حيرتيني بهذه الغيبة ان شاء الله خيرا

*أم كوثر*

2014-04-07, 21:16

لي عودة للاجابة

*أم كوثر*

2014-04-07, 22:03

طريقة تحضير العجينة
كمية من الدقيق حسب عدد الافراد
ملح عينك ميزانك
وماء فاتر ولمي العجينة متكونش طرية
تخليها ترتاح
من بعد تعجنيها مليح
الطياب كاين عدة طرق

بعد العجن تلوزيها وتقرصيها رقيق وتطيبيها في طاجين الطين ومالازمش تحمار او تتحرق تكون بيضاء لانها رقيقة تمتم تطيب
وهي سخونة حطيها في ساشي وكملي كل الكمية

من بعد تقسمي الخبزة على 4 كل جزء تقطعيه بالسكين طوليا خطوط طوال ورقاق
وتخليهم في الساشي حتى تكملي
من بعد تفتتهم بصباعك

او تستعملي اضافرك==النقية طبعا== وديري نفس العملية

طريقة اخرى

تقرصي زوج قرصات ترقيهم مليح وتحطيهم فوق بعض تكوني دهنتي بيناتهم زيت وتطيبيهم عادي وديري نفس العملية
وكاين لي يطيبوها في طاجين الحديد او المرى
انا نفضلها في تع الطين

كي تخلصيها تقدري ديريها في لي ساشي تع الكونجيلاسيون وتحتفظي بيها لوت الحاجة

طريقة التحضير

تنصبي مرق بالبصل واللحم او الدجاج==انا نديرهم مع بعض== وحمص وملح وفلفل اسود واحمر حار وزيت زمغرف سمن
تقليهم مليح مليح وتضيفي الطماطم المصبرة وتمرقي بماء سخون وتخاي الكل يطيب
انا نستعمل الكوكوط

وماتنسايش الفلف الحار

نجيو للشخشوخة
تحطيها في قصعة وترشيها بشووووية برك زيت وتخلطي وتحطيها تفور

تفور مليح تنحيها وتخلطيها مليح مع بعض وتضيفيلها مغرف كبيرة زبدة وهي سخووونة
وترجعيها تفور ومرة ع مرة وهي في الكسكاس تسيها بشوية صوص
حتى تشوفيها ولات طرية

تخليها في الكسكاس وتسقيها بالصوص وتقدم

او تجمريها
انا نفضل نجمرها

نديرها في برمة واسعة ونقص لنار ونبدى نضيف لاصوص ونحرك حتى تتشرب مليح وتقدم
تزين باللحم والدجاج والحمص والبيض المسلوق

==كتبت في عجالة ان هناك اخطاء اعذروني ونبهوني==
سلامي للكل

*بيتي مملكتي*

2014-04-08, 08:09

اولا حمدا لله على سلامتك
حيرتيني بهذه الغيبة ان شاء الله خيرا

الله يسلمك حبوبة نصرية ربي يبارك عزيزتي شكرا لك

هذه كليتها عند جالاتي قالمية متزوجة في عنابة واش نقلك راح نموت عليها ولت عاودت دارتها وبعثتهالي
واش عجبني فيها تجي خفيفة

هذاك علاش راني نحوس عليها نيفرتيتي عزيزتي

:dj_17:السلام عليكمالاخت ام اياد
هدا شئ يشرفنا انه فى كل ولاية من بلادنا الجبيبة كاين عادات وتقاليد
انا من ولاية عنابة و راح تجاوبك على سؤال
هدى الشخشوخة ديريلها صلصة حمرة تكون باللحم والا الدجاج والبصل والحميصة والطماطم كعب مع طماطم مصيرة وتفليها مليح وتمرقي غير بالشوية اما الشحشوحة تفوريها 2تفويرات الاولى غير بالزيت فقط
والتانية بشوية من المرقة الحمرة متكتريش غير بالشوية وبعد التفويرة الثانية ضفيها شوية زبدة وتسقيعا بالصوص وهى فلا الكسكاس ان شاء الله تكونى فهمتى الطريقة

ربي يبارك فيك عزيزتي هداية الروح

شكرا لك على التوضيحات و الشروحات

لي عودة للاجابة

طريقة تحضير العجينة
كمية من الدقيق حسب عدد الافراد
ملح عينك ميزانك
وماء فاتر ولمي العجينة متكونش طرية
تخليها ترتاح
من بعد تعجنيها مليح
الطياب كاين عدة طرق

بعد العجن تلوزيها وتقرصيها رقيق وتطيبيها في طاجين الطين ومالازمش تحمار او تتحرق تكون بيضاء لانها رقيقة تمتم تطيب
وهي سخونة حطيها في ساشي وكملي كل الكمية

من بعد تقسمي الخبزة على 4 كل جزء تقطعيه بالسكين طوليا خطوط طوال ورقاق
وتخليهم في الساشي حتى تكملي
من بعد تفتتهم بصباعك

او تستعملي اضافرك==النقية طبعا== وديري نفس العملية

طريقة اخرى

تقرصي زوج قرصات ترقيهم مليح وتحطيهم فوق بعض تكوني دهنتي بيناتهم زيت وتطيبيهم عادي وديري نفس العملية
وكاين لي يطيبوها في طاجين الحديد او المرى
انا نفضلها في تع الطين

كي تخلصيها تقدري ديريها في لي ساشي تع الكونجيلاسيون وتحتفظي بيها لوت الحاجة

طريقة التحضير

تنصبي مرق بالبصل واللحم او الدجاج==انا نديرهم مع بعض== وحمص وملح وفلفل اسود واحمر حار وزيت زمغرف سمن
تقليهم مليح مليح وتضيفي الطماطم المصبرة وتمرقي بماء سخون وتخاي الكل يطيب
انا نستعمل الكوكوط

وماتنسايش الفلف الحار

نجيو للشخشوخة
تحطيها في قصعة وترشيها بشووووية برك زيت وتخلطي وتحطيها تفور

تفور مليح تنحيها وتخلطيها مليح مع بعض وتضيفيلها مغرف كبيرة زبدة وهي سخووونة
وترجعيها تفور ومرة ع مرة وهي في الكسكاس تسيها بشوية صوص
حتى تشوفيها ولات طرية

تخليها في الكسكاس وتسقيها بالصوص وتقدم

او تجمريها
انا نفضل نجمرها

نديرها في برمة واسعة ونقص لنار ونبدى نضيف لاصوص ونحرك حتى تتشرب مليح وتقدم
تزين باللحم والدجاج والحمص والبيض المسلوق

==كتبت في عجالة ان هناك اخطاء اعذروني ونبهوني==
سلامي للكل

شكرا لك عزيزتي أم كوثر على الشرح المفصل أكيد راح نجربها عن قريب بدون شك

mistral288

2014-04-08, 14:46

السلام عليكم شطورات بالنسبة للشخشوخة الي نسميوها في ولاية قالمة الفتات وفي عنابة المفتة نحتاج للعجين سميد ارطب كيما تاع المسمن ماء وملح نبلها ونخليها في كيس ترتاح ثم نعجنها ونزيد الماء حتى نتحصل على عجينة مثل المسمن نلوزها ونغطيها بكيس بلاستيكي نسخن الطاجين تاع المسمن ناخد كرية و نديرلها الزيت مليح ونزيد كرية اخرى فوق منهاونحلهم في اثنين لكن مش رقاق بزاف كي المسمن نحطها تطيب لازم تطيب بيضاء وهكدا حتى نكمل ثم نفتتها فتات اكبر شوية من شخشوخة الظفر يمكن طهوها مباشرة او نيبسها عادة نحن نيبسها و نخبيها اما بالنسبة للمرق عادي بصل ثوم زيت ملح فلفل زروديةاكحل حمص دجاج و فلفل حار نمرق القدر بالماء ولما يغلي نحط الفتات اوالشخشوخة تفور لما تفور نحطلها الزبدة ونخليها بجيه ولامرقة لازم تنشف نحي اللحم ونصفيها من الحمص والجزر ونضيفلها الفتات ونخليها تطيب يعني تتجمر ولازم غير تهز الغلوة نطفي لانها خفيفة بزاف ونزينها بالبيض و الزرودية والحمص والدجاج وبصحتكم ارجو ان اكون افدتكم وخاصة الاخت ام اياد وياريت تزورينا في قالمة رغم اني بعيدة عنها وعن اهلي و بالمناسبة كاين انواع بزاف في الشخشوخة كاش نهار نقلك عليهم لاني ما نعرفش نحط المواضيع والصور سلام حبيباتي دعواتكم وشكرا

mistral288

2014-04-08, 15:00

ام اياد نسيت مات قتلكش بلي تحطي عند التجمار الشخشوخة اولا وتضيفي المرقة الحمرا بشوية على نار هادية وعينك ميزانك حتى تتجمر وكاين طريقة اخرى كيما تاع ام كوثر تقرصي العجينة بالرولو ومبعد تفوتيها في مشينة الرشتة في الرقم 5 يعني مش رقيقة بزاف2مم
وتتحصلي على مستطيلات شيحيهم في الطاجين تاع الطين وحطيهم في قماش لانو بالصاشي يتنداو ولازم يبقاو بيض ومبعد نفوتهم في المشينة من جيهة الرشتة الخشينة نتحصل على مستطيلات بعرض1سم ونفتت لكن في طيابها لازم تديريلها الزيت بعد مت تيبسيها و تفوريها ثم تسقيها بلاصوص تاعها وتفوريها للمرة 2 وتديريلها الزبدة ومبعد تجمريها وبالصحة والعافية انشا الله نكون افدتك ام اياد