الي يعرف يفتي يفتيلي ربي يجازيه

[ألاء-]

انا متزوجة منذ عام ونصف عندي مسكن مستقل مع زوجي بسبب مشاكل مع زوجي بسبب امه ربي يهديها في شهر السادس من زواجي شكت ام زوجي علي وحين لم يصغي لها زوجي جاءت بنبأفاسق قالت له بالعامية زوجتك خرجت في غيبتك شافوها تشري فالماعن وقالت له رفعت يدها فقلنا لهم جيبولنا ناس لي شافوني كان عندي أسبوع فقط ملي بديت خدمة طبعا بعد جهد كبير لاقناع زوجي الذي كان في فترة الخطوبة موافق على اني ازاول العمل بعدين دار عليا حتى تدخل ابي في الموضوع وقالو يخي شرطنا عليك خدما وكنت قبلت ام زوجي استغلت الفرصة اي فرصة العمل وقتلو مرتك راحت للسوق في غيابك وجاني راجل للدار وقالي زوجت ابنك شفتها تشري فالأواني طبعا عندما ام تقول لابنها هاد كلام يكون بالعامية كالوحش جاني بصفة وحدخرا تقول مش راجلي لي نهدر معاه وبدا يحلف وانا نحلف بلي مرحتش من الخدمة للدار وبدا يرويلي كل مواضيع لي قالتهملو يماه حتى قال لي هكذا على لسانووالله والله والله لوكان مرا جاية تقولي ماما عليك حاجا وتهدرلي عليك راكي مطلقة بثلاث وجازت مدة 08 أشهر ورجعت يماه شكاتلو عليا يعني والله العظيم باه تشوفو قمة حقرة وطظلم لي في أم زوجي كنت في دارنا ودارنا خطرو خطرت معاهم طبعا عيطت لزوجي وخديت موافقته كي جيت من دارنا ورحت لداري غدوا من دك رحت لمنزل اهل زوجي يعني امو دارتلي عرس قالتلي كيفاش تروحي مع داركم تخطري ومتقوليليش وبدأت تسرد في شكاويها كالعادة مكيش حابتنا تروحي تحوسي مع داركم بلا متعلميني للعلم فقط اني لحد الان مزال مخرجتش نحوس مع زوجي كي يخطرو يقولولو ديها لبيت اهلها وانت تروح معانا 04 مرات زوجي يروح مع اهلو وانا كاالعادة نروح لبيت اهلي
وكي جينا لدار قاعد يعيط ويقولي هادي ماما لي تقولي عليها ماما نديرها ومنحبش ندي منها دعوة الشر
يعني شرط معلق لي قالو من قبل ينطبق على مشكل اخير لي وقع لانه اشترط انو لوكان يماه تشكيلو مني راني مطلقة ترك شرط معلق طلاق وقع بمجرد انو شكت له
ياريت لو تفتولي في هاد مشكل
انا حاليا في بيت اهلي غضبانة ولا أنوي رجوع الى بيت زوجي لانو يعني من كثرة مشاكل حتى لما استشرنا إمام في الموضوع قالي لي زوجك لا يمتلك شخصية مع انة كبير في سن عمره 34 سنة
هل يعتبر طلاق رجعي يمكن ان يرجعني في وقت العدة وهل يعتبر طلاق مرة واحدة لو طلاق بثلاث

[رانيا لوك]

انا لا اعرف ولكن نقول ربي يفرج عليك

[ألاء-]

شكرا لكي اختي رانيا لوك

[تصفية وتربية]

فرّج الله عنكِ أختي
هذه الأمور يُرجع فيها لأهل العلم
سارسل لكِ عبر الخاص رقم أحد المشايخ اتصلي به واعرضي عليه مُشكلتكِ وهو سيُفتيكِ بحول الله

[mounia 85]

ربي يكون معاك اختي وانا نقولك الباب لي يجيك منو الريح سدو واستريح ارجعي لراجلك المرة هادي وحاولي تفهمي راجلك و تجبديه ليك ولا مانع انو يدخل باباك في الموضوع ويهدر معاه ويفهموا باش مايزيدش يديرلك شرع من هدرة امو
بالنسبة ليا مانعرف نفتي بصح لي علابالي بيه نقولهولك ...انا نعرف باللي الطلاق بالثلاث في مجلس واحد يعتبر طلقة واحدة يعني كي يقولك راكي مطلقة بالثلاث تعتبر طلقة واحد وهادي سمعتها فالتلفزيون اما بالنسبة للطلاق المعلق بشرط ماعنديش فكرة الا في حالتك تتوفى فيه شروط الطلاق المعلق اسئلي امام احسن
ان شاء الله ربي يهدي حماتك وزوجك كثر على خاطر نورمالمون راهو يعرفك خير منهم وماشي اي هدرة يصدقها عليك امو صح تع مشاكل بصح هو تاني مش لازم يصدقها وكيما تقولو يأمنها ويديرك شرع يعني كيفاه راجل من طرف يجي يهدر مع امو ويقولها لقيت مرت بنك تخير فالمواعن اصلا هادي كذبة باينة ومكانش لي امنها غير هو ...و والله راسي حبس ربي يعينك عليهم يا ختي

[hodahodahoda]

لا استطيع ان افتيك لكن كان لازم عليك تسدي وذنيك و تحاولي تقاومي مشاكل حماتك بالحكمة اكراما لزوجك
و لو ان الامر ليس بسيط
خصوصا انك تسكن وحدك و مازلت عروسة جديدة

[نارينا]

يأ اختي المشاكل اللي صرات بيناتكم سببها عدم تحكيم العقل واندفاع كل طرف بحكمه وقراراته المهم الموضوع بسيط ولا يحتاج الوصول للطلاق انا من رأي حاولي تكسبي حماتك لاني شخصيا حاطتها خط احمر وماما ربي يرحمها نبهتنا وحذرتنا من التجرأ على الحماة ولو بنظرة لان الجزاء من جنس العمل اللي نديروه يجونا ولادنا وعرايسنا ويسلكوه فينا ....المهم حاولي تكسبيها هاكي شفتي ولدها قاللك راهي هي كلش عندي والصراحة الام كلش في حياة اي شخص ,,,,كثريلها الدعاء والكلمة الحسنة وربي اكيد راح يهديها ولا شدة تدوم

["<صفـــاء>"]

نعم تحسب طلقة واحدة و يكون الطلاق رجعيا حتى و ان تلفظها ثلاثا ثم ان العدة تقضى في بيت الزوجية و حرام عليك اذا خرجت فيها و عديتيها في داركم

[ha.abdoudz]

أولا، ندعوا الله أن يرفع عنك هذه المحنة و على جميع النساء المؤمنات.
ثانيا، الإفتاء له أشخاص معينون و خاصة في الأمور الحساسة مثل الزواج و الطلاق، لهذا نصيحتي لك أن تسألي أباك أن يحضر لكم رجلا يجيد في أمور الشرع و الله أعلم.
ثالثا، إسمحي لي أن أعبر لك عن سخطي من هذا المجتمع الأنثوي المريض، عندما يتزوج الإبن فإن الأم تغار و الأخت تغار و الكل يتدخل في الشؤون الزوجية و كأن الأم أو الأخت هي التي متزوجة بزوجته، لماذا هذا الجهل العائلي الذي ينخر شخصياتنا.
شيء آخر، الظلم حرام حتى ولو على غير المسلم، من يقل لا أريد دعوة الشر من أمي و كذا .... فما هي إلا حجة واهية، من يريد أن يطيع أمه بظلم زوجته فقد أطاع الشيطان و العياذ بالله، و من يشهد عن شخص بشيء و لم يأتي بأربعة شهود و لو كان صادقا فإنه يجلد 80 جلدة و لا تقبل منه الشهادة من بعد، لكن للأسف الآن ياتي فاسق بخبر هو نفسه يدري بإنه ليس الصحيح و الأدهى و الأمر أن المستمع يعرف أن هذا الخبر ماهو إلا من فاسق فيصدقه، للأسف مجتمع مريض بغيرة و تسلط في غير محلهما و حاشا للذي لايستهل هذا القول لأنه مازلنا نرى زوجة الإبن تكون كالأخت بين أخواته و كالإبنة لوالدي الزوج.

[naamane3]

شوفي يا بنت الناس
يجب أن تأخذي زوجك الى أقرب مسجد وتسألو الإمام
لأن مثل هذه المشاكل يجب أن يسمع من الطرفين

[حياتي نبع امل]

هدا امر جاد وحساس ولا تأخذي فتواك الا ممن هو أهل لها ولا احد يفتيك الا اذا سمع من الطرفين
لهذا انصحك ان تلجئى الى اي احد من عائلتك بشرط ان يكون حكيما اباك ،عمك ،خالك ، جدك اي احد المهم تتوفر فيه الحكمةوالعقل المدبر والرزانة ويتكلم مع زوجك ويوقف هذه المسخرة و يستفتي احد المشايخ بحضرة زوجك حتى يعلم. خطورة الموقف الدي وضعك ونفسه فيه
الله يفرج عليك وعلى كل مكروب ومهموم وربي يقدملك ما فيه خير لك ولزوجك

[eBusiness]

يا أختي الكريمة أولا إن كان العمل سبب المشاكل بينك وبين زوجك فالأولى لك أن تتركيه، أنا أتعجب على عائلة تأتيها خاطبا لإبنتهم ويشترطون عليك أن إبنتهم يجب أن تعمل، يعني هذا من الناحية الشرعية خزعبلات ونفخ في رماد ولا أظن أنه أمر جيد أن نبني زواجنا الحلال على منطق لا يتعارض مع السنة النبوية، وصراحة لم أفهم كيف أبوك يتجرأ ويتدخل لكي يجعل زوجك يقبل أن تعملي وكيف لزوجك أن يتقبل ذلك كشرط في الأول وكأمر من اباك من بعدها، قديما كانوا يشترطون على الأزواج أن يحسن للبنت وأن يكون رجلا صالحا معها ولكن أن يصل الأمر في أن يشترط أن تعمل فهذا والله من مظاهر نهاية العالم، والله لو دهبت لخطبة إمرأة اشترطوا علي أهلها أن تعمل أو اي شرط اخر غير ما أمر به الرسول الكريم (ص) والله لن أتزوج إبنتهم ولو قدموا لي معها وزنها ذهبا

كيف للرجل أن يقبل أن يضع نفسه على كف عفريت، إن لم يتحكم الرجل في داره وزوجته فاي رجل هذا؟؟؟ أكيد الرجل هو من يرأف بزوجته ويسعدها لكن ليس على حساب كرامته

باختصار أختي الكريمة أنا لست مفتي وكلن ارى أن زواجك اصلا بني على شرط غير محمود في الدين ولهذا كافئك الله بأم زوج اقل ما يقال عنها الله يهديها وزوج لم يعرف كيف يسير الأمور وهذا كله من شؤون الله في خلقه

أدعوك أختي الكريمة أن تصلحي من حالك وحال عائلتك بمن فيهم أبوك الكريم حفظه الله الذي تجاوز حدود الله في طلب شرط العمل في الأول تم أمره زوجك أن يدعكي تخرجين للعمل ومن بعد ذلك حاولي أن تصلحي من أم زوجك وزوجك أيضا، الأولى أن نصلح نفسنا قبل أن نصلح الناس وأنا هنا أقول هذا من منطلق قناعاتي ولست افتي وأنا أجاوبك بكل صراحة مع احترامي لك، لنقل أنني أجيب على سؤالك كأخ يحب الخير لأخته بارك الله فيك

إن أبغض الحلال عند الله الطلاق فلا تدعوا الشيطان نعله الله أ يدخل بينكم وحاولي أن تفهمي زوجك أن لا يتسرع في اتخاد القرار وأن تعملي كل ما في وسعك لإرضاء أم زوجك وأن تبتعدي عن مشاحنتها فهي في الأخير أم زوجك وإمرأة كبيرة في السن، حتى وإن أراها مخطأة أنصحك ماديريش عليها والله يسهل

[Napia]

شوفي راجلك واش كان ناوي في الهدرة تاعوا
ولازم الإمام يسمع منوا
حد ما يقدر يفتيلك
الطلاق ولاّ لعبة

[فانيسا]

ربي يصلح الحال بينكم ويزين عشرتكم روحي عند امام ولا دار الافتاء وسقسي مليح لان الموضوع ما فيهش لعب لازملو اهل الاختصاص ويا اختي متقلقيش ممكن هدا المشكل رايح ايكون بداية سعيدة وراجلك ايخاف ويبدل طبايعو وامو الله يهديها

[wafa16]

meme ida maw9a3ch tala9 hadi yemah ida kima raki ta7ki matkhafch rabi w cheraniya
wach fiha ida ra7ti techri ma3en wa7dek
wach fiha ki tro7i l darkom wela tekherji m3ahom w rajlek radi
hiya wach dekhelha
meme ida weliti dirlek machakil
lazem tetfahmi m3a rajlek bach mayesma3alhach
lazem ykoun intelligent y9olelha ih fi wjeha mais machi lazem tet7akam fi 7yatkom
rabi m3ak psq hadi machi m3icha

[ألاء-]

شكرا لكم جميعا ان شاء الله ربي يفرج

[ألاء-]

صدقوني مستحيل نرجعلو اذا راجل على يكذب على مرتو ويكذبها باش يصدق اهلو ويرضيهم مهيش معيشةهادا بحكم قول اهل العلم نصحوني وقالولي وعلاش راه يكذب حنا اول مرة نشوفو هاد الحالة
وحد المرة جيت خارجة من دارهم قتلهم تبقاو على خير ورفعت يدي تدل على علامة السلام كي خرجت عيطتلي أم زوجي وبدات تعاير فيا حتا والدي سبتهم وعيطت لإبنها وشكاتلو وقاتلو راها رفعت يدها عليا وجاني زوجي كانت ساعة منتصف الليل جيران كلها تسمع بدا يعاير فيا حتى وصل به الحد حكملي راسي وبدأيخبطلي في راسي على جدار ويقولي هادي ماما هادي ماما هادي ماما وهو يخبطلي في راسي قتلو رفعت يدي دلالة على علامة سلام مع قول تبقاو على خير اين هو خلل حكملي كرسي ولاحو فيا حتان غلقت باب تع بيت وبدأ يخبط فيه ويقولي حلي باب وهكذا مخرجتش من داري غدوا من ذاك راح لدارنا وقال لوالدي قالو ابنتك درك نجيبهالك راها رفدت يدها على ماما وبدأ يحف بلي هو شافني كي رفدت يدي حتا جاء زوج اخته وشهد شاهد من أهلها قالنا لالا هو كان معايا خارج منزل وانا وهو مشفناهاش يعني والله
عجوزتي صغيرة في سن وهدا ابنها أكبر ومن طبقة كيما يقوقو هوما مرموقة ومثقفة لكن للأسف غياب الوازع الديني عندهم وهو أهم شيئ في حياة الأسرية


لا ثقة عندهم بعد الان حتا لوكان نرجع مش رايحين يخلوني في حالي يحطو بهتان بزاف
حسبي الله ونعم الوكيل

[المسافر 09]

نتمنى لك السعادة وأن ترجعي لزوجك وتكملي حياتك

أما سؤال الفتوى فليس هذا مكانه

من الافضل إذا تبحثون عن الجواب الشرعي قبل الحلول الاخرى

واقصد بالحواب الشرعي يعني أنت الآن مطلقة أو لا ؟

لازم أنت وزوجك ووالدك تقصدون إماما متمكنا ورعا يسألكم ويسأل الزوج عن نيته وقصده

عندما تلفظ بذلك الكلام ويسألك أنت كذلك والي فيها الخير الله يقدرها لكم

[ألاء-]

أنا إمرأة متوةجة منذ عام ونصف ومطلقة حديثا طلقني زوجي طلاق تعسفي ربي يهديه
أود الذهاب لاداء مناسك العمرة الاسبوع المقبل
طليقي نوى طلاق في جانفي 2014وصدر حكم بطلاق من محكمة في ماي 2014
سؤال هو: هل عنما أكون في عمرة اكون معتدة من طلاق ؟متى تحتسب العدة طلاق من وقت نية وقوع الطلاق ؟او من وقت صدور حكم الطلاق ؟
مع العلم ان زوجي لم يتلفظ بكلمة الطلاق لم اسمعها والدته هي من اجبرته على ذهابه للمحكمة للشروع في إجراءات الطلاق
وهل عند ذهابي للعمرة يترتب على قضاء؟

[بلسم غرام2018]

ربي يهدي
واتصلي بامام

[ألاء-]

اي احد عنه رقم المشايخ يدلي عليه جزاكم الله كل خير

[○•ميسون•○]

الطلاق هو الحل الوحيد لأنو زوجك تتحكم فيه أمو و هاذا معندوش شخصية لأنو كون جا راجل واحد ما يحكم فيه

الطلاق هو الحل الوحيد لأنك ستقعين في مشاكل أكبر