مغتربة محتاجة لكم

[مشكلتي]

السلام عليكم ورحمة الله وبركاته
انا فتاة عمري 23سنة اسكن في فرنسا وحامل في الشهر الخامس بعد 3سنوات من الزواج مشكلتي انا راني هنا وحدي يعني بعيدة على كل عائلتي ومعنديش حتى واحد هنا الا ربي وزوجي كنت نخدم في الاذاعة في ولاية في الجزائر والحمد لله جميلة جداً ومرحة واحب الحياة عكس زوجي هو انسان نكدي بلبزاف يعني نقولو نخرجو يقولي وين نروحو نقلو نلعبو ولا نتفرجو كيفكيف ولا نبدا نضحك يقلي علاه هذا لجياح راكي كبيرة يشوفني تزينت يقولي رايحة للعرس نتفرج يقولي واش راكي تتفرجي والله منزيد عليكم كلمة يحب يتفرج النشرة من الصباح للعشية وسكات في الدار قهرني ميحوس عليا لا راني فرحانة ولا حزينة لا راهي ضايقة روحي لا راني مريضة ولا لالا كرهت والله كل يوم نحاول معاه باه نبدلو والو قالي انا عشت حياتي وحبيت وخرجت وزهيت وسمعت غنا و....ضرك كرهت هو كبير عليا ب 17سنة وانسان محافظ على الصلاة المشكل في البداية مكاش هكذا انا منيش نقول نديرو لحرام بصح يضيق خاطري نحبو يخرجني يفهمني يحس بيا والو لاحياة لمن تنادي كون جايت قريبة لدار بابا على الاقل نروح نبدل لجو شوية
والمشكل الثاني ميخلينيش نخرج وحدي حتا كون نحتاح حاجة وهو مهوش هنا كون يصيب نبقا غير في دار منتعرف على حتا وحدة منهدر ما.....مهيش غيرة بصح توسويس شاك في كل الناس حتا اقربهم ليه وميحب حتا واحد نهار كامل وهو ينعل ويسب في الناس
ارجوكم خففوا عني راني منهارة ملقيتش حل سعات نصبر ونقول نهار يزيد لبيبي بلاك يتبدل ويخليني نتنفس شوية وسعات نخاف نقول كنت كالأميرة وليت خديمة نهار كامل نقضي ونطيب وكنقولو غير اشكرني ولا امدحني ولو بلكذب يقولي راكي خالصة عليها والله عيت مرانيش حابة ننفصل عليه ونندم ونقول مصبرتش كماما وجدة و..... بصح تقهرت بزااااف كلمة حلوة وشوية اهتمام واحساس مطلبتش حاجة كبيرة ربي يهديه ويصلحوا

[الفاتحة]

أنت انسانة عاقلة كون اخترتي واحد في سنك وفي بلادك ، الحل اصبري وكي يجي وليدك اتهلي فيه وربي يفرج عليك

[محمد جديدي التبسي]

القلق ليس جيدا لجنينك اصبري حتى يزيد بوزيد بالاك يتبدل وتدخلوا شوية حنانة ويحس بيك
شوفي صديقات في النت تعلمي طبخ خياطة اقري كتب
لا تفكري في الانفصال تماما مادام زوجك محترمك لحد ما وما يقلقكش وما يعنفكش راك مليحة الله يعاونك

[أم شروفة]

يا أختي أنا كيفك.غدوة تجيبي وليدك تنساي كل الدنيا اصبري و تهلاي في روحك.أنا كذلك لاخرجة. دار بابا بعيد شوية والله طول النهار في الدار.لكن وضعي تغير من زادلي ابني.ربي يوصلك

[dala3 dalou3a]

الله يعينك و يصبرك اختي ما عندك غير الصبر و الدّعاء اختي و الله الدعاء هو حل لكل مشكل قيمي الليل و ادعي انو ربي يهديه و يغيرلو طباعو و ان شاء الله ربي يفرج عليك و يهنيك معاه و تجيبي لبيبي و يغيرلكم حياتكم

[oprah]

متقلقيش روحك بزاف ماشي مليح ليك و أنت حامل
بالاك راكي حساسه زياده بويسك راكي حامل و تشوفي كل صغيرة كبيرة
بصح فهميه لازم يحس بيك شويه
و عيشي حياتك و تبهلي و جياحي قد متقدري بويسك مرات الجياح يبدل الروتين و مع الضحك الواحد يديفولي شويه
واش نقول لخيتي رانا خيات هنا و رانا خياتك
كاش محتاجيتي أرواحي هنا
و راجلك نورمالمو راكي عرفتيه مليح قبل الزواج و راكي تقولي مكانش هكدا بالاك الضغط نتاع الحياة ولا العمل
حتى أنا مرات زوجي يتبدل من ضغط العمل مهبليينو و ربي يجيب الخير يا رب
نصيحه
متقعديش تعسي في روحك أنا شابه و أنا صغيره و أنا نستاهل كتر من هاك و هاك
عيشي مكتوبه و ادا شفتي روحك انغبنتي صلي صلاة استخارة و الي فيها الخير ربي يكتبهالك ان شاء الله

[ساندريلا]

اختي مازلت جد صغيرة على كل هذا القلق و هذه الحالة ليس لها علاقة لا مع الجمال و لا بكنت اميرة و كنت وكنت......كل وحدة فينا تشوف نفسها ملكة جمال و تربات في العز و الدلال
لكن هذا هو حالنا جميعا انا في الجزائر لكني مثلك في الغربة ما نعرف حتى واحد ديما في الدار لكن غير انزاد عبد الرحمان تبدلت كامل الدنيا
اختي القلقة من الشيطان اذا كنت دايرة بي بالك تروحي للخارج و تعيشي فيلم هذي حسبوها زمان و ندموا عليها
ما تمرضي روحك ماوالوا صلي و استغفري حبي الحياة و اضحكي لن لا تنسي لمذا خلقك الله
ربي يعطيك وقفة ساهلة و يوفقك في حياتك ان شاء الله

[heureuse05]

عزيزتي الزواج تضحيات ولازم تضحي ....
ربما زوجك هندو اعذارو خااصة انو عاش مغترب
يعني ما تزعفيش منو و كبر عقلك معاه خمي في البيبي الي جاي وان شاء الله يفرحك ربي

واشكري ربي بزاااف راهو صعيب بزاااف في هذا الوقت تلقاي رااااجل مدين نعمة كبيرة اختي
ادخلي الى منتديات الطبخ و بدلي وصفات الأكل و المنتديات الاسلامية ستساعدك
زيدي قوليلو بلي حابة تحفظي معاه القرآن أكيد راح يفرح
حاولي تشوفي كل محاسنو و اخطاك من المسلسلات الي يكذبو علينا
لا تنسي الدعاء في الصلاة
ربي يفرج همك

[مواطنة جزائرية]

السلام عليكم


شوفي حنونة أنا نقلك بأن السعادة في هذه الحياة أحنا اللي نخلقوها و نعيشوها يعني إذا حبينا نكونو سعداء كان لنا ذلك و الا فالعكس


و الزواج ديما يقولو عليه فيه المشاكل سوا في الجزائر أو في الغربة متقلقيش روحك


و انشاء الله ربي يرزقك بوليدك و يملا عليك حياتك


و اصبري بالاك راجلك راه يجرب فيك مادام مازلتي صغيرة

المهم ربي يهنيك

[لينوش.]

والله لست الوحيدة التي تعيش هده الوضعيه أنا أعيش في الجزائر ولكني وكأني مغتربة لا اخرج الا نادرا جدا لا عمل ليست لدي علاقات رغم ان مكانة زوجي مرموقة اكره هذا المكان الذي اصبحت احسه كالسجن زوجي لا يتركني اخرج الا برفقته رغم انه لي تلات ابناء وحين اخرج معه لا استمتع واذا ذهبنا لشراء اي شيئ لا اخذ كل وقتي ماذا لنا غير الصبر اصبري واشغلي نفسك تتحسن معنوياتك وحين ياتي المولود لن تحسي بالفراغ لانه سيشغل كل وقتك ادعي ربي فهو احن منك عليك٦

[نارينا]

والله فارق السن صح شاسع بيناتكم وهو اللي خلق هاد المشكل وكذلك العيش في الغربة وحدو مجازفة لانك 90 بالمئة راح تعيشي وحيدة الحل الوحيد الدعاء والاستغفار

[imi02i]

سينسيك ولدك فيما أنت فيه
ولربما سيكون ميلادا جديدا لتصرفات زوجك أن تتغير ويحسن معاملته لك
أكثري من الدعاء

[nilly]

هدوا هما العقلية نتاع المغتربين يحوسوا يديو واحدة من البلاد باه يحقروها ويقفلوا عليها الباب .
لكان جاء يخليك تخرجي ميفكرش بزواج من البلاد راح يديها من ثما ...وطفلة راح تموت بالفرح .. انا تزوجت لفرنسا وهي معلبالهاش بلي تزوجت لاربع جدران ماشي لفرنسا . زوجك مثل باقي المغتربين يعني ماشي غير انتي لتسوفري كامل لتزوجوا المغتربين . اكيد زوجك عنده ماضي اسود وعلى هدا فقد ثقة في البنات ليخرجوا وعلى هادي راه يزير فيك ويعاود اخطر مادرش فيك ثقة وماشي غير مدرش ثقة في جميع نساء وانتي عرفتيها ماشي غيرة انما عدم ثقة.
هدا اختيارك من الاول وماعندك ماتديري اخطر مكنش ليقدر يبدل انسان اخر الا ادا هداك الانسان حاب يتبدل. وانتي لازم تتكيفي مع هدا الوضع . وان شاء الله راح تتوفر الاحياة الكريمة لاولادك بالمستقبل.

[hayet04]

انا نحير تخيرو الي كثر منكم بضعف العمر و من بعد تولي تشكي كنت تخمي بعقلك قبل
الزواج ماهوش عرس و فرحة و نزوخ بين صحباتي راني مخطوبة و نقضي في شورتي و و و الزواج راه مسؤولية و توافق
المهم يا اختي هذا رأي انت اخترت احملي و خلاص ماعندكش حل تاني

[" أبو عبود"]

سيدتي الافاضلة الامر بسيط. بعد 3 سنوات يعني صبرت 3 سنوات ولم تعودي قادرة على الصبر اكثر؟ انت حامل في الهشر الخامس وهذا يعني راكي مريتي بتجربة لاول مرة تمري بيها وطبها هذا يتولد عليه القلق والشعور بالوحدة. هو ربما راه مقصر معاك لكن صدقيني تقدري تتجاوزي هذه المرحلة بالصلاة والدعاء. اقلبي عليه الطابلة بطيرقة ذكية قومي صلي الصبح وقيام الليل ولو ركعتين اقرئي القرآن حاولي ان تتافدينه دون ان تسبيه او تقللي من احترامه. عندما يعشر انك متغيرة سوف يبحث عن حلول. ومادام متدين اكيد رايح يرجع الى رشده لكن عليك ان لا تبالغي في تصوري الوضع فانت بالف نعمه. والله الموفق

[ام صفية1]

اختي اصبري هذا هو الحل وكيما قالولك من قبل كيما يزيد وليدك ان شاء الله
راح يعمر عليك الدنيا كامل وتقلقيش روحك بزاف والله رانا كامل كيف كيف سوا هنا في
الجزائر والا تمة في الغربة ودرك راه كاين الانترنات تقدري تشوفي اهلك كل يوم تنقص شوي عليك الغربة وربي يهنيك اختي
ويحفظلك جنينك

[الجليس الصلح]

السلام عليكم ورحمة الله
كان الله في عونك اختي الكريمة فيما انت فيه هدى الله زوجك ليخفف عنك على الأقل الغربة التي انت فيها
جميل انه محافظ وملتزم هذا إضافة لكونك على موعد مع الضيف الجديد الذي نرجوا ان يدخل البهجة لبيتكم

[pharma-93]

اصبري اختي وان شاء الله ربي يفرج عليك ويرزقك بلذرية الصالحة وضرك تجيبي وليدك وتنساي كلش وهو يولي يونسك وانت ما تكرهيش ماعليش ابقاي غير تحاولي مع راجلك بالاك يتبدل

[abdelhafid28]

السلام عليكم كل هذه اوهام تمرين بها .هذا الذى تقولينه هو اختلاق أعذار لك او مبرر لكي تنكدي عليه وليس العكس .كل رجل يمر بظروف اجتماعية او نفسية او مشاكل فى العمل حاولى ان تجدى لزوجك عذر ولاتتوقفين عند هذه التفاهات والافكار التافهة حاولي ان تصلحي نفسك انتى العيب فيك انتى وليس فيه حاولي ان تشغلى تفكيرك بأشياء مفيدة حاولي ان تحبي مايحب زوجك .اسمحيلي ان اقول لكى انك تتصنعين المشكلات بامور تافهة ربما سيكون الامر جارحا بالنسبة لكى سيدتى لكن هذا هو الواقع وشكرا

[رحمة 20]

الصبر هو الحل وقدري قلقو عليك لانك عايشة في بلاد الكفار وهذا خوفو عليك ماشي شكوك

[مون1]

ربي يصبرك ختي وكيما قالولك بلاك لما يجي وليدك تلقاي باش تتسلاي وتجوزي وقتك
بصح عندك الحق الغربة صعيبة بزاف ربي يقدرنا عليها برك

[faty05]

اصبري هذي اصلا حاله الحامل تولي حساسة من كل شيئ
اصبري تجيبي البوبون الصغير ان شاء الله و يسهلك ربي في امورك
الله يفرج عليك

[زهرة كل يوم]

اشكي حالك وابكي لربي

وربي قادر على كل شيء

يقول له كن فيكون

ربي قادر يغير زوجك ويهتم بيك أكثر

وكيم قلتي جايك طفل في الطريق راح يدي كل وقتك

ربما يعود زوجك الي يشكي ويبحث على اهتمامك

لا تقنطي من رحمة الله

ربي يكتبلك الخير

[tahar mido]

السلام عليكم ورحمة الله وبركاته

انا فتاة عمري 23سنة اسكن في فرنسا وحامل في الشهر الخامس بعد 3سنوات من الزواج مشكلتي انا راني هنا وحدي يعني بعيدة على كل عائلتي ومعنديش حتى واحد هنا الا ربي وزوجي كنت نخدم في الاذاعة في ولاية في الجزائر والحمد لله جميلة جداً ومرحة واحب الحياة عكس زوجي هو انسان نكدي بلبزاف يعني نقولو نخرجو يقولي وين نروحو نقلو نلعبو ولا نتفرجو كيفكيف ولا نبدا نضحك يقلي علاه هذا لجياح راكي كبيرة يشوفني تزينت يقولي رايحة للعرس نتفرج يقولي واش راكي تتفرجي والله منزيد عليكم كلمة يحب يتفرج النشرة من الصباح للعشية وسكات في الدار قهرني ميحوس عليا لا راني فرحانة ولا حزينة لا راهي ضايقة روحي لا راني مريضة ولا لالا كرهت والله كل يوم نحاول معاه باه نبدلو والو قالي انا عشت حياتي وحبيت وخرجت وزهيت وسمعت غنا و....ضرك كرهت هو كبير عليا ب 17سنة وانسان محافظ على الصلاة المشكل في البداية مكاش هكذا انا منيش نقول نديرو لحرام بصح يضيق خاطري نحبو يخرجني يفهمني يحس بيا والو لاحياة لمن تنادي كون جايت قريبة لدار بابا على الاقل نروح نبدل لجو شوية
والمشكل الثاني ميخلينيش نخرج وحدي حتا كون نحتاح حاجة وهو مهوش هنا كون يصيب نبقا غير في دار منتعرف على حتا وحدة منهدر ما.....مهيش غيرة بصح توسويس شاك في كل الناس حتا اقربهم ليه وميحب حتا واحد نهار كامل وهو ينعل ويسب في الناس

ارجوكم خففوا عني راني منهارة ملقيتش حل سعات نصبر ونقول نهار يزيد لبيبي بلاك يتبدل ويخليني نتنفس شوية وسعات نخاف نقول كنت كالأميرة وليت خديمة نهار كامل نقضي ونطيب وكنقولو غير اشكرني ولا امدحني ولو بلكذب يقولي راكي خالصة عليها والله عيت مرانيش حابة ننفصل عليه ونندم ونقول مصبرتش كماما وجدة و..... بصح تقهرت بزااااف كلمة حلوة وشوية اهتمام واحساس مطلبتش حاجة كبيرة ربي يهديه ويصلحوا

سلام الله عليك يا اختاه.ما اراه في زوجك انه مل من حياة البذخ و الملاهي.حلك الوحيد و الله اعلم انك تلتزمي بتعاليم الدين في كثير من الاحيان.و تقومين انت بدعوته الى الصلاة حين تسمعين صوت المؤذن.تطلبين منه فعل الخير و التصدق على الفقراء الخ من افعال الخير.و انشاء الله سيجعل الله مخرجا لمشكلتك و سترين حجم الفرج و الفرحة التي ستعم البيت.الله معاك.كريم من الجزائر

[pauvre]

فهمت من كلامك أنك تزوجته في الجزائر من أجل الذهاب الى فرنسا ضنا منك أنها الجنة و في الحقيقة اذا كان لا يريدك أن تصادقي الناس هناك فلعلمه عن سوء أخلاقهم و صدقيني اذا صادقت احدى المغتربات التي تربت هناك فستسوء أخلاقك و ستنزعين الحجاب و ستتحولين الى رجل يخرج و يدخل متى شاء ابقي كما أنت أحسن و في فرنسا تجدين كل الأمراض الاجتماعية و زوجك يحبك و لا يريدك أن تختلطي بالحثالة

[b.mayssouna]

السلام عليكم
اختي علابالي واحد ماراح يحس واش راكي تحسي لانو ببساطة انت لي في هاد الاشكال انا لي عليا 2 حوايج
الاولى اني نوصيك تصبري ولا راكي صابرة زيدي اصبري لانو ماكانش لي فيه كل لي نتمناوه صحيح انت راكي طلبتي اشياء بسيطة وماش خارقة للحدود لكن الله غالب هادا هو طبعو الحمد لله لانو الاشكال ماش في حوايج بخلاف لازمك تحمدي الله
اما الحاجة التانية عليا ندعيلك ربي يكملك ويهديه ويحنن قلبو كتر وان شاء الله المولود الجديد راح يكون ليه رونق ورائحة طيبة تضاف لحياتكم ....
معليش لازم نصبرو اليوم باه نعيشو غدوة هانيين
ربي يسترك ويغمرلك قلبك هدى ورحمة وسعادة..