مطبخان في بيت واحد

[مواطنة]

السلام عليكم ورحمة الله و بركاته
اردت ان اعرف اراءكم في هذه الظاهرة الغريبة التي دخلت على بيوت بعض العائلات من المفروض لما يتزوج الابن في بيت والديه يتقاسم معهم البيت و المطيخ و المصاريف ايضا ما نراه الان في بعض العائلات ان تقوم المشاكل على المطبخ و القفة و ما الى ذلك هل تعتقدون ان المطبخ المستقل لكل من الحماة و الكنة يعتبر حلا للمشاكل ؟

[أيمن عبد الله]

السلام عليكم

عندما كانت القلوب صافية والنية موجودة كان المطبخ الواحد والقدر الواحد يحضرون فيه طعام 20 شخصا من افراد العائلة الكبيرة

واليوم لما فسدت أخلاقنا تجدي عائلة فيها 3 افراد
الأم بمطبخها والابن وزوجته لوحدهما

وحسبنا الله ونعم الوكيل

[sarl02]

قمة الدناءة والانحطاط الاخلاقي ان ينفرد الزوجان بمطبخ بجنب مطبخ العائلة ....ادا كان الراجل صح راجل ينفرد بسكنه الخاص كليا هدا ارفع له القبعة لكن باش غير ثم وادير كوزينة وحدو هده ماشي شطارة هده قمة الجياحة وتعسا لها حياة هكدا.

[الجواهر]

لست متزوجة لكن اعرف الكثير من الامهات بمطبخ و الكنة بمطبخ لماذا ؟؟؟
لان الام ياتيها اولادها و بناتها و احفادها و هذا الحضور دائم و تقريبا يومي فتكون المشاحنة بين الكنة و الام و الابن حول الطبخ و من يطبخ و المصاريف و...النهاية الام بمطبخ و الكنة بمطبخ

[eBusiness]

يمكن ذلك في الحالات الطارئة كالتي ذكرت الأخت في حالة أن الإخوة والأخوات يأتون لزيارة والديهم باستمرار، قد أستوعب ذلك بشرط أن ليست الأم من يطبخ ولكن مثلا زوجات أبنائها أو بناتها لكن أن تكون الأم وحدها في البيت وتطبخ لنفسها والزوجة تتفرج المسلسلات هذا ذل عظيم

[princesse_kheira]

انا و زوجي كنا ضد الفكرة هذه من البداية و حطلي النقاظ على الحروف من بداية الزواج و فهمني مليح انو ميقدرش يدير دار في دار يماه و انو الدار دارها و احنا مجرد ضياف عندها و تقبلت الفكرة و عشت عندها زمن حتى فرج ربي و سكنت وحدي و لهذا المشكل هذا يظهر عندما يكون الزوجان غير متفهمان او يكون فمها شيء وجدت شيء اخر تماما فتضطر الى هذا الحل الذي هو في الحقيقة اكبر مشكل

[محمد جديدي التبسي]

إذا كانت الكنة تعمل مشاكل مع الأم الأفضل يكون لها مطبخ مستقل
أعرف الكثير ممن بدؤوا بمطبخ مشترك ثم انفصلوا بغد بضعة أشهر وخاصة في رمضان الذي من المفروض يكون شهر لاجتماع العائلة
لكن هذا واقعنا ومجتمعنا وطبيعة نسائنا قلة من تعامل أم زوجها كأم ثانية لها والأم كذلك نظرا لكبر سنها قد تنسى أن تلك الكنة مثل ابنتها
وهذه الحسابات المسبقة تأتي بها الزوجات من بيوت أهاليهن خاصة من كانت مدللة ثم تصطدم بواقع جديد ومسؤوليات مختلفة
كما أن طباع المرأة تبدلت فمثلا الكنة العاملة تطبخ في المساء عادة ولربما تريد بعض الخصوصية مع زوجها
عندي دار خالي لديه ابنان متزوجان كل واحد بمطبخ يعني ثلاث مطابخ في بيت واحد اثنان في الطابق الأرضي
أظن الأمر عادي مع هذا الواقع المر .. والمهم أن لا ينسى الابن أمه ويساعد أهله في المصاريف قدر الإمكان
شكرا وبارك الله فيكم

[ABDOU ELE]

ســـــــــــــــــــــــلام

اذا كان للزوج بنات فنعم لمطبخ مستقل لتفادي المشاكل..................اما و الام وحيدة فاظن ان الزوجة التي تطلب ذلك لا تخجل من نفسها............هي لا ترصى لامها ذلك فكيف ترضاه لام زوجها..................لا مناص من الاعتراف ان نبنات جيل المسلسلات التركية و الافكار الغربية خرجوا مشوهين فكريا مما يصعب عليهم النجاح في احياة الزوجية.

[sarl02]

إذا كانت الكنة تعمل مشاكل مع الأم الأفضل يكون لها مطبخ مستقل
أعرف الكثير ممن بدؤوا بمطبخ مشترك ثم انفصلوا بغد بضعة أشهر وخاصة في رمضان الذي من المفروض يكون شهر لاجتماع العائلة
لكن هذا واقعنا ومجتمعنا وطبيعة نسائنا قلة من تعامل أم زوجها كأم ثانية لها والأم كذلك نظرا لكبر سنها قد تنسى أن تلك الكنة مثل ابنتها
وهذه الحسابات المسبقة تأتي بها الزوجات من بيوت أهاليهن خاصة من كانت مدللة ثم تصطدم بواقع جديد ومسؤوليات مختلفة
كما أن طباع المرأة تبدلت فمثلا الكنة العاملة تطبخ في المساء عادة ولربما تريد بعض الخصوصية مع زوجها
عندي دار خالي لديه ابنان متزوجان كل واحد بمطبخ يعني ثلاث مطابخ في بيت واحد اثنان في الطابق الأرضي
أظن الأمر عادي مع هذا الواقع المر .. والمهم أن لا ينسى الابن أمه ويساعد أهله في المصاريف قدر الإمكان
شكرا وبارك الله فيكم


ليس الامر عادي يا اخي ولا يتقبلها عقل ومنطق ...يعني انت تاكل فالستاك وامك حدك تضرب مقارون وتقولي عادي ...والله لا يقبلها عقل رجل يا اما استقلال ببيت كلي ولو بجمب بيت الاهل والا راك مع والديك ..يااما ما تتزوجش نهائيا حتى اتكون روحك اذا شفت انو اهلك يستحيل معاشرتهم .

[محمد جديدي التبسي]

ليس الامر عادي يا اخي ولا يتقبلها عقل ومنطق ...يعني انت تاكل فالستاك وامك حدك تضرب مقارون وتقولي عادي ...والله لا يقبلها عقل رجل يا اما استقلال ببيت كلي ولو بجمب بيت الاهل والا راك مع والديك ..يااما ما تتزوجش نهائيا حتى اتكون روحك اذا شفت انو اهلك يستحيل معاشرتهم .
أظن الأمر يتعلق بشخصية الرجل وتحكمه في أهله
هناك زوجات تستغل شخصية زوجها وتبعده عن أمه دون أن يشعر
وهناك العكس من تعرف قيمة الأم وتكون عونا لزوجها على بره بأمه

[ام خليل §]

هاذي راهي موضة هاد ليام انا الحمد لله من النهار الاول عندنا سكنة و قاع كون جيت مع عجوزتي مانقدرش نقولو كوزينتي وحدي بالاك كون زعمة مشاكل نطالب باه نكرو و نسكنو وحدنا بصح نولي انا نطيب وحدي و هوما وحدهم عيب كبير و كما ما تقبليهاش لامك و ليك في المستقبل كبفاه تقبلها لعجوزتها و هي لي ربات و كبرت و هي لقاتو واجد
لازم هي اللي تخليه يدي دعوة الخير من عند يماه و الراجل ثاني لازم يحط كل واحدة في بلاصتها الام في بلاصتها و الزوجة كذلك و ثاني لازم الاحترام و القدر بين العائلة و الزوجة من النهار الاول

[LILA LAMIS]

ســـــــــــــــــــــــلام

اذا كان للزوج بنات فنعم لمطبخ مستقل لتفادي المشاكل..................اما و الام وحيدة فاظن ان الزوجة التي تطلب ذلك لا تخجل من نفسها............هي لا ترصى لامها ذلك فكيف ترضاه لام زوجها..................لا مناص من الاعتراف ان نبنات جيل المسلسلات التركية و الافكار الغربية خرجوا مشوهين فكريا مما يصعب عليهم النجاح في احياة الزوجية.



هههههه حتى ان بعض العجايز اصبحو يتفرجون المسلسلات التركية و تعامل الكنة كخادمة تحت رجليها و هي المتسلطة التي تتفنن في اذلال كنتها و زوجها خاصة اذا كانو يعانون من مشاكل مادية ......اذن تحيا الاستقلال مع الفقر في مطبخ مجاور و ليسقط الاستعمار نتاع العجوز.........
ولكل الشباب اقول الام ليست ملاك و لكن يجب احترامها و مصاحبتها في الدنيا بالمعروف.....و اني لارى اغلبية الكنات تستقل بمطبخ بالرغم من ان العجوز لوحدها و ذلك من قباحتها و هو واقع مر......
اما انا شخصيا فاننا نملك منزلا خاصا و الحمد لله و لم اسكن معهم ولا يوما واحدا ....فانا لا احب الصخب و الضجيج......هههههه
سلام

[guelmiya]

لاكان نتي مساعدتك خلاص.احمدي ربي تفاهمتي معاهم. بصح كاين ناس اي تعاني صح حطي روحك في بلاصتهم ضرك تجيك نورمال.كل واحد يدير لي يريحو برك.

[mounaminou]

لكان كاين مشاكل بسبب المطبخ فعادي يديرو 2 او 3:1: ...بصراحة لاكان هو حل فعلي للمشاكل فأنا مع هدا الحل :19::19: وين هو المشكل ...... ماشي حرام و ماشي عيب تاني العيب هو كثرة المشاكل و الصدامات و سوء التفاهم

و زيد الناس كون مالقاوهش يخفف من حدة المشاكل كون ماتعبوش رواحم و دارو أكثر من مطبخ

و يبقى الحل الأمثل هو الاستقلال الكلي ماش غير بكوزينة

[optimism]

السلام عليكم
انا صراحة جيني راني نلعب فالعشة لي كنا نلعبوها صغار
ولكن لااعرف ماذا يخبيء المستقبل مااره اليوم مستحيل او مسخرة افعله في المستقبل
هذا تعلمناه من الحياة

[نورة مروان]

السلام عليكم
انا صراحة جيني راني نلعب فالعشة لي كنا نلعبوها صغار
ولكن لااعرف ماذا يخبيء المستقبل مااره اليوم مستحيل او مسخرة افعله في المستقبل
هذا تعلمناه من الحياة

يعطيك الصحة اختي هدرة في بلاصتها و معناها جد صحيح

[hocine2007347]

https://fbcdn-sphotos-g-a.akamaihd.net/hphotos-ak-prn2/t1/1235252_649949278405743_1257237878_n.jpg

[sadstar]

يا ناس لي يديه في ألما ماشي كيما لي يديه في النار رأكم قاعدين تحكو شغل نتماملاءكة ظلم كبير تحكم على الناس بلا ما تعرف ظروفهم

[madame fatima]

السلام عليكم
صدقوني كنت مثلكم شرطي في الزواج ان يكون لي مطبخ واحد في بيت واحد لكني تفاجأت بعد 3 اشهر زواج و قبل رمضان بأيام قليلة
طلب ابو زوجي منه ان يكون لنا مطبخ خاص ليس مطبخ بل قراج اطبخ فيه ليس داشما الكنة المسؤولة اقسم لكم اني كنت اعاملهم نعم المعاملة و هم يشهدون على دلك لكن السبب الدي دفعهم لدلك اجهله رغم انه لا يوجد اي بنات في البيت حماتي و حماي و زوجي و اخيه الاصغر و غير متزوج
مادا تقولون الان؟؟؟؟؟؟؟؟؟؟؟؟؟

[مواطنة]

السلام عليكم
صدقوني كنت مثلكم شرطي في الزواج ان يكون لي مطبخ واحد في بيت واحد لكني تفاجأت بعد 3 اشهر زواج و قبل رمضان بأيام قليلة
طلب ابو زوجي منه ان يكون لنا مطبخ خاص ليس مطبخ بل قراج اطبخ فيه ليس داشما الكنة المسؤولة اقسم لكم اني كنت اعاملهم نعم المعاملة و هم يشهدون على دلك لكن السبب الدي دفعهم لدلك اجهله رغم انه لا يوجد اي بنات في البيت حماتي و حماي و زوجي و اخيه الاصغر و غير متزوج
مادا تقولون الان؟؟؟؟؟؟؟؟؟؟؟؟؟
صحيح كل وحدة وضروفها ولي صرالك مليح حتى ولو شفتي العكس لانو حماك هو لي اقترح

[وبشر الصابرين]

السلام عليكم
بالفعل هذه الظاهرة اصبحت متفاقمة في مجتمعنا و هذا راجع في راي الى الانانية السائدة في نفوس بعض الزوجات و ضعف شخصية بعض الرجال و عدم وضع النقاط على الحروف قبل الزواج فلو قرر الزوجان العيش في بيت العائلة فيجب الالتزام و الانضباط بقواعد البيت و ان لم يستطع ذلك فليقم بيت مستقل دون لن يفسد بيت والديه

[اسمهان79]

انتم تتحدثون عن وجود مطبخان في المنزل والله اعرف عائلة الام وبناتها وحدهم والابن الاول والكنة يطبخو وحدهم والابن الثاني وزوجته يطبخو وحدهم يعني صاو ثلاث عائلات في بيت واحد

[نسائم الهدى]

دائما نفس الوضع

الهدرة في الوسع ساهلة

و الحكم على الاخرين من موقع المتفرج امر يسيييييير

نحكيلكم حكايتي انا

كي تزوجت كنت مع ناس داري

شيخي و عجوزتي

سلافي ثلاثة

و زوج بنات

سلافي واحد صغير مازال في الجامعة

و زوج يخدمو و شهريتهم دوبل شهرية زوجي

المهم كانو متفاهمين كل واحد يحط ثمانية الاف دينار // ثمنميات الف //

و يزيد عليهم شيخي و يصرف هو

المهم زوجي نهار يخلص يجيب الدراهم لباباه و الباقي يخليهم مصروفنا

يماه واش ادير كل ما تخصها حاجة تجي ليه

نهار روح جيبلي الخضرة

نهار روح شريلي طماطم

نهار سكر

نهار قهوة

نهار اومو

// و لمعلومكم انا و هو ما نشربوش القهوة و قليييييل وين نشربو الحليب و الاومو عندي ديالي وحدي يجيبولي ابي من عندو //

المهم حتى يخلاصو دراهمو

نولي انا نعطيه من دراهمي

هو ما يحبش و يبدا يعيط

و انا نقولو :

ما تعيطش ياك انا و انت واحد

المهم ما تزعفش يماك و نصيب واش نطيب غدا ولا عشا

يغلي يغلي و انا بالتحلال و التشيات و الظرافة نقنعو و يروح يقضيلها

واحد النهار دراهمو خلاصو و دراهمي كيف كيف

انا مرضت من ظهري و من السرير ما قدرتش انوض

و في السرير ما نقدرش نتحرك او نتقلب

باش يديني للطبيب ماكانش بح

خمسة ايام ما تحركتش و انا مسطورة

حتى رجع هو ياكل في روحو

راح لباباه و قالو :

كي نخلص راني نعطيك حقي في المصروف ولا لالا؟

قالو :

راك تعطيني

قالو :

ألور علاش انا نعطيك المصروف و يما كلما تخصها حاجة تزيد تجي تدي من عندي؟
هاي المرا مرضت باش نديها للطبيب ما عنديش

قالو :

انا ما علاباليش

كي سقسى عجوزتو

قالتلو :

ايه انا واش ندير
الزوج لخرين ما يعطوك ليك ما يحبو يقضولي
و انا كي نحتاج نروح ليه انت تبدا تعيط عليا

عيط شيخي لسلافي لخرين

و سقساهم علاش هكدا

قالولو :

حنا مازال عزاب هو اللي عندو عايلة هو اللي يصرف

قاللهم زوجي :

واش من عايلة؟؟؟؟؟

عندي عشرة يتبعو فيا؟؟؟؟؟

عليا انا و المرا؟؟؟

اللي هي تتغدا و ما تتعشاش

و انا اللي على الغدا نكون خدام نتعشى برك

قاللهم :

شوفو تصرفو معايا و تعاونوني في المصروف الله يبارك

نصرف وحدي و انتوما تخلصو كتر مني هذي ما نقبلهاش

باباه قالو :

شوف يا وليدي

هوما نعزلهم ماكانش كيفاه شكون يخدم عليهم؟

مي انت راك متزوج عندك شكون يخدم عليك دير كوزينتك وحدك و خليهم

كي ما يصيبوش شكون يقضيلهم يرجعو يقضو وحدهم

جا راجلي لعندي للكوزينة قالي :

الشهرية الماجية نديرو كوزينتنا وحدنا

قلتلو :

آسعدي وعلاش واش كاين

قالي الحكاية

قلتلو دبرو ريسانكم انا خاطيني

ما ندخل روحي ما يقولو هي السبب

مي دركة كل حاجة نطيبها نديلهم منها

و مع انو هوما ما يعطونيش الحاجة حتى و نشوفها يقلو الكبدة و يشوو اللحم و انا نديلهم كاش طياب نشوفها بعيني و ما يعطونيش منها

مي انا اطيب عندي تبرد عندهم نقول حتى و ما يشوفونيش الريحة توصل لعندهم

ألور ما تقولوش العرايس ولا لولاد

حنا مثلا ظروفنا كانت صعبة في هداك الوقت صعبة بزاف و هوما عزلونا

الحمد لله عاونوني اهلي و كنت ملايمة شوية دراهم في الحصالة ديالي فتحتها و عاونتو بيهم

حنا لوكان لينا رانا معاهم مي الله غالب اصدر الرئيس الحكم

ما تظلموش بنات الناس و ما تظلموش الرجال

دي فوا الحاجة تجي فوق اليد و ما تقدر والو

ما تهدروش في الوسع

لانو الهدرة في الوسع ساهلة

سلام

[maya bouharoun]

لا ادري لما يربط بعض الاخوة المسألة بسوء الاخلاق الرجل اكيد تكون عندو نظرة مختلفة لانو ما جربش يكون كنة انا اخواتي عطاوهم عجايزهم كوزيناتهم من السمانة الاولى بمحض ارادتهم هوما كل ما يطيبو حاجة مليحة يمدولهم قسمتهم و متفاهمين و بالنسبة ليا واش نقول عجوزتي ساعة هاك و ساعة هاك كي يجيو بناتها تتبدل و كي يروحو تولي كيما كانت و في هاد الحاجة هي ما تتنازلش على الطبخ لازم هي لي طيب انا مرضت بمصارني من البهارات بزاف لي تحطهم مي صابرة أذلتني و مازلني صابرة نهار تنحيلي الكرسي من الطابلة و نهار تحط للعايلة كامل يبداو ياكلو وانا نتنشع ما نلقاش كرسي ولا ما نلقاش صحن نبقى نشوف و نفتش حسيت بالذل مي ما حكيتش ني لراجلي ني لدارنا مالقري راجلي مرة شاف بعينو مي ما تناقشناش في الموضوع تعيط عليا و من بعد تجي تحكي كي شغل ما صرا والو تشنف وقت ما ظهرلها هدا كامل خاطر نتغدى برا باسكو نخدم ما نقدرش نصبر حتى ل 4 و لا 5 بزاف قاتلي ما تعجبكش ماكلتي طيبي وحدك انا حابة نطيب وحدي في كوزينتها مي ماما قاتلي عيب اصبري و راني صابرة علابالي ماهيش شريرة لكن تجاربها مع عرايسها السابقين خلاوها تعاملني هاكا مالقري ربي شاهد عليا جامي قستها بنص كلمة مام الخدمة ما تخليش بناتها يعاونوني كي يجيو ولا هزت وحدة تعاوني بحاجة خلات عليها صابرة باسكو راجلي مايقدرش يسكني وحدي و هي في النهاية امو و لا تمت هكا نقولو يديرلي كوزينة وحدي نشالله ما نطيب في الشومبرا مي ما يذلني حتى واحد ادعيولي ربي يفرج عليا

[نسائم الهدى]

نقوللكم

حنا ماما ديما تقولي :

والله و جا عندنا الوسع غير نديرلهم كل وحدة كوزينتها وحدها

تقولي :

باباك انا نطيبلو ماكلتو سبيسيال

زوجة اخي الاصغر اطيبلو ماكلة هو يشرطها

زوجة اخي الاوسط اطيب ماكلة زوجها وحدها هو يتشرط

و زيد غدا الجماعة

و في بعض الاحيان ماكلة الدراري وحدها

تصورو!!!!

في بعض الاحيان نكون ضيفة عندهم يدخلو للمطبخ الكل و حتى انا نزيد نعاونهم

قالتلي ماما :

علاش مساكن عرايسي هكدا؟

ياك لوكان جا عندي الوسع نعطي لكل وحدة كوزينتها و تزيد شوية لاكونتيتي و تاكل هي و زوجها و اولادها و راهي مهنية

علاش حتى اطيب غدا الجماعة و تزيد غدا زوجها و وحدو؟

باش ما تقولوش بلي لافوت في بنات الناس لالا

دي فوا الظروف تحكم

[نسائم الهدى]

@@@@@@@@@@@@@@

[سهى 88]

كل واحد يرقد على الجنب اللي يريحو
وكل مرا تحب يكون عندها بيت مستقل وهاد الشي من حقها
واللي ماجربش ماكالاه يمد رايو

[mimish]

السلام عليكم ورحمة الله و بركاته
اردت ان اعرف اراءكم في هذه الظاهرة الغريبة التي دخلت على بيوت بعض العائلات من المفروض لما يتزوج الابن في بيت والديه يتقاسم معهم البيت و المطيخ و المصاريف ايضا ما نراه الان في بعض العائلات ان تقوم المشاكل على المطبخ و القفة و ما الى ذلك هل تعتقدون ان المطبخ المستقل لكل من الحماة و الكنة يعتبر حلا للمشاكل ؟

لو كان مشكل مطبخ فقط......أو أكل وحده......المشكل أكبر من هذا ................
حين تتدخل الأم في كنتها في كل شيء ...لبس كلام أو حتى تفكير
والأدهى والأمر تدخلها بينها وبين زوجها ............هناك مشاكل أكبر وأكبر من الأكل.....وخاصة عندما لايفهمها زوجها
ويحاول أن يطبق بر الوالدين في حين ينسى زوجته ...اسرته الجديدة
الخلاصة
لا داعي لأن تفصل الكنة الابن عن امه....ولا ان تفصل الطعام
اذا كانت تريد الحل الأمثل فالأفضل ان تخرج الى بيت منفصل عن بيت الأهل تفاديا لكل المشاكل
وكما يقول المثل ....ابعد عن الشر وغنيله.....
ولكن مالحل تجري الرياح بما لاتشتهي السفن...
ملاحظة: هذه قصتي
....هناك شيء مهم...ديننا أكد انفصال الابن حين يتزوج ...اذا كان قادرا ..ولا يفرض على الكنة ان تخدم أمه...لا يوجد نص ديني يقول ذلك...وهذه معلومة يجب أن يعرفها كل المتزوجين

[Sarima]

كل واحد و اسبابو و كل واحد يحكي على حياتو بصح كاين عرايس سبحان الله
كيما مرت خويا عندها عامين متزوجة بصح مازال تحسب في روحها ضيفة عندنا و الله ساعات نحير تقعد في شمبرتها تتففرج واقيلا احنا ماعندناش télévision و ماتهبطش تتغدى حنى نعيطولها و العشاء كيف كيف
لوكان عليا نورمال نحمل الهم بصح غدوا كي نروح لدار راجلي كيفاش رايحة تعامل الام تاعي
و االه خسارة فيخم كلش
و كيما يقولوا ناس زمان الحديث قياس