كيف اتزوج

[مشكلتي]

السلام عليكم
بلغت اربعين سنة كل رفاقي لديهم اولاد و زوجات الا انا اعمل و ارجع للبيت و اجد نفسي وحيد
و الله لدي كل شيء مسكن ،راتب ، تدهورت صحتي و كرهت حياتي و كرهت مطالب اهلي
يريدون زوجة لي استاذة او طبيبة و تكون جميلة جدا و بيضاء البشرة و لا طويلة و لا قصيرة و لا نحيفة و لا سمينة
و من عائلة مشهورة بالصلاح و يريدونها طباخة و شاطرة وتكون صغيرة لا تتعدى ثلاثة و عشرين سنة و ان تسكن بالبيت العائلي بالرغم من انه لدي شقة هم يشترطون كل شيئ و كانهم هم من سيتزوج و لست أنا
فمن اين اتي لهم بزوجة على مقاسهم ؟؟؟؟؟؟؟؟؟؟؟
فكل اخوتي و اخواتي تزوجو و لديهم اولاد الا انا يشترطون و يشترطون
حين ألتقي فتاة اعجب بها و اريد خطبتها و استشير امي تقول لي قصيرة و اذا وجدت اخرى تقول لي لا تعرف الطبخ
و حين اقول لها بنت خالتي تقول لي ليست متعلمة و بنت الجيران تقول لي والدها شرير و اذا قلت لها اخت صديقي تقول لي كبيرة عجوز ....
للعلم انا انسان عادي و لست طوم كروز و لست ميلياردير و لست اي شيء انسان بسيط و هم يضخمون المطالب
فاصبحت لا اعرف طعم الزواج و اصبحت اخاف ان اتزوج فتاة و يضلمونها او يعايرونها او اذا احببت ىفتاة يفرقون بيني و بينها و يتحججون انه لديها عيب ما
كرهت حياتي كل المشاكل محيطة بي فلو كنت متزوج على الاقل لدي شريكة تقدر مشاعري مرضت و صحتي بدات تتدهور فانا رجل و اريد ان استمتع بالحياة مثل اقراني افكر بزيارة طبيب نفسي

[يونس معبدي]

وعليكم السلام ورحمة الله
لو قلت ان سنك في أوائل الثلاثينيات
كنت سأقول أن الامر طبيعي ..لكن 40 سنة وتتوفر لديك كل شروط الزواج اسمحلي نقلك انهم زودوها حبتين ..خاصة وانهم يريدون بنت 23 سنة ..:confused::confused:
يا أخي ضع لهم حد واذا استمريت معهم بهاته الطريقة
فلا أعتقد انك ستتزوج..
موفق أخي ربي يسهل

[ندى الصبح]

السلام عليكم اخي هون عليك لا تدع اليأس يحطمك
يبدو انك الاصغر في العائله لذلك يتحكمون بحياتك !! في الحقيقه شيء غريب في عصرنا انو العائله تتحكم في اختيارات الشاب الى هذه الدرجه
رأيي انك كي تصيب وحده مليحه وتعجبك ما عليك غير تتوجه للوالد تاعها وتكلمو ثم تروح للعائله تاعك وتقولهم راني اديت موعد باش تروحو تخطبولي وكون صارم في كلامك معاهم ماراكش صغير باش يديرولك هكذا
وكلمهم بصراحه وقولهم راهي عاجبتني وما تتدخلوش في قراري
وربي يوفقك ويسعدك ويهنيك

[ahbab]

السلام عليك اخي شوف يا خويا ماترسكيش ببنت الناس لهدي هي الشروط تاع داركم انت حاتجيب امراة ليك ماشي لماليك انت عندك دار و زيد كبير ماتخليهمش يدخلولك في حياتك مرتك خيرها انت كاين بنات الفاميلا ماش المهم تعرف تطبخ المهم امراة تصونك و تكون زوجة صالحة و ام مثالية اما الطبخ تقدر تتعلم استخير ربي و ان شاء الله حا تلقا لي تناسبك بصح دير لها دارها ياخويا باش تتجنب اي مشاكل بين النساء امك في بلاصتها و زوجتك في بلاصتها راك قلت 40 سنة لازم تكون عندك كلمتك لي تمشيها في الدار ربي يوفقك و تلقا بنت الحلال بصح لازم تخبرنا يا خويا

[محمد جديدي التبسي]

مشكل غريب فعلا المفروض والد يك راهم حاسين بمعاناتك وهوما اللي يخطبولك كل أسبوع حتى يلقوا اللي تليقلك وتعجبهم
أمك صعبة الإرضاء إذن شوف أختك تشوفلك صديقاتها..حتى فتاة بنت 23 عادي راهم جماعة الخمسين يجيبوا في بنات العشرين ركّز على الأخلاق أخي حتى تلقى وحدة في الثلاثين متخلقة عادي
عندك مشكلة في شخصيتك ويظهر إنك إنسان قلوقي ما تحبش المشاكل وحاب تتزوج بلا ما دير حتى مشكلة مكانش خطبة أوزواج مافيهش مشاكل أخي لكن لابد عليك أن تواجهها وتكون كلمتك هي اللي تمشي مادامك جاهز وعندك بيت الله يبارك.. راك أمنية كل فتاة ..ربي يعينك ويفتح عليك

[miinoucha25]

ابحث عن زوجتك بنفسك و ربي يهنيك و تلقا بنت الحلال

[lalib40]

في هذه الحالة واحد مايمدلك بنتو ، شكون ليرايح يتزوج انت ولا والديك ...

[السيدة اسيا]

كيفاش طبيبة ولا استاذة و في عمرها 23 سنة بيزاااار....الصبر الصبر

[imene12]

يجب أن تكون صارم ...فلنفرض أنك تزوجت و لا قدر الله حدث مشكل بين زوجتك و أهلك أقول لا قدر الله.. كيف ستتصرف هل ستتفرج من بعيد .
هذه حياتك و لا دخل لأحد بها.

[بنت غليزان]

خويا اتزوج و دير دراري تصيبهم للعاقبة ماغادي تنفعك لا مك و لا خوك اتزوج و كي عندك دارك ديها ديراكت و عيش حياتك و دير اسرة لانو انت راك مخليهم يتحكمو فيك قوي شخصيتك

[فارس وجواد]

أستاذي الكريم اسمح بهذه الكلمة راك كبير ماكش صغير يعني لازم تفرض رايك خصوصا في أمر مثل الزواج.
يعني شكون اللي رايح يتزوج أنت أو أهلك و هذه حياتك و لا حياتهم.
أين أنت من كل هذا.
لازم تفرض رايك و منطقك فالوقت يمر و الأيام تمضي و رايحة تطفر فيك.
أخي روح تزوج و ان شاء الله تجيب واحدة من المريخ و كما يقال ارضاء الناس غاية لا تدرك .
رايحين يهدرو ساعة و يسكتو.
خير البر عاجله .

[أمّ عبد الودود]

هو سؤال واحد

هل أنت راض بهذا الوضع أن يستمر معك
فإن قلت ماذا سأفعل ...فتاكد انك ستظل على هذا الحال
وإن قلت أنك لست راض فابدأ بفرض شخصيتك وقراراتك والبحث عن السبب
الذي جعل أهلك يتصرفون معك بهذه الطريقة


يستحيل ان تجد زواج بدون مشاكل كما أنه يستحيل أن
تجد الموافقة من جميع الأطراف لاننا لا ننظر بعين واحد للأمور
الام ترى الزوجة بصفة والأخت تراها بصفة مغايرة وأنت كذلك
ضع انت شروطك لكن في نفس الوقت كل مستعدا لتحمل النتائج
كما أنه يجب عليك ان تعرف حقوقك وواجباتك
وهل للأهل حق التدخل بهذه الطريقة في حياتك

[yousra14]

السلام عليكم
أخي إذا رفضوا كلامك الصارم خذ أحد معارفك واخطب وتزوج وضعهم أمام الامر الواقع وانقذ نفسك اسمحلي اهلك قلبهم قاسي

سيغضبون قليلا ثم يرضون لا تضيّع الوقت إن لنفسك عليك حقّا

[" أبو عبود"]

أمامك خياران لا ثالث لهما إما ان تعطي لأمك فرصة شهر لكي تجد لك عروسا شهر لا تكثر ولا اقل وتتزوج من تختارها ما دمت غير قادر على ان تقول لهم لا. او تختار انت وتعقد القران المدني والشرعي وتضعهم اما الامر الواقع والا فاقعد كما انت فلم الاستعجال يا رجل فلا زلت صغيرا.

[مراد سابقا]

أنا ننصحك أقعد كيما هكذا

الزواج كارثة في بلادنا وخاصة ما يوجد في الجزائر فيف العزوبية

[kamel76]

نصيحتي كالتالي يا أخي : اختر بنت الحلال بينك و بين نفسك و لستخر الله تعالى . ثم تقدم و اخطب ."إن وافقت والدتك فأهلا و سهلا و إن لم توافق فتوكل على الله "

[optimism]

السلام عليكم
بدون تعليق

[sarl02]

40 سنة يا اخي الناس في هذا السنة راهي حاكمة بلاد واتسير فيها وانت راك امخلي كمشة من النساء يقررون مصير حياتك؟؟الا امك فقط لها عليك واجب المشورة والاحترام اقول المشورة فقط وليس شيء اخر سينو اذا زادت عليها كيما راك تقول يعني لا يعجبها العجب كلاسيها مع الاخرين يعني قلها تبعي واسكتي وافرحي وبس ...والباقي الي ادخل روحو يسمع ما لا يرضيه مكان لا خوك لا اختك لا عمك لا جدك السابع....الكل ليقل خيرا او يذهب الى الجحيم....مشكلتك واحدة موحدة ي ااخي وهي شخصيتك ...لازم تكون تتمتع بشخصية قيادية وحكيمة وحازمة في نفس الوقت خاصة في هذه السن ...يعني امك واختك ووو هذو اديرهم موراك ماشي قدامك ...قوي شخصيتك واضرب بيد من حديد لكل من تسول له نفسه تنغيص حياتك والله ستحل امورك وتحيا الجزاير ووفقك الله اخي.

[tuba21]

هون عليك يا اخي الامر ليس بتلك الصعوبة الكبيرة
انت راك تقول راك واجد من مجاميعو وحاب تستقر في حياتك هدا حقك
اما فيما يخص اهلك هما صح يحبوك تزوج مع احسن عروس مي مالزمش يبالغو بزاف وانت مالزمش تستسلملهم وترضخلهم يا خويا انت الي راح تزوج وتعيش مع هدا المرأة ماشي هما
كي تلقي بنت الفاميليا الي تعجبك وترضيك انت من جميع النواحي المستوي العلمي , الشكل ,السن .... الخ ) حاول تقنعهم بجميع الطرق و سيرتو متستسلمش حتي توصل لمبتغاك

وربي يفرحك فيما قريب ان شاء الله

[khawlita.dz]

يجب ان تكون لك شخصيتك المستقلة اولا وتفرضها عليهم ويعرفوا جيدا انك من ستتزوج
ارى انهم يريدون فتاة تكون كالعجينة بين ايديهم لا زوجة ابنهم واعتقد ان زوجتك المستقبلية ستعانى من هكدا وضع
خصوصا انك لم تحدد لعائلتك الحدود
نعم كلنا لنا اهل و لديهم علسنا الكثير من الحقوق لكن ليس ان يسيرونا حسب نظرتهم ونحن بسن النضج فما بالك ب 40
انت بقمة الرجولة فاظن انه عليك ان تختار فتاة بنفسك وفق شروطك وما يناسبك و يناسب سنك فلا اظن فتاة ب 23 قد تناسب رجلا ب40 وعلى اهلك ان يعرفوا ان حتى لهده الفتاة اللتى يريدونها طموحا ونظرة لحياتها المستقلة مع زوجها و شروطها ووووو و تختار كيف ستعيش معها واين بالاتفاق معها
و تفرض رايك
بالتوفيق


بالتوفيق

[الحلم الجميل]

ربي يفرج همك و يفتح عليك
و يرزقك زوجة صالحة باذن الله

[Rania-34]

اخي الكريم

مادام انك ميسور الحال و لديك شقة مستقلة و راتب مناسب فالافضل لك ان تبحث عن بنت مناسبة لك تكمل معها مشوارك

ونصيحة لك لا تجعل حياتك لعبة في يد اهلك لانك لو قبلت بشروطهم ستندم طول حياتك
ربما سياتي يوم تطالبك فيه زوجتك ببيت مستقل فماذا ستفعل ؟ هل تطلقها بطلب من والدتك ؟ وانت تعلم ان السكن المستقل عن الاهل حق من حقوقها
هل ستقبل ان تكون زوجتك المستقبلية خادمة لاهلك ؟ هل تقبل الذل لها ؟
بالطبع هذا ما يدور في راسك الان
يا اخي لا تجعل حياتك لعبة ولا تجعل زوجتك طريدة لوالدتك حتى تولي باش تشري باط قاطو لازم تشاور والتك
فانا اعلم ان والدتك تلعبلك على المورال كيما تحب واسمحلي نقولك ستصبح شخص بدون شخصية
فاستجمع قواك واتكل على الله خير بنت فاميلا واشرط على اهلك السكن المستقل لانه راح تندم فيما بعد
وتولي معندك حتى كلمة مع داركم والدليل هو ارتفاع مستويات الطلاق بسبب تدخلات الاهل في خصوصيات اولادهم
.
.
و في الاخير لا طاعة لمخلوق في معصية الله
اتكل على ربي واتزوج واشرط عليهم السكن المنفرد .
. واذا مقبلوش .... الرزق على ربي ازوج وقوم بوالديك في وقت الحاجة متعصيهمش
وكونك راجل ( واخبط الطابلة على جال مرتك )

[abdel02]

فمن اين اتي لهم بزوجة على مقاسهم ؟؟؟؟؟؟؟؟؟؟؟



أنت الذي ستتزوجها...ماشي هوما...قول ليماك إيه ودير رايك...وبدل العقلية...
خاطش بهذي العقلية...لوكان تتزوج...يولو يلعبو بيك كي الخاتم...إذا أنت راجل
والراجل مالازمش يكون محكوم من النسا...والله يسهل.