ma voiture

[مشكلتي]

السام يا الخوا
انا عندي بارمي عمره 2 سنوات وجامي سقت سيارة من بعد البرمي وكيما تعرفو الاوتو ايكول يمد فقط مبادىء السياقة فقط ماشي كلش
الان ربي فتح علي واشتريت التو وحبيت نسوق رحت اوتو ايكول من أجل ساعات اضافية في البداية كنت ضعيفة واليوم وبعد 09 ساعات صرت أحسن بكتييييير والحمد لله ولكن المشكل هو الخوف الرهيب يلي عندي ...يعني مستحييييل انني نسوق السيارة لوحدي
اليوم حبيت نجرب سيارتي مع المونيتور ...ما قدرتش خلااااص نسوقها خفت بزاف بحكم انني كنت نسوق سيارة اوتو ايكول الي هي كليو يعني سيارتي بانت لي حاجة جديدة مش موالفتها
المونيتور يقل انك مليحة في السياقة لكن الخوف متغلب عليك وابتداءا من اسبوع قادم يعمل لي ساعات احترافية في سيارتي باش نوالف ولكن العائق الكبير هو الخوف اللي عندي لدرجة شفايفي ييبسوا ووجهي يحمار وقلبي يرجف :mad::mad:
كيفاش نتغلب على الخوف؟
هل فكرة انه يعلمني في سيارتي فكرة مليحة؟ ملنريسكيش ندير حادث؟ هو يقدر يتحكم في؟
لازم جدا انني نسوق لانها شرط في وظيفتي الجديدة ...أرجوووووووووووووووكم الله يجازيكم بالخير نصائحكم وماهي امثل طريقة باش نحي الخوف ونقدر نتكل على روحي
لعلمكم انا بنت :rolleyes:

[white-heart]

السام يا الخوا
انا عندي بارمي عمره 2 سنوات وجامي سقت سيارة من بعد البرمي وكيما تعرفو الاوتو ايكول يمد فقط مبادىء السياقة فقط ماشي كلش
الان ربي فتح علي واشتريت التو وحبيت نسوق رحت اوتو ايكول من أجل ساعات اضافية في البداية كنت ضعيفة واليوم وبعد 09 ساعات صرت أحسن بكتييييير والحمد لله ولكن المشكل هو الخوف الرهيب يلي عندي ...يعني مستحييييل انني نسوق السيارة لوحدي
اليوم حبيت نجرب سيارتي مع المونيتور ...ما قدرتش خلااااص نسوقها خفت بزاف بحكم انني كنت نسوق سيارة اوتو ايكول الي هي كليو يعني سيارتي بانت لي حاجة جديدة مش موالفتها
المونيتور يقل انك مليحة في السياقة لكن الخوف متغلب عليك وابتداءا من اسبوع قادم يعمل لي ساعات احترافية في سيارتي باش نوالف ولكن العائق الكبير هو الخوف اللي عندي لدرجة شفايفي ييبسوا ووجهي يحمار وقلبي يرجف :mad::mad:
كيفاش نتغلب على الخوف؟
هل فكرة انه يعلمني في سيارتي فكرة مليحة؟ ملنريسكيش ندير حادث؟ هو يقدر يتحكم في؟
لازم جدا انني نسوق لانها شرط في وظيفتي الجديدة ...أرجوووووووووووووووكم الله يجازيكم بالخير نصائحكم وماهي امثل طريقة باش نحي الخوف ونقدر نتكل على روحي
لعلمكم انا بنت :rolleyes:

مشكلة كاااامل البنات
قضية الولف والله أعلم لانه أختي عندها نفس المشكل والان هي تتعلم مع صاحب مدرسة سياقة وبسيارتها ولكن في الصباح الباكر
الله يسهل أختي

[biologie2001]

اختي اولا مبروك عليك السيارة..... هي فترة و تعدي ان شاء الله ..... انا لما تحصلت على رخصة السياقة ماسقتش مدة 3 سنوات حتى اشتريت سيارة خاصة بي .. درت 4 او 5 حصص عند المونيتور و من بعد احسست انه هو اللي يسوق ماشي انا و كانت عندي الرهبة لدرجة متتصوريهاش ..... شوفي اختي انا الطريقة اللي تعلمت يسها كنت نخرج مع بابا في الصباح الباكر الطريق تكون فارغة و يعلمني و حتى لما كنت نرتكب اخطاء الضرر يكون اقل من انك تتعلمي في النهار منين يكون الازدحام و انت اعطاك المونيتور الحل انه يعلمك في سيارتك و هدا شيء جميل و يحفزك اكثر على التعلم..... اختي و مع الوقت رايحة تتعودي و تتغلبي على الخوف ديالك **** و كتتفكري هدو الايامات تقولي يا حسرا نهار كنت مخوافة ههههههه***

[جويرية الإيمان]

الله يسهلك اختي

انت ادعي الله باش نحيلك هاذا الخوف .

[oumhana]

فكرتيني في حكايتي نصيحتي توكلي عى ربي وابداي ومتخافيش انا كنت نسوق مع خويا كان ميخليليش يقولي عمرك مراح تتعلمي و هذاك لكلام القاتل بإذا أنت تحماري أنا كنت نعرق من يدي منقدرش نشد le volantوخليوخلي وكقولي ديري ساكيام 5 منحبش ونقولو منقدرش جيني الدوخة ولالو دارنا دايرني سينيما.تشجعت واحد النهار وخذيت la voiture غير انا وختي ورحت وكاليت ومشيت بالعقل و من هداك النهار وليت نخرج وحدي وندير les dégâtsقد راسي وتعلمت و الحمد لله منكذبش خذيت لكور عند l'auto écoleو الحمد لله راني نسوق منذ 1999 .تشجعي وديري كوراج لازم تتعلمي ماشي شريتي الطوموبيل باه تخليها مركونه .والله الموفق

[melissa lola]

السلام اختي نفس المشكل اللي عانيت منه قعدت عامين بلا مانسوق وكان بابا وزوجي يعلموني يعيطو عليا بزاف يعني زاد عندي هذاك الخوف وصرلاتلي عقدة كانو الصباح واحد فيهم يروح معايا للخدمة وانا نسوق وتبقى الطونوبيل عندي يجو العشية يدوني حتى صرالي مشكل في خدمتي خرجت نفور من الخدمة باه ندير مالادي قلعت طونوبيلتي وخرجت عادي ودخلت في واحد الفيلاج معمر الطونوبيلات وقريب قاسوني وكي يشوفو مراة كاين اللي يحبو يبينو رواحتيهم وهذا كامل وانا مانيش فايقة بلي راني نسوق وحدي يعني حالة نفسية وراحت و الحمد لله اليوم راني نسوق عادي نسوق حتى في alger centre وفتح عليا ربي جبت طونوبيل كبيرة وعادي عندي مشكل كي نقاري المهم نسوق ننصحك شوفي واحد اللي مايعيطش عليك يديك ويجيبك حتى شهر امبعد اتكلي على روحك علا خاطر الفران و لومبرياج انت اللي تتحكمي فيهم بالتوفيق

[safiro]

مبروك عليك السيارة الأخت و القضية راهي قضية ولف برك

هوما زوج مالناس لي يديرو الحوادث اللي مايعرفش يسوق و اللي يخاف

أنت مالقري بارمي ديالك عندو عامين ملي جبتيه مي علقي مور السيارة اشارة 80

باش ناس تعرف بلي راكي مبتدأة وبلعقل تولي محترفة و يزول الخوف تدريجيا

[احمدdz]

السلام عليكم
مبروك عليك السيارة اما بالنسبة لموضوعك فهو قضية مداومة فقط هذي اللحظات يمر بها كل شخص لا تقتصر على النساء فقط
انا نعرف واحد جارنا جاب سيارة جديدة واول مرة يسوق والبرمي ديالو جديد في البداية مرتبك نوعا ما ومع مرور الوقت تحسن والحمد لله
وانت اذا كنت مرتبكة اثناء السياقة علقي اشارة80باش الناس يعرفو بلي راكي مبتداة ومع مرور الوقت يزول عليك الخوف والارتباك تدريجيا

[maria mirou]

اختي والله نفس مشكلتي انا رخصة السياقة تاعي من 2006 والان حابة نشري سيارة لكن الخوف من السياقة يخليني دائما ناجل

[ibissam]

اخي انت ايضا يكي نسوق ميت بلخلع مي بشوية ومزا ل منعرف نسوق مليح برمي 2007 وهدوين بديت نسوق وحنا في مدينة لي نسوق فيها بزاف درجات النرية نكون خيف لا يخرجولي وزيد مشكل لخر لكلنطو ديمن نغلط فيها مي الحمد الله تعلمت شويا ربي وفقك نشاء الله

[قطر الندى13]

وربي يعاونك

[lili1988]

صرالك كيما انا الايامات اللولة كي شريت سيارتي فرحت بيها بعدها كي نشوفها نبكي مالخوف مي ضرك الحمد لله تحسنت وليت نعلم فأختي احسنها تسوقي بكري وحدك على 6 تع الصباح الطريق فارغة هكا انا درت
ربي يوفقك

[amina-imi]

اولا نقول السلام عليكم و ليس السام
لان السام هو الموت

لذا ساجيبك بقول : و عليكم ما قلتم

بالنسبة للسياقة اكيد في البداية سيكون خوف كبير .. لكن مع الوقت ستتعودين

[doba]

تشجعي وديري كوراج لازم تتعلمي ماشي شريتي الطوموبيل باه تخليها مركونه

[mariana1]

السلام عليكم ورحمة الله وبركاته أما بعد كلنا مرينا من هنا أنا كان يعلمني زوجي وكي يعيط عليا حتى يهبطولي ( les regles) ولكن من وحد اليوم أقريت أن سورة البقرة مليحة بزاف للرهاب قريتها وتوكلت على الله وديت السيارة والحمد لله اللهم أدمها نعمة وأحفظها من الزوال

[سحر البيان]

نوصيك حاجة أختي مين تسوقي السيارة ديالك ، تحكمي في أعصابك و ما تخليش اللي موراك يقلقك بالكلاكسون خصوصا إذا عرفوا بلي انتي جديدة في السوقة . ديري روحك كلي ما سمعتيش ، و خذي كل وقتك .
ربي يوفقك و بالباراكا عليك

[رحمة من المولى]

السلام عليكم
احي انا كنت كل يوم نسلم على حاجة طروطوار قراج كل مرة يسترها ربي و الخوف نولي منشوف الطريق و الدوخة هههههههههههه شوفي حنوووووووونة اركبي فيها وحدك و اضربي دورة مدام يركبوا معاك تخافي انا كنت اكثر منك و اليوم الحمد لله عندي عام راني نسوق بصح نمشي غير القدام منرجعش للوراء منعرفش ههههههههههههههههه راني نروح بها يوميا 50 كيلو هيا تشجعي صديقتي

[hodahodahoda]

هي قضية تعود فقط
اكثري من السياقة مع مدربة اقول مدربة مدربة و ليس مدرب