مشكلتي خوفي من العنوسة

[مشكلتي]

السلام عليكم انا فتاة عمري 22 سنة ماكثة في البيت

مشكلتي التي ارقتني انه لحد الان لم يطرق خاطب باب بيتي حيث اني مقبولة الشكل ومتحجبة وسمعتي جيدة والحمد لله

فصديقتي اخبرتي ان ابدا الخوف من الان وقالتلي لي عندك لا تبوري

علما هي تقدم لها خطيب وقريبا سوف تتزوج ربي يكملها على خير لكنها جرحتني بكلامها

اخوتي هل شيء طبيعي اني في هدا السن ولم يتقدم لي خطاب ؟

وهل علي حقا الخوف ؟

[nasser26]

اختي والله مزالك صغيرة وصاحبتك هذي ربي يهديها محقهاش تقولك الكلام هذا

والله كل شئ بقدر مي حاولي تقتلي وقت فراغك بما يفيد

ماتدري وين راه الخير

[bonbon]

22 سنة و عنوسة؟؟؟؟؟؟؟؟؟؟

مازلتي صغيورة ختي

الزواج مسؤولية صعيبة بزاااااااااااااااف لكن للاسف بعض البنات عندهم فكرة المهم نتزوج و خلاص!!!!!!

زيدي عيشي شوية في دار باباك و استمتعي بالايام هناك لانك رايحة باذن الله تشتاقيلهم لما تتزوجي

عيشي كل وقت في وقته و مادام انك ما زلتي صغيرة لا داعي للقلق

الدقيقة للي تروح من حياتك ما توليش

و ماراكي رايحة تستفادي والو كي تقلقي روحك من درك اذن واش خليتي للزواج و مشاكله (نقصر برك:))

كلشي في وقته مليح و ربي كل حاجة دايرها في وقتها اذن لا تقلقي ختي و بينك و بين الله فقط سجدة و دعاء

ربي يكتبلك الخير ان شاءالله و يزوجك بالشخص للي تقر به عينك

[safiro]

كاين لي تزوجو و هن في سن الأربعين

مزالك صغيرة وجاية للدنيا ماتضيعيش وقتك في القلق راه كل شي بالمكتوب

[مياسم الصمت]

شوفي يا اختي نقولك حاجة

الزواج مكتوب

ما تقولي راني مليحة اللي متوسطة الجمال وتزوجت وربما الجميلة قعدت

ما تقولي راني فحلة
تلقاي الخايبة مدايرة دارها والفحلة راهي قاعدة بلا زواج

كل شيء مكتوب

تقلقي ولا ما تقلقيش
ما عندك ما ديري
زيدي غير على روحك

وكي انت في عمرك 22سنة ةتقلقت
واللي في عمرها ثلاثين واش رايحة دير

ما زالك صغيرة يا حنونة

[ايمان نور الجزائر]

اختي...وان بدأتي بالخوف ماذا سيحصل؟؟
سترهقين نفسك فقط وتتعبينهااا ...وتتحول حياتك الى اسوء
نصيحتي لك اشغلي نفسك ووقتكي بهوايات مسلية ومفيدة في نفس الوقت
وكي يجي المكتوب ما منو مهروب كيما يقولو
كلو بيد ربي سبحانو
يمكنكي ايضا الدعاء بتعجيل النصيب

[white-heart]

22 سنة وراكي تتكلمي عن العنوسة ؟؟؟؟؟ انت بزااااف صغيرة على هذه المو اضيع أختي
الله كريم ويفتح عليك ان شاء الله

[ibissam]

اختي ما زلك صغيرة انا كنت مثل اختي يقلو واش خصك ما متزوجيج بزاف يجرحني والحمد الله رني زوجت درك ربي يهدي ما خلق واكثير من استغفار وقراءة القراءن وادعية وانشاء الله ربي يرزقك بن لحلال

[عبدو ايليزي]

قال صلى الله عليه وسلم : لن تموت نفس حتى تستوفي رزقها. والزواج من الرزق فلا تستعجليه فسيأتي بإدن الله

[أَحمــد]

الزواج مثله مثل الرزق وسيأتيك رزقك المكتوب لك لباب دارك يدق عليك ولا تستعجليه فتُحرميه.

[كلنا راحلون]

السلام عليكم كنت نبحث على هادي مقولة وأية
لفتاة تظن أنها لن تتزوج ..
المرأة تظن أنها لن تنجب ..
الشاب يظن أنه سيواجه الفقر و البطالة ..
العجوز يظن أنه سيواجه الأمراض ..
الطالب يظن أنه لن ينجح ..

كل هذه الظنون تأتيكم من الشيطان ..

قال تعالى :
{ الشَّيْطَانُ يَعِدُكُمُ الْفَقْرَ وَيَأْمُرُكُمْ بِالْفَحْشَاءِ وَاللَّهُ يَعِدُكُمْ مَغْفِرَةً مِنْهُ وَفَضْلًا وَاللَّهُ وَاسِعٌ عَلِيمٌ }

وبعدي على اناس من يهبطولك مورال وعيشي متفائلة

[ايمان ايمانو]

أختي مزلتي صغيرة 22 سنة ولي راهي في الثلاثينات و الاربعنات واش يقولو من الأحسن مارسي هواية و ابتعدي قدر المستطاع على الاشخاص لي يهبطو المورال ، و ان شاء الله يرزقك بزوج الصالح .

[طالبة مساعدة]

يا اختي والله لانا كي تزوجت ندمت على يمات توحشي داركم غير بروفيتي و عيشي حياتك مع والديك ما احلى عيشة معاهم لا تستعجلي في زواج وخاصة مازلتي صغيرة وعيب ليس انكي لم تنخطبي ابدا عيب كون يجيك انسان غير صالح تتعبي معاه كثر من راكي تخمي هاك اصبري ربي يكتبلك لي في قلبك يارب وستعيني بصلاة ودعي ربي

[التوليب الجميلة]

ما زالكي صغيرة اختي و مكتوبك راح يجيك وقت ماحب ربي و ادا تقلقتي ولا خفتي معندك ما تديري هاد الشي بيد ربي سبحانو وان شاء الله يرزقك بزوج صالح عاجلا غير اجلا

[تمام المنة]

ممَّا تخافين أختي ؟؟
من قدر الله
تخافين من شيء ممكن يأتي و ممكن لن يأتي و ممكن الواحد يتوفاه ربي قبل ما يأتي ، نصيحتي لا تضيعي وقتك الثمين جدا في التفكير في هذا الأمر فهو بيد الله سبحانه و سيأتي في وقته
أقول لك لا تسمعي لكلام صديقاتك فهن حتى و إن تزوجن قبلكِ فليس هن اللواتي جلبن هذا الزرق و إنما ربي اللي كتبلهم و إن شاء الله نزعه منهن
ربي يرزقك الزوج الصالح التقي اللي يصونك أختي

[ندى النسرين]

اكثري من قول حسبي الله ونعم الوكيل
ومكتوب حد ميديه حد ختي
مديري والو في بالك راني قدك انا تاني وماني مخطوبة ماالووووووو ههههههههههههه

[jomana jiham]

يا أختي الزواج مكتوب كانت تجيني غريبة كي نسمع هذه الكلمة و درك فهمتها.

في عمري 23 سنةمن قبل كنت في الجامعة كانوا يجو بصح ماكنتش نخمم في الزواج, و درك مازال يجو بصح ماكانش واحد مناسب واحد بعيد بزاف على الولاية و واحد مغترب و أنا نخاف من المغتربين قليل لي يصدق زواجهم,و واحد زعما جاي يخطب قالهم كان تقبل بيا ندبرلها خدمة بقيت نضحك ههههههههههه...

و درك وليت نسمع الهدرة وين ما نروح.

في العمل وحدة قاتلي راكي شابة,تنطق أخرى تقول كل يوم شابة,و الثالثة تقولهم كل يوم شابة بصح الشباب ما بغاش يجي.

وجارتنا اليوم قاتلي بغيت نسقسيك قلتلها واه قتلي : قاع هذا الزين و ماجاك حتى واحد,قلتلها يجو بصح مكتوبي ماجاش,قاتلي شوفي برا حتى واحد ما عجبك,قلتلها تاع برا يحوسوا يدو النيميرو و الهدرة في التيليفون,و قاتلي ما عليش و شافيها دبري واحد ههههههههه. قاتلي تطولي كيما هاك يبقو يهدروا فيك الناس و يقولوا علاه فيها كل شيء مليح و مازال حتى واحد ما داها سير دايرة حاجة. حكمتني الغمة ههههههههه
نيتها بغات تنصحني....
و هكذا كل يوم نسمع هدرة جديدة :mad:

[الفقيرة الى الله]

فوضي امرك لله والسكوت على الاحمق جوابه *صديقتك*وفي وقتنا هدا كثر الحمقى للأسف ما فهمتش كيفاش نخموا هكدا ونحن مسلمين ربي يهدي ما خلق ...ربي يرزقك الزوج الصالح الدي تقر به عينك ...ماشي المهم الزواج للهروب من العنوسة كيما قالتلك صديقتك ...هدا التخمام الي رجع الزواج لا يعمل عمله والواقع خير دليل

[hodahodahoda]

سياتي مكتوبك لا تياسي
ادعي الله ان ياتيك من يستحقك

[فارس وجواد]

أختي الزواج رزق من الله و كما يقال للرزق أشد طلبا للعبد من الموت فلماذا اذا العجلة.

[pomaria_aindefla]

و مادا تقول من تكبرك سنا بعشر سنوات هدا مكتوب ربي و الحمد الله

[kamel76]

وقالتلي لي عندك لا تبوري: سبحان الله و لاحول و لاقوة إلا بالله . أنا أقول لصديقتك هذه الله يهديها . ما تريدك أن تفعلي ؟ هل تريدك أن تتزيني أو تتبرجي لتعجبي الرجال ؟ أما ماذا ؟ سبحان الله .
أختي الكريمة رعاك الله عليك بالدعاء و تمسكي بحجابك و عفتك و الزواج رزق و الرزق على الله .