ماعرفتش واش ندير

[مشكلتي]

السلام عليكم
حابة نحكيلكم على مشكلتي وياريت تفهموني
من مدة اتعرفت على شخص وصار اتفاق مابينا واعجاب وتفاهمنا على الخطوبة في الاول قالي اصبري شوي حتى نقدر نقول للوالدة عليك لانو الوالدة عندها مشكل قلت ليه ماعليهش نصبر عليك لاني حاسة بيك
بصح من نهار الي تعرفت عليه وهو من موصيبة لموصيبة اتخيلو في الاول تكسر من ايدو بعد مابرا زاد اتكسر من ايديه في زوج بعدها دخل للمستشفى بسبب حساسية جلدية وفوق كل هذا الشيء هو عندو حساسية من الادوية المهدئة ومخففة الالم يعني يبقى يتوجع على طووول اتعذب
من بعد السيارة نتاعها خسرتله ودفع فيها الي فوقه والي تحته ( هذا الشيء كله وانا ساكتة مالقيت مانقول )
والي زاد مؤخراا انو ممكن راح يخرج من الخدمة ( رايحيين يستغناو عنو ) سنين وهو يخدم وهادي هي اخرتها ( ان شاءالله ماتصيرش)
كل مايهدر معايا يقولي راني مغمووم مايتفاهمش مع والده والوالدة مريضة عندو خوه توفى من عامين ومزال جمرته شاعلة في قلب امه وفي قلبه
الصراحة انا بديت نشك ونقول في بالي انو ممكن انا وجهي مش خير عليه يعني كيما نقولو ماربحش عليا
فكرت اني نقولو ننفصلو رغم اني والله العظيم غير نحبو ورايحة نصبر عليه وقابلة بيه باه كان بصح شفتو من نهار اتعرف عليا وهو من موصيبة لموصيبة عييت وانا نسمع فيه يتعذب ويقولي راني مهموم وكي نتلاقا فيه نحس بيه ذابل
يقولي راكي انتي الحاجة الزينة في حياتي
انا نحبو بكل ظروفو وقابلة بيه ونصبر عليه بصح نفكر انو ممكن كي نبعد عليه يرجع كيما الاول بخدمتو ومالو وصحتو من نهار عرفني وهو في الهم والمصايب
رايحة نهبل ماعرفتش واش ندير نظل نصلي وندعي ليع ربي يفرج همو وهم كل المهمومين ياااارب

[bonbon]

يعني لو تعرفتي عليه قبل سنتين و توفي اخوه نتي السبب؟؟؟؟


انفصلي عنه ليس لانك وجه نحس بل لانك قاعدة تغضبي في ربي بعلاقتك هادي


ربي يكتبلك للي فيه الخير

[اسعى لرضى الله]

يا اختي واش نقولك , مشي قضية انتي مكيش وجه خير عليه كيعاد تعرفي بلي الطيرة في دينا مكانش وراهو من الجاهلية والرسول عليه الصلاة والسلام كان يكره لطيرة يعني الفكرة هدي غير نحيها من بالك

وراهو غير ابتلاء فقط وربي يفرجها عليه
ومستحيل ان عسر يغلب يسرين
فان مع العسر يسرا ان مع العسر يسرا

قولليلو يكثر الدعاء وقيام الليل والاستغفار وباذن الله ربي يجمعكم في الحلال

[yousra14]

هذا اسمه تطيّر وهذا من الجاهلية وغير جائز في الإسلام

ثانيا توقفي عن هذه العلاقة وقوليلو كي تخبر أمك راك تعرف وين راهي دارنا وتفضل في أيّ وقت ولا داعي لاغضاب الله حتى يكن الله معك ورب يفرج همك لا تنسي الاستغفار لك ولناولكل المؤمنين ورب يسعدك

[safiro]

معلاباليش مي نعرف شي ناس عباقرة في التمثيل

[محمد جديدي التبسي]

مقدمة مشكلتك أشعرتني أنك التقيت به مرة وحدة وتفاهمتو وتم المشكل وراح يجيك يخطبك
لكن بعد تتمة القراءة ولت الأمور معقدة وظهرت فيها حكايات وأخذ ورد والسيد يحكيلك على مشاكلو ومعاناتو في حياتو كل وكأنه سيجد عندك حلول!
أختي العواطف والحنان تاعك وفريه لزوجك الذي يتقدم لبابك ويحارب ظروفه للظفر بك أما الباقي قوليلهم ربي يعاونكم والسلام

[طريق الهدى]

أختي العواطف والحنان تاعك وفريه لزوجك الذي يتقدم لبابك ويحارب ظروفه للظفر بك أما الباقي قوليلهم ربي يعاونكم والسلام

يسلم فمك اخي

يا وخيتي قولو يرجع لطريق ربي تزول مشاكلوووووووو

[مريم العدراء]

تفاهمت على الخطبة صح ما عليش برغم من أن الخطبة يتفاهم عليها أهلكم على الاقل هذا على ما تربينا عليه مانقولوش الدين لخاطرش ما وليتوش تحبوا بصح لي ما فهمتهاش بأي صفة راكي تهدري معاه دروك

[نارينا]

ربي يكون في عونكم الحل الانسب الانفصال لتحل البركة مع وعد بالرجوع تحت غطاء شرعي ورسمي

[قطر الندى13]

وربي يعاونك

[lili1988]

يعني لو تعرفتي عليه قبل سنتين و توفي اخوه نتي السبب؟؟؟؟


انفصلي عنه ليس لانك وجه نحس بل لانك قاعدة تغضبي في ربي بعلاقتك هادي


ربي يكتبلك للي فيه الخير


عندك حق فهدرتك

[selin cobbra]

اختي تفكيرك غلط في غلط
هذا مكتوبو وربي ما يكتب للانسا الا لي فيه الخير وزيد كيفاش هو يشوف فيك الحاجة الوحيدة الزينة في حياتو وانت تقولي نحس عليه
على كل حال ربي يفرج عليه وربي يهديك وان شاء الله تتحسن طروفو ويجي يخطب

[moulmoul]

هادا قاعد يتهرب ويألف قصص وروايات بلي مريض وماعلاباليش
اقطعي العلاقة احسنلك

[tuba21]

يااختي هدا ليس بكلام انسان واع ,انتي راكي منفعلة فقط لست بفأل شر عليه الاشياء التي تحدث له هي قضاء و قدر و ان شاء تتحسن ضروفو
ادا راكو تحبو بعض و راضيين و مقتنعين و هو راه قصد الحلال معاك يخبر اهله و يجي عند اهلك يخطبك
و ربي يسافج الاحوال

[أندلس]

بالنسة للنحس و غيرها فلا يجوز للمؤمن أن يتحدث بذلك لأن كل ما يصيبنا قدر من الله ربما هي الصدفة فقط و ربما علامة لتتركيه
بالنسبة لقولك ستصبرين على ظروفه و غير ذلك من كلام العشاق فأخبرك يا أختي إذا دخل الفقر من الباب فر الحب من الشباك يعني سرعان ما سنجدك هنا مرة أخرى تشتكين من قلة ذات اليد و مرض الزوج و مشاكل العائلة
فكري جيدا فما كل البيوت بنيت على الحب

[samy algerien]

بالنسبة للنحس لا اعتقد هذا ومن جهة قطع علاقتك به سيكون هذا ضربت كبيرة اخرى في حياته *

[مريم الصابرة]

السلام عليكم
الفتاوى الشكاير رانا عارفين العلاقات حرام زعمى هي ما راهيش عارفة اللي حرام الله يهدينا كلنا هي او حنا كلنا رانا نغلطو
المهم أختي شوفي ما تخمميش إنو إنت وجه شر عليه هذا مقدر ومكتوب هو يفوت بمرحلة ربي يختبرو فيها وشوفي انا نقولك هو في وقت اللي يحكيلك فيه معاناتو الله غالب عليه ما عندوش لمن يحكي يعني على حساب واش حكيتي لو جبل صراحة ما يتحمل ربي يكون معاه وفي عونو لكن كل شي فالقرآن وعند ربي نصحيه يرقي يتقرب من ربي يدعيه ويطلبويسامحو راه في شدة وتزول أما إنت لو تخليتي عليه يقولك بللي ما قبلتنيش بظروفي لكن ما رانيش نقولك كملي هاك معاه لو باغيك يدير خطوة لأنو لو يستنى ظروفو تبقاو هاكا ووقت الصح هو يخليك ويروح إمالا اختي قوليلو يتقدم راكي قابلة بكل شروطو وظروفو راضية بيهم ديرو خطبة وعقد ومن بعد يحل مشاكلو بالشوي وعادي هنا راكي زوجتو لما تعاونيه عادي
اما أمو ربي يصبرها عل فراق وليدها الامر صعيب بزاف وربي يكن معاهم لانو فعلا مسكين راه يعاني ربي معاه وإنت علاه لا وجه شر ولا شي المكتوب أختي مقدرلهم يعيشو الظروف هذي اما انا ما ننصحكش تتخلاي عليه و في نفس الوقت ما تبقايش هاكا لالا لأانو قد ما راكم ديرو هاك ربي غاضب هذا واش نقدر ننصحك موفقة

[khawlita.dz]

يا اختى كل ما يصيب الانسان مكتوب من الله سبحانه وتعالى
تطلعى ولا تهبطى ماكيش حتبدليه لا انت ولا غيرك
لما كل هاده السلبية فى التفكير
كل ماحدث له مكتوبه
بالتوفيق

[b.mayssouna]

السلام عليكم
اود ان اذكرك الى نقطة ناسيتها بالاك
دكرتي بالاك كل مصائبه لكن نسيتي اكبر مصيبة تاعك وتاعو هو الوقوع في الحرام
جامي خممتي والى راكي تعملي في الصح...+ هادا ماهوش تاعك حتى يتقفل عليكم باب واحد
لن اقول لكي خدي القرار او اقتنعي لانو امر مافيهش مجادلة نصيحتي الوحيدة توبي الى الله واكثري الاستغفار وانهي العلاقة هادي فورا فوراااااااااااااااااا

[djalal44]

معلاباليش مي نعرف شي ناس عباقرة في التمثيل
أختي إلا تقدري إتساعديني راني حاب أندير فيلم مي ماعرفتش كيفاش أندير السيناريوو شوفي مع هذا الولد ربي يخليك

[nilly]

نقولك حاجة
هدا طفل راه يتمسخر بيك وحاب يجيب بيك الوقت ماتكسرت يدو ومادخل لسبيطار ومامات خوه كل هدا كدوبات الفها من خياله الواسع. وكي شافك حنينة معاه بدا يتخيل وينسج في الكدوب. غير اخطيك منو اد كملتي انتي لتخسري اخطر هو مستحيل يتزوج بيك. علبالي بلي راح تزعفي من رد نتاعي بصح كاع واش قلت لصالحك .