أساسيات الطبخ ، نصائح مجربة ،قصص وطرفات

[السيدة كرمين]

السلام عليكن ورحمة الله وبركاته


ألهمتني مشكلة فتاه رفضت خطابها لأنها لم تتعلم بعد الطبخ ، أقول الطبخ هو متعة من متع الحياه
وهو شغف من خلاله تحقق السيدة أو حتى الرجل ذاته وفن راق جدا ويعبر عن صاحبه وصاحبته
عشقت الطبخ منذ الصغر واذكر أنه منذ 8 سنوات وانا اساعد أمي لكن هي ليومنا هذا ليست راضية
عما أقدمه وهذا يرجع لكوني لا احفظ وصفات الجدات للأكلات التقليدية بل احرف اظيف وانقص ربما لأني أمل
أو بسبب التقدم والتعرف على ثقافات الغير المهم اعشق جدا المطبخ الايطالي و المطبخ المغربي
طبعا على راسهم مطبخنا الجزائري وهو غني جدا وشري بتنوعه

ياريت كل اخت تحكيلنا حكايتها وحبها للطبخ وما يقع من طرفات مثلا من الطرفات التي وقعت لي وهي
محاولاتي الكثييييييييييييييييييييييييييييييييييييرة ليومنا هذا لعمل قلب اللوز وكلها بائت بالفشل يمكن انه يتكل
ويقال مليح لكنه ابدا مش كيما تع برا ومن بكري امي تشكي من خسارة السكر واليوم زوجي :1:


ياريت من كل وحدة ترد تكون من أجل سرد قصتها مع الطبخ أو ذكر ما تراه اساسي لتعلمه وهكذا نستفادوا
أما المرور فقط يكفي الشكر وهكذا تكون كل الردود مفييييييييييييييييييييدة جدا وتسهل علينا البحث مستقبلاً


تقبلن حبي واحتراماتي

[السيدة كرمين]

أبدأ أولا طبعا لأني صاحبة الموضوع هههههههههههههه

الأساسيات كثيرة جدا نحاول نختصر كل مرة

* البهارات * لازم كل سيدة يكون في مطبخها الأدوات الأساسية لي هي الأواني

ومواد الطبخ الجيدة ولعل ما هو اساسي هي البهارات

أخذت وصفة جدتي للفاح ونعملوه في معظم المرق الحمراء ادخلي للرابط باه تاخدي

الوصفة ، ورق الرند نستحموه ياسر حاولي تحطيه في الأخير لأنه يمرر اذا تحط في البداية .

http://www.djelfa.info/vb/showthread.php?t=1449900

* التمراق * بالنسبة لكل مرق يحب أنه يتقلى البصل ويذبال باه تضيفي البقية

وتستمري في التقلية و الأساسي هنا التمراق يكون بالماء الساخن

لأن لما تكون المكونات ساخنة وتمرق بالبارد راح ترجعيها للصفر وفوف هذا اللحم

و الحبوب ايضا يشدوا روحهم ويقساو إلا اذا كانت الوصفة

تستلزم يكون بارد في بارد.

* اللحوم * لما تحبي يكونو بنان بيتيهم في كيس مبهرين مع الزيت و الثوم او اقل شئ ساعتين

* لازم تعرفي ماهية الطبخة باه تعرفي نوع اللحم المناسب ليها فهناك من الطبخات

لي تحب حموظة الداند وهناك لي تحب دهن الضأن...

* النار * عامل مهم في الطبخ ناس بكري يقلك الطبخ على نار هادية وهذا هو الأصح

لأنك اذا استخدمتي نار قوية راح يتبخر المرق وتظيفي الماء

لأن المكونات مزال ما نضجت وبالتالي الفايدة تبخرت عليها قللي الماء و نقصي النار

وماتنسي ذكر اسم الله

* العجين * حاولي تخلي العجين يرتاح واذا فيه خميره ماذابيك تخمريه مرتين

واذا كان الحال سخون خمريه في الثلاجة لأن الخميرة ريحتها

مش لازم تبان بعد النضج - قارصة -

* اذا زدتي الملح ارمي حبة بطاطا في المرق

* وصفة البيشاميل ما تنسيها 50 غ زيدة 50 غ فرينة ملح و نص لتر حليب :

ذوبي الزبدو وحمصي الفرينة وظيفي الحليب شوي شوي

لحد ما تحصلي على بيشاميل ثقيل نوعي الفرماج حسب وش راح تظيفي معاه

* وصفة الكيش احفظيها 125 غ زبدة 25 غ فرينة صفار بيضة وملح وماء بارد

والحشوة نوعي

* وصفة عجينة البتزا 500 غ فرينة 3 ملاعق ك لحظة 3 م ك فرماج مبشور

3 م ك زيت ملح م ك سكر م ك خميرة ونوعي في الحشو

* وصفة عجينة البقلاوة 3 كيلات فرينة وكيلة سمن ملح واعجنيها نوعي استخدامها

في اكثر من 20 نوع حلوى



ياريت مانكون طولت:1: تحياتي

[-Jasmen Bonbon Choco]

l,مواضيعك هي المتعة شكرا على رحااااااااابة الصدر تسلمي=========

[mounia hse]

شكرااااااااا على النصائح القيمة
بارك الله فيك
موضوع قيم عجبني

[منى بسيكو]

444444444444 شكر على الموضوع الراع والمفيد

[السيدة كرمين]

أشكر مروركن لكن تمنيت منكن غالياتي لو التزمتن بطلبي وهو ان تحكين قصصكن مع المطبخ وكل وحدة تحط فكرة تراها هي أساسية .
حرام العشرات يمروا على الموضوع واخواتنا وبناتنا كثــــــــر يردن الاستفادة فجملة تكفيها لتتعلم وتؤجرين انتي عليها.

[besbes]

الله يجازيك كل خير ويحفضلك صحتك واولادك ويجعل الجنة مأواك وكل الاخوات على المجهود المبدول يعلم الله كم ادعو وندعو لكم والله استفدنا من هاد المنتدى المزيد من الابــــداع والمزيد لاجل الجزائر وابناء الجزائر شكرا شكرا للجميع

[om mita]

انا قصتي قصة مع الكوزينة عجبني الموضوع بصح راني مشغولة غدوة ندا الحكايات هههههههههه

[غزالة الصّحراء]

موضوع جدّ قيّم 10/10ممتازة . واللّه منكنّ نتعلّم . ولكنّ من الجميع جزيل الشّكر. انا وحدة راني استفدت بزّاف من الموضوع . يعطيك الصحّة.
* وصفة عجينة البقلاوة 3 كيلات فرينة وكيلة سمن ملح واعجنيها نوعي استخدامهافي اكثر من 20 نوع حلوى

ياليتك تعطيني بعض الحلويات ألي نعملوهم بعجينة البقلاوة. وماهي الحشوة ألي نعملوها فيها. على خاطر في بعض الأحيان تبقالي العجينة وأنا حبيت أنوّع في الحلويات.اللّه ايجازيك الجنّة على هذا الموضوع الهادف.

[bibajoury]

السلام عليكم اخواتي وتحية خاصة للاخت السيدة كرمين علابالك راكي طلتي على قلبي لاخاطر عندي تاريخ كبير مع الكوزينة (بخايص بالاخص) لاني انا كنت مانشتيش نطيب حتى تزوجت وتحطت الفاس في الراس ومالقيت راسي من رجليا في الطياب بصح مابقيتش كيما بكري تغلمت شوية والفضل لربي و منتدى الجلفة اللي نفعني بزاااااااااااااااااف و لوكان نحكيلكم مانخلصش وشكرااااااااااااااااااااااا

[om mita]

غزالة الصحراء تقدري ديري بيها لمقرقشات اي لمخاخ كل واحد وش يسميها

[om mita]

البريوش السر تاع اي وصفة هي انو تخليه يخمر بزاف
يعني يطلع مليح وتكسريلوا الطلوع وتعاودي يطلع مليح وطيبه بعد ما تكوني زدتي خمرتيه

[om mita]

الكسرة باه تجيك حمرة ديريلها شوية خميرة

[om mita]

لمبرجة ديريوا تاع ام رامي مكانش خير عليها

[الأمنيات]

بارك الله فيك فيك انا كان عندي مشكلات ماشي مشكل واحد صراحة
قبل ما كنتش نحب ندير قريوش نخاف منه بصح كي تزوجت خواتات زوجي كامل يديروه
ايا درت القلب وبديت نتعلم كتجربه درته اول مره جات جارتي ذاقته وهي حطت كل التعليقات عليه وبقات تشكر في قريوشها وعععععععععععع
ايا حلف وبقيت نبحث ونحوس حتى عردت زوجت اخي وحده متخصه فيه درتلها عرضه مقابل ما تعلمني نخدمه هههههههههههههه رشوه
الان الحمد لله اه يبان لي ساهل
مرات الامور احنا نكبروها وهي بسيييييييييييطه
المقروض كنت نقول عمري ادا نديره منين لقيت وصفه ام رامي تعلمته الحمد لله وراني رقم واحد في عائلة فيه بشهادة الجميييع
قلب اللوز ايضا عمره زوجي ادا قال مليح يفضل تاع بره حتى ولو كان معجن
لكن غير تعلمت تاع ام رامي خلاص هادا رمضان ماشريناش الحلويات المحلي برك ههههههههههههههههههه

[السيدة كرمين]

أفكاركن جميلة ورائعة مشكورات ومشكورة أم رامي على عطاءها الرائع

فكرتي اليوم خاصة بالشراء

- لما تشري السمك حاولي تشوفي عينو اذا كانت تبرق يعني انه فري اشري مباشرة

- حبة البيض لما تفتحيها توجدي الصفار لامع والبياض متماك مش مايه وهكذا تعرفي انها جديدة

- الإكليل سر المشوي باللحم

- بالنسبة لي سألت عن عجينة البقلاوة لي تبقى : اعملي منها قريوش ، اي وصفة بحشوة اللوز أو الكوكاو مثل

القرنفلة وغيرها أو حطيعا في مول بأي شكل عندك واحشيه بالمكسرات

أو احشيها بالفرميسال المعمولة من نفس العجينة مقلية في الزيت ومعسلة ومخلطة مع مكسرات مختلفة

- مرات السميد في الصيف يفسد و نجو نعجنوه للرقاق يولي سائل ما عليك غير ديريه في الثلاجة

واعجني شوي سميد مع خميرة وخليها تخمر ليلة ثاني يوم دخلي العجينة الفاسدة مع الخميرة

وكسري فيها شوي زبدة طرية يخرجلك خبز دار ولا اروع


تقبلن احتراماتي

[جويرية الإيمان]

شكرا لك كارمن و الله موضوع في القمة

رايحة نحكي حكايتي مع الثوم

أنا موالفة نرحي الثوم في الروبو و ندير الزيت و الملح

و لما نحطو في البورت مونجي نحط ملفوق الزيت نغلق عليه و نحطو في الكونجلتور

هذا النهار كثرت الثوم و حطيتو في البورت منجي بصح ما تغلقتش مليح كي عاد بزاف الثوم

نهار الاول خدمت بيه عادي و بعدها لقيت الثوم أصبح لونه أحمر .

إيييييييييييه كيما خممتو تأكسد خطراها البورت مونجي تفتحت .

المهم قالي زوجي معليهش طيبي بيه و فعلا طيبت بيه عادي ما كاين حتى فرق.

كي رحلت هنا لبوسعادة أنا كنت في دارنا و هزوجي كي جاب الحوايج حط كلشي كان في الكونجيلاتور عند دار باباه

في الكونجلاتور نتاعهم و شافو الثوم الأحمر راحو ارماوه.(واش دخلهم )

و جاتني طفلتي و قاتلي و هي تضحك : عمرك شفتي الثوم أحمر ؟ قلتلها راه خوك كي راح يجيب في قش الدار خلاّ الغطاء مفتوح

(حصّلتها في زوجي هههه).

و لي عودة .

[السيدة كرمين]

عجبتني قصتك مع الثوم ودارها بيا من قبل
بكري كنت نحب نخترع رحت رحيث طماطم ودرتلها الثوم
وغلقتها بباطة عادية تع بلاستيك وش نقلك الكونجيلاتور كامل ريحتها ثوم
والمصيبة أن الطماطم ولات ريحتها قاوية كي نحطو يطيب ريحة الماكلة ما تشمش
وليت رميتها ---- شفتي لخسارة هههههههههه

[ام ملاك.]

ههههه عجبتني قصة الثوم
شكرا اختي ام كررمين ممكن تقوليلي من وين انت حسيت بللي من ورقلة من لهجتك ههه حكمتك:1:
نحكيلكم قصتي مع البطاطا المقلية هي في الحقيقة قصة راجلي بصح كيما تعرفة المراة هي اللي دايما تروح في الرجلين
نهار كنت حامل ببنتي ربي يحميهالي ان شالله
زوجي مانعرف شكون قالو البطاطا المقلية باش تجيك بنينة كيما نتاع المطاعم لازم تقطعها عادي وتغليها نص طياب وخبيها في الكونجيلاتور ونهار تحب تطيب اجبد واقلي مباشرة :19:
وانا زدت اكدتلو المعلومة :19:كنت غير كيما شفت واحد الحصة ماشفيتش واقيلا في فتافيت قطعت البطاطا وطيبتها نص طياب وخباتها في الكونجيلاتور قالت تجي بنتها روعة
المهم راجلي يحب يعاونني في الكوزينة نهار يكون قاعد شد قطع وغلى البطاطا ودار كل كمية في صاشي وحدها وخباهم في الكونجيلاتور قالي انت راكي عيانة كنت داخلة للتاسع ونهار نحبو نطيبو يجيو ساهلين(ياك بيني وبين راجلي نورمال :rolleyes:هههه)ودار الله يبارك قيس عرش :Dههه
نهار ولدت جات عجوزتي وانتم تعرفو العجايز والسلافات يالطيف زعما بداو يخملو في الفريجيدار بداو يجبدو في البطاطا ويضحكو علي زعما مارانيش مرا :mad:وماما كانت قدامهم جات تعيط علي وانا نافسة هههه قلتلها ماشي انا راجلي هو اللي دارها المهم دارو علي قصة وايستوار وليت مانيش مراة:cool:
راجلي دارها وانا خلصتها :confused:هههههه
كي نتفكر نضحك :Dمن بعد نتقلق:mad: من هدرتهم ومعانيهم وخزراتهم:cool:

[دائمة الحمد]

امسية طيبة من احلى واجمل وابهى لحظات حياتي لما نكون في المطبخ
اسنتتجت انو ماكانش مرا تعرف طيب ومرا ماتعرفش كاين مرا تحب الطبخ وتستمتع باعداد الطبق ولو كان بطاطا مقلية
وكاين الي طيب تادية واجب فقط
من اساسيات الطبخ عندي الكسكسي احسن شيء يجي بلحم الخروف
الحبوب والعجائن الحمراء تجي بمنطقة من لحم البقر
نسموها الجري بكسر الراء العجائن البيضاء بلحم الدجاج الملوخية بلحم البقر او الكرشة
انا في هده الامور مانحبش نخلط ماكانش اللحم المناسب نعمل مقلي ولا بيتزا ولا مسفوف ههههه
نتمنى راني افدت ولو بالقليل
شكرا كرمين على مواضيعك الثرية

[ام ملاك.]

راني وليت
صباح الخير عليكم
انا عندي مبدأ
نطيب بواش متوفر عندي عكسك اختي دائمة الحمد:1:
مثلا حبيت ناكل بيزا ماشي شرط حتان يتوفر عندي اللحم المرحي والفرماج والاشياء الاخرى يالوكان بالطومايش برك :19:
حبيت ناكل شخشوخة ماشي شرط يكون عندي لحم المهم نديرها على اصولها واللي يخص هو اللحم ماعليش وتخرج:19:
يعني انا بالنسبة لي المراة اللي تدخل للكوزينة واش يكون عندها في الفريجيدار تطيب ماتشرطش لازم هذي ولازم هذي
احيانا كثيرة يجوني ضياف وانا ماعندي والو بحكم خدمة راجلي المسكين ليل ونهار وانا نعجز نهبط نقضي مع لنتي الله يبارك اللي تشوفها تقولي اشريهالي لاعلينا هذي قصة اخرى:1:
والله نقعد في الكوزينة ندور ندور حتى مانفيقش كيفاش نطيب 2 ولا 3 ماكلات من والو انا نحير في روحي:confused::rolleyes: ههههههههه
نبدا نحط في الاساسيات اللي نشوفهم انا مناسبين
اذا خسرلك لحليب ماترميهش استفادي منو واخدمي فرماج يجي يهبل :19:
اذا تحرقلك البصل في القدرة انقذي اللي بقى في طبسي وعاودي اغسلي قدرتك مليح ورجعي كلشي وكملي طيبي كليي ماصرى والو ههه:rolleyes:
جامي ترمي الجزء الاخضر في البصل وراقو دايما نقيهم واغسليهم مليح وقطعيه تقريبا 20 سم وخليهم ينشفو وخبيهم في الفريجيدارتاكلي بيهم طعام او تطيبي بيهم محاجب يخحرجو هايلين
السلق اذا شريتي كمية كبيرة وخفتي تخسرلك اغسليه في الحين وقطعيه صغير وخبيه في صاشي في الكونجيلاتور باش نهار تحبي تطيبيه يجيك ساهل اجبدي وطيبي ديراكت ماتتعبيش بزاف سورتو اذا خرجتي وجيتي عيانة:19:
لازم المواس نتاعك دايما ماضيين باش يسهل عليك الخدمة في الكوزينة وماتكرهيش
هذا اللي تفكرت درك ولي عودة باذن الله
ماكملتلكمش في قصتي اللي كتبتها الفوق مزية راجلي كي حكيتلو هذاك الوقت دافع علي وقاللهم قع بللي انا اللي درت البطاطا فريت في الكونجيلاتور:3:

[جويرية الإيمان]

مونية

و علاه ضحكو على البطاطة ؟

زعما ما صلحتش ؟ و لا ولات بلاكة وحدة و لا كيفاش ؟

حتى أنا راجلي يعاوني في الكوزينة (بلا ما نطلب منو) خصوصا إذا كنت مريضة يطيب و يغسل لمواعن بصح

ما نقولش لدارهم راهو يعاوني .

أنا كنت ساكنة في ورقلة 5 سنين و رحلت لبوسعادة عندي 4 أشهر .

حابة نقول :

الطبخ نية .

إيييييييييه نية

لازم المرأة تكون ناوية باش تجي الأكلة طيبة

و ثاني نوصيكم ما تنسايش أبدا التسمية .


.

[دائمة الحمد]

مافهمتينيش يامنية انا اليوم مثلا غدايا دوبارة
نهار الجمعة نعمل كسكسي ما كانش اللحم
نعمل حاجة اخرى نعمل مثلا كسكسي بالحليب بالصح ما نديرش مثلا ملوخية بالدجاج
راني نهدر على اساسيات الطبخ حسب العنوان
وشكون الي مازال يقدر يشرط
راجلك ناس ملاح منية استهلي فيه

[ام ملاك.]

اختي جورية ضحكو علي خاطرش زعما مانيش مرا فنيانة نخبي في لي فريت داخل الكونجيلاتور فهمتي علاش ؟
وانا راجلي هو اللي دارها كي شافني بديت نعيا تعرفو الحمل في الشهر الاخير
بصح ربي وكيلهم راه جا اليوم اللي سلفتي اللي ضحكت علي راهي بلكرش درك للمرة الثانية ماشي مامبا الاولى
مالحقتش شهرين ولات عيانة وماتقدرش تخدم الشغل وزيد عجوزتي تقولي مسكينة بنتي عيات بزاف ؟؟؟؟؟؟؟؟
خلي برك البير بغطاه
البطاطا بالعكس صلحت تخرج بنينة
وراجلي يعاوني حتى ولو كانو قدامي هو يحب يكون معايا في الكوزينة نهار يكون ماشي خدام يحب يعاون هذي طبيعتو

اختي دائمة الحمد ماتزعفيش مني صح عندك الحق كل ماكلة بطيابها وحوايجها وكي تنقص تجي مخصوصة بصح مايمنعش انو نديروها خاصة اذا توحشناها
راني فاهماتك حنونة ربي يخليلك دوك اليدين باينة تعرفي تطيبي مليح

[دائمة الحمد]

يامنية ماغضبتش راني قلبي كبير ام بنات ونحب يااااسر لبنات ربي يهنيك عزيزتي

[ام ملاك.]

ربي يخليك حنونة اموااااااااااااااااااااااااااااااااااح
راني خارجة لعشية ان شالله نتلاقاو ونحكيو عن الاساسيات

[madoucha]

موضوع شيق
انا كنت زيرو في الطبخ و الحلويات وذلك بسبب انشغالي بالباك ثم الدراسة في الجامعة ثم انشغالي بالعمل كمدرسة مما جعلني ادخل المطبخ الا نادرا او في نهاية الاسبوع
بصح درت القلب وقلت لازم نتعلم بلا جدي ههههههههه
اتذكر اول حاجة تعلمتها وهي المسكوتة ونسيت الخميرة جات يابسة ورقيقة هههههههههه .
وكي بديت نتعلم الكسرة جاتني واعرة باش نديرها مدروة كل مرة ندير خريطة ونفس الشي بالنسبة للمطلوع
وبالشوية تعلمت شحال من حاجة بديت بالكسرة و المطلوع و الخبز دار و المسكوتشو ثم الحلويات البسيطة كالصابلي و الكروكي وهكذا
ومازلت نشوف روحي ناقصة بزاف في الطياب خاصة البنة تاع الاطباق التقليدية
ربي يخلينا هذا المنتدى وهذا القسم لي بفضلو استفدت بزاف

[السيدة كرمين]

ههههه عجبتني قصة الثوم
شكرا اختي ام كررمين ممكن تقوليلي من وين انت حسيت بللي من ورقلة من لهجتك ههه حكمتك:1:
نحكيلكم قصتي مع البطاطا المقلية هي في الحقيقة قصة راجلي بصح كيما تعرفة المراة هي اللي دايما تروح في الرجلين
نهار كنت حامل ببنتي ربي يحميهالي ان شالله
زوجي مانعرف شكون قالو البطاطا المقلية باش تجيك بنينة كيما نتاع المطاعم لازم تقطعها عادي وتغليها نص طياب وخبيها في الكونجيلاتور ونهار تحب تطيب اجبد واقلي مباشرة :19:
وانا زدت اكدتلو المعلومة :19:كنت غير كيما شفت واحد الحصة ماشفيتش واقيلا في فتافيت قطعت البطاطا وطيبتها نص طياب وخباتها في الكونجيلاتور قالت تجي بنتها روعة
المهم راجلي يحب يعاونني في الكوزينة نهار يكون قاعد شد قطع وغلى البطاطا ودار كل كمية في صاشي وحدها وخباهم في الكونجيلاتور قالي انت راكي عيانة كنت داخلة للتاسع ونهار نحبو نطيبو يجيو ساهلين(ياك بيني وبين راجلي نورمال :rolleyes:هههه)ودار الله يبارك قيس عرش :Dههه
نهار ولدت جات عجوزتي وانتم تعرفو العجايز والسلافات يالطيف زعما بداو يخملو في الفريجيدار بداو يجبدو في البطاطا ويضحكو علي زعما مارانيش مرا :mad:وماما كانت قدامهم جات تعيط علي وانا نافسة هههه قلتلها ماشي انا راجلي هو اللي دارها المهم دارو علي قصة وايستوار وليت مانيش مراة:cool:
راجلي دارها وانا خلصتها :confused:هههههه
كي نتفكر نضحك :Dمن بعد نتقلق:mad: من هدرتهم ومعانيهم وخزراتهم:cool:


استناي حكمتيني وقيلة بيك الدشيشة المغمومة هههههههههههه هذيك مش لهجتي لأن لهجتي تدل على الشرق لكن في الحقيقة أنا من واد سوف واسكن في ورقلة وكيما تعرفي لي قام فقوم يقوم منهم يعني احيانا نعملو حاجات هوما هنا يعملوها :dj_17:

أما قصتك متكسريش راسك كي يجوك ولا اعرضيهم وحطيلهم دي بلا ما يحلموش بيهم صدقيني ينساو:D البطاطا وأبو البطاطا منعرفش شكون هو هههههههههههه:confused::D

المهم بينك وبين راجلك واحد ماراحلو:mad:

قصتك رائعة و وما تتقلقيش لأن الأيام مزال جاية ويعرفوا اصح:19::rolleyes:


تعرفي أنا أول مرة رحت لدار شيخي وكونهم من بوسعادة طبخهم مشي كيما تاعنا خلاه

قالوا رح نعملو طعام حبيت نعمل فيها شاطرة قلت أنا نديرو وتعرفو كنت عروس جديدة

مزال يحشمو مني ونحشم منهم

طبخت الطعام وقبل ما يطيب جات عجوزتي تشكر في وقفتي وووو

رفدت لكسكاس وهاتي المسكينة تخرج الكلمة من فمها

قاتلي كريمة يابنتي اطعام راه بيض زيديلو اطماطم

بيض :confused::confused::confused:

وتعرفو يمكن طعام السوافة كيفاه يجي حمر وبالخضرة الله الله

لكن كونهم يكثرو الطماطم المصبرة ياسر بانلها بيض

قلتلها معليش ليوم في خاطري جربي طعام اسوافة وغدوة ندريلك طعام بوسعادي

قبلت على مضض - خوفا من الشيخ طبعا -

ولأني واثقة من نفسي احم احم ماغيرت فشئ درت كيما نعملوه يخي شحاااااااال

وهوما يحكو على الطعام لبيض لبنين

تصوري كون درتلها الطعام لبيض الحقيقي

أما شيخي الحمد لله ولا يقول ما ناكل غير طعام كريمة ههههههههههه

وليت شكون يهدر معايا أما أيو العيال أرواحي وتفرجي ثلاث نجمات الهامل واقف قدامو ما يقيموش هههه

:rolleyes::rolleyes::rolleyes::1::rolleyes::rolley es::rolleyes:

[ام ملاك.]

هههههه والله ياطعام لبيض
كي كريت جاتني عجوزتي ودرت لاسوب وسلطة الفول وسلطات اخرى ماشفيتلهمش المهم تاكل وتستبنن
انا حرت فيها وتقولي هذي هايلة كيفاش درتيها؟
وكي كنت في دارها اللي نطيبها ماتعجبهمش حتان كسرولي يدي وليت مانعرفش قع نطيب

[السيدة كرمين]

مونية

و علاه ضحكو على البطاطة ؟

زعما ما صلحتش ؟ و لا ولات بلاكة وحدة و لا كيفاش ؟

حتى أنا راجلي يعاوني في الكوزينة (بلا ما نطلب منو) خصوصا إذا كنت مريضة يطيب و يغسل لمواعن بصح

ما نقولش لدارهم راهو يعاوني .

أنا كنت ساكنة في ورقلة 5 سنين و رحلت لبوسعادة عندي 4 أشهر .

حابة نقول :

الطبخ نية .

إيييييييييه نية

لازم المرأة تكون ناوية باش تجي الأكلة طيبة

و ثاني نوصيكم ما تنسايش أبدا التسمية .


.


أنا معاك الطبخ نية حب و فعلا التسمية تخلي الماكلة مش بنينة برك وانما يبارك فيها ربي

مرات تبانلك درتي شوي وتولي نبعث لهاذي ولهذا تلقاي روحك وكلتي لجيران وزوفرة وفضلت براكة

خاطر ذكر فيها اسم ربي ،تعرفي احنا ليوم نحوسو على وش يناسب وخاصة الأطباق العالمية نشفى

جداتي ربي يرحمها تحط هاذي على هاذي حتى تبانلك اي تخلك وماكلتها سبحان الله بنة فيها

ما خلقتش لخاطر النية والذكر عليها

[السيدة كرمين]

مافهمتينيش يامنية انا اليوم مثلا غدايا دوبارة
نهار الجمعة نعمل كسكسي ما كانش اللحم
نعمل حاجة اخرى نعمل مثلا كسكسي بالحليب بالصح ما نديرش مثلا ملوخية بالدجاج
راني نهدر على اساسيات الطبخ حسب العنوان
وشكون الي مازال يقدر يشرط
راجلك ناس ملاح منية استهلي فيه

وش خصها الملوخية بالدجاااااااااااااااااااااااااج يخي تجنن :D:mad::rolleyes::19::1:

أنا معاك احنا درنا الموضوع باه يستفادو الأخوات الجدد وكي يحطو شئ في العرضات

تحمر لوجه مي مع الوقت تولي تبدل خاصة لعائلتها نورمال مثلا نشوف بلي انسب لحم

للملوخية هو الدجاج وخااااااااااااصة الداند لأن فيه حموضة تزيد النكهة

كيما يمكن يعرف البعض أن الطبخ ضرك ولات ليه معايير وفي فنادق 5 نجوم لازم الطبق

يكون فيه لحلو والحامض و القرمشة ووو خليط نكهات يمكن غريب على عاداتنا لكن

نحاولو كيفاه نديو واش يناسبنا

[السيدة كرمين]

اختي جورية ضحكو علي خاطرش زعما مانيش مرا فنيانة نخبي في لي فريت داخل الكونجيلاتور فهمتي علاش ؟
وانا راجلي هو اللي دارها كي شافني بديت نعيا تعرفو الحمل في الشهر الاخير
بصح ربي وكيلهم راه جا اليوم اللي سلفتي اللي ضحكت علي راهي بلكرش درك للمرة الثانية ماشي مامبا الاولى
مالحقتش شهرين ولات عيانة وماتقدرش تخدم الشغل وزيد عجوزتي تقولي مسكينة بنتي عيات بزاف ؟؟؟؟؟؟؟؟
خلي برك البير بغطاه
البطاطا بالعكس صلحت تخرج بنينة
وراجلي يعاوني حتى ولو كانو قدامي هو يحب يكون معايا في الكوزينة نهار يكون ماشي خدام يحب يعاون هذي طبيعتو

اختي دائمة الحمد ماتزعفيش مني صح عندك الحق كل ماكلة بطيابها وحوايجها وكي تنقص تجي مخصوصة بصح مايمنعش انو نديروها خاصة اذا توحشناها
راني فاهماتك حنونة ربي يخليلك دوك اليدين باينة تعرفي تطيبي مليح

ماديريش في قلبك كيما قتلك قبل يعياو ويضحكو يجي يوم ويعرفو اصح

:19::19::19:

[السيدة كرمين]

موضوع شيق
انا كنت زيرو في الطبخ و الحلويات وذلك بسبب انشغالي بالباك ثم الدراسة في الجامعة ثم انشغالي بالعمل كمدرسة مما جعلني ادخل المطبخ الا نادرا او في نهاية الاسبوع
بصح درت القلب وقلت لازم نتعلم بلا جدي ههههههههه
اتذكر اول حاجة تعلمتها وهي المسكوتة ونسيت الخميرة جات يابسة ورقيقة هههههههههه .
وكي بديت نتعلم الكسرة جاتني واعرة باش نديرها مدروة كل مرة ندير خريطة ونفس الشي بالنسبة للمطلوع
وبالشوية تعلمت شحال من حاجة بديت بالكسرة و المطلوع و الخبز دار و المسكوتشو ثم الحلويات البسيطة كالصابلي و الكروكي وهكذا
ومازلت نشوف روحي ناقصة بزاف في الطياب خاصة البنة تاع الاطباق التقليدية
ربي يخلينا هذا المنتدى وهذا القسم لي بفضلو استفدت بزاف

اختي لي يهم هو القلب ودرتيه وتعلمتي أما الباقي
رانا لكل كيف كيف كل يوم نتعلمو منو حاجة
فكرتيني في الرقاق بكري نجي نرميه وانا نقلب تسمعي غير اححح
تقلي ماما لي رح تخلعك اخلعيها
وفعلا كي تصدمي تولي ماتحسي بشئ
أما
الأطباق التقليدية مبنية اكثر شئ على التوابل
وننصحك أنك تبلي مرتين مرة وقت التقلية ومرة قبل ما طفي بعشر دقايق
و الرند ديريه دايما مع الأخير لأنه يمرر

والحمد لله كيما قلتي كاين فضاء وين نتعلموا دايما الأفكار الجديدة

[السيدة كرمين]

هههههه والله ياطعام لبيض
كي كريت جاتني عجوزتي ودرت لاسوب وسلطة الفول وسلطات اخرى ماشفيتلهمش المهم تاكل وتستبنن
انا حرت فيها وتقولي هذي هايلة كيفاش درتيها؟
وكي كنت في دارها اللي نطيبها ماتعجبهمش حتان كسرولي يدي وليت مانعرفش قع نطيب

في دارها كاين الشيخ وقدامو لازم تقعد ماكلتها رقم واحد :cool::1:
لكن في دارك نورمال :D

[sel dalia]

شكرا على الموضوع
والله كون نحكيلكم تشبعوا ضحك على الكوارث لي نديرهم
مرة جاوا عجوزتي وحماتي عندنا لداروانا طيبتلهم القهوة وشنو هادي القهوة جات قاطعة بزااااااااااااااااااااااااااااف :mad:وكي شربتها حماتي قاتلي هادي قهوة الرجال ومايشربوهاش وانا حششششششششمت:o ورحت طيبتها من جديد :D:D
وكل مرة يجو تصرالي حاجة يانديرها قاطعة يانديرها ماء وزغاريد :confused:
الله غالب انا والطياب مازال مانتعارفوا :D:D:Dوالله مادبيا نتعلم على خاطر مانيش باغية نحشم روحي مع اهل زوجي مع العلم هو كل مرة يقولي تعلمي يولوكان حاجة صغيرة باه منحشموش مع صحابو في العرضات::eek::eek::eek:
وديما صحاباتي يتفاخرو بواش طيبو مي انا نسكت على خاطر من قلي بطاطا مانعرف حتى حاجة اخرى...تبهديلة ياك
مادبيا تقولولي كيفاش ندير

[دائمة الحمد]

شكرا على الموضوع
والله كون نحكيلكم تشبعوا ضحك على الكوارث لي نديرهم
مرة جاوا عجوزتي وحماتي عندنا لداروانا طيبتلهم القهوة وشنو هادي القهوة جات قاطعة بزااااااااااااااااااااااااااااف :mad:وكي شربتها حماتي قاتلي هادي قهوة الرجال ومايشربوهاش وانا حششششششششمت:o ورحت طيبتها من جديد :d:d
وكل مرة يجو تصرالي حاجة يانديرها قاطعة يانديرها ماء وزغاريد :confused:
الله غالب انا والطياب مازال مانتعارفوا :d:d:dوالله مادبيا نتعلم على خاطر مانيش باغية نحشم روحي مع اهل زوجي مع العلم هو كل مرة يقولي تعلمي يولوكان حاجة صغيرة باه منحشموش مع صحابو في العرضات::eek::eek::eek:
وديما صحاباتي يتفاخرو بواش طيبو مي انا نسكت على خاطر من قلي بطاطا مانعرف حتى حاجة اخرى...تبهديلة ياك
مادبيا تقولولي كيفاش ندير

عزيزتي دليلة الراجل راهو ما يتسامحش مع البرمة ماكانش الي خلق يعرف يطيب
عندك المنتدى عندك الكتب عندك قناة سميرة واسالي ماتحشميش
تعيي وتولي لالاة النسا في الطياب
المهم انوي برك

[rachid5555]

شكرا لك أختي على هذه المعلومات القيمة
أحلى تقييم+9أحلى شكر

[x ام رحاب x]

السلام عليكم ورحمة الله وبركاته عجبني بزاف الموضوع سيدة كارمين وقلت والله غير نحكيلك على تجربتي في هذه الحياة انا كنت صغيرة كنت نقرى كيما كامل لبنات بصح كانت فيا ميزة انميل بزاف للطبخ كي ايديروا دارنا ماكلةماتعجبنيش انروح وانطيب حاجة وخدوخرة بصح ايلاجات بنينة راني كليتها ويلا العكس ناكلها بسيف وبشوية بشوية كبرت وانا انحب الطياب انجرب كل اكلات مدام رزقي وفي رمضان ماكاش الي يدخل في بلاستي للكوزينة انخلي لبنات راقدين ونروحانطيب وكي ينوضو ايقولولي واش خليتينا انطيبو انقولهم خليتلكم السلاطة اديروها هههههههههههههههه وكبرتزوجت و وراجلي يعشق البطاطا المقلية كل مايجيني خويا يلقاني انطيب في البطاطا المقلية ملا راح حرش عليا بابا وقالو هذي الطفلة ماتعرف الطيب ماوالو تعرف الدير غير البطاطا المقلية املا كلم بابا اختي وقالها روحي علمي اختك الطياب راهي حشمتنا مع الراجل وبدات تدحك اختي قالتلو والله غير نعرف الطيب انت ماتخممش عليها راها تعرف تسلك راصها امالا واحد النهار اعرضتو مع مرتو والاولاد وختي وراجلها واختي وخدوخرة مع راجلها او مانقلكش ادرت حالة طوارق هههههههههههههه اوطيبت كامل الطياب الي نعرفوا وكان اقبل ما يجي كان ايقول المرتو دوك اطيبنا غير البطاطا المقلية وهو يضحك ميت بالضحك وكي لحقو ليا ابدى ايشمشم في الروائح وقالي واش اطيبتيتنا وكى حطيتلهم ماامنيش بلي انا الي طيبت من داك النهار ايقولي ماكانش الي ايطيب كيما اختي لعزيزة او ريح راصو من التخمام على راجلي هذي هيا حكايتي وانشاءالله ما تكونش صرعتلك راصك اخت مدام كارمين وسلام

[ام ملاك.]

ابا على لي فريت واش دايرين ههههه

[السيدة كرمين]

شكرا اخواتي لتفاعلكن
مرحبا بيك اختي ام رحاب وتجربتك رائعة

فكرتي لليوم

أن احسن شئ لحفظ الخضر خاصة ذوات الأوراق الخضراء هي:

توضعي حافظات بلاستيكية كبار تع شامية وفيهم ورق النشاف من الأسفل

ضعي الخضر وايضا ضعي فوقها ورق نشاف تبق فترة طويلة وكأنها جديدة

أما في الثلاجة ضعيهم في اكياس الخاصة بالكرواسون من ورق ولو كانت مقطعة رح تبقى خضرة

[x ام رحاب x]

السلام عليكم راني وليت ليكم انا تجربتي مع الحبوب مثلا الوبيا البيضة انشمخها ليلة كاملة امبعد نغسلها مليح وانطيبها عادي كي انجي اندوزنها ما ندوزنش في الطنيجرة الي طيبت فيها اندوزن في طنيجرة وخدوخرة وانحط فيها الطوماطيش والزيت انخليهمم ايطيبو مليح بصح مايتحرقوش امبعد انكمل ندرس الثوم والملح والفلفل ادريس والكمون كي انكمل انحطهم فى الطنيجرة وانمرق شوية وتعود المرقة بنينة وحمرة وتحطيها في الطنيجرة تكمل الطياب مع الوبيا وكي تتجمر كوليها بالصحة

[Wunderbare fehlt]

boriktiiiiiii okhtaah machaalah (y)

[السيدة كرمين]

السلام عليكم راني وليت ليكم انا تجربتي مع الحبوب مثلا الوبيا البيضة انشمخها ليلة كاملة امبعد نغسلها مليح وانطيبها عادي كي انجي اندوزنها ما ندوزنش في الطنيجرة الي طيبت فيها اندوزن في طنيجرة وخدوخرة وانحط فيها الطوماطيش والزيت انخليهمم ايطيبو مليح بصح مايتحرقوش امبعد انكمل ندرس الثوم والملح والفلفل ادريس والكمون كي انكمل انحطهم فى الطنيجرة وانمرق شوية وتعود المرقة بنينة وحمرة وتحطيها في الطنيجرة تكمل الطياب مع الوبيا وكي تتجمر كوليها بالصحة


فكرو رائعة نجربها ونردلك الخبر
جزيتي خيرا على اثرائك وكتبه الله في ميزان حسناتك

[ام ملاك.]

راني وليت اليوم بفكرة ممكم الكل يعرفها لكن نذكر وعلى قولة اختي الوهرانية الله يذكرها على خير
المنتدى فيه مبتدئات
فكرتني الاخت اللي الفق باللوبيا
اختي اذا كنتي حابة تطيبي اللوبيا او اي نوع من البقوليات اللي لازم تتشمخ من قبل بليلة ونسيتي تشمخيها
ماعليك غير تغسليها مليح وتحطيها في كوكوط او كاسرونة كبيرة تعمريها ما وتخليها تغلي لمدة 10 دقايق من بعد طفي عليها وخليها مدة ساعة وهي مغطية
وكملي دوزني ماكلتك ولا اقضي شغلك وارجعيلها بعد ساعة تلقايها كيللي مشمخة من قبل وفكرة سريعة
انا موالفة نستعملها عدة مرات لانني دائما ماانسى تشماخها بالليل

[السيدة كرمين]

راني وليت اليوم بفكرة ممكم الكل يعرفها لكن نذكر وعلى قولة اختي الوهرانية الله يذكرها على خير
المنتدى فيه مبتدئات
فكرتني الاخت اللي الفق باللوبيا
اختي اذا كنتي حابة تطيبي اللوبيا او اي نوع من البقوليات اللي لازم تتشمخ من قبل بليلة ونسيتي تشمخيها
ماعليك غير تغسليها مليح وتحطيها في كوكوط او كاسرونة كبيرة تعمريها ما وتخليها تغلي لمدة 10 دقايق من بعد طفي عليها وخليها مدة ساعة وهي مغطية
وكملي دوزني ماكلتك ولا اقضي شغلك وارجعيلها بعد ساعة تلقايها كيللي مشمخة من قبل وفكرة سريعة
انا موالفة نستعملها عدة مرات لانني دائما ماانسى تشماخها بالليل

في طريق التجريب هههههه
ايضا مليح للوبيا البيكربونات واحيانا لما نشمخها
ندير معها خميرة الحلوى ما تخذش وقت طويل وطيب

[ام ملاك.]

صباح الخير
جبتلكم اليوم فكرة بسيطة
ابدا ماتزيديش تقشري الزرودية فوائده كلها في قشرته(شحال وحنانتعذبو في تقشارو ونرمو في فايدته ههه)
ماعليك غير اغسليه مليح وقطعي الراس والذيل برك بلا تقشار (شفتو شحال سهلت عليكم الكوزينة ههه)
اذا كنتي عيانة وماراكيش قادرة تطيبي او كارهة من الطياب حتى ولو جاوك الضياف اسرع طبق هو الروز (قشري البصل وقطعيه وثومتين مرحيين او مقطعين وجومبو وملح فلفل لكحل وكمون وطماطم حب مرحية حبة برك ونص مغرفة كبيرة طماطم علب ملح اكيد وزيت حطي الما يغلي وارمي كل المقادير فوق واذا عندك اضافات زيديهم مثلا زردية مقطعة مكعبات جلبانة وارمي كلشي مع بعض بلا ماتقلي وتكسري راسك غير تبدا تدخل الطياب في الزرودية ارمي الروز نتاعك وخليهم يطيبو )العملية ككل ماتحتاجش اكثر من نص ساعة من نهار تبداي توجددي حتى تخلاص الطبخة ويجيك الذوق رائع كأنك عاملتيه باحترافية
هذا الروز نتاع التفنيين ههههه الكل يسقسيني على مقاديره كي يذوقوه عندي نقول في قلبي لوكان تعرفة كيفاش طيبتو هههه
لي عودة باذن الله

[جويرية الإيمان]

السلام عليكم

رجع باش نشوف وااش واش راكم دايرين فيها

راني قريت الصفحات الكل .

كنت مريضة عندي 5 ايام و أنا في دار بابا و البارح لعشية رجعت لداري

هكذك و مازلت شوي دايخة و مش مركزة و انا حابة نشارك في المواضيع .

وشراكم دايرين مع الكوزنية ؟

نعرفو ؟ و الله غير توحشت كوزنتي و ماكلتي

خلاص سلام راني عييت شوي

في أمان الله .

[السيدة كرمين]

شكرا اختي مونية افكارك رووووووووووووعة تبارك الله
خاصة روز التفنيين أكيد نحتاجوه لكل خاصة ايام الميناج


جويرية ألف الف سلامة حبوبة طهور ان شاء الله
معليش ادللي حتى تروح عليك الدوخة

[amindell]

شكرا وبارك الله فيك

[السيدة كرمين]

وفيك بارك عزيزتي نورتي الموضوع

[السيدة كرمين]

فكرة اليوم خاصة :

غيري ماء الزيتون وضعيه يغلي مع شوي خل

[x ام رحاب x]

سلام اخواتي فكرتيني في الزيتون انا نشري الزيتون كمية كبيرة وانرمي الماء الزيتون وانعاود انعمر الزيتون بالماء صافي وانحط قطع القارص مع الزيتون وانخليهم ليلة كاملة وكي اذوقي الزيتون تلقاي الملح كامل راح اتصفيه وادريه في اكياس الكونجيلاتور وانخبيهم وانهار اتحبي اطيبي اجبديهم ومباشرتا للطياب بلا ماتغليه وانشاءالله انكون فدتكم

[السيدة كرمين]

هي فعلا فكرة وتدبيرة رائعة

جزيتي خيرا نورتي صفحتي بردك الثري

[السيدة كرمين]

هي فعلا فكرة وتدبيرة رائعة

جزيتي خيرا نورتي صفحتي بردك الثري

[السيدة كرمين]

أفكار اليوم الخاصة بالشواء

- افضل استخدام الأعواد الخشبية
- وافضل نقعها ربع ساعة قبل ما نستخدمها
- بالنسبة لأي لحم من الأفضل نقعه
- يفضل شويه قليلا قبل ادخاله في الأعواد
- اذا كنتي تستخدمي الكبدة قبل ما تشويها حطيها في ماء مغلي
لأنها بذلك تحفظ قيمتها الغذائية
- افضل المنقوعات للحم هي المكونة من الحليب لأنه يخترق اللحم واستعملي صحن زجاجي.
- لاتستخدمي اللحم من البداية واتركيه في المرحلة الأخيرة لأن الملح يؤخر النضج
- اذا درتي ليكوت انصحك باستخدم ملعقة صغيرة من العسل فذلك يعطيها ذوق ولون رائعين.

ياريت تفيدونا بطرقكم وحيلكم الخاصة بالشواء ههههههه

[x ام رحاب x]

السلام عليكي حبيبتي انشاء الله تكونو كامل بخير انشاءالله انا يوم قبل مانشوي بليلة انجيب مثلا صدر تاع الجاج انقطعو طويل
وانحط عليه الخل ولاموتاغد فلفل اكحل ملح سكنجبير وشوية ثوم شوية راص الحانوت ولبن هو الي يمد طراوة للجاج وانخليهم ليلة كاملة وفي الصباح انصفي كامل الخليط وانشويه في الطاجين تاع الحديد المتقوب تاع الخبز اطيبو بسرعة والبنة تاع الشوا مانقلكش وبالنسبة للحلم المرحي اندوزنهم والنشويهم في الطاجين الي قلتلك ونشويهم على نار قليلة ويطيبو مليح ونديرهم في الخبز الهمبورقر وانشاءالله انكون فدكم ولو بالقليل

[السيدة كرمين]

شكرا يا أم رحاب جزيتي خيرا لاثرائك للموضوع
طريقتك تبان بنينة يعطيك الصحة

[almazalina22]

صبااااااااح الخير انا هذا وين شفت الموضوع حتى وليت نزنق في المنتدى هههه لوكان غير يثبتوه باش يشوفوه
المهم انا عندي بزاف حكايات هههه وافكار انشاء الله تفيدكم ونشكر بزاف السيدة كرمين على هذ الفكرة ياخااااه كنت قاع ما ندخلش مواضيعك من اسمك كنت تبانيلي قاورية هههه حتى دخلتي للكوزين باش عرفت واش راني مراطية هههه اسمحيلي
المهم انا اول حاجة طيبتها هي كسرة واش نقولكم يابسة حجرة ورقبقة تذبح زاوش بصح بابا كلاها باش يشجعني كنت عمري 8سنين ومن بعد تعلمت العجائن يعني معارك ومسمن وخبز وكنا احنا خبزنا يطيب في كوشة العرب نفرشو تحتها السمار هو نبات والكوشة مبنية بالطين وحد البنة فيه رووووعة شكون تعرفو
من بعد نزيد نرجع بااااااي

[almazalina22]

السلالالالالالالالالالام شفتكم ما دخلتوش من ورايا دوختكم واقيلا ههههههههه
شوفو نحكيلكم مرة درت في الغدا بذنجان مع لحم مرحي كيما يقولو المصرييين مصقعة حطيتها للراجلي كلا شوية وقالي ساخف على الحليب والخبز ما يتشرطش كي ما تعجبوش الماكلة ولا يقول اعطيني بيض مقلي وهو عبد قديم في الماكلة يعني يحب غير المراقي والشخاشخ والهبرات ههههه المهم في العشاء طبعا راهي مول معمر ناقص غير واش كليت انا وولادي
حكمتها حطيتها في الكوكوط وزدت البصل والقصبر وتوابل وبطاطا وثوم وقرعة وطماطم وقليت شوية ومرقت وكي طابت البطاطا ميكسيت كلش وزدت دشيشة الشعير لا تعرفوها وممممممممم ولات حريرة وحطيتها كلا حتى خرجو عينيه وقالي هذي الشربة في رمضان وما درتيهاش بنينة ضحكت قالي او نعرفك واقيلا راني ناكل في البذنجان مرقة ههههههههههه نتفكر حيلة اخرى ونرجع مواااااااااااااح ليكم

[السيدة كرمين]

صبااااااااح الخير انا هذا وين شفت الموضوع حتى وليت نزنق في المنتدى هههه لوكان غير يثبتوه باش يشوفوه
المهم انا عندي بزاف حكايات هههه وافكار انشاء الله تفيدكم ونشكر بزاف السيدة كرمين على هذ الفكرة ياخااااه كنت قاع ما ندخلش مواضيعك من اسمك كنت تبانيلي قاورية هههه حتى دخلتي للكوزين باش عرفت واش راني مراطية هههه اسمحيلي
المهم انا اول حاجة طيبتها هي كسرة واش نقولكم يابسة حجرة ورقبقة تذبح زاوش بصح بابا كلاها باش يشجعني كنت عمري 8سنين ومن بعد تعلمت العجائن يعني معارك ومسمن وخبز وكنا احنا خبزنا يطيب في كوشة العرب نفرشو تحتها السمار هو نبات والكوشة مبنية بالطين وحد البنة فيه رووووعة شكون تعرفو
من بعد نزيد نرجع بااااااي


اهلين ومرحبا بيك حنونة نورتي الموضوع بخفة ظلك وردك الجميل
وليت قاورية على سعدي هههههههههه وكي نكون قاورية متدخليش هذا راسيست ولا واش :D
أسمي مشتق من اسم زوجي أمين واسمي كريمة
ونا فعلا ننزعج لما يقولولي كارمن خصني نكتبها في التوقيع :1:
فكرتيني فيبابا ليومنا هذا هو كان الوحيد لي يطلعلي المورال أما ماما ما تحبش
تقلي تخلطي
نشفي فليسي كنت نحط المقلة لكبيرة باه ندير لعشا
تجي هي تقلي وش راح اديري نقلها مزال مابانش
يجي بابا خاوتي بالواحد واش لعشا نقلهم مزال مابانش
تقلهم غير خلوها كي يتحط فطابلة تقلك اسنى نزيلو حاجة بالاك يبان :confused::D:1::rolleyes:



السلالالالالالالالالالام شفتكم ما دخلتوش من ورايا دوختكم واقيلا ههههههههه
شوفو نحكيلكم مرة درت في الغدا بذنجان مع لحم مرحي كيما يقولو المصرييين مصقعة حطيتها للراجلي كلا شوية وقالي ساخف على الحليب والخبز ما يتشرطش كي ما تعجبوش الماكلة ولا يقول اعطيني بيض مقلي وهو عبد قديم في الماكلة يعني يحب غير المراقي والشخاشخ والهبرات ههههه المهم في العشاء طبعا راهي مول معمر ناقص غير واش كليت انا وولادي
حكمتها حطيتها في الكوكوط وزدت البصل والقصبر وتوابل وبطاطا وثوم وقرعة وطماطم وقليت شوية ومرقت وكي طابت البطاطا ميكسيت كلش وزدت دشيشة الشعير لا تعرفوها وممممممممم ولات حريرة وحطيتها كلا حتى خرجو عينيه وقالي هذي الشربة في رمضان وما درتيهاش بنينة ضحكت قالي او نعرفك واقيلا راني ناكل في البذنجان مرقة ههههههههههه نتفكر حيلة اخرى ونرجع مواااااااااااااح ليكم


راكي قافزة تبارك الله عليك ياريت تنعتينا حيل كيما هاذو انا لحق قلااااااااااااال جدا البدائل عندي
يعطيك الصحة على مرورك وشعروك وخفة ظلك

في انتظار ابداعك:19::19:

[<نَجْمَاتْ>]

السلام عليكم وانا ندور في المنتدى شدني هذا الموضوع وان شا الله تقبلوني معاكموها هي حكايتي مع المطبخ نحكيلك انا دخلت المطبخ وانا صغيرة كانت امي مريضة في المستشفى انا اللي تحملت مسؤولية المطبخ مرة درت بربوشة بالحليب واللفت ومكانش علبالي بلي امي مديرش الزيت انا درتو وكي خرجت امي من المستشفى واحد اليوم هي دارت البربوشة كيمايقولولها تاوع الجي كسكسو وانتبهت ليها وشفتها مادرتش الزيت مقدرتش نقلها خفت تضربني وخبيت هذيك الذكرى حتى تزوجت وانجبت بناتي وحكيتهالهم كان عمري هذاك الوقت12سنة وهاني حكيتهالكم اليوم وهاذ الذكرى عندها اكثر من20 سنة وكي كنت نقرى في المتوسط كنا دايرين الصف وسمعت واحدة تقول لصحبتها على وصفة البسبوسة وكي خرجت رحت مباشرة للمطبخ وجربتها وجات 444 واناد اول واحدة اديرلهم البسبوسة رغم انو عندي اختي اكبر مني

[السيدة كرمين]

الله يبارك اختي باين عليك شاطرة لأن الانتباه من اسباب نجاح المرأة

يبدو انك كيفي دخلتي المطبخ من الصغر وهذا لي يسهلك ضرك
حسن الاختيار وحسن التذوق طبعا اذا توفر عشق الطبخ
ربي يحفظلك والدتك ويحفظك لعائلتك

[almazalina22]

صبااااااااااح الخير راني نشوف عجبوك زبايلي هههههههه
شوفي انا مارميت والو بصح قلب اللوز يييييييييييااااااا وشحال كلاو الرفيس من وراه ههه كيما يصلحش ويجي حجرة ما نشربو ما نخسر عليه العسل خخخخ نرحيه في الربو وووووووووهب نفور والباقي راكي عارفة ونولي شاطرة قدامهم وانا زبلة درتلها تزييين ههههههههه اضحكو نورمال انشاء الله نكون مفيدة بقدر الامكان
انتظرونيييييييييييييييييييي
والله ما كنت ننتبه لمواضيعك ندخل للكوزينة برك نعرف الجديد من بعد وليت نزنق في المنتدى هههه واسفة نحسبك تحطي ماكلة لهيه خخخخخخ علا هذي ما دخلتش بصح نوعدك راني معاك في هذ الموضوع حتى تحاوزيني وتشبعي من زبايلي خخخخخخخخخخ

[السيدة كرمين]

هههههههههههههه ربي يفرحك قتلتيني بالضحك
صدقيني اعتبري الموضوع موضوعك وان ظيفة عندك

راكي تبارك الله
تعرفي ياريت كنت نفكر هكذا من قبل
لأني قلب اللوز الطبخة الوحيدة لي ياااااااااااااااااااااااما رميتها
بسبب فشلها الذريع

هاتي وخرجي وش عندك لأني اعتبرك كنز

[جويرية الإيمان]

عندي حكاية تقريبا مثل حكاية ألمازة على الباذنجان

مرة خلاصلي القضيان ما لقيت ما ندير و كان عندي شوي لحم مرحي

و 2 و لا 3 حبات باذنجان وحدة ذابلة و وحدة نص نص و وحدة صغيرة

و حبات طماطم صغار

قعدت نخمم واش ندير واش ندير

مالا تفكرت المصقعة نتاع المصريين و عمري ما درتها

رحت طيبت اللحم مع البصل و التوابل

و قليت الباذنجان و درت صوص تومات و حطيتهم في بلا و مباشرة للكوشة

و من بعد حطيتهم لراجلي و قتلو : الله ما لقيت ما ندير

قالي عودي ديما ما تلقاي ما تديري .هههههه

و طبعا اختك ما كلاتش خطراها ما نحبش اللحم المرحي .

[almazalina22]

حبيبتي شكرا هذا من تواضعك شوفي زبلة واحداخرى مرة جات عجوزتى وماا دراك ياخي يعطيك ما تغلطي قدامهم درت شربة وسلاطة وروز وحمرت الدجاج زعمة وااااااع كي طليت على الروز ماعجبنيش ماهش كل حبة وحدها هههههههه شوفي حكماتو وخيتك قطعت البصل رقيق وزدت المعدنوس والبيض والروز والتوابل وهوووووووووب في الفرينة خبيزات واقليتهم ولاو خبيزات الروز هههههههههه حطيت الدجاج محمر ودورتو بيهم خخخخخ
كلاتهم غير هوما هههههههههه عندك تقوليلها تباصيني

[السيدة كرمين]

تبردي على القلب
تعرفي عائلتي مايحبوش الماكلة كي تبات
امالا نعاودها ونعملها طاجين في الكوشة
كيما مرقة الجلبانه كي تبات مع شوي بطاطا مقطعة مربعات
وبيض وشوي خميرة الحلوى وراني قدمتو

[السيدة كرمين]

اذا كانت عائلتك مايحبوش اللون الأبيض واقصد مثلا البيشاميل
ديري الحيلة هاذي تصلح فوووووووووووووووور
كنت نعملها لأن أمي ماتحبش البيشاميل
منذ اشهر قليلة اكتشفت انها صوص ايطالية ههههههههههه معروفة
واقصد البينك صوص

لما نحب نعمل مكرون بالبيشاميل
نعمل كل الخطوات عادي كيما درتهم من قبل في موضوع لكن وقت ترتيب الصينية نخلط الصوص بيشاميل
مع الصوص طوماط تولي عندك بينك صوص وهذا اسمها الايطالي
تمزجيهم وتعملي وكأنك بالبشاميل طبقة مكارون مخلطة بالبينك صوص ومرة حشوة اللحم المرحي ومبعد الطبقة الأخيرة مكارون
بالبينك صوص وفي الأخير طبقة الفرماج وتقدميها متتتتتتتتتتتتتتتتعة

[almazalina22]

شكرا على المعلومة
انا راجلي مايحبش القرفة نديرها عود مايفيقش
اللوبيا نشمخها في الليل مع خمارة القاطو وفي الغد نصفيها ونعاودلها ماء جديد ونطيبها
الخبز الصابح نسخنو في الفرن ونكرفجو نسيرو ونخليه شابلير للبيتزا المقلية او سفيرية ووووو
سميد حرش شوية نحمصو ونخبيه والعسل دايما كين كاش واحد على غفلة نخلط الطمينة ودائما كي نخدم القاطو نقص شوية في علبة وفي المجمد للضياف الغفلة
كي نتفكر نزيد نرجع سلالالالالالالالالالام

[جويرية الإيمان]

إيييييييييييييييييييييه

الله يبارك عليك يا ألمازة كل حاجة عندك لها فكرة .

[المنديل الابيض]

هههههههههههه.....المازة راكي داهية ...ربي يبارك

حبيت نقلكم برك البيشامال زيدو فيها شوية جوزة الطيب راهي تعطيها بنة عضيمة
و كي ترحيو التوم و تبقى الريحة في يديكم حكو يديكم على مغرف انوكس مع الماء و راح تروح الريحة
هدا واش تفكرت كي نزيد نتقكر راني نرجع
شكرااا كارمن على الموضوع

[السيدة كرمين]

شكرا غاليتي المنديل الأبيض على الاظافة الرائعة

بالنسبة لجوزة الطيب هي فعلا من المطيبات الرائعة واساس البيشاميل
في جميع مطابخ العالم لكن للاسف منذ فترة اكتشفنا انها محرمة فلم
تعد تدخل في الطبخ لأنها تعتبر من المسكرات،
أما فكرة المغرف صحيح هي نافعة بكري نهار نعملوا لمختومة
نقلبوا صحن لينوكس وحكوه بيدينا باه تتنحى الروايح

ربي يخليك وشفتي المازة الله يبارك دايرة سوكسي صحيح ههههههههههه

الدار دارك وقت ما دخلتي مرحبا بيك وباظافاتك وخبرتك اللي نحتاجوها

تحياتي ليك

[<نَجْمَاتْ>]

اني رجعت انا مر درت حلويات العيد قالي زوجي وامي تاني دريلها كي خلصت الحلويات تاوعي بديت نديرلعجوزتي ويصادف انا ندير فيه وهي جات يعني عجوزتي وشافت المودال اللي راني. نديرلها فيه كي طاب هذاك القاطو جا حجرة مع العلم انويتعسل منبعثوش تقول هذي لاه حكماتو نبعثو حجر ما لا رحيت جدو في الروبو وزدتلو نصف المقادير الا الفرينةدرتوا هو مرحي والله غير جا روعة روعة ويقلولو هاذ المودال لسان القط بلاك راكم تعرفوه

[السيدة كرمين]

صباح الخيرات


مرحبا بيك حنونة الدار دارك،فعلا فكرة رائعة وحتى انها اقتصادية
نشفى على روحي كي مانقراش يوم الاثنين لعشية نعمل القاطو
وفي حال مارضيتش على الشكل أو الذوق نقلبو بنينو بشوي مكسرات
و شامية وشكولا........... وهوباااااااااااااااااا يقولولك واش هي لاروسات ههههههههه
حتى المسكوتشو كي ما يصدقش نديرو ترافل
عجينة البقلاوة لي تبقى اما نديرها على شكل رشتة ومع مجموعة من المكسرات وعسل
نديرها عشاش او نصبها في الصينية وكي تبات نقصها مربعات صغار تخرج روعة
أو ندير بيها حلوى اخرى .....................

يومكن سعيد

[karima 40 سابقا]

السلام عليكم عجبني الموضوع وقلت نحكيلكم حكايتي انا لحد الان منعرفش اندير الكسرة ديما تخرج يابسة حجرة كنت كي

بديت نتعلمها كيما قالت الاخت كل مرة تخرج خريطة تاع كاش دولة وضرك كي نديرها مدورة تخرج يابسة ومعرفتش السبب

الى يومنا هذا.

اما بالنسبة لقلب اللوز اول مرة درتو كان في رمضان اللي فات وخرج هايل و الوصفة هزيتها من هاذ المندى انظن فيها

الخميرة .

[<نَجْمَاتْ>]

اختي كريمة انا نقولك على الكسرة وممكن نفيدك شوفي كي مدريلهاش البسوس بزاف لميها فقط واقعدي تشكلي فيها بيديك حتى تروح هذيك الشقوق من غير متعجنيها اما اذا زودتيلها البسوس اعجنيها حتى تشرب هذا لبسوس.وتختفي الشقوق لبسوس نقصد بيه الزيت او السمن

[السيدة كرمين]

اهلين اختي كريمة ومرحبا بيك
نورتي ام جمانة

كريمة فعلا كيما قاتلك اختي ام جمانة
وزيدي لما تعجني تحب الدلك وتقطاع باه يخرج الرخساس بنين
ويذوب فالفم


جزيتما خيرا

[السيدة كرمين]

فكرة اليوم

عجينة سهلة لجميع انواع الفطائر


2 كاس فرينة

ملعقتين زيت عادي

ملعقة صغيرة خميرة الحلوى

ملعقة خميرة الخبز

4 ملاعق حليب بودرة

1ملعقة سكر

رشة صغيرة ملح

ماء دافئ للعجن


تعجن جيدا تخمر مرتين ،في فصل الصيف تخمر في الثلاجة

تقبلن تحياتي

[karima 40 سابقا]

شكرا ليك اختي ام نور وجمانة و شكرا ليك اختي كرمين راح نجرب النصائح و ان شاء الله ننجح هاذ المرة

[السيدة كرمين]

وانا في انتظار تجربتك يارب تنجح

تحياتي

[lilouchaf]

sabah el kheir
ana djadida fi mountada ntemena ncharekoum an karib bi atbaki
ou nstfed bi nassaih dialkoum

[ام محمد انيس]

شكرا جزيلا حبيبتي موضوع اكثر من رائع

[أم البشائر]

عجبتني الفكره الله يسجيك

انا نحط البهارات والثوم قبل عشر دقائق من انهاء الطهي مانقليش بيهم باش تبقى بنتهم مليحه

الملح نضيف قطعه بصل تمتص الملح

الخبز باش ما ندلكش بزاف نعطيه الماء بزاف في البدايه ومن بعد يسهل عليا الدلك ويمتص هذاك الماء ويجف

هذا برك باه نشارك منيش متفكره واش نكتب ههه

[x ام رحاب x]

انتو بتزاكرو من ورايا هههههههههههه واشراكي اختي مدام كارمن واشراكم اخواتي انشاءالله تكونو كامل بخير نبداو بسم الله كي نعودو نخدمو المايوناز وتفسدنا المايوناز مانرموش المايوناز انعاودو انحطو حبة بيض في الطاس تاع الميكسور وانطلعوها مع الاول بشوية وامبعد انضيفوالبيض الي فسدنا بشوية وانطلعو ه بشوية بشوية وانطلعو حتان تعاود اتشد المايوناز ويلا ماطلعتش مليح زيدي شوية ز يت وكملي حتان اجيك كيما راكي تحوسي عليها انشاءالله انكون فدتكم ولو بالقليل

[السيدة كرمين]

شكرا لكن اخواتي

ليلوشاف مرحبا بيك بيناتنا يارب نقدرو ننفعوك وتنفعينا بتجاربك

أم محمد انيس نورتي الموضوع بطلتك ياريت افكار من مطبخك

دمعة قمر يابنتي ليه الدموع ؟؟انا ايضا نبهر في الأخير ودبشة او معدنوس وفلفل حار

نخليهم للاخير لكن ايضا نبهر قليلا في البداية لأن هذاك الذوق لي يدخل خاصة في اللحوم

ام رحاب نورتي غاليتي وشكرا للتدبيرة الرائعة وهنيتينا من رمي البيض بعد ما تخسر المايونيز


جزيتن الفردوس الأعلى

[kosrah]

يعطيك الصحة يا أختي موضوعك يفتح الشهية
للمشاركة فيه وفكرة رائعة لتبادل خبرات الطبخ وفنونة

[kosrah]

نعطيكم فكرة عاي الفلفل الأخضر كجي تقليه":تحطي الفلفل في بسينة وتكبي علي ماء غالي وخليه 10دقائق في الماء وتجبديه وتمسخيه وتفليه يبفي محافظ علي اللون والزيت نتاعك ميتحرقش يقعد مليح

[soumeya1987]

انا اول تجربتي مع المطبخ كانت في سن العشر سنوات ;في يوم من الايام استغليت غياب امي عن البيت و حبيت ندير كسرة رحت للحاجة الصعيبة لعبتها شلطرة هههههههههه والكارثة باش ندير السميد درت الكسكس الرقيق اللي يديرو بيه المسفوف وما حيش يتاملي و بقيت غير نزيد ف الماء و بسيف ما خبزتو و حرقتها كي طيبتها ووووو واش نحكي و واش نخلي كي جات ماما وبختني لانها خافت الغاز: لكن والدي شجعني و اصبحت امي كل مرة تعطيني نعجن مقدار خبزة مرة المطلوع و مرة الرخسيس ومرة المسمن و ......حتى اصبحت اليوم امراة و تزوجت و اصبحت اتقن جميع انواع الخبز الجزائري و المعجنات و الشخاشخ و.....و انا اعشق الطبخ و اجد فيو متعة كبيرة و سعادة غامرة وانا عضوة جديدة و ان شاء الله راح نفيدكم

[goraya]

شكرااااااااا على الوصفة

[السيدة كرمين]

يعطيك الصحة يا أختي موضوعك يفتح الشهية
للمشاركة فيه وفكرة رائعة لتبادل خبرات الطبخ وفنونة

شكرا غاليتي لردك الجميل الذي زين موضوعي وياريت تفيدينا بخبراتك ونصائحك

نعطيكم فكرة عاي الفلفل الأخضر كجي تقليه":تحطي الفلفل في بسينة وتكبي علي ماء غالي وخليه 10دقائق في الماء وتجبديه وتمسخيه وتفليه يبفي محافظ علي اللون والزيت نتاعك ميتحرقش يقعد مليح

شكرا غاليتي لفكرتك الجميلة
ربي يكتبها في ميزان حسناتك

انا اول تجربتي مع المطبخ كانت في سن العشر سنوات ;في يوم من الايام استغليت غياب امي عن البيت و حبيت ندير كسرة رحت للحاجة الصعيبة لعبتها شلطرة هههههههههه والكارثة باش ندير السميد درت الكسكس الرقيق اللي يديرو بيه المسفوف وما حيش يتاملي و بقيت غير نزيد ف الماء و بسيف ما خبزتو و حرقتها كي طيبتها ووووو واش نحكي و واش نخلي كي جات ماما وبختني لانها خافت الغاز: لكن والدي شجعني و اصبحت امي كل مرة تعطيني نعجن مقدار خبزة مرة المطلوع و مرة الرخسيس ومرة المسمن و ......حتى اصبحت اليوم امراة و تزوجت و اصبحت اتقن جميع انواع الخبز الجزائري و المعجنات و الشخاشخ و.....و انا اعشق الطبخ و اجد فيو متعة كبيرة و سعادة غامرة وانا عضوة جديدة و ان شاء الله راح نفيدكم

مرحبا بيك اخت غالية بيناتنا وياريت تفيدينا بخبراتك
وافكارك ونصائحك فكل يوم نتعلم جديد
جزيتي خيرا

شكرااااااااا على الوصفة

العفو غاليتي

[المنديل الابيض]

ممكن تفهموني كيفاش التتبيل من الاخير
يعني الحم تقلوه مع البصلة برك و و لا كيفاش؟؟؟
وزعما هاكا الماكلة تجي بنينة خير
ياريت توروهالي بالتفصيل باش نجربها لاني اول مرة نسمع بيها
و صحا رمضانكم

[السيدة كرمين]

عدنا لموضوع اساسيات الطبخ

عزيزتي المنديل الابيض اسفة لأني جئت متأخرة وعدت بعد ظروف مررت بها

اللحم يلزم يتقلى في الزيت قبل الطبخ وتنحيه وهذاك الزيت تقلي فيه البصل وباقي المكونات ومبعد تظيفي اللحم وتمرقي

يلا يالحراير تحضيرات العيد على قدم وساق هاتو افكاركن

[ام سوهيل]

شكر على الموضوع الراع والمفيد

[السيدة كرمين]

العفو عزيزتي نحن في الخدمة

[المنديل الابيض]

عزيزتي كارمن عودا حميد و ان شاء الله ماتزيديش تغيبي علينا

انا تاني ندير كيما قلتي مي كاين ينات قالو انو التتبيلة تكون في الاول كي نقليو اللحم و تاني من الاخير يعني كي يطيب الاكل و تزيدي تبلي من جديدي
هدي لي مافهمتهاش كيفاش ؟؟؟
و مارسي عليك حنونة

[oumeima m]

mrrrrrrrrrrrrrrrrrrrrrrrrrrrrrrrrrrrc

[ميمي مازوني]

ana kol manadkhol llkozina nrobalha w nakhroj besah nsayi w nsayi w nsayi hata tanjahli hadik ltabkha had liya rani dayra karita m3a lmsaman w rah halaf mayanjahli wana rani halfa najhah besif 3lih li3andha kech sar ta3 najah lmsaman tatfadal 3liya biya w lah yhfadkom

[ام سوهيل]

صباح الخير عليكم اسمحولي طولة باش رجعة
المهم هادي حكايتي اوتجروبتي الاولى معى القاطو

كنت صغيرة وكان قريب عيد الفطر خرجة ماما كان عندها موعد عند الطبيب

وجيت انا لعبتها شطرة قلة اندير المشوك راهو ساهل مايحتاج لطبيع لوالو يعني كور وعطي العور هههههههههههههههههههههههه

درة كامل المكويناة وكيجات في الخمارة ملقيتش كيس كامل مغلوق كلهم انصاف املى درة وحد الربع انصاف الكيس ولى خمسى وجدته وكورته ودخلته ايطيب وكي جيت

انطل عليه الكريث العضما لقيته خرج كامل من الصنية خفت من ماما ومعرفتش وش ندير خممت شوية ومن بعد خليته انشف شوية في الفرن وخرجته ورحيتله ولديه

ودرته بنيون ومقلتش لماما وش صرا المهم عجبها وخلاص

وقتلي من جبتي الوصفة قلتلها شفتها في التلفاز ههههههههههههههههههههههههههه


ولى كاش متفكرة نعاود نرجع

[mimi souma]

انا حكايتي مع الطبخ خكاية قرايتي ماخلتنيش ندخل للكوزينة "ميدسين " بصح غير كملت درت للكوزينة لاني نعشقها ومالغري ماكنت نعرف ندير والو وكانو يضحكو عليا بصح اول مرة درت فيها حبة حلوة درت حلوى لعرس خويا باللوز وكانت حلوة صعبة وخرجتلي من اروع مايكون وماكلتي دوكا كي نطيبها يشهدو بيها ههههه ان لم نقل اديتهالهم ماشي شرط وحدة تكون اتطيب من الصغر الصح تكون تحب تطيب
انا الاضافة اللي حابة نزيدها فالبيشاميل كيما قلتي عليها بصح نضيفلها الفورماج وفص ثوم مرابي وشوية معدنوس غير الورق نقطعو مليح ورشة جوز الطيب هادو نديرهم بعدما نطفي والله الطعم ديالها يتبدل
والاضافة الثانية على الباقة العطرية "عود كرافس عود معدنوس عود زعيترة وورقة رند بدون الاوراق نربطهم مليح بخيط ونوجد عشرين وحدة ونخبيهم فالكونجيلاتور في باطة صغيرة كلما نكون راح نطيب نجبد وحدة خاطر المعدنوس يخسر هكذا نضمن كل يوم عندي

[nolla]

موضوع رائع انا نحب الطبخ و نشوف مهما الواحد تعلموا و تقنو يتصادف مع الجديد و يتعلموا مجال الطبخ مجال واسع غير محدود

[ام اروى وعاصم]

شكرا على كل النصائح

[rachedi souad]

أنا نحب الطبخ ياسر والحمد لله لي نجربها نحاول نتفنن فيها وتجي مليحة و تعجب كل لي يذوقها
والحاجة لي ما صلحتليش هي أوراق البوراك أو الديول ما عرفتش الطريقة الصحيحة باه يضلحو
أخواتي شكون لي عندها الوصفة الصحيحة لأوراق البوراك أو الديول تفيدني بيها
لأن زوجي من محبي البوراك وجزاكن الله عني خيرا

[sousou sahraoui]

10000000000000000000 شكر

[mixo]

مشكورة على النصائح

[Nouzette]

يعطيكم الصحة

[السيدة كرمين]

اشكركن على المرور و مشاركتي قصصكم
الاخت لي سألت على التتبيل اسفة على هذا التأخير
نعم التتبيل يكون في البداية ونهاية
خاصة بعض الاكلات تحتاج رائحة الفاح مع الاخير

صحة رمضانكم وربي يتقبل منا ومنكن