اه يا رب ...

[مشكلتي]

السلام عليكم و رحمة الله
دون اطالة انا كنت مخطوبة لشخص جاو مدو كلمة فقط من بعد انا و هو صرات بينا مشاكل و بقينا 6 اشهر ما بغاوش اهلو يتقدمو رسمي بعد الكلمة و هو و هوما كل مرة يتحجو بحجج مرة زواج اختو مرة مرض احد من اهلو كل مرة علاش و كبرت المشاكل و الحساسيات و اقطعنا كل شيئ بينا
بعد عام و نصف تخطبت لشخص اخر و تقرات فاتحتي
هوما ندمو الكل و حتى هو و بعدها قبل زفافي بشهر اكتشفت انو خطيبي -نتاع نساء و و و - حمدت ربي و بطلت مع كل القهر و الالم قبل شهر من زواجي

عاد خطيبي الاول طلب السماح سامحتو حاول التقرب مني رفضت و لحسن حظي فعلا اكتشفت انو متزوج و كان يحاول ربما الانتقام مي لقاني صديت كل الابواب و الحمد لله

المشكل انهم الكل صارو يستـشـفاو فيا خاصــة هــو صار يقولو راهي خدعاتو و خاصة هو يقول باعتني و بدلتني و خرج فيها ربي
و اقسم بالله لحكاية مثل ما حكيتهالكم بالضبط

وحتى ليا صار يقول انتي غدارة و بدالة و راكي 33 سنة خرج فيك ربي و راحت عليك

هل برايكم كان واجب عليا ننتظر اكثر ؟؟؟
هل 6 اشهر غير كافية يتقدمو بخطبة رسمي ؟؟؟

هو يقول ظنيـتك زعـفانة و راح ترجعيلي ؟؟ هل الزعاف عام و نصف ماهيش كافية يصلح اللي بينا و يجيو للدار كحسن نية ؟؟
هل خطبتي للاخر ابتلاء ام فعلا عقاب ؟؟؟

هل فعلا نسـتاهل و خرج فيا ربي بالثاني ام ماذا ؟؟؟

و كيف أقــــــــــــوى

لا اله الا الله ... حسبي الله و نعم الوكيل
رايكم يهمني جدا جدا فلا تبخلوني اكرمكم الله

[yousra14]

السلام عليكم

الزواج شيئ مكتوب من عند الله وليس عليك أن تتحسّري بل سلّمي أمرك لله

بغضّ النظر عن أسباب فشل الخطبتين الإثنين ليسا من نصيبك وفقط ــــ المكتوب مكتوب ـــــ


إذن انظري للمستقبل وانزعيهما من تفكيرك و لا تسمعي لكلام الناس لأنّك تتعبين وكلامهم لايقدّم ولا يؤخّر


لا تندمي فليس لك ذنب فقط اشغلي نفسك بأمور أخرى في انظار نصيب آخر يسعدك ان شاء الله عليك بالدعاء و الاستغفار

[ana hia]

هذو ناااااس مرضة في رووووووووووووووووووووسهم ......... إذا كنتي فحلة ما تديهااااش فييييهم ..... ما يششفاااو فيييييك ما وااااالو رااهم محروووووق قلبهم عليييك ........ هاذي يسموها عقلية الرخس ...... هاذو ناس رخاس و انتي رايحة معاهم ...... ربي يهديك عيشي حياتك ... عادي بناااات الحارة وحدة فيهم ما زوجت
وحدة نهار العرس بالذات سيبارات من خطيبها و هاهي لاباس عليها ...... علاابالي بلي راكي مرة فحلة .... راه مشكل صغير ويعدي .... ما تخمييييييش راه يحلها الحلااااال سبحااااااااانو

[مواطنة]

اختي هذا مكتوب و امر المؤمن كله خير اكيد فيه حكمة و ما تسمعيش لكلام الناس و خاصة الخطيب الاول يحاول برك يرجعك مذنبة باش تحسي نفسك غلطانة و ندمانة و تكتئابي انت ما تتاثريش المهم درت لي كان لازم و احمدي الله انك سلكت من الخطيب الاول و الثاني حتى لو كان عمرك 40سنة الحكمة في الزواج ليس بمدة الزواج لكن بنوعية الزواج المهم الصلاح حاولي تبدلي الرقم ديالك باش تقطعي كل معلومة وكلام يجيك من هذوك الناس اعتني بنفسك و لا تنتبهي لما يقوله غيرك لان ارضاء الناس غاية لا تدرك

[جويرية الإيمان]

نتي لاه معمرة راسك بكلامهم

يخي خاطي الراجل ماهو باباك ماهو خوك ماهو خالك ماهو عملك

اطلقي عليك هذا الجاهل .

و كيما قلت نتي كي ما قدرش عليك قلبها مضايقة

ثانيا انت علاه تتكلمي معاه ؟ خلاص أخطيك منه الحسّاد .

و كي بطلتي قبل عرسك بشهر واش فيها أنا ختي بطلت قبل 15 يوم و بدينا نجمعو في المهر نرجعو فيه 9 ملاين و قبل ما نحكمو خدمة .

و بن خالتي عندو شهر ملي تزوج بوحدة كانت مخطوبة و بطلت نهار الحنة يعني العرس راكب و هي بطلت عليه كي عرفت بلي الراجل ان متزوج من قبل و مخبي عليهم .

لازم تفهمي يا ختي بلي الزواج مكتوب و كيما نقولو : العروس راكبة و ما نعرف لمن كاتبة .

33 سنة ماكيش كبيرة لدرجة اليأس و ربي شايف و عارف .

أختي تزوجت في 35 سنة و جابت 2 بنات توام و طفل عندو 6 اشهر .

يعني إذا كاتبلك ربي واحد ما ينحهالك .

و بالنسبة للرجل الحسّاد ادعي بهذا الدعاء و إن شاء الله سيبتعد عنك :

اللهم اكْفِنِيهِ عني

و سوف ترين كيف سيكفيك الله عنك .

أما انت فاشغلي وقتك بأي أشغال يدوية و الله المستعان

و ربي مافيه غير الخير .

[sabrinask]

السلام عليكم أختي أنا نقولك حاجة وحدة أنو الزواج مكتوب يعني متكسري راسك ماوالو نهار يجي مكتوبك راكي تكوني في دارك كل شي سرالك راه كاتب و كل وحدة و ليها حكاية في حياتها مي المهم الإنسان يحكم عقلو و يستعين بالله و الإستغفار و الدعاء باش لكان غلط وهو عارف و لا ماش عارف ربي يغفرو و الدعاء باش ربي يفرج و يسهل أمورك. أختي العزيزة متكسريش راسك و وكلي أمرك ربي و كملي حياتك عادي

[manoula 84]

اختي الزواج راهو مكتوب داخل في الضاء و القدر ديما قولي حسبي الله و نعم الوكيل و اخطيك من كلام الناس

[حبيبة زوجها]

يااختي كلشي مكتوب وانت مقتنعةبلي مدرتيله والو وهو اكيد مش هيقولهم كانت مليحة معايا وانا لي غلطت معاها
لازم يزيدو الهدرة ويرمو الطفلة بالكدب لانه مجتمعنا الله غالب كل شي في لمرة
وشفنا بزاااف حالات المراة مظلومة وزيد يكملو عليها بالهدرة ...لاحول ولا قوة الا بالله
انا ننصحك انساي ومتسمعيش لهدرة الناس لانه كيما تكون حالتك ميخلوكش
وربي يرزقك عاجلا غير اجل بالزوج الصالح

[naamane3]

شوفي يا بنت الناس رب العالمين باغيلك الخير
لذا لا تقنطي ولا تيأسي وما دمت على حق
فلا تخشي في الله لومة لائم
وكيما قالو ناس بكري اللي يغير منك يبدلك اسمك
وتأكدي أن الله سبدلك بمن تقر به عينك

[الدر المكنون]

ما تبكي ما تتحسري ما تقولي وعلاه

هذا مكتوب ربي بغض النظر عن الاسباب

ادعي ربي يعوضك برجل صالح ويهنيك معاه وكلام الناس عمرو ما بنى الساس حبيبتي

[nouna l maghbouna]

انتي برك راكي تكبري فيها و تقلقي في روحك
في العوض اللي راكي تحمدي في ربي اللي كشفلك وجوه زوج وخاص راكي طلعي و تهبطي في الباطل

اللي هدرو فيك وكلي ربي عليهم و بدلي الرقم تاعك
ابداي حياة جديدة
و السن ماشي عيب كلش بمكتوب ربي

ماتخلي حتى واحد يقلقك

ربي يرزقك ولد لحلال اللي ينسيك في هادو وجوه الشر

[nesrine jijel]

el denya makatiiibe w 9issma w nassib w hada maktoob rebi madarhalek ghiir pcq fiha khiir lik

[الحلم الجميل]

ما تقلقيش روحك
اذا كان الزواج مكتوب و بيد الله
علاه تهلكي روحك يا اختي
ربي يرزقك بزوج صالح طيب عاااااااااجلا غير اجلا
و تفرحي ان شاء الله

[بلسم غرام2018]

السلام عليكم

الزواج شيئ مكتوب من عند الله وليس عليك أن تتحسّري بل سلّمي أمرك لله

بغضّ النظر عن أسباب فشل الخطبتين الإثنين ليسا من نصيبك وفقط ــــ المكتوب مكتوب ـــــ


إذن انظري للمستقبل وانزعيهما من تفكيرك و لا تسمعي لكلام الناس لأنّك تتعبين وكلامهم لايقدّم ولا يؤخّر


لا تندمي فليس لك ذنب فقط اشغلي نفسك بأمور أخرى في انظار نصيب آخر يسعدك ان شاء الله عليك بالدعاء و الاستغفار

[عبد الله 22]

السلام عليكم ياختي المهم نيتك تكون صافية اما كلام الناس صح يأثر لكن لا يغير القدر توكلي على ربي ولاتنظري إلى الخلف ((( لكل أجل كتاب (http://www.djelfa.info/vb/#docu)يمحوا الله ما يشاء ويثبت وعنده أم الكتاب (http://www.djelfa.info/vb/#docu))) الرعد

[rosa allia]

راني فاهماتك يا أختي مليح علبالي ماشي حاجة ساهلة صح تجيك كل الأفكار السوداء في بالك تقولي مانيش مليحة وربي خرجها فيا وذنوبي اللي دارتلي هكا ....الخ، لكن اللي شافو ربي حنا ماشفناه ديريها في بالك ديما بلي ربي شافلك فيها خير كي منعهم عنك في زوج وأنت صلي وأدعي ربي يعوضك
وكلما تجي تخممي في هاد الموضوع أبداي أستغفري وأذكري ربي هكا تلقاي روحك نسيتي وحتى الأفكار هذيك تروح وحدها
وربي يكون معاك ويرزقك بالزوج اللي تتمنايه

[أمة الله 12]

السلام عليكم

يا اختي نصيحة واحد مايلعبلك ع المورال, 33 سنة و مبعد , عادي جدا, ارضي باللي كتبهولك ربي و احمديه يزيدك من نعيمو

و اللي راح تلافو يجيب خلافو, خلي شخصيتك قوية

ف الدنيا هاذي ما يدوملك حتى واحد, غير وجه ربي

مالا ما تقلقي روحك حتى على واحد,

ربي يفرجها من عندو

[رحمة من المولى]

كل شيء بالمكتوووووووووووووووووووووووووب تأكدي ربي سبحانو كاتبلك ما خير منهم و كلي أمر زواجك لربي سبحانو ورايحة تشوفي الخير

[nacera72]

السلام عليكم
يا اختي لا تقنطي من رحمة الله الزواج مكتوب و رزقك راهو يجري موراك و يجيك يجيك اليوم ولا غدوة و الله يا اختي نعرف وحدة كانت تعرف واحد جا خطبها و صرا سوء تفاهم و تفارقو و بعد 6 سنوات رجع ليها و خطبها و زاد ما كتبش ربي بيناتهم و تفارقو يعني ماكانش مكتوبها و راهي الان في 41 سنة و مازال يجوها الخطاب يعني يا اختي السن ما عندوش علاقة بالزواج و ما دقوليش خرجو فيا بالعكس هاذا ابتلاء و ربي سبحانو يبتلي عباده الصالحين اصبري اختي و ان شاء الله ربي سبحانو يرزقك الزوج الصالح الذي يقر عينك عاجلا ان شاء الله

[fella fifi angel]

يعطيك الصحة اختي راني معاك فالشيء لي درتيه وراح يعوضط ربي ان شاء الله و تاكدي لوكان كان مكتوبك راهو جا :) ربي يرزقك ان شاء الله

[جلفاوي32]

ربي معاك اختي