دبرو عليا

[مشكلتي]

سلام الله عليكم

راح نحكي بالعامية افضل ^^
انا شابة نقرا 2 جامعي الحمد لله مثقفة و عاقلة و متربية بشهادة الجميع
كان يقرا معايا واحد من ايامات اللسي مهتم بيا و نحسو قريب ليا لكن عمري ما حطيت حاجة في بالي لاني ضد العلاقات
المهم هو تاني درك يقرا في الجامعة و كيفي سنة ثانية ,, حنا اصدقاء في الفيسبوك بصح كوم ما ندخلش ياسر ما نحكيش معاه نلقى ميساج من عندو يسقسي على احوالي
المرة هادي الحكاية تطورت لقيت مقالة ماشي ميساج مكتوب على 2 تع الصباح قالي فيه بلي راو يحبني من. سنين و ما قدرش يقولي خاطر خايف عليا و في نفس الوقت حاشم ! قالي يما ولات تحبك قبل ما تعرفك تالمون ديما نحكيلها عليك و راي قاتلي اخطبها الصيف هذا او على الاقل مد الكلمة ( يهدر مع بابا )
انا كي قريت الميساج تشوووووكيت !!!! و حطيتو كيما باقي الشباب اللي يدخل امو في ابحكاية هكاك برك ! قريت الميساج و ما لقيت ما نرجع
هداك النهار جاني رقم ما نعرفوش ! هزيت لقيتها مرا قاتلي انا ام فلان و راو في حالة كي شاف بلي قريتي الميساج و ما رديتيش فهمها بلي راكي رافضاتو
و قاتلي راني حابة نشوفك انا و ياه و نحكيو في 3 نجيك للجامعة ???? ( امو نعرفها بالوجه كانت تجي لليسي يعني نستبعد فكرة مرا اخرى تجي :p )
انا الحق ما عجبتنيش الفكرة و قتلها نخمم و انا من النوع لي نحكي كلش لماما ! قاتلي علاه ما تجيش العطلة هادي للدار ! و هو يحكي مع باباك ? علاه تشوفك البرا و في الصيف باش تجي
انا كيفاه راح نقولو هاد لكلااااام ! تبلي نعرض فيهم باش يجيو ! و الله ما فهمت كيفاش لازم ندير :/
واش رايكم ! مع العلم هو اللي هبلها قالها غير احكي
معاها و اقنعيها بلي نحبها و ناويها الخلال و اللي طالبو منها تحطني في بالها و ترفض اي عرض يجيها حتان تولي ليا *

[فارس وجواد]

يا حسراه على هاذ الرجل لي عادت امه تعاونوا و تهدر في بلاصتو على خاطر هو مسكين جاتو صدمة نفسية .

[blue.sky]

ومادام شاتيك بهذا الشكل وعلاه ميجيش لداركم يماك عندها الحق بارك الله فيها

[بسمة تنتظر فرحة]

أختي علاه راهم يصعبو فيها هكذا وعلاش يماه تجي لعندك في الجامعة ياك انت بنت فاميليا واللي يقصدك يجي لداركم نظن قوليلها هاد الشيء وقلها اذا ناوين الخير تقدمو بالطريقة الصح سيرتو راهي تعرفك وهو يعرفك وش حكاية تجيك للجامعة؟؟؟؟؟
ربي يوفقك ويسر امرك اختي

[ايمان نور الجزائر]

تقصد البيوت من ابوابها....ناس تجيك للدار وتخافي وما تديريش كونفيونص
مابالك في مكان اخر
نصيحتي هيا نصيحة أمك....قولها هاك ماما قالت وربي يجيب لي فيه الخير

[mira mira02]

اليت ثم البيت ثم الييت

[knives66]

ناس ناقص ثقافة تاع معاملة

يقولك خير البر عاجله

وخطبة ما فيها لا طلع ولا هبط

اهدر مع طفلة اذا عطاتك فرصة أتقدم مباشرة لبابها ومن بعد يبداء لحديث

اما هذي تاع نشوفك براء و في جامعة لاه جي نشروا في كباش


يا اختي

أذا انت حابة تعطي فرص لهذا الشاب به يجي يخطبك ردي عليه وقوليوا اتقدم مباشرة لدار واهدر مع بابك

[ABDOU ELE]

ســـــــــــــــــــــلام

اذا كانت الام تود رؤيتك فلتاتي للبيت وتراك مع اهلك حسب الاصول وليس في الجامعة كانه ليس لاهلك قيمة............واذا كان الشاب يود رؤيتك فليطرق باب الدار ويكلم اباك..........ولكن كيف ياتي للجامعة ليراك مع امه :confused::confused::confused: هل يحكي لامه حتى عن مشاعره وحبه لك:1::1::1:

[pharma-93]

Yamak 3andha l7a9 kolilou iji la dar directe wnchlh rabi yjib li fiha lkhir wrabi yhanikom

[○•ميسون•○]

لي يبغيك يقطع الواد و يجيك

[آسياآسيا]

السلام عليكم، والله بارك الله في والدتك، وبارك الله في كل من يساندها في رايها، ولكن لازم نكونوا واقعيين ،يا اختي سامحيني نقولك قبل ما تخممي فيه وقبل ما تحطيه في بالك وتعجبي بيه او حتى تحبيه ،مادام قلتي يدرس في الجامعة ولاكان يجي مع امه باش يهدروا عليك ،أول سؤال يطرحوه والديك: خدّام ولاّ لا؟؟؟؟ .اذا كان جواب والدته :ابني كي يتخرج ان شاء الله يلقى خدمة. ساعتها نزوجوهم.
والله انا يا اختي نتمنى يلقى خدمة عاجلا وتفرج عليكم ان شاء الله. ولكن اذا طول وما لقاش خدمة؟؟؟ يعني راح طولوا ونتوما مخطوبين.....والله يبعد عليكم المشاكل.
اختي فكري بعقلك قبل ما تفكري بقلبك. وكيما يقولوا استشارة الناس مليحة ولكن يبقى ربي الاعلم.
لذلك ننصحك تصلي صلاة الاستخارة عدة مرات والله ينورلك دربك.
الله يهنيك ويسعدك ويفرجها عليك وعلى كل المؤمنين

[imene12]

لا أظن أنه من الآداب أن تأتي والدته لتتعرف عليك في الشارع... أخبريها برأي والدتك..
و إياك أن يغرك كلامه

[bibimoto6]

انا شابة نقرا 2 جامعي الحمد لله مثقفة و عاقلة و متربية بشهادة الجميع
انا تاني تشوووووووووووووووكيت
و علاش تحكي معاه في الفايسخوك
ايك ثم اياك ثم اياك ان تكلميه مرة اخرى لانك قلت متربية
اذا ارادك فالياتي الى بيتك
ساااااااااااااااااااااااهلة

[samara lara]

khetiii matal3ii mathabtii

diri kima 9alet yemak
si mohamed jib yemak w babak w arwa7 ledar

w rabi ywef9akk
khetii
w nchalh tethanay fi 7yatek
;)

[منهاج]

السلام عليكم

قوليلهم يجو للدار

[doba]

ربي يوفقك ويسر امرك اختي

[الماسة النادرة]

بلاكي وبلاي وبلاكي تهدري مع يماه برى لوكان تديك تولي تعايرك تقولك مديتي روحك فالطريق ومشورتيش اهل وزيد الام الي تشجع وليدها عاى الغلط هذي ماشي ام اذا زادت عيطتلك قوليلها اسمحيلي الحاجة عندي دارنا مسؤولين عليا والامور الرسمية كيما هذوا دارنا يدبروا راسهم وكبري بداكم وبلاكي تصغريهم علجال انا نقولك الي تتصرف بلا اهلها رها تدور عليها وزيد راه قدك واش المسؤولي راح يتحملها هذا اخطيك الطريق مزال مفتوح امامك وشدي نيفك في الجامعة را يصحلك احسن منوا وزيد واش هذا الي كي مترديش الميساج يموت ويتكسل اخطيك منوا هذا ذراري على روحوا

[نصيرة1973]

بارك الله في والدتك أحسنت الراي ايجو لداروتتفاهمو أما لقاء الشارع ليس من الاداب ربما أقنعتكي ببعض الكلمات باش توافقي

لان كل ام تحب تجيب بنت الفاميلية لايهم ابنها متربي ولا ماشي متربي ولا هذه البنت تعيش في السعادة ولا التعاسة

نصيحتي الك ماتحبيش قبل الزواج واذا حبيت سلمي امرك لله لييسرى لك ما فيه الخير

[constantin25]

اسمعي ننصحك كوني إيجابية لأقصى الحدود مادام الراجل ناولي الحلال وجاء من الباب

[constantin25]

اسمعي ننصحك كوني إيجابية لأقصى الحدود مادام الراجل ناولي الحلال وجاء من الباب

[mina24j]

هذا في عمرو 20 سنة يعني صغير و زيد ما يخدمش المهم إذا كان ناوي لحلال و والديه قادرين يعنوه ما كان حتى مشكل تجي أمو لدار و يهدرو رجال مع رجال المهم ما تشوفيهاش برا قادرة مرة أخرى تعايرك بها ما ديري حتى حاجة تنقص من قيمتك ما كيش سلعة معروضة للبيع
.........و زيد معجبنيش في حاجة هذا يحكي لأمو كلش أنا طفلة و نحشم من ماما
ديري في بالك هذا النوع يبقى كيما هكى بعد الزواج أي يحكي كلش لأمو