اصدقاء زوجي

[مشكلتي]

السلام عليكم ارجو ادراج موضوعي لانه اصبح يقلقني بشدة واريد آراء من له خبرة
موضوعي وباختصار اصدقاء خطيبي "زوجي درنا العقد"ومازال العرس على موقع التواصل الاجتماعي فيسبوك 2 من اصدقائه بعثولي من قبل poke رغم انه يبدو لي انه واضح اني لست صديقة لزوجي مادامني الوحيدة في الفيسبوك تاعو وهو كذلك ومن بعد طلبات الصداقة وبعض التعليقات انا الان حايرة يعني واش حابين هاذو الاصدقاء مني بعد مشورتي من امي قاتل يمتقوليلوش وانا مقتلوش وهاذو الاصدقاء لا اعرفهم سوى انني رأيتهم في soutenance تاع زوجي ومهمش اصدقاؤوا مقربين بزاف صديقة لي قاتلي انهم يلعبوا وراء ظهره يعني حابين يفسدوا بيناتكم وقاتلي اما هو اللي باعثهم يديرلك test :confused::confused::confused: كيفاش يديرلي تاست راني خلاص مرتو بالعقد وزيد قرب العرس وزيد راه سقسا عليا وعلى دارنا وزيد لم احس انه من النوع الموسوس او الشكاك وانا ارجح انهم يغيروا منو وحابين يفسدوا بيناتنا لانه وبصراحة لم تعجبني نظراتهم في سوتنونس تاعو لم ار سوى نظرات حسد وغيرة وخاصة انه حدث شيء اقلقني آنذاك واحد منهم لديه صديقة وجابها معاه وهي كانت زميلة لزوجي كي جيت نجلس وعطاتني الطفلة كرسي تصرفت بتصرف جريء حيث انها دزتني بيدها ومن بعد نشوف فيها تخزر فيا منين جاتها الجرأة منعرف وزيد تهمس مع صديقه بزاف وكانهما يتفقان على شيء
ما رأيكم ؟

[يونس معبدي]

وعليكم السلام ورحمة الله
طالما انكما تقريبا اصبحتما متزوجين
فلماذا كل هذا التهريج ؟
اعتقد ان هؤلاء الأصدقاء تقريبا نجحوا في مسعاهم اذا كان لهم قصد كما تقولين
كونك بديتي تتحدثي على التاست والشك و..وامور قد تفسد بينكما
لا سمح الله
وهل الفيسبوك مهم لهاته الدرجة
اذا كان ولابد ديري حساب آخر وانتهى
..
ربي يجمع بيناتكم عن قريب
ويهنيكم

[نورسين.داية]

السلام عليكم

على صعيد الأنترنت ما أسهل قفل bloqué لا أعتقد أن هذا الأمر صعب بالنسبة لكي

مسألة التاست ....لما تتخيلين و تفترضين ما ليس واقع فعلا .....و أنتي نفسك وصفتي الزوج ...أنه ليس من النوع الذي ذكرته ....

لكن ملاحظة : أعرف قصة مماثلة : زوجين متزوجين حديثا .....كان للزوج صديق يملك تاكسي فون ...في إحدى المرات قامت الزوجة بملئ هاتفها النقال من عند صديق زوجها يعني في محله .....فإحتفظ برقم هاتفها و إتصل بها ليلا ...في غياب زوجعا ....بكل وقاحة .......
كان ردها أنها لم تخبرالزوج ....و وضعت الرقم من بين الأرقام المرفوضة في هاتفها و السلام

يعني المسألة متعلقة بكي أنتي عزيزتي

وفقكي الله أختي

[الفاتحة]

بكل بساطة بلوكي فايسبوك تاعك هذه ليست مشكلة هذه تفاهة علاش الفايسبوك تاكلي منو ولا تشربي منو ولا تتنفسي منو

[فارس وجواد]

و أنت يا أختي واش داك تدخلي لهذا الموقع حتى يجد هؤلاء و غيرهم ثغرة لازعاجك عن طريقها.
نصيحة اقفلي حسابك و لا تدخليه مجددا و نهائيا فأنت الآن زوجة رجل و لا هدف من الدخول لهذه المواقع.

[mohazi]

السلام عليكم

الحل بكل بساطة هو انك تعطلي حسابك وماعدش تزيدي تدخلي ليه.

[nouna l maghbouna]

علاه عليك هاد الحالة و تقلقي في روحك ساهلة
ابلوكيهم و ماتقوليلو ما والو
ولا افتحي فايس جديد

[ميمي سمية]

بلوكيهم وتهناي

واذا تقلقتي بزاف قولي لراجلك راني نتعرض للديرونجمو وحلي واحد باسم طفل احسنلك

[البيت السلفي]

وعليكم السلام و رحمة الله
ربي يهنيك ختي
وعلاش عليك الغبينة ،نحي الفيس بوك هذا شرو أكثر من خيرو والله المستعان أولها ضياع الوقت ، ولي حب يستفيد كاين المواقِع النافعة
نحي كامل الحِساب ديالك تتهناي من المشاكِل بإذن الله

[نارينا]

وانت بلاك بعثولك طلبات صداقة هكاك صدفة ومعمبالهمش راه راجلك مدايرك صديقك فالفايس الا اذا كنتي حاطة صورتك والبنات اللي قلتي يتافقوا بلاك غير يخزروا فخطيبة زميلهم وداتهم الهدرة على واش يتافقوا زعم ؟؟ واصدقائه كل نظرتهم مش مليحة هك راكي تديري فالوسواس والشك زعم علاه كل يشوفولك بهاد الطريقة ؟؟نحي من بالك الشيطان راه تحكم فيك وبلوكي والا نحي والا بدلي الفايسبوك الحلول ياسر

[سمية محمد عطية]

الحل ان تقفلي كل الابواب انتاع الشبهات والشك الان راكي زوجة وما بقى والوا وافتحي الحديث مع زوجك واطرحي المشكلة وتوكلى على ربي ولا تنسي الدعاء اولا ان يبعد زوجك عن الرفقة السيئة وان يكفيكي شرهم ربي يهنيك

[" أبو عبود"]

بكل بساطة بلوكي فايسبوك تاعك هذه ليست مشكلة هذه تفاهة علاش الفايسبوك تاكلي منو ولا تشربي منو ولا تتنفسي منو

والله ما خليتيلي واش نقول. لا فض فوك كما يقول المثل العربي.

[بنت لبحر]

يرحم باباك و علاش راكي دايرة فايس بوك واش ديري بيه و زيد كيما قالولك الاخوة ابلوكيهم و خلاصت لحكاية
لكن من الافضل تبلوكي الفايس خلاص و اتهناي

[منهاج]

السلام عليكم

اخطيك من الفايسبوك واغلقيه واحكي نتي وراجلك في التليفون

[محمد جديدي التبسي]

أنا في الحقيقة استغربت شيء آخر كيفاه رجل يدعو خطيبته أو حتى زوجته لمناقشة مذكرته!!
يبدو أن مجتمعنا في طريق التحول أو قد تحول ..وقبل أيام قرأت فتاة تحتفل بعيد ميلاد خطيبها في نادي وتستدعي أصدقائه وصديقاتها؟!! وشموع وموسيقى وهدايا ومفاجآت!!
وين رانا رايحين بهذا التقليد للغرب الله المستعان ربي يهدي
حل مشكلتك سهل أختي لا تقبلي طلباتهما واعمليلهم حظر ونوهي في اسم حسابك أنه للنساء فقط ونصيحة ما كان لاه تكثري منو
ربي يوفقكم وييسر أموركم

[فارس وجواد]

أنا في الحقيقة استغربت شيء آخر كيفاه رجل يدعو خطيبته أو حتى زوجته لمناقشة مذكرته!!
يبدو أن مجتمعنا في طريق التحول أو قد تحول ..وقبل أيام قرأت فتاة تحتفل بعيد ميلاد خطيبها في نادي وتستدعي أصدقائه وصديقاتها؟!! وشموع وموسيقى وهدايا ومفاجآت!!
وين رانا رايحين بهذا التقليد للغرب الله المستعان ربي يهدي
حل مشكلتك سهل أختي لا تقبلي طلباتهما واعمليلهم حظر ونوهي في اسم حسابك أنه للنساء فقط ونصيحة ما كان لاه تكثري منو
ربي يوفقكم وييسر أموركم
الدنيا طورت يا أخي محمدأنت وين راك عايش.