دعوة لكل منطقة في الجلفة شكون تعرف تطيب سلق في المقلاة

[قمر الخلق]

السلام عليكم
ان شاء الله تكونو لاباس توحشتكم عندي بزاف ما دخلتش اسمحولي راني حاصلة مع الدار والزواج
المهم
انا تزوجت غير كيما واكتشفت بلي طيابنا في دارنا مختلف شويا على طياب ناس داري وحبيت ندير سلق (سبانخ) في المقلاة مي المشكل خفت ما يكونوش يديروه كيما حنا وما تعجبوش رجلي الماكلة مع العلم انا نسكن وحدي وجامي قالي ما عجبتنيش مي يقولي يما دا تديروش هكذا ووليت نروح عندها ونشوف طيابها صح مختلف
تعيشو اعطوني وصفات للسلق في المقلاة من كل مناطق الجزائر الحبيبة وخاصة العاصمة وبومرداس اذا ممكن


وشكرا حباباتي

[منارالقلوب]

سلام عليكم
مبروك عليك وربي يهنيك
تعلمت من والدتي سلق مقلة يجي بنين

تديري مقلة فوق نار ودير بصل وزيت يتقلى مليح ومن بعد ديري سلق +سلق يكون طايب وتصفيه مليح من ماء
كي يتقلى مليح مع بصل ضيفيلو طماطم مطحونة وزيتون دون نوان مقطع وخليهم يطيبو وديري توابل ملح وفافل اسود وكمون
كي تشوفيه نشف من الماء تاع طماطم كسري عليه بيض
بصحتكم

[قمر الخلق]

يعطيك الصحة
هادي وصفة ما نعرفهاش

[منارالقلوب]

يعطيك الصحة
هادي وصفة ما نعرفهاش


يسلمك حنونة هدا طياب والدتي الله يحفظها يجي هايل جربيها ورجعيلي خبر
ولحبيتي تظيفيلها بطاطا مقلية مقطع مربعات صغيرة وكثري بيض جي خبزة وقطعيها جي تاني تهبل

[قمر الخلق]

وصفة واحدة فقط وينكم يا فنانات المطبخ

[مريومة دودي]

الف مبروك اختي شوفي طريقتي انا منغليش السلق خاطر تروح كامل الفيتامنات تاعو بعد ما تنقيه مليح قطعيه بيدك ماشي بالسكين ودريه ف مقلى بلا ماتزيدي الماء على نار هادية حتى يطيب و ك يبرد اعصريه مليح من الماء ودري شوية بصل و توم ف المقلى كي يتقلاو طبعا و اشوية زيت زيدي السلق قليه معاهم زيدي الملح و التوابل وقبل ماتكسري عليه البيض زيدي تاني على السلق شوية زيت او تحبي بنفس الخطوات تزيدي علية خضر مقلية و فرماج و بيض و ديريه قراتان يجي هايل

[ام قسوم]

مبروك عليك الزواج وانشاء الله تتهنى كل وحدة فينا كتروح لدار رجلها تلقى معظم الماكولات مختلفة على دارهم صح هو موالف بدارهم وبصمتهم انت ايضا درى بصمتك وسبقتنى الاخت منار القلوب بوصفتها اللى نعرفها

[kika85]

انا موالفة ندير السلق في المقلة بالطريقة هادي..نغلي السلق ونقطرو من الماء من بعد ندير في مقلة شوية زيت + ثوم مرحي حوالي 2 سنات + قرصة فلفل اسود ونخليهم يتقلاو حتى ينشف مليح من الماء الي فيه ونضيف عليه بطاطا نكون قليتها ونحاول نصنعها خبزة و نفرغ عليها حوالي 3 حبات بيض طيبيها من تحت من بعد اقلبيها وطيبيها تاني واقسميها متلتات متل البيتزا.
كاين تاني سلق بالديول...غلي السلق وقطريه من بعد ديريه في الزيت + التوم + فلفل اسود+ملح طبعا+قطع صدر الدجاج وقليهم مليح مليح حتى ينشفو مليح من المرق وبعدما يبرد ضيفيلو الفرماج مقطع وحطيه بجهة
فرشي 3 ورقات ديول في مقلاة ما تلصقش وفرغي في وسطهم الحشو تع السلق وعاودي غطي عليهم ب 3 ورقات ديول وحاولي تغلقي الجوانب حتى تتحصلي على خبزة حطيها فوق النار تكون هادية وديري شوية زيت في جوانب المقلة ما تكتريش من بعد طيبيها من فوق ومن تحت واقطعيها قطع متلتة وقدميها...هادي الرجال الي درتهالهم كامل عجبتهم بما فيهم زوجي
بصحتك يا الحبيبة وبالبركة عليك الزواج

[صلاتي راحتي]

بارك الله لكما و باك عليكم و جمع بينكما في خير زواج مبارك ان شاء الله
الاخوات وفو وكفو السلق حاجا ساهلة رلي يكون في عونك

[zah11]

السلام عليكم أختي أولا مبروك عليك أنا نسكن في البليدة و هذه طريقتي في إعداد السلق:
تحكمي السلق تنقيه و من بعد تغسليه و تقطعي الأغصان وحدهم و الأوراق وحدهم من جهة أخرى أحكمي مقلاة ديري فيها شوية بصل مسكرفج و و شوية حار أخضر و ملح و أرمي فوقهم الأغصان ثم الأوراق(لأن الأغصان تجي شوية عاصية على الاوراق في الطياب) و من بعد أغلقي على المقلة بمغطة و خليه على نار هادية كي تشوفي السلق طاب نحي المغطي و خليه ينشف ثم زيدي شوية زيت كلي يتقلى فيه و من بعد أضيفي البيض كل ما أضفت البيض أكثر تجي بنينة أكثر و شهية طيبةأ

[مرام]

مساء الخير مبروك اختي ولعقوبة لذرية الصالحة نشالله
بالنسبة للسلق انا نغسلو مليح ونقطعو رقيق شوي بلا ما نطيبو
ومن بعد نجيب المقلة ندير فيها شوي زيت وبصل مقطع شرائح رقيقة ونذبلو مليح مع شوي ملح
ومن بعد نرمي فرقو السلق المقطع وندير الغطا نخلي السلق يذبل وينزل الما تاعو ونخليه حتان ينشف مليح من الما
ومن بعد نزيدلها مغرف زبدة ونكسر عليها 3 بيضات من ما نخلطهم نخليهم مجمولين فهمتيني؟
ونرش شوي ملح وفلفل اسود على كل بيضة وندير الغطا ونقص النار ياسر ونخلها تطيب حتى تنشف البيضة من فوق ومن بعد نقلبها ونخليها تطيب شوي
ومن نقدمها ونشالله تجربيها وتعجبك

[red lina]

السلام عليكم
الف شكر لكل الاخوات الي اعطاولنا وصفة السلقاحنا تان رانا نتعلمو معاك
و الف مبروك للاخت و العقوبة للذرية الصالحة
و بالنسبة لزوجك ضروك غي بالشوية و يوالف الماكلة تاعك في الاول كامل يديرو كيما هاك و من بعد خلاص
انا ثان زوجي كان يقولي ماكلتك ماشي كيف كيف مع تع دارنا و كل بيت و العادات اتاعها و ضروك انت راح اتديري اللمسة للاكل و كل شيئ في بيتك
ربي يهنيك..
اما السلق انا انفورو باه ما تروحش القيمة الغذائية تاعو و الطريقة نفسها الي قالو عليها الاخوات
سلق فاير+ البطاطا القلية+ البيض+ ملح+ فلفل اسود+ كمون+ فرماج
انخلطهم كامل و انديرهم في مقلاة اتكون سخونة و نقلي من الجهتين و الف صحة و هناء

[قمر الخلق]

يعطيكم ألف ألف عافية كامل وشكرا على الوصفات
نعطيكم انا الوصفة اللي قررت نعملها البارح على العشاء في مكان السلق المقلي باش نتفادى التعليقات هههههه وعجباتو بزاف بزاف المفشش ديالي هههه

اولا هي وصفة سلق في الطنجرة "جواز" كيما نقولو
في البداية نحمسوا الثوم مع التوابل (ملح ، فلفل اسود، كمون) في زيت ساخن ما تحمسوش بزاف باش ما يتحرقش التوم من بعد اضيفوا الطماطم المقشرة والمطحونة في المرحاة خاصة بالطماطم مع الطماطم المصبرة ايضا وخلوهم يتقلاو حتى تحلل الطماطم وتولي على شكل صلصة من بعد زيدو حمسوا شوي البطاطا المقطعة مكعبات صغار ومرقوا كي تغلى المرقى اضيفو كمية قليلة من الكمون وراس الحانوت "من التوابل" كي تطيب البطاطا اضيفو السلق المقطع والمغلي وخلو المرقى تنشف مليح حتى تقرب تخلاص باش تطفوا عليه
مممممم شحال بنين

وادا تحبو الحار زيدو نصف راس او الكمية الي تحتاجوها على حساب حجم الطنجرة في التحماس يجي بنبن اكثر كي يكون حار

[yacef hayet]

sala,e okhti yatik essaha mafihche thoume chokrane

[mojab]

مبروك اعليك اختتي انا انطيب اسلق كما قالو عليه اجماعة مي مندرلوش لبصل

[إيمان سارة]

ألف مبروك
تقطعي السلق وتحطيه يتغلى في الماء ومن بعد كي يتغلى مليح تنحيه تعصريه من الماء تاعو وتحطيه يقطر ملييييح
ومن بعد تجيبي بصلة كبيرة أو بصلتين صغيرتين تقليهم في الزيت مع الفلفل الأسود وبعد مايتقلاو ضيفي الطماطم مصبرة حوالي نصف ملعقة وخليها تزيد تتقلى مع البصل
ومن بعد ضيفي السلق تاعك بعد ما قطرتيه ومن بعد خليه يتقلى مليح ضيفيلو 3 إلى 4 بيضات وحركيه مليح
وبالصحة ولهنا نشالله

[soumia bougaa]

اخدمي لاصوص تومام

وارميلها السلق كي يدبل ارمي كمشة روز باش يشرب الماء هاذاك وخليه يزكا شوي

واحيانا امي تزيدلو لحم مرحي تقليه وتزيدو لطن قبل ماتزيد السلق

وفي النهاية تكسرلو البيض

يجي روعة

[amina-31]

ديري السلق في مقلة ونقصي عليه وخليه يطيب يطلق الماء وصفيه ماء نتاعه يدير الاسهال والحجر فالكلاوي ومنبعد قلي ثوم زيدي سلق ملح حروركحل وفرماج وطون قليه ليح وزيدي بيض يجي بنين بزاف مع المطلوع جديد ممممممممم ديفوا نديروه في pate brisé wela pate brisé yji bzf bnin

[ام حنين الحنونة]

مبروك عليك اختي و ربي ايهنييك ...............السلق انا انفورو و نعصرو و نحط في المقلاة ثوم +زيت +فلفل +كمون+ملح نخلط شوية و نحط عليهم السلق و نحركو شوية ثم انضيف عليهم نصف ربطة معدنوس راح يعطييه ذوق هايل ثم انضيف ملعقة صغيرة طماطم مصبرة و انخليه على نار هادية و نخلك منن مرة على مرة ثم انضرب 2 حباة بيض + جبن و نرميهم في الاخير .
متتقلقيش قضية وقت و زوجك ايوالف ماكلتك..ربي ايهينك