أريد الطلاق

[مشكلتي]

وش راح نقلكم والله راني عاجزة على التفكير ولا التعبير على وش راني نعاني
أنا متزوجة عندي عام .. بالاك على حساب العنوان تقولو هادي راجلها يضربها و لا خانها ولا مهملها ,, نقلكم لالا ماكاش منها . زوجي طيب و حنين و مثقف و كريم و و و و باختصار مافيه حتى عيب من هادو... مشكلتي معاه انه ضعيف الشخصية , صدقوني مارانيش حاسة بالأمان معاه .. كل ساعة براي .. يماه ساكنة معانا فالدار و الله تقريبا هي لي تتخذ القرارات المصيرية في حياتنا ,, كي يتخد قرار الصباح تجيه لعشيا تقولو لالا يبدلو في دقيقتها
علابالي يماه و لازم يطيعها و هي والله ما عندي حتى مشكل معاها بالعكس والله نحترمها و هازتها فوق راسي بصاح مشكلتي معاه هوا
مارانيش قادرة نحترمو نحسو ضعيف و متردد بزاف و يتدخل في أمور النسا فوق الحق ... مالقيتش وش نقول بالاك تتهموني بلي راني خفيفة و لازم نصبر مي ماقدرتش ديما نعتبر بلي الراجل لازم يكون حازم و مايهابش ,, راني ديما خايفة م المستقبل حاسة روحي وحدي بلا سند
الحاجة الوحيدة لي مخليتني ماطلبتش الطلاق لحد الساعة هي من الناحية الشرعية ما علاباليش إيلا هدا سبب كافي باه نطلب الطلاق و لا لازمني نصبر فالوضع هادا حتى يفرج ربي ؟
دلوني وش ندير ؟؟ راني كرهت والله كرهت

[exodia31]

عندي سؤال من نصك لو كان جا يضربك و يهملك واش كنتي رايحة ديري أظن أن زوجك رزين و ماشي مقلق

[" أبو عبود"]

اذا تخافي ربي حق الخوف نحي من بالك فكرة الطلاق لان الرسول صلى الله عليه وسلم قال:"أيما امرأة سألت زوجها طلاقها من غير بأس فحرام عليها رائحة الجنة". واظن هذا الحديث يكفيك.
ثم هذه امه ساعديه لكي ينال رضاها لانها سوف ترحل يوما ما وتتركه لك واذا حدث وان اغضبها بسببك وحدث ان ماتت لا قدر الله سوف يبغضك كل العمر لانك كنت سبب اغضابه لها. و قراراته التي يغيرها من اجل امه ليست ضعفا للشخصية كما يتهيا لك بل قوة ايمانية. فلا تكوني انت السبب بل ساعديه على ذلك وسف ترين انك كلما كبرت بامه كلما احبك وكلما تغير امره. ساعديه على الصلاح. ولا تكوني اول من يدعوه ليترك امه او تضغطي عليه ليرفض لها طلبا فتغضب عليه.

[sara160349]

هو رضا الولدين حاجة و ضعف الشخصية حاجة و شكون قال بلي كي يكون قوي الشخصية قراراته من نفسو رايح يكون عاق لا قدر الله هذا فعلا مشكل عويص لانك تحسي بروحك مزوجة بامو و حتي هو يطيح من عينك و لا راح يكون فيه حب و لا مودة و لا رحمة مجرد رجل ساكن معاكم و امو هي لي متحكمة بزمام الامور ربي يفرج عليك و الله موقف صعب جدا

[ammar_phys]

احسن القول الاخ رياض,,,,هي ليست ضعف شخصية ,الضعف الحقيقى هو لما تكون حياة وعرض الزوجة في خطر ولا يابه الزوج لذلك,,,اما ماذكرت ليس سببا مقنعا لطلب الطلاق اتق الله اختاه وبالحسنى واللين والنصيحة تتحسن اموركم ان شاء الله واذا كان ما ترينه غير ملائم حاولي نصحه من دون الاشارة الى امه بنقص لان ذلك يجعله يمقتك ويكرهك فالحذر في طريقة النصح ,,الرجل على حسب ما اشرت مطيع لوالدته وهذا امر محمود بل مطلوب لكن من دون اهانة او انتقاص للزوجة او مساس بحقوقها فلكل فرد حقوق وواجبات ,,,ونصيحتى لك لا تسمعي لكلام الناس المحيطيين بك ان كانوا قد اشاروا عليك بابغض الحلال لان الطلاق قنبلة تشبيها تشتت الاسرة,,,وفقك الله وزوجك للخير وحسن العشرة,

[malek416]

بنات اليوم يريدون تسيير شؤون الاسرة لوحدهم وفي بيت مستقل عن والديه واخوته لتفعل ماتشاء تخرج كيف تسحق ولا واحد يحوس عليها ولكن الوالدين يراقبون حركاتها للحفاظ علي اسرة ابنهم .
عند شروط الزواج يقولون للزوجة انك تقيمين مع الوالدين تقبل مباشرة دون تفكير المهم الزواج وبعد سنة تبدا المشاكل ربي يهدي مخلق
واطلب من هذه الاخت تفكر قليلا قبل اي قرار مصيري يهدم الاسرة

[rimora]

لا حول ولا قوة الا بالله

هي تقولكم خايفة من المستقبل ونتوما تقولولها يعني رضا الوالدين ضعف شخصية

ولو يا اخوتي اقراو مليح وافهمو ومن بعد ردو

راهي تقول امو على راسي وهو نعم الناس

اختي زيدي اصبري معاه وماتطلبيش الطلاق وبمرور الزمن وكي يجيو الاولاد راح يتبدل الوضع اكيد ويحس بالمسؤولية زادت كبرت ويصبح يعتمد على قراراتو

[ام جواهر]

اختي والله غير راني حاسة بيك وكلامك مايعنيش بانك متقلقة من يماه بالعكس ....وراني نعرف واحدة اخت زوجها هي الي تمشيلو في حياتو وهي راهي صابرة معاه 14سنة على خاطر اولادها اولا و على خاطر انو طيب وناس ملاح ثانيا ..........حاولي انك تصبري وربي يفرج عليك

[دكن]

في هذي عندك كل الحق مدام ما يقدرش يتخد قرارت لنفسوا موش راجال هذا

ومدام يتبع راي ناس وغيروا بلا تفكير ما بقات حتي معيشة معاه

وصدقني والله راح يدمرلك حياتك وحياة ولادك اذا بقاء يخلي ناس يتحكموا في حياتك

قرار سليم مع انوا طلاق ابغض حلال لكن لضرور احكام

[رانيا لوك]

الرجل ضعيف الشخصية مشكلة ولكن ليس الطلاق حلها با العقل وبرزانة وانت فهميه وقوليلو لا زم تكون عندك شخصية ومن مذا الكلام والله انو سيتغير ما زال مافاتش عام من الزواج يا اختي ما زا لكي عروسة

[hikari1988]

السلام عليكم ، اختي لا يمكنك طلب الطلاق لانه بيد الزوج وحده و لا التطليق لأنه ليست لديك أي من شروطه القانونية و إنما طلب الخلع بمقابل مالي غالبا ما يساوي صداق المثل.
وليكن بعلمك أن القاضي سيجري عدة محاولات صلح بينكما، لذا أنصحك التريث و زيارة طبيب نفساني لربما ساعدك و زوجك على التوافق و إيجاد حل لما ترينه مشاكل او عيوب في زوجك. و أخيرا الحوار هو الحل الامثل لكل المشاكل.

[" أبو عبود"]

للاسف كل النساء من طينة واحدة. تريده ان يعصي أمه لكي ترضى هي مع أنها تقول انها في نعمة من الله؟ لا حول ولا قوة إلا بالله. صدق رسول الله صلى الله عليه وسلم: " لانتن صويحبات يوسف". بدل ان تقنعنها بالصبر وأن الامر لا يستدعي كل هذه المبالغة رحتن تخببنها على زوجها وقد قال صلى الله عليه وسلم :" ‫لعن الله من خبَّب امرأة على زوجها". ثم انت هنا غتبت زوجك على الملأ واهنته بضعف الشخصية فتوبي الى الله لان ما تفعلينه منكر. واعلمي ان نهايتك لن تكون كما تظنين. فاحذري ان تخطئي واغلقي الموضوع واطيعي زوجك ما اطاع الله فيك.
وإني لأعجب لرجل بيته له يتزوج فتصبح زوجته الآمرة الناهية بينما تأتي امه ضيفة وفي أغلب الاحيان ضيفة ثقيلة على زوجته وأولاده فتعطش فلا تستطيع أن تشرب من الحنفية ولا أقول من الثلاجة إلا بعد ان تستاذن زوجة ابنهان في حين تسكن حماته فتبيع وتنفق من ماله وتطبخ ما تشاء من ماله واخوة زوجته يعيثون في البيت فسادا ولا يحرك ساكنا؟؟ أهذه هي الحياة؟ كم هم كثيرون حولي ممن يعطون سياراتهم لاخوة زوجاتهم في حين لا يركبها اخوه ولو بالمقابل. وأعرف أن الكثيرات يعترضن على ما اقول لكنها الحقيقة المرة.

[naamane3]

اعلمي جيدا انك لو تطلقت منه فلن تجدي مثلة
وسوف تندمين ندما شديدا يوم لا ينفع الندم
لذا اكثري من الاستغفار و حافضي على الاذكار
وتذكري دائما هذه الحكمة
دوام الحال من المحال
كاما اذكرك بانك يجب ان تكون رؤيتك للأمور
بنضرة بعيدة
والله المستعان

[zahra30]

ما يحس بالجمرة غير اللي عافس عليها واش راح انقولك الطلاق اخر حل تديريه حاولي تهدري معاه بلا ما تجرحيه حاولي بشوية حتى تكسبيه مليح وبطول الوقت راح يتفطن وحدو حبيبتي ما تتسرعيش واصبري وان شاء الله يفرج عليك ربي هكذا يكون بعض الرجالة في بداية الزواج يعني مازالهم مرتبطين بوالديهم بزاااااف بصح مع مرور الوقت والمسؤوليات راح يتبدلو وانتي راكي غير زوجتي والناس عندهم 40 سنة زواج وراهم صابرين بلعقل يفرج ربي سلالالالام

[حميد.ص]

ابغض الحلال عند الله الطلاق

حاولي تغيري زوجك و تخلي شخصيته قوية

وراء كل رجل عضيم.........

[ام رجاء 09]

السلام عليكم الله يهديك الله يهديك الله يهديك فصبر جميل انا نفس الحالة لكن صبرت 6سنوات والحمد لله اعلى نعمة اليوم ومن محض التجربة كلما تصبري كلما تزيد حلاوة النعمة وربي يجازيك على صبرك وكل حاجة ولو صغيرة تكون في ميزان حسناتك واذا صح تحبي زوجك متكبريش الموضوع في راسك الشيطان وجد مدخل حتى يدمر بيت زوجية واصبري يماه واحتسبي الامر لله ربي يرزقك ذرية صاااااااااااااااالحة وربي يسعدك

[كاميلا]

وحد الردود هنا تردك تندبي في قشك منعرف واش حاطين المرا هي برك اللي تحمل في الدنيا هاذي
مادابيكم تحطوا روحكم في بلاصة هاد المرا كون تجي نسيبتك تتصرف في مرتك او ابوها والله يطلق مرتوا على هاد السبة يخي عباد تقول منعرف وين عايشين يردوا وحد الردود انا ساعات نقول باللي خصهم شعرة ويوليو ملايكة طاحو من السما ما هذا؟
اختي الكريمة آسفة بصح شي ردود تثير اعصابي صراحة راني معاك صح الوحدة تحب تدي راجل مش ولد امه يستنى الرضعة اللي تمدهالوا باش يتحرك ما هذا ؟ وهذا ان كان ياخذ امورها ويبدل رايه في امور تتعلق بيك وبيه هذا لا يجوز سبحان الله اما ان كانت الامور اللي ياخذ رايها فيها متمسكش بشكل خاص خليلهم مساحة بين بعضاهم هذا راجع ليك في درجة تقييمك لخطورة هذا الطبع فيه او ضعف الشخصية انصحك بالتروي وتحليل الامور
تجيهم طاعة الوالدين غير كي يتزوجوا هوما هاد الرجال من قبل يكون مش سامع باموا ومن بعد غير باش يحط المرا هاديك تحت رجليه ويدير السبة بامه فففف
يسر الله امرك

[النجمة القطبية]

لو قلنا ان تلك الفتاة تسمع لراي امها لدرجة انها تسير كل حياتها في كل شئ وتحكيلها كل شئ عن زوجها بالتفصيل الممل لاقمتم الدنيا ولم تقعدوها يعنى من الواضح ان بنت مثل هذه ضعيفة الشخصية ولو قلنا العكس الرجل يحكي لامه كل تفاصيل حياته ويستشيرها في كل شئ لما استغربتم الوضع وقلتم عادى هو طايعها
في الحقيقة الطاعة شئ وضعف الشخصية شئ اخر والحياة بين الزوجين خاصة المعاملات من الاسرار التى لا يطلع عليها الوالدين ولا يجوز واحد ينشر حياتو على الملا ثم يقول طايع الوالدين :confused::confused:
وبالنسبة لصاحبة الموضوع لا اصدق انها كانت ستشعر بانعدام الامان لو كان زوجها حاااازم فقط ويعرف كيف يحفظ اسرار زوجته ويقوم عليها ويطيع امه في نفس الوقت مش صعبة
الانسان يطيع والديه فيما لا يغضب الله فقط
والغريب ان واحد يدعيلها بالطلاق وواحد يتهمها بعدم الطاعة لا ادرى ماذا
بالنسبة لصاحبة الموضوع انتى قلتي ان زوجك ضعيف الشخصية من وجهة نظرك لكنك لم توضحي جيدا عمق المشكلة كيفاش نحكمو عليه فقط من عموميات بمعنى اذا كان زوجك طايع الوالدة ولا يحكي اسرار الزوجية وفي نفس الوقت هي امور تقدري تصبري عليها مثل شغل الدار والطبخ و ميزانية البيت وغيرها من امور فهذي لا اراها سبب للطلاق وقد لا تكون بالضرورة ضعف في الشخصية اصبري واجرك على الله لان هذه الامور راهي منتشرة كامل فى بلادنا وهي من الامور العادية وصبرك عليها شئ محمود
اما ان كان الزوج يترك كل الحمل على امه ولا يتدخل في شئ هي المسؤولة عن دخولها او خروجها او حتى حياتها الشخصية تديها للعرس بسيف عليها وللحمام بالسيف وتتصرف فيها مثل الدمية ولا تفرق بين الحلال والحرام وتتدخل حتى في امور الزوجية وهذي امور منتشرة في بلادنا حبينا او كرهنا كاين عجايز يتدخلو حتى في حمل الزوجة للاولاد من عدمه والزوج لا يسال وكانه غير موجود ولا دور له فهنا يجب وضع النقاط على الحروف
لذلك الموضوع غير واضح ولا اجد سوى الدعاء لكي بصلاح الحال والفرج وربي معاك

[النجمة القطبية]

للاسف كل النساء من طينة واحدة. تريده ان يعصي أمه لكي ترضى هي مع أنها تقول انها في نعمة من الله؟ لا حول ولا قوة إلا بالله. صدق رسول الله صلى الله عليه وسلم: " لانتن صويحبات يوسف". بدل ان تقنعنها بالصبر وأن الامر لا يستدعي كل هذه المبالغة رحتن تخببنها على زوجها وقد قال صلى الله عليه وسلم :" ‫لعن الله من خبَّب امرأة على زوجها". ثم انت هنا غتبت زوجك على الملأ واهنته بضعف الشخصية فتوبي الى الله لان ما تفعلينه منكر. واعلمي ان نهايتك لن تكون كما تظنين. فاحذري ان تخطئي واغلقي الموضوع واطيعي زوجك ما اطاع الله فيك.
وإني لأعجب لرجل بيته له يتزوج فتصبح زوجته الآمرة الناهية بينما تأتي امه ضيفة وفي أغلب الاحيان ضيفة ثقيلة على زوجته وأولاده فتعطش فلا تستطيع أن تشرب من الحنفية ولا أقول من الثلاجة إلا بعد ان تستاذن زوجة ابنهان في حين تسكن حماته فتبيع وتنفق من ماله وتطبخ ما تشاء من ماله واخوة زوجته يعيثون في البيت فسادا ولا يحرك ساكنا؟؟ أهذه هي الحياة؟ كم هم كثيرون حولي ممن يعطون سياراتهم لاخوة زوجاتهم في حين لا يركبها اخوه ولو بالمقابل. وأعرف أن الكثيرات يعترضن على ما اقول لكنها الحقيقة المرة.

يا اخي لنكن واقعيين هناك امور بين الزوج وزوجته وامور بين الزوج وامه وكل شئ في هذه الحياة لازم يكون عندو حدود لا افراط ولا تفريط
المراة لما تتزوج تبحث عن رجل يكون قايم بمسؤولية زوجته وقوام بمعنى رجل تعتمد عليه رجل يكون ابوها وزوجها وحبيبها وكل شئ لكن كاين رجال يتخلاو عن المسؤولية بحجة طاعة الام :confused::confused:
الرجل لازم يبر امو هذا واجب يعطيها مالو يشريلها كيما يشري لمرتو يديها للحج وللطبيب يديها تعيش في دارو او حتى يعيش عندها وتخدمها زوجته يحطها فوق راسو وقليل كل هذى امور عادية واحد ما يسالوا فيها لان الجنة تحت اقدام الامهات لكن كاين رجال يترك مسؤولية زوجته كاملة للام وميسالش عليهاا وكانه غير متزوج وهو يقعد مرتاح ويخرج ويعتقد انو هدي هي الطاعة والزوجة تحتاج لوجود الزوج قربها والا علاش تشتكي انا فهمت انها تقصد هذا الامر من خلال قول صاحبة الموضوع لا اشعر بالامان معه وهي عبارة خطيرة
وطبعا نقولولها اصبري لانو ليس لديها حل اخر سوى انها تحاول تصلح الامور وتصبر
اما كلامك يا اخى عن الحماة التى تتصرف في مال الزوج فطبعا ماشي مقبولة هاذي ياك قلنا لازم يكون الرجل رجل حاااازم في بيته مع الجميع كيفاه تتحكم فيه نسيبته يعني يا هاك يا هاك معندكمش وسط ههه

[khalwi]

غير بالشوية و تلقاو الحل

[khalwi]

من كانت في نعمة و لم تشكر.................خرجت منها و لم تشعر

[hamdanhamdod]

كلمة طلاق راهي دمر اسرة كيما قالك اخ خلوي ونصحك وخطيك من هاد فكرة سبب شيطان يحب يدمر بيوت اسرية والله يدوم عشرة بيناتكم

[مواطنة]

السلام عليكم
اختي الفاضلة يمكن شخصية زوجك الضعيفة مقلقاتك لكن انت ميزي مليح
زوجك صالح و ينقصو غير شخصية تكون قوية ياك هكذا معناه حاجة وحدة برك ماشي مليحة اختي انا لا اعرف مدى تعلقك وحبك لزوجك لكن الذي يجب ان تعرفيه هو انك تركزي مليح على ايجابياتو
و اذا راكي حابة تعرفي قيمة زوجك اطلبي من زوجك يديك عطلة لداركم منها ترتاحي و منها تغيري جو و تشوفي الامر ديالك من بعيد
اما فيما يخص زوجك
يمكن مازال مالحق لمرحلة النضج الكلي لي خليه يستقل بافكارو و يوازن بينك و بين امو
باش تنقصي الضغط عليك كي تحبي تتفاهمي معاه كي تكونو مع الام ديالو اهدري ديركت و هو تشوفي اجابتو قدام يماه
نهار يقولك علاه هدرتي قدام يما فهميه بلي هكذا تكون علابالها و اذا عندها اقتراح تطرحو,,,,,, يفهم وحدو بلي بدون ما يعطيها تقرير
انت عمليلو اشارات من وقت لوقت بلعقل يفهم باذن الله
اختي خدمي ذكائك و لا تختاري الحل السريع
الصراحة لازمك تريحي راسك منهم عاودي حساباتك و ارجعي لدويرتك وراجلك و احتسبي تحملك لاننا في دنيا فانية ما تنسايش و اذا راجلك ضعيف الشخصية معناه ساهل باش ترضيه و طيعيه و هذا يساعدك في الفوز بالجنة واش تخيري...؟؟؟؟؟؟؟؟
تعلرفي اختي لوكان تشوفي مشاكل المتزوجات تهربي و تلقايهم صابرات ليس لانهن ذليلات لالا بل لانهم يريدون الاجر و الثواب مع امل التغيير للافضل

[ايمان نور الجزائر]

الطلاق ماشي حل ختي.....وماشي لهاد
الدرجة
اصبري معاه...لعل وعسى يتغير

[alchamkha]

ادا على اي مشكله يوقع الطلاق ما يبقى حتى بيت عامر اختي راكي مازلتي اول سنه زواج و هي اصعب مرحله فالزواج لازمك تصبري و تحاولي تصلحي بيتك و امورك ماشي تهربي للطلاق

[نايفز55]

مممممممممممممممممممممم

هذا ولد باب ومام ما يصلح لولوا مدام مماه تتحكم فيه لا أمل فيه ربي يسهلك

[مياسم الصمت]

. , زوجي طيب و حنين و مثقف و كريم و و و و باختصار مافيه حتى عيب من هادو... مشكلتي معاه انه ضعيف الشخصية , صدقوني مارانيش حاسة بالأمان معاه .. كل ساعة براي .. يماه ساكنة معانا فالدار و الله
علابالي يماه و لازم يطيعها و هي والله ما عندي حتى مشكل معاها بالعكس والله نحترمها و هازتها فوق راسي بصاح مشكلتي معاه هوا


مارانيش قادرة نحترمو نحسو ضعيف و متردد بزاف و يتدخل في أمور النسا فوق الحق مايهابش ,
راني ديما خايفة م المستقبل حاسة روحي وحدي بلا سند





السلام عليكم ورحمة الله وبركاته
اسمحيلي اختي مسبقا على الكلام اللي رايحة نقولوا ربما نكون قاسية معاك لكن ماعليش كيما قالوا زمان
خذ رأي اللي يبكيك وما تأخذش رأي اللي يضحكك
أختي الكريمة حابة فبل تفكري وتجاوبي على أسئلتي
اقلبي الاية لو كان كل المحاسن اللي في زوجك بدليها بعكسها


يضربك يسبك يخونك وغيرها من العيوب
فقط فيه ميزه واحدة مليحة هي قوة الشخصية

راح يعجبك الحال أكيد لا

رايحة تحسي بالأمان اكيد لا

واكيد وناكد لك انه كل واحدة متزوجة ماهيش حاسة بالامان وحتى اذا ماصرحتش بالشيء هذا

وانعدام الاحساس بالأمان ليس فقط سببه الزوج

قارني نفسك بوحدة ربما وصلت 48 سنة وهي بلا زوج وبلا عمل
رايحة تحس بالامان أكيد لا
وأكيد رايحة تحس بالخوف وتحس روحها بلا سند خاصة اذا كانت بلا أب وبلا أم
والحديث قياس فيه امثلة كثيرة

زوجك نوعيته ماشي ضعيف الشخصية نوعيته متعلق بأهله بزاف هذه هي الحقيقة

واذا كان يأخذ رأي امه في كل شيء وكان رايها صواب وين المشكل
واعكسي الآية لو كان زوجك ياخذ رأيك انت بدل أمه واش رايك يعجبك الحال كوني صادقة مع نفسك كي جاوبي

اسالي روحك امه هاذي رايحة دوم
تاثيرها على ابنها رايح يدوم
مع الوقت يتغير كل شيء


اذا كان زوجك هذا هو عيبه الوحيد وما وصلكش اغفلي على العيب هذا بالشوية راح يتغير

اختي احمدي ربي انه تزوجت بنفس مومنة كيما يقولو العجايز
وواحد في الدنيا ماهو كامل

اذا كان زوجك فيه عيب واحد ربما انت فيك عيوب وقابل بيك زوجك ومحترمك

اختي الكريمة حطي ربي في قلبك واصبري راه يتغير عليك الحال فقط انت في عامك الاول

ما تبقايش غير تحسبي لزوجك عيوبه فكري في حسناته

ربي يرزقك اختي راحة البال يرزقك الذرية الصالحة

سلام

[foton fatna]

حسبنا الله ونعم الوكيل .الانسان مهما عطاه ربي مايقنع

صدقيني كاين رجال والله ماتقدري
تقعدي معاهم من السنتهم السليطة
يحبو يظلمو بيديهم والسنهم لدرجة
انو تتمناي انك تموتي واذا كان ايمانك ظعيف ربما تنتحري
راهو مابقاش رجال ظراف في
هذي الدنيا ديريها في بالك.
ومابقاش رجال يعرفو ربي
انقشيها في عقلك.
وشدي في راجلك بسنانك ويديك. الراجل العاقل راهو عملة نادرة هذي نصيحة من وحدة شافت الهموم

[liyna_24]

احمدي ربي أختي راكي في نعمة
و الشياطين حابين يفسدو عليك
ما تسمعيش للي يقولك لي يسمع كلمة يماه ضعيف
سبحان الله خايفة على مستقبلك خلاص معاه
واش راهم يتعدو عليك و هو ساكت
انعلي بليس
الراجل ديما في عامو الاول يحب يبين بلي يماه فوق الكل باه تديري حسابك
و مبعد راح تستقلو بقراراتكم خاصة كي يجو لولاد و اتفكري كلامي
و الله راجلك لاباس عليه هدا الشيطان حاب يخربها عليك بالسيف
ربي يهديك و يسهلك

[محمد جديدي التبسي]

أفهم مشكلتك تماما لكن لا أظنه سببا كافيا لطلب الطلاق ثم ماذا بعد الطلاق ألا ترين حال المجتمع الذي لا يرحم أحدا
أختي عودي إلى ربك وانظري للصفات الاجابية التي سردتها لزوجك أعرف أن ضعف الشخصية كارثة لا تحتمل لكن يمكنك التعايش مع ايجابياته وكوني أنت القائد لهذه الحياة الزوجية بما أنك أوعى وأرزن وربما بعد مجيئ الأبناء ستتغير الحال ويشعر بالمسؤولية أكثر
الله يعينك ويفتح عليك ويلهمك الصواب

[moh140]

سوآء گنت نآجح أم فآشل فالنآس
ستتحدث عنك بآلسوء لذلك لآ تبآلي گمآ
قآل آحد الحگمآء :
آلنآس إن لم يجدوا عيب في
الذهب لقآلوا بريقه يتعب العيون !

[زكرياء الأوراسي]

والله عيينا نفهموكم يا النسى يضربكم الراجل مايعجبكمش الحال يكون حنين معاكم مايعجبكمش الحال يكون يضحك مابعجبكمش الحال يكون رزين ومايحكيش بزاف مايعجبكمش الحال وش راكم حابيين؟؟؟ آآآآه وش راكم حابيين؟؟؟ واقيل حابين حتى نتوما تزوجو بربع رجال؟؟؟ احشموا شويا ولا حابيين تطلقوا وتلقاو لا ليبارتي ؟؟؟ احمدي ربي لي رزقك براجل حنين وكريم معاك كاين نسى راهم عايشين بالطرايح صباح طريحة عشية طريحة والانسان لي مايحمدش ربي راهو ماوش مليح.... المسلسلات دارو فينا حالة نقولك حاجة اطلقي اطلقي خير ليك
واقيل تزوجي مع مهند اون بارصون راجل وعندو شخصية بفففف

[wafa16]

اختي انا نظن الصفات و الميزات اللي ذكرتيها في الاول تغفر لزوجك باقي الامور
اختي ما وضحتيش الامور بالشكل الكافي
يعني هل زوجك ضعيف الشخصية مع كامل العائلة الاخوة و الاخوات العمات و الخالات مع الجيران في مقر عمله
ام مع امه فقط
ثانيا ما فهمتش واش تقصدي بضعف الشخصية هل يحكي لها الامور الزوجية و يطلب رايها هل تتدخل في علاقتك الخاصة مع زوجك
هل قراراتها معك تعسفية يعني ما تخرجيش و ما تروحيش لداركم و ما تخدميش
انا لا اظن لانه لو كانت الامور هكذا لما اكتفيت بكل صفحات المنتدى لانتقادها و ربما وصفها باقذع الصفات كما نصادف في بعض المواضيع
و من هذا استنتج انها ناس ملاح لانك لم تتحدثي عنها بالسوء
اختي مفهوم ضعف الشخصية يختلف من شخص لاخر احيانا اهتمام الولد بامه و بره بها يعتبره الناس ذلا و ضعف شخصية
احيانا اذا شاور امه في امر من امور بيتها يعتبر وليد يماه اذا اهداها هدية او اخذها في نزهة يعتبر وليد يماه
اذا جلس معها في جلسة منفردين يحكيلها و الا تحكيلو او عانقها او قبلها يعتبر وليد يماه
نعطيك مثال
والدي مثلا مشات في عائلة امي دعاية و اشاعة انو وليد يماه و يخاف منها و يشهد الله ان ابي رجل و من احسن الرجال فقط لانه بار بها و لانه يزورها يوميا و لا يرد الكلام في وجهها و لا يرفع صوته في وجهها و يشاورها في بعض الامور
لكن في الاخير امو ماتت و هو و والدتي ربحو دعوة الخير
لهذا انصحك لا تسمعي كلام اللواتي يحرضنك على العصيان و ربما طلب الطلاق
لانك ستندمين لوحدك و كل وحدة مهنية في دارها
الطلاق كلمة صعيبة في المجتمع ديالنا
انت لم تخبرينا عن راي اهلك في الموضوع يعني ان عرفو انك ستتطلقين لهذا السبب مع ان زوجك و امه يعاملانك جيدا
ما هي نظرة المجتمع ان كنت لا تزالين شابة من سيخطبك و ان خطبك سيسالك لما تطلقتي تقوليلو كان زوجي مليح بصح يشاور يماه و انا نحب واحد اللي مايشاورش يماه
انا نقولك واحد ما يزيد يدنا ليك لانك تخوفي يقولك نجيب المشاكل لروحي
ما تخافيش لوكان تعاودي تتزوجي بواحد شخصيتو قوية بصح يهينك و يضربك و يظلمك و ان لم يعجبك الامر يطردك لانه واعر و راسو خشين و كلامو من راسو
خلاصة القول اختي نحي الطلاق من بالك لانك عندها ستعرفين قيمة زوجك الطيب
امو يجي نهار تموت و انتي تكوني كسبتي رضاها و رضا زوجك و هذا زواج عمرك ما تصيبي واحد كامل مكمل يعني مستحيل تصيبي خاتم قد صباعك

[" أبو عبود"]

يا جماعة أرى ان البعض يسيئ فهم الآخر. لنناقش الأمر كلمة كلمة. الرجل قوي الشخصية كيف يكون؟ حازم ؟ يعني حازم على زوجته يعني طريحة الصباح واخرى العشية وحتى أمه لا تستطيع توقيفه عن هذا؟ هل هذا ما تريده الأخت؟ هي قالت انه رجل بكل معنى الكلمة ثم قالت هو ضعيف الشخصية وأعازت ضعف الشخصية إلى طاعته لأمه. هل أقول لكم ما الذي يدور في خلد هذه الاخت؟ وآمل أن اكون مخطئا. هي تريد مسكنا لوحدها وأمه تمنعه من ذلك. هذا باختصار ما وصلت إليه. فهي لم تورد سببا كافيا بل قالت بأنها تفكر في الطلاق. بالله عليكم هل ما ذكرته من مواصفات زوجها يدعو حتى للقلق فكيف بالطلاق؟ نحن لا نتكلم عن الرجل الذي لا شعور له بالمسؤولية وحقوق الزوجة على العين والراس وهذا امر لا نقاش فيه. فلم أرى بعض المتدخلات أعطين للموضوع بعدا آخر؟ من لا خير فيه لامه لا خير فيه لزوجته ومن لا خير فيه لزوجته لا خير فيه لنفسه. هذه الاخت تفتعل مشكلة تريد من خلاله ان تضغط عليه لكي يرحجل عن امه. فهي لم تطلب طريقة لاصلاح زوجها بل اصلا لم تحاول ذلك. فما الذي تريده إذن؟ فلتكن صريحة ولتقل باللسان العربي الفصيح : لا اريد ان اعيش مع امك". واردد اتمنى ا، اكون مخطئا في فهمي للموضوع على هذا النحو.
وقول لها للمرة الاخيرة: اتقي الله في زوك وفي نفسك وفي اولادك.

[khawlita.dz]

اولا ليس ابدا بسبب لùلب الطلاق
وهناك فرق كبير بين قوة الشخصية و بين سوء الاخلاق
كما ان هناك فرق شاسع ولا مجال للمقارنة بين طيب المعشر و سماحة الخلق وبين الضعف
صحيح الامور الزوجية و قرارات العائلة الصغير خط احمر لا يتدخل به لا اهل الزوج ولا اهل الزوجة وانما هو امر يقرر بين الزوجين فقط وهما فقط لهما الحق بالقرار
لكن ليس هكدا تحل الامور ليس بالطلاق
يا اختى كلميه و ضحى له اتفقى معه اقنعيه و غيريه اما الطلاق فلا

[زينة نور]

شوفي حبيبتي طولي بالك اصلا هذا عام واحد فقط اذا نراكيش حاسة بالامان وانت متزوجة صدقيني راكي رايحة تفقديه نهائيا وانتي مطلقة
وتقولي راني نخمم في المستقبل ...المستبقل لايعلمه الا الله
انا نقلك يااختي استغفري ربك وادعيه واهتمي بزوجك وعائلتك هذا وسواس نتاع شيطان لاغير
ربي يهنيك

[zahra13]

السلام عليكم
آه آه يا أختي الغالية ربما مراكيش عايشا معنا في المجتمع وسامحيني ولكن تخمامك في الطلاق لهذا السبب مدخلتش في راسي ابدا غير في حالتين اذا كنتي حاسبا انو بعد الطلاق من هذا الرجل راح تلقاي مباشرة وبسهولة راجل احسن منو وحازم كيما راكي حابا او أنك متحبيهش لأنو المرأة لتحب راجلها مستحيل تخمم في الطلاق او تتلفظ بيه .كنت على الأقل تقولي راني منزعجة او كارهة هذا اسلوبه ولكن مرة واحدة الطلاق ؟؟.
وهذه الجملة اثرت فيا كثير(الحاجة الوحيدة لي مخليتني ماطلبتش الطلاق لحد الساعة هي من الناحية الشرعية ما علاباليش إيلا هدا سبب كافي باه نطلب الطلاق) تخيلي اختي الغالية هو يسمع هاذ الجملة منك واش راح يحس واش؟؟ راح يخمم؟؟ لالا يا أختي الغالية استغفري لربك لأنو هاذ الزوج نعمة من الله وخاصة ليس فيه ما يغضب الله (وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ ..)
اتفق معك ربما هذا السلوك يقلقك لكن ليس لدرجة الطلاق .انت ماتحبيش هاذ السلوك لكن تحبي راجلك هذا اكيد؟.
والله نصيحتي ليك انسي كلمة الطلاق واذا كان حجتك ضعف الشخصية راكي في المشوار حاولي تتقبليه كما هو اذا فعلا تحبيه ويمكن توضحيلو الأمور بطريقة غير مباشرة يعني تتناقشي معاه في مواضيع بعيدة عن الأسرة وتقوليلو واش رايك في هذا الفيلم؟؟ واش رايك في هاذ اللباس ؟ يهمني رايك....عندك الحق ...شجعيه باش يعطيك رأيو في كل شيء لازم الحوار.....
المهم سامحيني طولت عليك الله يهنيك ويوفقك للطريق الصحيح ان شاء الله.
على فكرة المستقبل لي خايفة منو بيد الله ماهوش بيد زوجك.

[ايمان23]

لالالالالالالالالالالالالالالالالالالالالالالالالا لالالالالالالالالالالالالالالالالالالالالالالالالا لالالالالالالالالالالالالالالالالالالالالالالالالا لالالالالالالالالا

[الواثق]

مليح كي عاد يغير رأيو بسبب امه ..................هاو تحوسي عليه كي رجال اخر زمن اسد على امه قط في الشارع ؟؟؟؟؟

وزادها انتم النساء غراتكم هذه الافلام التركية وين يبان الرجل يضرب ويقتل ويقاتل على جال زوجته هههه من كل الاشرار ههههه حتى الكف كي يضرب زوجته يجي بنين في رأي الكثيرات هههه
شدي في راجلك واخطيك من لعب الدراري هذا واحمدي ربي ماركش عند اشباه الرجال لاغيرة لا كلمة طيبة لاوالو السب والشتم وسب الدين والزطلة والشراب وهم الزمان والكارثة معصية الوالدين
والله المستعان

[نورالهدى بيولوجيست]

أفهم مشكلتك تماما لكن لا أظنه سببا كافيا لطلب الطلاق ثم ماذا بعد الطلاق ألا ترين حال المجتمع الذي لا يرحم أحدا
أختي عودي إلى ربك وانظري للصفات الاجابية التي سردتها لزوجك أعرف أن ضعف الشخصية كارثة لا تحتمل لكن يمكنك التعايش مع ايجابياته وكوني أنت القائد لهذه الحياة الزوجية بما أنك أوعى وأرزن وربما بعد مجيئ الأبناء ستتغير الحال ويشعر بالمسؤولية أكثر
الله يعينك ويفتح عليك ويلهمك الصواب

الله يكثر من امثالك اخي و جزاك الله كل خير دايما ردودك فالمستوى و قريبة للمنطق مافيها لا استهزاء لا تشفي هذا و ان دل فيدل على نبل اخلاقك و سموك ماشاءلله الله يكملك بعقلك و لا تحرم من يطرحون المشاكل من ارائك و ردودك



جزاك الله كل خير