رأيكم هو الحل

[مشكلتي]

أنا طالب جامعي عمري 21 سنة ...مشكلتي هي أنه كان لأخي "camera" و "appareill photo pro.." و كان دايرهم فالبيع ..المهم أنا تدخلت و قلتله مدهملي أنا نبيعهملك , المهم روحت لعندو و جبتهم مع العلم أن أخي يقطن بمدينة أخرى ..و روحت عند صديق كان قالي من قبل لو تملك أجهزة إلكترونية للبيع مدهملي نبيعهملك و بالسوما ليراك طالبها ..المهم مديتهملوا و قلتلو عندك 4 أيام لا بعتهم جيبلي دراهم لا منباعوش ردهملي ..أمالي فاتت 10 أيام و عيتلوا لقيته داير "code" زدت عيتلو و ماردش بعثتله sms تاني ماردش ..روحتلو لدارهم فاليل لقيتوا أيا صرخت في وجهوا PSk هادوك صوالح مشي تاوعي ..أيا عطاني ronduvo قالي عندك 3 أيام يكونوا عندك دراهمك Psk قالي راني بعتهم و مازالا ما خلصوني ..أمالي فاتت 7 أيام و مابان والوا و كي نروحلو لدار يقولولي ماراهوش هنا ...و في ليلة من اليالي روحتلو فاليل فإذا بي نلقا واحد عند دارهم باب مانعرفهش قتله : سلام راك تقارع لصاحبنا واقيلا قالي إيه قتلوا : ماعندكش بروبلام معاه قالي : راه دايلي Iphon4 و galaxy s4 و قالي راني في 15 يوم نعيتلو و مابانش ..المهم قعدنا كل يوم نروحولو و مانلقوهش ..و خطرا تلاقينا بيه عند باب الدار و حكمناه قلناله يا تعطينا دراهمنا يا تردلنا صوالحنا ، قالنا أنا راني بعتهم Mé مازالا ما خلصونيش و قلنالوا نروحوا دركا عند كاش واحد Psk كان اليل ..المهم دانا لوحد الدار و فاللنا هنا يسكن و قعدنا نطرطبوا و نلغوا ماخرج تاحد .. فطلقناه قلناله غدوة نتلاقاو ..المهم غدوة من داك رحنالو ملقيناهش فالدار تلاقينا بباباه قلنالوا هاشدرنا البارح و هاوين روحنا أمالي قاللنا باباه : راه كدب عليكم راه داكم لدار خالتوا هاديك و راها مبلعا في 30 يوم ..المهم قلنا لباباه غادي نشتكوا بيه و لي فيها فيها ..قاللنا باباه دبروا ريسانكم لابغيتوا تشتكوا شتكوا أنا خاطيني ..المهم حنا محبيناش عليه قلنا نزيدو نصبرولو ..فبعد 3 أيام ولينا لدارهم تلاقينا ب باباه قاللنا غيل دركا كان واحد هنا لعندي يحوس على ولدي راه دايلوا Pc Portable و carte Mére و قعد يبكي ..........المهم رانا حاصلين Psk كي نعيتولوا داير code و كلما نروحولوا لدار منلقوهش و أنا خويا راه مدابزني قالي ماتزيدش تهدر معايا حتى تردلي صوالحي
فما هو الحل أيها الزوار و الأعضاء و المشرفين .....نشتكوا بيه ولا نصبرولوا
و السلام عليكم

[نورسين.داية]

السلام عليكم

لكن ما هو الدليل الذي يثبت أنك سلمت لدلك الصديق الأجهزة التي تحثت عنها في حال شكواك ......يعني حتى لو شكيت به ....سوف ينكر أي علاقة بك ...و يقول أنه لم يتسلم منك أي شيئ ..........................ما رأيك .....

مسألة الإمهال بالنسبة لي غير واردة ......أشكي به و أنتظر رده في قسم الشرطة .....و لو أني متأكدة أنك لن تسترد شيئا .....هي عضة لك .....و لنا حتى لا تكرر هذا النوع من الأخطاء

[badi09]

روحة اشتكو بيه في 3 كل واحجد يقدم شكواه راهم راكم تربحوه ولكن تشتكي بيه وحدك ميكفيش بتهمة النصب والاحتيال ةولكن الاحسن سيوتوصلو للحل الوجي بارسكو ادا شتكيتو بيه راه ايجيبها في الحبس ويمكن تضييع حياتو

[abdelka22]

و كان تشتكوا بيه يليق الدليل ....و كان ما تشتكوش غادي تقعدوا معلقين و المشكل خاصة أن الأجهزة مشي ديالك ..المهم روحوا عند يماه باسكو يماه قلبها حنين على ولدها و يمكن هي تدبرلكم على الدراهم ولا تضغط على باباه باش يمدلكم
و الله يسهل خويا

[hodahodahoda]

ادفع لاخيك ماله ثمن الاشياء
و تبقى القضية بينك و بين صديقك

[joulia31]

صيب حل غير بالسياسة ادي معاك خوك و روح ليه يعطيك دراهمك ان شاء الله


ومتل هاد الناس كاين ياسر انا تاني صراتلي بعت تيليفوني اعطاني النص و النص لاخر غير ليوم غدوا ليوم غدوا فاتت تلات اشهر

لكن جبتهم بالدراه انا ما كنت نعرف دارهم لكن صقصيت عليه و ين يخدم و رحت عندو في محل الحلاقة ونكر بلي بعتلو هاتف

لكن زدت رحت لدارهم وعند باباه بهدلو باباه وعطاني رزقي

[abdel02]

الدبزة هي الحل مع أمثال هولاء.

[abdelhamid24]

كاين حاجة سموها
ديزة ودماغ صوتها رائع

['مــــــــــــرجان نينو']

ياصحبي هذا صحيبك بلعاط 100 في الساعة

شوف اذا كان عندك الدراهم وقادر تخلصهم

اعطي لخوك حقهم كي شغل انتا اشتريتهم

ومن بعد تبع صاحبك واذا معندكش الدراهم

فهم خوك مليح وقلو راهي الدنيا مهيش دراهم برك

وهذي اللقطة تعلمك بزاف صوالح

[badi09]

يا اخي مديرش عليهم دبزة زدماغ طفرها فيه يروح يجب ورقة من عند الطبيب الشرعي يربحك وتعاشي نتا في الحبس
نقولك حاجة ديرولو تسجيل صوتي ورحو اشتكو بيه

[hamdanhamdod]

كيما قالك اخ تسجيل صوتي يكفيك مشكلتك ساهلة او دي معاك 2يكونو كيما تاع مصارعة ورجعلي خبر نحن شعب العصا لمن عصى

[الحلم الجميل]

السلام عليكم
شوف اخي الا عندك دراهم خلص خوك و الا معندكش خلصه غير بشوية كل مرة اعطيه شوية
و هذا الاخ الي خونك غير بعده غادي تتعب بزاااااااف معاه ووكل عليه ربي
لانو رانا في وقت صعيب انت كما قلت كاين بزاف الي يجيوا يعيطولوا على صوالحهم
بلاك يضربه كانش واحد بموس في زعفة و تحصل فيك
..سلك روحك و بعده

[sarl02]

راكم 3 من الناس ..روحو بوزيو بلانت عند الشرطة القضائية محل الاختصاص الي عندكم وتاكد اخي اذا كان طاح مع ضابط او مفتش محترف في نهارو اجيبو ويجبد كلشيء وحبذا لوكان اكون عنكم معرفة ثم ماشي واعرة هذه.

[doba]

والله قضية معقدة يا أخي ربي
يجيب الخير

[لينة نور]

السلام عليكم

أراك وقعت في مشكلة لو أنت تخطيتها بحكمة , سوف تكسب منها درسا قيما .

أعتقد أن القانون يعاقب على مثل هذه التصرفات ( قضية التسجيل ) يعني اذا كنت في مواجهة

مشكل سوف تصبح في مشكلين , و ابتعد عن العنف فكم من مشاكل من هذا النوع انتهت بالقتل

و ادخلت صاحبها السجن المأبد وما عند الله أعظم , نصيحتي لك ( خسر وفارق ) ولا تصغي لاحد

ولا تنسى أن هذا الولد متورط مع أناس من قبلك ....

حاول أن ترد لأخاك مبلغ أغراضه واياك أن تلومه وكلمه واعتذر منه على الذي حصل

فمهما كان فالمال ماله وقد أمنك عليه , لكن حظك كان سيئ , وسوف يندم والندم يكفيه

المهم أن لا تخسر أخاك , أتمنى لك النجاح أخي في تخطي هذا الاختبار .

[little smile]

ادفع لاخيك ماله ثمن الاشياء
و تبقى القضية بينك و بين صديقك

[jonne51]

سلام عليكم
اولا عليك تن تتقدم بشكوى و كن متاكدا انه سيكون تغير ايجابي في المشكلة و سوف تتحصل على ممتلكاتك و ما يقابلها من مبلغ مالي

[liyna_24]

مشكلك ساهلة
اشكي بيه انت و الاخرين عند السلطة المختصة
يخرجوهم من عينيه
و الله يرجعولك صوالحك أو دراهمك في نهار
موفق

[جماع مكي]

كيفية الحفظ بسرعة ساعدوني