زوجي هبلني

[مشكلتي]

السلام عليكم
مشكلتي هو انني مهما فعلت مع زوجيوحاولت اني نرضيه يطيح بيا
انا متخرجة من الجامعة وقعدت في الدار باه نقيم بعائلتي كل يوم وانا مع التنظيف والطيلب يجي من الخدمة يلقى كلش على الساعة حتى اني نطيبله كسرة جديدة لعشيةاه يشرب بيها قهوة نهار اعيد كان بايت في الخدمة قعدت لنص ليل وانا نرحي في اللحم وندير مرقاز ونقطع في اللحم ونوجدلو ونحط وكي جا الصباح قلتله شوف واش درتلك ودرتلك قالي يهو يا انت حتى وليت نبكي وبعد ياكل ويعاود وحتى كي نطيب حاجة من المنتدى وتجي مليحة حتى اذوقان مايذوقش نحاولو نحاولو يقلي راكي تعفسي مع انه كل الناس تعجبهم ماكلتي ودرك الصباح ماعندهمش باه يشربو القهوة درتلهم قاطو من 6 وانا فيه درك برك كملت قالي الخدمة الباهية اللي راكي تخدمي فيها والصبح يوكل كالنه ضرتي ماهوش راجلي ساعات نحس انه يغير مني طول يحب يطيح بيا مع اني وحدة من صحابو ولا من اهله تفوتني حتى انه كي يروح لدارهم يقتله الجوع لانهم مايطيبوش مليح حتى قالي ماعتش نروح نقعد لانهم بعاد
مانيش حابة ندير المكرة ونولي مانطيبش ومانظفش وتفسد داري وثان نحس بقيمتي تحت رجله طول يعكسن
اعطوني الحل راني كرهت

[ام نسمة]

واش نقلك يوجد بزاف رجال صح يغيرو من نساهم ويحبو يذلوهم ويحتقروهم انت اذا ماعندكش اطفال وعندك وين تروحي
روحي احسن اللي مايعرفش قيمتك وانت جديدة وعزيزة وقتاش يعرفها واذا عندك منو ذراري احملي الذل واقعدي على جالهم كما رانا قاعدين كامل بلاك راكي حاسبتنا عايشين لابال في مع رجالنا راكي غالطة الا من رحم ربي
الله يقويك على الصبر حنونة وانت ماتغشيش دارك اخدمي واحتسبي الاجر عند الله ربما يجي نهار ويفيق مع روحو

[7anine 87]

ربي يعينك اختى نقولك ماعدتى تسناى منو والو ومتقوليلوش درت ودرت خلى نيتك لربي وكملى اخدمى دارك باخلاص وادعي ربي هو القادر يهديهولك وتتبدل عقليتو مانيش حابة نقولك روحى لداركم نهارات خليه هو يروح عند دارهم ويزيد ياكل ماكلاتهم باش يعرف قيمتك مى لا خليك انتى الاحسن وماتبيلوش انك الاحسن هو اصلا فى داخلو عمبالو مى صعيب بزاف يعترف ربي يهنيك ويصلحهولك

[AMINA.Z]

يا اختي ديري قيمة لروحك باه يقيمك هو

انت طيبي بويسك حابة تطيبي و نظفي دارك بويسك تحبي النظافة

ماش علاجالتو و لا باه يشكرك

ثقلي روحك شوية

[نايفز55]

جعت وانا نقراء في مشكلتك

هذا موش راجب سبحان الله واش راح دري معاه إذا كل هذا وما قيمكش كون تنقصي شويا ياكلك

اضحكيلوا في وجهوا وخلاص

[*الحواس*]

عاقبيه , لكن ليس عن طريق معركة :1: , لن بطبيعة الحال سوف يفوز عليك .....

العقاب يكون بسحب كل المجهودات التي تبديلنها , خليه يشرب القهوة تاع الصباح بالخبز , وقت الغذاء وجبة عادية , المساء قهوة و بس لا قاطو و لا مطلوع جديد .............. العشاء تاني وجبة عادية .........

مع مرورو الوقت يفهم الغلطة تاعه , بالطبع إن كان لديه إحساس تجاه شريكه الأخر .............

بالتوفيق :19:

[نورسين.داية]

السلام عليكم

أنزعي جميع الإمتيازات ....في نفس الوقت ...و لا تتركي المجال لمناقشة الموضوع أو أن تبدي بعض التبريرات .....يعني تعاملي معه بنفس طريقته ....

هنا لربما سوف يستوعب الرسالة .....

بكل صراحة أنتم من أعطاه هذه الفرصة يعني أنتي تعطين أكثر من الواجب .....فتأتيه حالة تخمة ......فبطبيعة الحال .....المدلل ماذا تتوقعين فيه ......؟؟؟

هذه هي غلطة المرأة الجزائرية ...................

[haytoo82]

لابد لك ان تغيري المنهجية بالتدريج طيبي عادي واذا قالك قلو شفتها ما عجبتك وكان عجبتك وكان شكرتني اما النظافة ما نقدرش نقلك حبسي هذي حاجة لازمةربما راكي مقصرة من جوانب اخرى ونزيدك حاجة اثقلي شوية عليه وتشوفي وادخلي في النت ودوري على الحياة الزوجية كيفاه راهي تمشي ربما تعرفي الا كنتي غالطة ربي معاك

[اناناسة]

السلام عليكم، اختي انا نقولك حاجه ديريها في بالك قومي بواجبك على أكمل وجه و لا تنتظرني منه اي تقييم بل أصلا لا تقومي بسؤاله عن رأيه في اي شيء تقومين به لأنك قيمتيه ياسر و هو مايستاهلش كي يلاحظ التغير تاعك من ناحيه انتظار تعليقاتو المشجعة وحدو وحدو يعود يرجع . و تاني اختي لا تفعلي ما هو فوق استطاعتك حتى لا يصبح تقصير منك اذا ما مرضت او أصبحت غير قادره لا سمح الله ذات يوم . كاين ناس راهي ميته على حرائر مثلك و ماهمش لاقيين و السيد مزال يتشرط ، اهم حاجه واصلي عملك على أكمل وجه و ما تقيميهش كامل ( بيني و بينك كاين اللي تلقايه صاحبو ولا أمو يقولولو متحسسهاش بالانجاز و لا باللي راهي دايرا فيك مزيه باش طول عمرها تبقى تجري غير من ورا رضاك أملا نتيا ديري اللي تقدري عليه و ماتحوسيش تشوفي منو الرضى او الابتسامه اللي راكي ترضي فيه هو رب العباد و ليس غيره منا وهاك )

[ام جواهر]

هذي مشكلة تعاني منها الكثيرات ....انا مرة شريتلوا 2 صحونة احمر على شكل قلب علق عليهم ....وضركة مرة على مرة نخليه هو في الكوزينة مع الطبخ والماعن ونزيدلوا ولادوا بحجة اني مريضة باه يحس بقيمة المراة ....

[doba]

ربي يساعدك ويهنيك الخير ساعات ماش مليح

[basma79]

عن تجربتي الخاصة نقولك متكسريش راسك ياسر ساعة أكلة عادية و ساعة حاجة مليحة لكن ماتقوليش درت و درت

و إذا طيبتي حاجة اسكتي و مع مرور الوقت راح يفهم روحو

حتى النظافة المنزل خليه يشوف بعينو بلا كلام

ربي يهدينا و يهدي أزواجنا لما فيه الخير.

[اسماء47]

يجي النهار اللي يعرف فيه قيمتك
اصبري و الحاجة اللي ديريها ديريها في وجه ربي
و ان شاء الله ربي يجازيك على واش راكي تتعبي
ربي يفرج عليك

[لمعة السيف]

وعليكم السلام
اختي الم تضعي في حسبانك انه ربما الطبع هو من تربى عليه عدم المبالات
ربما لا زلت تجهلين طباع زوجك ..
من خلال شكواك و طريقة معاملته وطريقة محبتك وتدليلك التي تقومين بها لا تخسري البريق الامع بشكواك وإلجئي الى الله افضل ..فالاحسان وطاعة الزوج والتي هي من أعظم العبادات عند الله جل وعلا؛ حتى أخرج بن عبد البر أن امرأة من الصحابة رضي الله عنها – وهي أسماء – جاءت إلى النبي - صلى الله عليه وسلم – فقالت: يا رسول الله؛ إنكم معشر الرجال قد فضلتم علينا بالجمعة والجماعات وحضور الجنائز وأعظم من ذلك الجهاد في سبيل الله، فما لنا نحن معشر النساء؟ فقال لها النبي - صلى الله عليه وسلم -: ( ارجعي فأخبري من وراءك من النساء أن حسن تبعل إحداكنَّ لزوجها يعدل ذلك كله ) فولَّت المرأة وهي تكبِّر..استمري في معاملتك له ولا تيأسي وتأكدي انك على حق مهما كان جفاء زوجك وعدم اهتمامه بك وبما تنجزيه سيأتي يوم ويقدرك ما ان صبرت عليه فلا تهدمي بيتك ...وكوني واعية ومدركة وحاولي ان تعرفي السبب ان لم يكن طبع او عادة عند زوجك ..


ثبت عن النبي - صلى الله عليه وسلم – أنه قال: ( أكمل المؤمنين إيمانًا أحسنهم خلقًا وخياركم خياركم لنسائهم ) رواه الترمذي..اياك يا اختي ان تنشري مشاكلك بين النساء وتفضحي زوجك


وقد تقع بينك وبين زوجك..

يجعل سيرتك بالقيل والقال عند النساء ..حاولي ان تتقربي له بنفسك وليس بالاكل فقط وحاولي ان تفهميه وان تفهمي ما يأرقه وماهي الفكرة الخاطئة التي يحملها عنك حاولي ان تقتربي من مكمن المشكل لا ان تداويه بمشكل آخر ..لا تيأسي من اصلاح زوجك ومن الاحسان اليه ولاسرتك فلا يوجد افضل من الاخلاق الحسنة


يقول صلوات الله وسلامه عليه -: ( أيما امرأة ماتت وزوجها راضٍ عنها دخلت الجنة ) أخرجه الترمذي في سننه..


فإن مقلب القلوب هو الله جل وعلا، فعليك بالتوجه إليه، اسأليه أن يلين قلب زوجك، اسأليه أن يعطف قلبه عليك، اسأليه أن يرزقه الخلق الحسن، واسأليه جل وعلا له المغفرة والعفو وإن وقع تقصير منه في حقك فاستغفري له الله جل وعلا واطلبي منه العفو والعافية في الدنيا

لا املك غير هذا ما اقوله لك يا اختي ربما لا يعجبك ولكن لا املك سوى النصيحة في الخير ..وفقك الله

[ام نسمة]

والله تعجبت وضحكت وانا اقرء في الردود وكأن مشكلتك انت التعب في شغل البيت والطياب فقط .؟؟؟؟؟؟؟؟؟؟
الا تظنين ان المشكل اكبر من هذا ؟ اللي يحب زوجته لوكان تكون جايحة ومعفونة ويحبها ويقدرها ويقدر كلشي منها والعكس عزيزتي اذا ما حبكش لو كان تشعلي اصبباعك العشرة شمع لاجل عيونه والله غير يطفيهم ويقولك مكانش
انا اكثر وحدة حاسة بيك والله العظيم صدقيني لكن كما يقول راجلي خليها ترولي امالا انت تاني ديري وواجبك وحاولي تصلحي علاقتك بيه ماشي تقطعي واجباتك وخليها ترولي يا مدام
وابحثي عن سبب مشكلته معك وليس عن حل باش تخلفيها منو بالعكس انصحك تزيدي ممجهودك وفي نفس الوقت شغلي مخك وابحثي عن السبب الحقيقي عله في غرفة النوم وانت غافلة عله في معاملتك عله في اي شي المهم نحي الشغل والطياب من راسك ودوري على سبب حقيقي لمعاملته ليك وعالجيه

[ام نسمة]

عاقبيه , لكن ليس عن طريق معركة :1: , لن بطبيعة الحال سوف يفوز عليك .....

العقاب يكون بسحب كل المجهودات التي تبديلنها , خليه يشرب القهوة تاع الصباح بالخبز , وقت الغذاء وجبة عادية , المساء قهوة و بس لا قاطو و لا مطلوع جديد .............. العشاء تاني وجبة عادية .........

مع مرورو الوقت يفهم الغلطة تاعه , بالطبع إن كان لديه إحساس تجاه شريكه الأخر .............

بالتوفيق :19:

ههههههههه ضحكتني كانو مشكلتهم الاكل فقط اظن انو عليها ان تبحث عن سبب مقنع لتصرفاته

[أم الشافعي]

السلام عليكم و رحمة الله و بركاته

يقول الله عز و جل : (( و ليس الذكر كالانثى ))

فنحن نحكم على تصرفات الاخرين من و جهة نظرنا و ليس من و جهة نظرهم
و من هذا المنطلق انصحك اختي بالمطالعة و القراءة لتتعرفي على شخصية زوجك و من ثمّ اكتساب مهارات التعامل معها هذا اولا

ثانيا : لا يكن شغلك الشاغل الحكم على تصرفاته و انتظار ما يصدرمنه فانك ستتعبين نفسيا
ادخري جهدك و وقتك للارتقاء بنفسك و تحسين مستوها في جميع النواحي ( الروحية -الاجتماعية -الصحية............)

ثالثا : عاقبيه بحسن معاملتك و معاشرتك له و حسن تربيتك لابنائك و حسن تدبيرك لشؤون بيتك من طبخ و نظافة ...........و انت تقومين بهذا كله و انت راضية مستمتعة لا تنتظرين جزاء و لا شكورا و احتسبيه عند الله لانك ماجورة

و اخييييرا :الوصفة السحرية الداعاء ثم الدعاء ثم الدعاء و تحري او قات الاجابة و ما اكثرها و لله الحمد و المنة

جعل الله بيتك عامرا بالود و الدفء و الطمانينة و السكينة ان شاء الله

[بلال86]

السلام عليكم
أختي الكريمة أنصحك بأن تصبري على زوجك و تحتسبي إلى الله، و أكثري من الدعاء فإن الدعاء سلاح قوي قد يغفل عنه الكثير منا، و عسى أن تكرهي شيئا و يجعل الله فيه خيرا كثيرا
و في الأخير أسأل الله أن يغير زوجك و أن يجعل الله بينكما المودة و الرحمة، و ما ذلك على الله بعزيز

[jomana jiham]

لازم تتأكدي اذا كان يعامل هكذا في كل الأمور و لا غير في أشغال البيت.
اذا جات غير في الطياب ساهلة و هذا ماشي مشكل كاين بزاف رجال هكذا حتى ماكلة ما تعجبهم ما يبغوش التغيير يبغو غير التقليدي ,حنا في الدار عندنا منهم هههههههههه,اخي وأبي نعيوا ما نطيبوا و في التالي يعيبو مرات قبل ما نبدا يقولولي شا راكي غير تخلطي,و سيرتو اذا درت وصفة جديدة ما يبغوش ياكلوا حتى قبل ما يدوقوها.يبغو غير الطاجين و المراقي.و درك ولينا نطيبو غير السامبل حتى هوما كرهوا ولاو يحوسوا على الجديد.:1:

[مواطنة]

السلام عليكم اختي العزيزة اذا زدتي بكيتي كي يعكسك في طريقة طيابك ما نسميكش فحلة منتدى الجلفة
اذا حبيتي تكوني سعيدة في زواجك ما تسنايش هو يفرحك ابدا هو زيادة في السعادة ماشي السعادة كلها
كيما قالو بعض الاعضاء نقصي من المجهود
طيبي لي تقدري ماشي تقتلي روحك باش ترضيه وهو لاحياة لمن تنادي يعني ماشي تحبسي طياب او تتخلاي على مسؤولياتك انما بالقدر المطلوب لانو كاين رجال بمجرد الزوجة تطبخ كسرة و لو مرة بالاسبوع يولي فرحااااااااااااااان و يشكر و يعاود لانو يقدر تعبها و كاين لي نهار كامل وهي تتعب مع الاخير لا كلمة طيبه ولا شي
لذلك تهلاي في راجلك و في نفسك وما تضيقيهاش على خاطرك
بالوقت تفهمي بلي عقليتك في ارضاء الزوج غير صالحة لطبيعة زوجك و بالوقت يولي هو يطلب منك ديرينا كسرة توحشنا الكاتو توحشنا هذي وهذي
كي يفقد النعمة يحس مليح
من بعد تبعي برنامج احيانا تتعبي واحيانا تفششي نفسك
اختي انت تقهري نفسك في باطل هذي الاشياء كلها تصير في اغلب البيوت
انا اخي متزوج و مرتو طيب مليح صح مشي كيما امي لكن طيابها ماشاء الله في بداية زواجها كانت تطبخ وخويا احيانا يدير روحو شبع ويخرج برا ياكل ولا يجي لدارنا لكن ماشاء الله عليه مايعكسهاش من بعد امي علمتها طريقتنا في الطبخ صارت تطبخ على الطريقتين و دك خويا يموت على مكلتها و الحمد لله
شوفي انت ديري لي تقدري عليه بلاما تكسر راسك اكثر من الازم و اصبري على زوجك لانو اكيد فيه خصال اخرى مليحة و ما تخليش باب الطبخ يفسد نفسيتك وزواجك
ولي يحب الطريق السهل لحل المشاكل *الطلاق* نقولهم الله يهديكم
حاولو تكونو واقعيين سبب الطلاق : من اجل زوجي لا يعجبه العجب في طبخي
الزواج نشدو فيه بكل قوتنا و نحاولو كل محاولاتنا المشروعة لانقاذو
الطلاق اخر شي بعد اتباع كل المراحل لي نص عليها الشرع

[بلال86]

السلام عليكم
أنصحك أن تصبري على زوجك و لاتعاملينه بالمثل عملا بقول الله عز وجل (ادفع بالتي هي أحسن)، و ذلك حتى تنالي رضى ربك، فطاعة الزوج موجبة لرضى الرحمن، فاحتسبي لله و لا تنسي الدعاء فإنه سهم لا يخطئ ، و ذكريه بالله و أن الله و رسوله أوجب حسن المعاملة مع الزوجة و الرفق بها

[أم الحسين 24]

يا أختي ابحثي عن أصل المشكل .... انت تظنين أنك راح تكسبي زوجك من خلال الطبخ و النفخ لكن ربما هو له منطق اخر ,, ممكن طريقتك كانت راح تنفع مع رجل اخر لكن ليس هذا مفتاح زوجك ... كوني ذكية و ابحثي عن مكمن الخلل قد تكون شيء يزعجه في شخصيتك .. قد تكون طريقة اهتمامك بنفسك , ابحثي عما يجذبه ( بعيدا عن الطبخ و نظافة البيت) ... ليس عيبا يا أختي أن تبذل المرأة كل جهدها للمحافظة على بيتها و زوجها حاولي كسب زوجك لا تتخذيه عدوا بل تقربي منه أكثر غيري طريقة تعاملك معه .. قوي شخصيتك و اهتمي بنفسك .
لا تلجئي الى التجاهل ليعرف قيمتك لكن حسسيه أنك انسانة واثقة من نفسها ....في المرحلة القادمة شغلي مخك و انسي حكاية الطبخ لن تنفع معه
بالتوفيق ....

[علياء]

السم عليكم

ساعات الزوجة كي دير واجب ربي وتقيم راجلها وطيعو وتحبو يدرها ماعندهاش كرامة ودلال مش فاهمو ملا اعكسي كلش


هي خالية خالية ملا اعطيه الطاك ما تهتميش بزاف طيبي طياب عادي ونظافة خفيف خيف وماتقيميهش بزاف


ماديريش معصية برك وريلو وش معاناها الحقرة ضرك يبطل عمايلو هادي وزيد الا لقيتي خدمة برا اخدمي في كل الاحوال ماعاجبو والو هدا لان وقيلا مفيهش الامان هدا



الله يهدي

[sarl02]

لا تجعلي الامر تحدي بينك وبينه ...مهما كان زوجك وشريك حياتك ممكن يهدر واعلق برك وما في قلبو والو وهذا حال الكثير مع زوجاتهم ...ممكن شافك تتحسي مالامر احب اقلقك برك..لكن في قرارة نفسو تاكدي بلي العكس ..شوفي للجانب الايجابي فالعلاقة بينكم وما اتركزيش على مشكل التعليق على الاكل.

[naamane3]

زوجك هاذي هي طريقته في التعبير
اما عن طريق العكسات
او بالكلمات التي في ضاهرها انها مثبطة
لكن لو رايتي معاملاته اوما بين سطور كلماته
سترين كل الاحترام والحب
لذا لا تنفري وحافضي على زوجك

[LAMIA TEFFAL]

السلام عليكم
والله صديقتي لسنا جميعنا نعيش العسل واعلمي انا وراء كل جواب هناك حكاية وتجربة وكلنا نعاني لاننا نساء ولاننا احببنا ازواجنا فاعتادوا على دلك وهم يعلمون ان المراة صعب ان تواجه القدر وحدها لهدا تشرب من كاس الدل وتتحمل النداله والقهر في صمت ربما انت تشجعت ان تكتبي قصتك حتى ولو باسم الحائرة هناك غيرك لا يتجرا حتى ان يدكر معاناته امام نفسه وكل هدا لاننا رضينا بالمكتوب وربما قراءة بعض الادعية ستجعله يرجع الى صوابه ويحترمك هل هدا هو الحل في نظركم ان نجلس نرى احلامنا وشبابنا يموت في ايادي رجال اعمتهم الانانية والنفس العالية يجب ان يدركوا ان هناك كائن بشري يحس ينتظر كلمة طيبة اولمسة حنونة ونظرة دافئه تنسيك تعب وهم النهار هل هدا كتير علينا .
اختي ارجوا ان تفهمي الرسالة انا لا احرضك على زوجك ولكنني لا اريدك ان تعيش تعيسه تنتظرين ان يرأف عليك حضرة السلطان ابحتي ربما كان الخظا فيك ربما لم تفهم مايريد وليس عيب ان تجلس وتساليه وتفمهيه اما ادا كان غير دلك فانت الوجيدة القادرة على ان تغير مصيرك فلا يغبر الله يقوم حتى يغيروا ما بانفسهم
اما ادا طرجت الموضزع لمجرد انك كنت متضايقة فقط فنطلب من الله ان يزيل همك ويفرج عنك

[الفاتحة]

شوفي أختي نعطيك نصيحة و يا ربي تنفعك ....ديري الواجب وماتزيديش عليه لانو راجلك من النوع اللي مايستعرفش وما يحسش بتعب الناس وعلى هذا قومي بدارك وبراجلك وما تخليهش ناقصاتو حتى حاجة لأن هذا واجبك لكن دون ما تضغطي على روحك ، وربي يوفقك ويحنن قلب زوجك عليك ويحنن قلبك عليه ويرزقكم الستر والهنا والطمأنينة.

[ولد حمد الباتني]

يعطيني ربي مرا اطيبلي القاطو على 6 تاع الصباح للفطور نحمد ربي ليل نهار

[leilaz]

ياختي احتسبي عند الله وكتري من الاستغفار والدعاء وحاولي تحوسي على جوانب لي مقسرة فيها انا نقلك الرجالة عبارة عن بيوت مغلوقة وانت تحاولي تفركتي على المفتاح المناسب ليه نظن راجلك مازلتي مالقيتيش كيفاه تتعاملي معاه كاين رجالة كون تقتل المرا روحها في الطيلب وشغل الدار نهار طول تجيهم نورمال امالا حاولي تحوسي على الجانب لي تقدري تجبديه بيه وانقلك راكي مدلاتوا ياسر يااختي بلاك ماكيش متولهة بروحك خصوصا في غرفة النوم وقيمي روحك وماتسقسيهش كي طيبي حاجة على رايو خليه وربي يصلحولك ويهديه وانا نقلك بلي راجلك اكيد من الناس لي كلش في قلبوا واكيد عندك معزة في قلبوا بصح مايحبش يبين

[zahra13]

السلام عليكم

والله الأخت احسست بكل كلمة ذكرتها
الله يكون في عونك انصحك بالصبر الكثير والدعاء الشكوى الى الله وحده لأن الناس في حالة كيما هذي يزيدو يحطموك خاصة الأقارب فقط اريد ان أعرف هل والدته على قيد الحياة وهل كانت طفولته عادية او المحيط الذي عاش فيه؟ ارجو الاجابة ان اردت؟ بالاضافة الى شيء مهم عندما تمرضين هل يحس بك..انت تعرفين؟

[Fatima fato]

انتي طيبي و نضفي عادي بس ما تحسسيه بلي كل هاد الشي على خاطره-_من اجاه_ يعني ماتدلعيهش قيسيه فالثقييل و ماتقيميهش
و هو راح يعود تحت رجليك و كبري خاطرك و ربي يهديه

[بيت النّسيم]

السّلام عليكم و رحمة الله و بركاته

أنا أنصحك قبل كل شيء بان تُبقي هذه المشكلة سرّا,, أي بينك و بين زوجك فقط
و أيضا عليك أن تبقي على حالك في الطبخ و التنظيف و كل الأشغال
و لن أقول لك إبحثي عن السّبب لأنه قد لا يكون هناك اصلا سبب فبعض الأزواج لا يُحبُّون كلمة (الحمد لله)
إحتسبي هذا الألم و تعب العمل عند الله تعالى و عاملي زوجك بالحسنى و اصبري على تصرّفاته
و اكثري من الدّعاء لعلّ الله يُصلح بينكُما
وفقك الله

[مسلمة انا]

هذا ما يحدث عندما نفعل الامور ليستمتع بها الاخرون بالدرجة الاولى وليس لنستمتع بها نحن

نحبط كثيرا

الوضع هكذا خطا
اذا كنتي تستمتعين بالنهوض الساعة 6 لعمل الحلويات فجيد ولا يهمك من اعجبه الامر او لا ولو كان زوجك المهم انك شعرتي بالرضى والفرحة لممارسة عمل تحبينه
اما ان تدوسي على نفسك وترغمينها للنهوض باكرا من اجل زوجك واخيرا ينكر ما تقومين به فلا تلوميه هو لم يطلب منك كل هذه الاعمال الجبارة وانتي اخذتي المبادرة كاملة