انقذوني قبل ما نضيع

[مشكلتي]

سلام
راح نحكيلكم قصتي ونتمنى تعطوني حل للاسف مشكلتي تتعلق برجل الحديث طويل شوي ساعفوني
المهم انا بنت 22سنة انسانة عادية قارية ومتحصلة على شهادة عليا والله بالنسبة لبنات هاد الوقت اانا عاقلة ورزينة نصلي نفل نصدق متحجبة حجاب شرعي خاطيني الخرجات والحمدلله من الله علي بقدر من الجمال هذ الانسان بدات حكايتي معاه من عام جا للدار وحب يخطب لكن الام ديالي رفضت لكن هو اصر والح سمعو بيه كامل عايلتي والكل رفضوه لانو لافامي لكن انا عجبني مبدئيا وانا قتلو لكن هو قال انو يقارعلي و يزيد يشوف مع ماما حتى ترضى هي و الوالد وفي هذ الوقت كان يتصل بيا ومن هنا بدات مشاكلي كان في البداية انسان عادي حتى بدا يتبدل كنت نقلو كي نخرج مي بدا يقلي كي تخرجي bipi وكي تدخلي تان وكي تحبي تروحي لكاش بلاصة شاوريني وانا نقلك يلا ايه ولا لالا قلنا معليش انا بديت نشاورو وبدا ميخلينيش نخرج تزوجت خالتي بت نحلل باش خلاني نروح معهم الدفوع (كي داوها)زادت خالتي وحدخرا تان مخلانيش نقعد لحزامها الصباح والله خليتها فلبستها التالية ورحت زادت بنت عمي رحت لمحضرها كالناس ورجعت تزوجو صحباتي 3 وحدة مرحتلهاش و نتاع لافامي مكلاه نهدر عليهم ومنسييش قاغ معاه المهم انا معلاباليش بلعراس وقلت معليش انا متربية عند خوالي يعني جداتي عندي 15يوم مهبطتش ومشفتهمش بيناتنا 200متر كل يوم يسقسو عليا قالو واش بيها حلفلي قالي والله متزيدي تحبطي حتا انا نقولك ويلا رحت اللي بيناتنا سايي وكل حاجة يقولي هذا ديري كذا ولا ميديريش ولا درت اللي بيناتنا سايي داير صوالح لكان نديرهم يكمل مثلا منبات عند خالتي او خالي او عمتي نبات في دارنا ولا دار جداتي ويلا درتها سايي منفوتش 6 نتاع لعشية برا لكان يلقاني مور 6 سايي مرة حللتو باش خلاني رحت عند صحبتي ايا دارت 6 عيطلي قالي دوك تخرجي اخرجت والله انخلغت كيفاش رحت عمبالها كاش مصرا كان وفي رمضان باب يخرج ماما وخوتي مع اليل انا منروحش يقلي تقعدي فالدار رحت وحد المرات مي شبعت تحلال +كنت نسوق طونوبيل دوك قالي تسوقي مع باباك ماعاد باباك سايي نسايني+ كي نهدرو يقلي كي نهدر اسكتي نحب ناقشو يبدا يعيط ويسب ويقلبها عليا كي نكوبي ونزعف يقولي سايي انا اللي يكوبي في وجهي كملت معاه حت نعاود انا نحوس عيله وشاك في كلش كي يجوني خطاب يقلي شفتيه لقيتيه كي نقلو لالا يقلي واش يخدم نقولو كذا يقلي اه سقسيتي عليه واش معناتها انا وين راني ويبدا يسب يقولي روحي ليهم وكل خاطب هكذا وليت منفولوش مي كي يسمع من برا يزيد يقلي علاه وتزيدي متقوليليش سايي +قطع عليا صحباتي كنت نلقاهم والله عندي 3اشهر مشفتهمش كامل يتلقاو ويقولولي ارواحي كل مرة واش نقول زبدة الموضوع انو وصل لخدمتي انا معلمة وبدا يقلي غدوا متروحيش للخدمة و يحلف ويلا رحتي نسايني يعاير ويسب انا والله منغلط معاه اخلاقي متسمحش مقادراتو نرد عليه في حدود نحب نفهمو ويبدا يقلي كي راك تردي فالهدرة والله متخرجي تسكتي وانا كي وصلت للخدمة فيها عقوبات على الغياب والله حرت وعييت وقتلو عيط لبابا وانت قولو انا مخليتهاش تروح وللمدير انت برر غيابي البارح جا عندنا ضياف كي كانو خارجين قتلو استنا نبفيهم على خير قالي تروحي انسايني يانا يا هوما وزاد قالي متروحيش غدوا للخدمة وقالي انا تطلعلي نقولك متروحيش انت متروحيش ويلا معجباتكش العقلية سايي نكملو اانا قتلو كي ديرني في دارك دير واش تحب دوك راني في دارنا ومواقفي لازم نبررها لبابا واش نقولو انا عييت انا فهمت هاد راح يحوس سبة وسايي رايو عليا الله يستركم وعلابالي انا درت الغلطة فالاول انصوحني متزعفوش عليا ومتجرحونيش الله يستركم واش الحل هل هذا انعدام شخصية مني ام ضعف ام استغلال منه ام جهل ولا انا الغالطة في كلش

[karistar06]

la vérité hada machi bnadem
oubli le wa khlass

[sali-sali]

السلام عليكم

واش نقولك هدا مراه لا باباك لا خوك لا راجلك حتى يحكم فيك

ماعنده حتى علاقة

بصراحة لو اباك او اخاك قالولك ماتخرجيش وماتعمليش هكا وهكدا ... يغيضك الحال وماتسمعيش لكلامهم
وواحد هكدا دايرتله خاااااطر


بكل بساطة اخطيك منه

[mokbity]

السلام عليكم حبيت نسقسيك هذا الراجل واش يكون بالنسبة ليك باباك خوك ولا راجلك انا حرت فيك كيفاش تسمحي الواحد معندوا حتى سلطة عليك يتحكم فيك و سيرك كيما يحب و المصيبة الكبيرة تزيدي تاخذي رايوا رغم اني فتاة في نفس عمرك الى يومنا هذا ماسمحت و مانسمح حتى الواحد يتحكم فيا غير بابا و خاوتي والله يهديك و يصلح بالك و حوالك وهدا راه يهدد فيك متروحيش و لا سايي هنا تحبس خليه يحبس و مبعد مزالكي صغيرة ودنيا قدامك متخليش هدا الراجل يكرهلك جنس الرجال و استغفري اللهم اني استغفرك من كل ذنب

[الفاتحة]

راكي غالطة من ساسك لراسك والهدرة معاه حرام وزيد مادام داركم ماقبلوش بيه خلاص انسيه وفي الحقيقة هو اللي حاب يخليك و تأكدي أنك لو تبقاي معاه راح تضيعي عمرك وسمعتك وقبل كل هذا غضب الله عليك وفي الأخير راح يخليك وراح تموتي بحسرتك على الأيام اللي راحت من عمرك فيما لا يرضاه الله ومن يتق الله يجعل له مخرجا

[wafa16]

essem7ili khti mais rani mchokia
raki tahadri men niytek
hada loukan ja rajlek t9oli rah 7agarni
hada inssan ajnabi 3lik la khatibek la rajlek w yzid y7al fomo
w ya7kem b 7kamou w 9at3ek 3la 3ayeltek w s7abatek w khedemtek w ............ w raki m3ah
ana n9olek ekhtik menou
hada loukan yetzewej bik ye9etlek b 9onta w yhablek w ya3azlek 3la nassek
w si non ykhalik
normalement raki 3refti 9imtek 3andou
kelma zouj y9olek n7absso
rabi yahdik

[naamane3]

بصفته من حتي يتحكم فيك هكذا
ثم ان اهلك رفضوه ما هي العلاقة التي تربطكما
اقطعي علاقتك به فورا واستغفري الله لذنبك
وعيشي حياتك في ما يرضي الله
واللي خلقو خلك اللي خير عليه

[بيت النّسيم]

السّلام عليكم و رحمة الله و بركاته
إتّق الله يا أختى و ابتعدي عن هذه العلاقة فهذا الرّجل أجنبي عنك,,و لا يجوز لك الكلام معه
و كيف تسمحين لشخص غريب أن يملي عليك مجموعة من الأوامر من ضمنها أن لا تزوري أقاربك؟؟
ما تقومين به يذهب ماء الوجه و يذهب إحترام و يفسد علاقتك بالله تعالى.
و إعلمي رحمك الله أنه من الأحسن عندما تسردين قصّتك أن لا تقولي اصلّي و متحجبة و أتصدّق فتلك الأعمال تبقى بين المسلم و خالقه و الحجاب الشّرعي يا أختاه هو ليس مجرّد قماش تستر به المراة عورتها بل هو حياء يفصل المراة عن الأجانب و يجعلها بعيدة عن الأعين
أنصحك ان تنسي قصة هذا الشّاب و ان تتوبي إلى الله عزّ و جل و تستغفرينه من هذه العلاقة المشبوهة
إهتمي بما ينفعك في دينك و دنياك حافظي على دينك و تعلمي العلم الشّرعي و تفقهي في دينك
لأنه سيأتي اليوم الذّي لن ينفعك فيه هذا الشّاب
و بما انه رضي ان يجرّك معه في هذه المكالمات فهو لا يريد لك الخير و يريد إهانتك و الدّليل هو أنك قلت : يسبّ و يعيّط
أنت من أعطاه الحقّ في ذلك و أنت فقط من يمكنك إصلاح الأمور و إسترجاع كرامتك
وفقك الله

[ريمة14]

اختي خطيك منو هدا انسان جايح وراه يحوسلك على السبة برك باش يروح ويخليك مالا غي اجري نتي سمحي فيه قبل ما يسمح فيك وتنضري

[حميد.ص]

اختي الكريمة

أولا: انا لم أفهم ان كان هاذا الانسان خطيبك ام مازال ماخطبكش

ثانيا: انا فهمت من كلامك أنك أحببت بشكل من الاشكال و هو استغل هذا الموقف و بدا يتدخل في امورك الخاصة .

ثالثا: الظاهر من كلامك انه يريد ان يمنعك من العمل و الخروج عموما .

الحل لازم على الاقل يجي يخطبك و تتفاهموا:


الحل الاول يا تسمعي كلامه و تتزوجي بيه و تسمحي في خدمتك و تلتزمي بيتك .

الحل الثاني يا تبينيلوا الشروط تاعك من الاول و تفهموا رواهك


ربي يوفقك

[أم الحسين 24]

ماذا دهاك يا أختي؟؟؟؟ بأي صفة تحدثين هذا الشخص و بأي صفة يملي عليك تصرفاتك ؟؟ عذرا لكنك أهنت و ابتذلت نفسك إلى أبعد الحدود ,,, ثم ما نهاية هذا الطريق الذي تسيرين فيه و قد رفض من طرف أهلك ؟ أنت أساسا لا تدركين أين مكمن المشكل تظنيه في تحكمه فيك لكن المعضلة تكمن في علاقتك به من الأساس,
بالله عليك اقطعي هذه العلاقة فورا دون تردد,, لا تقولي قول السفهاء " إني متعلقة به" فوالله ثم و الله لن تتزوجي إلا بمن قد كتبه الله لك ,, كوني قوية الشخصية يا أختي و لا تنجري في هذا السبيل , أقول هذا و أنا مشفقة عليك فلا مصيبة تعادل مصيبة الدين إن غضب الله عليك فأين المفر؟ لن ينفعك لا هذا الشخص و لا غيره ,
فكري في كلامي جيدا , أسأل الله تعالى أن يهديك إلى الحق

[Some1]

انتي معلمة تعلمي الأجيال ؟
اسمحيلي مسمعتش بطفلة "مغفلة" كيما نتي

[مبروكة الصحراء]

واش راهو حاسب فيروحو هذا
أولا ليس زوجك شرعا و ليس له عليك أي كلمة
العجب و العجاب أنكي تعرفي حدود الله كيف تسمحين لوضع كهذا بالاستمرار ماعندو حتى حق و في زوج راكم غالطين
نخلي بابا لي عايشة تحت فضله و نروح نجيب واحد من برا يحكم و يتحكم فيا كي شغل نتي مشي مربية و هو راه يربي فيك؟؟و لا واش قصدو بهذه الأوامر؟؟ حتى التربية ليست بهذا الشكل هذا حبس يا سيدي الحبس و مسموح فيه زيارات الأهل؟؟؟؟؟؟
و الأغرب علاه تحوسي ترضيه؟؟؟؟؟ واش دارك حاجة مليحة باه تحوسي تكسبيه ؟؟؟؟
يحبك و حاب يحافظ عليك و يحترمك؟؟؟؟لازم يحترم داركم قبل و اهلك و حياتك بها بخدمتك و صحاباتك مشي يرجعك خاتم يدورو كيما يحب
سمحيلي لكن بقيت نقرا في القصة نتاعك و أعصابي توترت؟؟؟؟؟
هذا إذا تزوجتي بيه واش يدير؟؟؟؟؟؟؟؟؟؟؟؟؟؟؟؟؟؟؟؟؟
سبحان الله الحل واضح
الحياة نعيشوها كيما نحبو و نحوسو دايما على راحتنا مكيش محتومة في معيشة كيما هاذي هذا ليس زوجك؟؟؟؟؟؟؟؟

[chahrazed-m]

اختي من راي اقطعي علاقتك بيه وخليه
وش هدا عمبالو بنات الناس لعبة ديري وماديرش وزيد يهدد فيك
كون ماشافكش متعلقة بيه ماراه يهدد فيك هكدا
وزيد وصلت لخدمتك
خليه قوليلو هاو وش كان مانقبلش هدي وهدي وهدي والا انت مصر خلاص بيناتنا كيما راو يهدد فيك
ولا بغات دار والديك مفتوحة يجي ويدير المستحيل باه يديك وتولي حلالو

بصح واحد بلا ماهو خاطبك عامل هكذا خلي كي يديك يسمى الضو ماتشوفيهش
اخطاك اختي واستهدي بالرحمن
والتاي بخدمتك وارجعي كيف كنتي واخطاك من هد العلاقات ماحرمها ربي غير كي يجي من وراها المرض
وديجا هكا راكي مرضتي منو

ربي يسهلك امورك

[فحلية]

هذا رجل يحب التسلط ولا ينفعك حتى لو تزوجت به
كيف تكلمينه على الهاتف ؟ هل هو زوجك شرعا ؟ كيف يتحكم في بنت الناس وليس زوجها ؟
أنت تخافين أن يتركك وأنا أنتمى أن تتركيه أنت لأنه لا يستحق ظفرك
هذا ذكر وليس رجل في زمن كثر الذكور وقل الرجال

[بنت الزمان]

اسمحيلي ختي صح مقستيهاش
عاقد عليك هذا باه يدير فيك هك و مادام ماليك رافضينو واش هي العلاقة لي تربطك بيه ؟
سمحيلي الدين يكمل في الحيا الاخت
عجبك اني معاك ماليك قالو لالا تحبس تم لا زيادا فيها و لا نقصان اصلا هذا وحش باغي يربطك و يحرمك من سنين عمرك قبل الدخول القفص الذهبي
و اي قفص ذهبي مع هذا المريض' نفسيا
و اذا هددك قوليلو ايه نتا خير منهم و ديري رايك و بدلي كلش
و'ش حاط روحو هذا و فمك نتي وين كان اني عارفة اخلاق و كلش و لكن كرامتك اولى
سمحيلي جبتيها لعمرك
الله يهدينا كامل

[LILA LAMIS]

ana 3labèli beli thabiiiih bezzaf ya okhti beyna .....bessah had linssèn 3labèlo w 3la hakda rah yethakam fik .........hata w in kèn yhabèk raho mssah b karamtek lardh w meremdek lazèm tfi9i rouhek w ta9at3i 3alè9tek bih w lhal tnihi lportable khlass w tssali w ted3i rab l3alamin yerz9ok zawj salèh
.....

[لمعة السيف]

وعليكم السلام
اختي اسمحيلي شويا قد اقسو عليك ليس لانني اريد لك الشر او اهينك معاذ الله بل لعل هذايجعلك تفطني بعقلك وان تفكري به قليلا بعيدا عن العاطفة .. الاندفاع بالقلب بدون عقل يولد خلل في الافعال ..أنت قلت في شكواك انك معلمة مربية أجيال ...كيف يصدر منك هذا ؟
ألهذا الحد اصبحت العلاقات المحرمة عادية بالنسبة لكم جعلتموه امرا هينا قال تعالى: { وتحسبونه هينا وهو عند اللّه عظيم} وهذا عندكم لا خجل ولاحياء حتى في سردها ..اختي انصحك بقطع علاقتك فورا من هذا الرجل وخصوصا انت تسوقين السيارة ألم يخطر في بالك انك لا سمح الله يقع لك حادث وتأخذين معك هذه الذنوب والمعصية في حق الله اختي لاطاعة مخلوق في معصية الخالق ..هذا الرجل ليس زوجك بل اجنبي عليك أي لا يحق له أن يأمرك أو له سلطة عليك .بل هو عديم الاخلاق الذي يتجرأ ويتحكم في فتاة بعلاقة غير شرعية هل يرضى هذا لاخته او احدى قريباته لاو الله قد يقيم الدنيا ولا يقعدها هذا الصنف الاناني الذي يرضى الشر لبنات الناس ويلعبها انه ذا اخلاق وغيرة عليهم لا يؤتمن جانبه وليس برجل فلا تغتري بأوامره فهي كذب واحتيال ليس الا
قد يتركك في اول فرصة نافعة له .فالتقطعي الشر وانتظري نصيبك زوجا صالحا يأتيك من الباب الشرعي ويكون المودة والتفاهم بينكما
.ويعطي لصلة الرحم حقها ويخاف الله اختي الحل في لك انت التي يجب ان تقوي شخصيتها اي تتعمق في مسائل الشرع والابتعاد عن المحرمات كونك معلمة ومربية اعذري شدتي وفقك الله للخير ..

[عبد الله 22]

كنت نستغرب من بعض من قالت بان خطيبها يحكم فيها وانت ماهو خطيبك وماهو زوجك اين عقلك ياخت كيف يعقل ان يتحكم فيك عن بعد السؤال هو إذا تتزوج وش ريح يدير فيك ؟؟؟؟؟؟؟؟؟؟؟؟؟؟؟ راجعي روحك قوي شخصيتك

[yousra14]

طلبت نصيحة سأعطيك نصيحة

اجعلي لنفسك قليل من الحياء فهو لا زوجك ولا عاقد شرعيّ ولاحتى خطيبك .

إذا لماذا كل هذا الذل هداك الله أهلك رفضوه وانت زوجت نفسك معه معنويا

وأصبحت تطيعينه كأنه زوج حقيقي .

عودي الى عقلك واحترمي نفسك لأنه لا يحترمك ولا يحترم أهلك لأنه يكلمك

من ورائهم ويعطيك الأوااااااااااامر ما شاء الله

[بنت لبحر]

الله يهديه و يهدينا كامل

واش يكون هو باش يديرلك هكا ماراهوش باباك خوك راجلك انا مفهمتش علاش راكي متحمل كل هدا .هدا انسان مهبول ورايحة تتعدبي معاه كون تتزوجي بيه
اختي خمي مع روحك بززززززززززززززاف قبل ماديري اي خطوة

وننصحك صلي صلاة الاتستخارة و خليها على ربي

[حمودية]

انا نلومك انت كي راكي تهدري لذرك معاه

[ورد الأقحوان]

أولا سامحك الله على هذه العلاقة
ما تجوزلكش أختي لا شرعا و لا من ناحية العايلة راكي غاشة يماك و باباك
ثانيا هذا الشخص راهو بينلك بلي ما يصلحلكش
منحط

[طيبة نفس]

مابيناتكم والو خلاص ديري لي يخرج عليك ما تقوليليش تحبيه وهو لو كان يحبك مايديرلكش هاك عمرك ولا تسبقي كلام اي شخص على كلام والديك

[sstolga]

واش نقولك هدا مراه لا باباك لا خوك لا راجلك حتى يحكم فيك
وبكل بساطة اخطيك منوا قبل لا يضيع مستقبلك كامل