هذه مشكلتي... ازربو حلوهالي الله يحفظكم .....

[مشكلتي]

السلام عليكم

انا شاب في المرحلة الثانوية واليكم ماجرى بالتفصيل العام الماضي
رايت بنتا بالمصادفة فاحببتها، لا ادري لماذا لكنني انجذبت لها وذلك بسبب حيائها وحشمتها وهكذا بدات حكايتي....
بالنسبة لي لا يكتمل يومي اذا لم اراها
بعد ايام رايت منها اهتماما ايضا كانت فرحتي لا توصف ففعلت المستحيل لاقترب منها واكلمها لكنني رايت منها معارضة حمدت الله عليها فيما بعد لانني عرفت انها تعارضني وتتجاهل تقربي منها لانها لا تريد ان تقع فيما يغضب الله من كلام ولغو لا فائدة منه
مرت الايام وتعرفت عليها اكثر فقط مما ارى واسمع كلام الناس
تلبس قش مستور وراسها ديما في الارض ماتهزوش واذا نهار غلطت وهزاتو وطاحت عيني في عينها يحمارو خدودها وتعاودو تهبطو في هذيك الدقة يبعد ، قرايتها مليحة والحمد لله وماسمعتش عليها غير الكلام المليح

مشاو ليامات حتان جاتني الصاعقة قالولي بلي باباها يخدم امام كان لازم نفرح للحاجة هذي ونفتخر بيها لخاطر من عايلة متخلقة وكبيرة مي جاتني حاجة في داخلي خلاتني نبعد عليها ماشي لخاطر كرهتها لالا مازلت نشتيها ومزال نهاري مايكمالش كي مانشوفهاش عدت مانقدرش نبين اهتمامي ليها ، عدت كي نشوفها نحط راسي في الارض ونحشم نخليها تشوفني بلي راني نشوف معاها، الوقت اللي نشوفها فيه هو كي تفوت وتكون تمشي قبلي ولا ماتشوفنيش طوول بصح كي سمعت بلي باباها امام احترت وش ندير نبقى كيما راني ولا نبعد ؟؟؟

الله يعيشكم مانيش حاب نسمع كلام ماعندو حتى فايدة

اعتبروني كي خوكم وقولولي ياو كنتو في بلاصتي وش ديرو؟؟

هل بنت الامام مالازمش يشتيها واحد؟؟

منيش فاهم وش ندير عجلو بحلولكم .....

[جويرية الإيمان]

شوف يا ابني

ما تحسبه حبّا ليس بحب

بل هو إعجاب فقط

و لنفرض أنه حبّ ما هي خطوتك التالية ؟؟؟ هل ستخطبها ؟ هل ستتزوجها ؟

أم تريد أن تصاحبها فقط ؟؟؟

اسمع الحقيقة التي لا تعرفها :

أنتم الآن في مرحلة تسمى النضوج "لا أدري إن كان مسموحا بكتابتها" تسمى النضوج الجنسي

فيها يكون هناك إنجذاب قوي للطرف الآخر أقول "إنجذاب " و ليس حب .

فتتكون أحاسيس و مشاعر يفسرها المراهق على أنها حب و ما هي بحب .

و ديننا لم يترك هذه المسألة دون حل :

و حلها : 1 غض البصر : الاولى لك و الثانية عليك و فيها إثم يعني نظرك إليها الذي لا يكتمل يومك إلا بها فيها إثم فعليك بالإستغفار.

2- الصوم .
3- الصلاه
4-حفظ القلب و النفس من الشهوات فهي مفتاح الشرّ كله إلا في الحلال.

أما حكاية بنت إمام فالإمام عبد من عباد الله .

المشكل فيك أنت و ليس في الإمام و ابنته فهي محافظة على نفسها حتى اللآن .

آخر نصيحة : لا تفعل في بنات الناس مالا تحب أن يُفعل في اختك .

و طلب آخير : أجب على أسئلتي التي طرحتها عليك .

[محمد جديدي التبسي]

وعليكم السلام ورحمة الله وبركاته
يا أخي أنت مازلت تدرس كن واقعي يعني الزواج بالنسبة لك مستحيل حاليا
إن أحسنا الظن بك طبعا فأنت تريد الحلال ولا تريد أن تعيش مرحلة صداقة ومراهقة تافهة مع هذه الفتاة
أبوها إمام لا يغيّر من الأمر شيئا فهو كغيره من الناس لكن اللي يشتي بنت يروح يخطبها لا غير وأنت عاجز عن ذلك حاليا
حاول تكوّن نفسك مستقبلا ومن يدري ربما تكون من نصيبك
يظهر أنها فتاة متخلقة فاتركها وشأنها وابعد نظرك عنها فالنظرات من سهام إبليس وربما يفتح عليك بابا من الشر بسبب تهاونك في مد بصرك ونحن مطالبون بغض البصر في ديننا ..
إن شاء الله كلامي يكون عندو فايدة ويجد آذانا صاغية ..ربي يوفقك ويفتح عليك

[zalamite]

المشكل فيك انت... اسال نفسك مادا تريد من البنت اولا. الله اعلم ستجد الاجابة الكافية و الشافية في نفسك و لا يهمك ان كانت بنت امام او رئيس الجمهورية .

[الحنان المفقود]

يا خويا
صح راك تهدر هكذا بصح لوكان تفوت تهدر معاك تولي تصغر في عينيك..وماراحش تسميه حب
سواء باباها إمام أو سراق .

ثبت روحك
إذا باغي الحلال تقدم
وإذا باغي برك تفوت الوقت هاذيك حاجتك.

[لمعة السيف]

كلام ماعندو حتى فايدة الكلام المفيد هو انت تبطل تلك الحركات المراهقة وتلك الامور الغير الجائزة والائقة واتذكر انه ايضا عندك اخت او اخوات
سواء في هذه الفتاة او غيرها ليس لانها ابنة امام فقط بل كل بنات المسلمين يجب ان تخاف الله فيهم ولا تحاول ان توقعهن
انت في مرحلة ثانوية مزالك الكثير لكي تنجزه اي تتم تعليمك وتتخرج وهذه الفتاة ربما نضجت وقد يزوجها ابوها ..وانت لا تقدر ان تتخلى عن دراستك لان الواضح الاب هو من يصرف عليك فلهذا لا تغامر لشئ بعيد عنك ولا تفضح الفتاة وتخرجها عن عفتها ودعها وشئنها وحاول ان تغض نضرك عن كل الفتيات وليس فقط بنت الامام لان الله امرك بذلك ..ثم حاول ان تشغل نفسك بأمور نافعة كعمل اضافي مامدمت تتطلع لمسؤولية هي اكبر منك كتكوين علاقة وربما زواج إبدأ في تكوين نفسك من الآن ان كنت تريد الحلال
او اصبر وابتعد عن كل المسببات التي تفتنك ..اكرر ما يفيدك في كلامنا انك ابتعد عن الفتاة وانساها ..وفقك الله

[سمرجان]

السلام عليكم *نصيحة أُخوة .*...................حقا .صعب ما انت فيه لذلك اخي استعن بالله واكثر من الدعاء فان كانت نيتك زواج فعلاش ما تتقدمش لاهل البنت وتحط عليها الكلمة كيما نقولوا الى حين تكملوا دراستكم ((((((هكذا تقدر تتكلم معاها في دراهم وبوجود اهلها طبعا ))))فاذا عجباتك هاذ الخطوة *الزواج* اعرف ان شعورك اتجاهها حلال واذا كان العكس فتذكر ان لديك ام واخت وخالة وعمة وووووو ..............
الله يكون في عونك وييسرلك امورك .

[lilas rym]

mazalk sghir twalah m3a kratyek wkhlass weli fuh elkhir yjibou rabi soubhanou ida rahi men maktoubak wahed maytyarhalk bent umam wella bent soltan. rabi ynajhak fi kraytek c tt wida thabha sah rtlouba rabi tkoun men nassibak gada matakder dir fi le cas nta3k.....

[kmilya]

وش فيها اذا باباها امام عادي نورمال كيما كامل الاباء
المهم نتا ركظ على قرايتك سع ومبعد لي فيه الخيريقدمو ربي مازالك صغير وزواج حاجة كبيرة
على الاقل كي تطلع الجاميعة وفكر بالموضوع

[نايفز55]

((حتان جاتني الصاعقة قالولي بلي باباها يخدم امام......مي جاتني حاجة في داخلي خلاتني نبعد عليها))
يعني كون جاء ببها مدير تفرح مي كي جاء ببها إمام جاتك صاعقة

انا نقولك أخطي بنت ناس خليهاتقراء على روحها مزالك صغير على موضيع زواج وهذا امور واذا .
مكمش تاع زواج مع كل احترامي الهي بقرياتك وخلي طفلة ما تخربلهاش في دمغها .

[imene ter]

مازلت صغيرا فكر بمستقبلك ودراستك اولا
الاهم ثم المهم

[الماسة النادرة]

يا اخي والله غير راني ننصحك من نيتي شوف اخطيك وتلها في قرايتك وخليها مسكينة العلاقة خارج اطار الزواج مكاش والي مترضهاش على اختك مترضهاش لبنت الناس

[عذراء الجبل18]

nahi hadi tofla mn balk w hadi l2afkaR okl nahihom mn balk ki takbaR w takhdam ida mzalt 3ajbatk okhtbha w n2akdlak rah tnsaha

[kamel76]

لا فرق بين ابنة إمام و إبنة سكير . الحرمات حرمات عند الله تعالى . نصيحتي لك أخي الكريم كالتالي : تزوجها أو ابتعد .

[miral23]

علاش كون جات ماش بنت امام واش كنت راح دير ...علاش غير بنت امام مستورة وتحشم ملايين من بنات الفاميليا بحالها والحمد لله
.بنت امام او اي طفلة كانت اذا كنت حاب تتقرب منها ادخل من الباب الواسع والا ما كان لاه ....هكدا تولي الدنيا بخير ويعم الامن والامان وربي يوفقك ويجعلها من نصيبك وعلاش لا

[cherifbeta]

اخي انصحك لوجه الله انا لما كنت في الثانوية شعرت مثلك مع فتاة مثلها و لكنني كبرت عقلي و لم اعترضها لحد ان عدت في الجامعة وانا الان اعتزم على الزواج منها

[مواطنة جزائرية]

مازالك صغير على هذا الشيء و حاول أن لا تقع في الحرام (تمشي معاها)

و بنت الإمام مثلها مثل باقي البنات

[كادي12]

يااخي لا سنك ولا مستواك الدراسي الحالي يسمحولك باتخاذ اي خطوة نحو الزواج لذا لا تعكر جوك وركز في مستقبلك حتى يحن الوقت وكلشي بالمكتوب .اذا كانت من نصيبك ياتيك الله بها.

[doba]

اقرا على روحك يا اخي

[fr95]

حكاية فارغة ماش حتموت اذا راحت عليك و لا ++ مازلت صغير ع الحاجات هادي

[فارس وجواد]

اه من المراهقة و المراهقين نتاع اليوم و القصص نتاعهم .
لا استطيع أن أقول لك شيء سوى أنه راح يجي النهار وتولي تضحك على واش كتبت.

[hakeem]

هل أنت مستعد للزواج ؟؟؟ بالطبع لا.... هل تنوي خطبتها ؟؟؟ بالطبع لا ؟؟؟ إذن فطريقك مسدودة و ابتعد عنها حتى لا تكون سببا في فساد أخلاقها و إدخالها في قصة نهايتها معروفة و لمعلوماتك كل كارثة اخلاقية كانت بدايتها نظرة و إعجاب و حشمة و تطورت الحكاية .....إلخ

[AMINA.Z]

خلي كلش في قلبك

ما تقدر تدير والو