حياتي المرة

[مشكلتي]

السلام عليكم يا ناس الخير جيتكم و قلبي معمر منين نبدا
انا كنت امراة ذات جمال و براءة حطموني والديا الله يسامحهم راهم في دار الحق زوجوني و انا 15سنة صح انا كنت ما نعرفش صلاحي كنت نية و ما نقدرش نواجه والديا في قرارهم كانت بالنسبة ليا الزواج لعبة لاني كنت صغيرة و المكتوب ما طيحنيش في ولد الحلال كان راجل فاسد و ضعيف ايمان ما نشوفوش طول النهار و كي جي يجي سكران جبت معاه
4 دراري سوفريت عليهم و شبعت مرار حتى وين خلاص ما قدرتش نزيد كتر 15 سنة و انا حاملاتو حتى وين كبرت و عرفت صلاحي طلبت الطلاق و انا مولات 30سنة و الموصيبة انو خرج معايا ماشي راجل لحقني في شرفي باش برك يبرر موقفو قدام الناس و القاضي المهم يا خاوتي قع واش سوفريت في صغري و مازالني نعاني في اخر عمري ولادي كامل تزوجو كل واحد راح لدارو غير الصغير راهو معايا هو الحمد لله لكن الموصيبة في مرتو في الاول كانت الحمد لله دايرتني فوق راسها لكن مع الوقت و كي جابت الدراري ولات امراة واحدة اخرى متوحشة تستغل الفرصة كي ما يكونش وليدي وليدي يخدم بعيد ما يجيش باالشهر شهرين هي تستغل غيابو و تاذيني بطريقة ولله ما تامنوني يا ولادي انا امرة كبيرة شحال من مرة تهددني باش تلوحني برى و تسبني بكلام ما تامونهش وصلتني في كرامتي و انا امراة حاجة درت عمرة و الحمد لله شادة بلاصتي وة قاعدة نصلي و نقرى القران مهنيتها لكنها دايما تبحث على المشاكل حتى الماكلة تحرمني منها تقولي طيبي وحدك مع انو وليدي هو لي يصرف لكنها تخبي الحاجات الملاح تاكلهوم في غرفتها تقولي راني في داري ندير كيما نحب حبيتي تاكلي اشري الله يسهل عليك و انا لوكان كان عندي لوكان راني رحت حتى براكة ولله غير نروح نتهنى منها برك نصلي صلاتي و نعبد ربي و نستنى الموت و لا حتى دار لعجازة لوكان ماشي حشمت على وليدي يقولو رماها و يضحكو عليا دايما هاربة نروح لبناتي روح لحباباتي لعائلتي غير باش نخليها نقول بلاك انا لي راني ماذيتها لكنت كي نولي كيف كيف تقابلني بمشاكلها توقلي واش جابك نرميلك قشك حرت واش الحل معاها شكيت لوليدي حتى هو ما قدرلهاش الله يحفطو ديما واقف في وجها لانو علابالو بلي خاطيني ما نديرلها والو يعيط عليها و والو تقولو مازالني صغيرة ما نقدرش نحملها عجوزة و تحرش مام ولادها عليا تقولهوم ما تحكوش معاها و لا سبوها المهم يا خاوتي حرت واش ندير دبرو عليا و انشاء الله ما كترتش عليكم

[نايفز55]

وكلي عليهم ربي وخلاص اصبري وستحملي و بعدي عليهم وخلاص

[naamane3]

ادعي ربي يفرج همك في كل صلواتك وخاصة في الثلث الأخير من الليل
ثم استغفري الله كثيرا وباذنه هو وحده ينجلي همك ويتغير حالك
وربي يجيب الخير

[thamourth]

ربي معاك يا يما ........عروستك ربي يهديها و و لدك ربي يصبرو تاني.......

[lilas rym]

الله يهديها ويصبرك على هذه المصيبة ويجي النهار اللي تشرب من نفس الكأس

[طيبة نفس]

ربي يفرج عليك فوتي اكثر من هاك وصبرتي زيدي اصبري واذا قادر وليدك يديها معاه ولا يديلها سكنة وحدها وانت جيبي كانش وحدة تعينك في الشغل ربي يهديها ويزرع المحبة ما بيناتكم

[نورالهدى بيولوجيست]

ربي يفرج عليك و الشدة في ربي سبحاااااااااااانو

[عذراء الجبل18]

Gata3tili galbi wallah hram 3liha tdirlak haka hadi mahich insan t2di mra kbira fi 3od mha
wech rah n9olk ya mimti wakli rabi w rabi ykoun m3ak w yfaraj 3lik

[مريم07]

ربي يكون معاك يا ميمتي والله جرحين كلامك وين راح راجلها لازم يوقفها اه اه اه اه

[wisale02]

ربي ايفرج اعليك واعلينا وكلي ربي سبحانو وادعيلنا معاك يا يما واذا بيتك انت هي تخرج كاشي انت ربي معاك الحاجة ان الله يمهل ولا يهمل

[الماسة النادرة]

الله يكون في عونك اختي ويصبرك ادعي ربي وهدري مع وليدك

[simou19]

ربي يفرج عليك يا ماما ويهنيك ان شاء الله ويهديها راكي في طوع ماماها حرام عليها كون جات تحب راجلها صح والله من غير ماتحس تلقا رحها تحب ماماه علاه هو جا وحدو يخي نتي لي حماتيه 9 اشهر في كرشك وتعذبتي عليه وسوفريتي معاه حتان كبر لاقاها بيه ربي راجل الله يبارك ربي يهديها ويحنن قلبها عليك ياااااااااااااااااااااااااااااااااارب

[لمعة السيف]

يا خالة انت مازلت صغيرة ماشاء الله عليك وان كتبت هذه الشكوى فأنت مثقفة وتفهمين والله كل واحد يتمنى ان تكوني امه
كما امي حفظها الله ترملت وهي صغيرة ولكن جاءت لدنيا ببنتين انا واختي وضحت من اجلنا وبقيت بدون زواج رغم اننا نلح عليها حتى ليومنا هذا ان تتزوج وان تعيش حياتها لان في زمن رسول الله كانت المرأة تتزوج ولا تبقى ابدا بدون زواج ...يا خالة
انصحك حفظك الله ان تصبري اولا فهو ولدك ومن كلامك انك تحبين اولادك ..ولا تقدري ان تأذيهم ..واضح ان الزوجة ابنك كانت بدون اولاد
وصغيرة والان اصبحت تغير اي تريد من آخرين ايضا ان يعتنو بك يقول الشيخ ابن الباز رحمه الله ليس في الشرع ما يدل على إلزام الزوجة أن تساعد أم الزوج ، إلا في حدود المعروف ، وقدر الطاقة ؛ إحساناً لعشرة زوجها ، وبرّاً بما يجب عليه بره .لا ، أم الزوج ليس لها حق واجب على الزوجة بالنسبة للخدمة ؛ لكن لها حق مِن المعروف ، والإحسان ، وهذا مما يجلب مودة الزوج لزوجته ، أن تراعي أمه في مصالحها ، وتخدمها في الأمر اليسير ، وأن تزورها من حين لآخر ، وأن تستشيرها في بعض الأمور ، وأما وجوب الخدمة : فلا تجب ؛ لأن المعاشرة بالمعروف تكون بين الزوج والزوجة .انتهى .يا خالة
انصحك ان تكوني في بيت وحدك انت ماشاء الله عليك صغيرة ومازلت يافعة وتقدرين ان تلبي احتياجاتك اي لكان يعطوك فقط شمبرة واطبخي لنفسك واجتنبي المعاناة والكل يشاركون في مصروفك اي كل شهر يتكفل بيك واحد منهم وتتقين كل هذه المشاكل ..وسترين ان زوجة ابنك ستزول عداوتها وهي ايضا لديها اولاد وهم يرون هذا ولا تعلم ان الله يمهل ولا يهمل وسيخزن هؤلاء الاولاد كل ما فعلته لك وسيطبقونه في المستقبل هناك يتكرر نفس معاناتك المهم ..
حاولي ان تعيشي وحدك اعرف ان هناك الكثيرات من الامهات يعشن وحدهن في سلام ولن يضيعك الله ولو اقتضى الامر هذه مهمة اولادك شرعيا هم من يتكفلون بك ..اللهم وفقك وفرج كربك والدعاء
انصحك في كل صلاة وخاصة في جوف الليل..بارك الله فيك يا خالة..

[لاعبة النرد]

والله مشكلتك كيما مشكلة وحدة جارتنا النهار على ماطالو هاربة من دارها عند ولادها او كامل الصبحة او العشية عند وحدة من جاراتها ...مادامك بصحتك وبقوتك شوفي كيفاش ديريلها وتتفاهمي معاها وتلقاي نقطة تفاهم بيناتكم .....وش تحب وش تهتم ....الخ ...الله غالب زمان ولات الكبيرة ترطب للصغيرة وتفكري انو في زماننا نساء الأولاد اغلبهم يحبو الخصوصية والحرية (لكن مش لهذي الدرجة اللهم لا تجعلني مثلها ) ....المهم .....شوفي عفسة تقنعيها بيها على انك كنز لها وانك تعاونيها وتهنيها مثلا من الشغل نتاع الدار من الدراري ....ونطلب منك حاجة خليك انت ثاني لطيفة معاها شوي .....

يعني مش ممكن انك تكوني انت مقصرة في حقها او انك مثلا ماشي مراقبة لتصرفاتك وحركاتك اللي هي ما تحبهاش ... وننصحك سيدتي بالدعاء والإستعانة بالله لتهدئة الأنفس ....و افشاء التفاهم بينكم ...ان شاء الله ......ربي يكون معا ك وربي يفرج عليك

[ilbeldelmondo]

خالتي او أختي كيف كتبتي الرسالة اذا زواج على 15 سنة و 30 تطلقتي و أولادك متزوجين و باولادهم و سوفريتي يعني ماقريتيش؟؟؟؟؟ بلاك مثقفة لا علينا
و اذا الماكلة تخبيها عليك كيفاه عطاتك كبيوتر و نت ولا iPhone ولا iPad مالا ماخباتش عليك الرقم السري تاع wifi بلاك راكي عند بناتك او إخوانك لاعلينا
ربي يهديها و ربي يصبرك و مأواك الجنة ان شاء الله

[yousra14]

ما شاء الله 30 وجدة مازلت في ريعان الشباب وقادرة تستقلي في منزل لوحدك ولما لا حتى إعادة الزواج مرة أخرى وتكوني تحت رعاية زوج يقوم بيك وتقومي بيه ...
وإذا مش ممكن يعملك ابنك جهة خاصة بيك وتقومي بشؤونك بنفسك رب يدوم الصحة والعافية عليك أما زوجة ابنك خليها لله هو يخلصلك حقك منها يمهل ولا يهمل وكما تدين تدان وكثري من الدعاء ورب يفرج عليك والسلام

[oumhana]

السلام عليكم ورحمة الله وبركاته

وكلي ربي ِلَمَيسْها ولا ينام علابالي كلامي مراحش يحل مشكلتك بصح صدقيني غير كاين ليديرو كثرمن هكذا لي يخدم يلقى يا ويحها من عقايب الزمان وكلي ربي وحاولي تبدلي جو ولا الصحة مزالت روحي خدمي متستسلميش للقهر ولا الدار تاع وليدك خوذي شامبرا كما قالت وحد الاخت و طيبي وحدك. علا حساب ما فهمت اذا عندك 30 سنه راكي صغيره مام حتى 60 سنه اذا صحتك تسمح اخرجي بدلي جو وارجعي غير لعشية صلي وخليهالربي يتولاها.حسبنا الله ونعم الوكيل

[tina rus]

ربـــــي يصبرك يا خالتـــي و الله وصلنا لزمن عااار بزاف الله يهدينا

[جمعي البشاري]

الله يهديها ويصبرك على هذه المصيبة ويجي النهار اللي تشرب من نفس الكأس

[مبروكة الصحراء]

ربي يهدي الجميع

[بيت النّسيم]

و عليكم السّلام و رحمة الله و بركاته أسأل الله تعالى ان يعينك على هذا البلآء و أن يرزقك الصبر الواجب على زوجة إبنك أن تعاملك بالحسنى فانت في مقام والدتها فهي أكيد لن ترضى ان تعامل والدتها بهذه الطّريقة و لن ترضى حتّى لنفسها و قد يحصل لها هذا بعد اعوام فكما تدين تُدان و الواجب على إبنك أن يكون حازما معها في هذا الموقف فالرّجولة الحقيقية تكمن في الدّفاع عن الحق و مثل هذه الزوجة -هداها الله- لن تصلح لكي تكون مربيّة فاضلة أسأل الله ان يريحك من هذه المشاكل