مشكلتي في لون بشرتي

[مشكلتي]

بسم الله الرحمن الرحيم و الصلاة و السلام على نبينا محمد و على آله و أصحابه أجمعين

السلام عليكم و رحمة الله تعالى و بركاته

إخوتي الكرام انا شاب 23 سنة موضف و الحمدلله و مشكلتي بدأت منذ حوالي 6 سنوات أي منذ 16 سنة و لم أستطع التحدث عن مشكلتي هذه مع أي أحد..
مشكلتي تكمن أنني أسمر البشرة حيث أصبحت بشكل يومي مع مواقف تقتلني...
في كل مرة نكون رايح نخدم ولا نمشي في الشارع و يكون خالي من المارة و ألتقي بفتاة او امراة تبدل الطريق في الجهة الاخرى و لا تحكم المحفظة تاعها بقوة و تشوف فيا بخوف ظنا منها انني سارق و لا حاب نعتدي عليها لأني اسمر البشرة
في البداية كنت نقول راني نتوسوس برك مي هادي راهي تصرالي تقريبا كل يوم و تغيضني عمري بزاف لان الناس يحكمو بلاما يعرفوني و ديما يشوفوني سارق و انا و الله الحمدلله خدام و ما يخصني والو و لوكان يخصني عمري ما نفكر نعتدي على الناس ولا نسرقهم و الله العظيم يا خاوتي مرات تغيضني عمري حتى طيح الدمعة من عيني لأني احس بعنصرية كبيرة في مجتمعي و الشي لي خلاني نحط مشكلتي في هذا الركن...البارح مررت على شخصين كبيرين في السن قلت السلام عليكم واحد رد علي و الاخر قال " هذا الف....خ باين سارق" طاحت في ودني هادي الكلمة و توشاتني بزاف و غاضتني عمري و كملت طريقي و انا نخمم و لكن رجعت له و قلت السلام مرة اخرى و قلت له الآتي:

"الحاج المظاهر خداعة و انا ربي خلقني هكذا و سمعتك واش قلت لي و لكن انا تربيتي ما تسمحليش باش نرد عليك لاني احترم سنك و ليس انت لان انسان كيما انت ما يستهالش الاحترام لانك لم تحترم نفسك و وصفتني باللقيط و السارق و ليكن في علمك ان والدتي رحمها لها انجبتني و توفيت في ذلك اليوم و لما فتحت عيني لم اجدها امامي و اليوم اصبحت راجل و الحمدلله...انا درك ما عندي ما نقولك غير بيناتنا ربي و نخليك بينك و بين ظميرك و السلام عليكم" لم يطنق ببنت شفة..كملت طريقي نمشي و نفسيتي منهارة و الله يا خاوتي رجلي فشلوا ما قدرتش نمشي و كي وصلت للدار قالي خويا الصغير واش بيك قلت له لا مكان والو..المهم دخلت لغرفتي و بقيت نخمم غير في هديك الحادثة ثم جائتني فكرة اخرجت شهادة عمل + صحيفة السوابق العدلية و رجعت لنفس الشخص و اعطيته الاوراق و قلت له هذا دليل على انك حكمت علي بلاما تعرفني و حسبي الله و نعم الوكيل..

اخوتي الكرام هادي عينة فقط من المواقف لي نطيح فيها و راهي تغيضني بزاف بزاف و أثرت فيا احيانا افكر في الهجرة لان العنصرية هناك اهون من عنصرية مجتمعك الذي يشتكي العنصرية في دول الغرب..

خاوتي لي عندو نصيحة ولا اي حاجة طلعلي المورال لا يبخلني و أجركم على الله لان القنطة تقتلني يوميا

و السلام عليكم و رحمة الله

[ام ظافر]

اخي الكريم لا ادر لما وانا اقرا قصتك تذكرت مقولة انه لو كل كلب نبح القمته حجرا لاصبح الحجر بمثقال الذهب
فذهابك لذلك الشيخ باوراقك الشخصية لتثبت له شيئا ثابتا يعد في نظري فقدان ثقة في النفس

اخي قد لا تحتاج مني ان اذكرك ان الناس لهم الظاهر فقط والباطن لله وحده فاحسن ما بينك وبين الله ولا تلتفت لغيره فيحسن الله ما بينك وبين خلقه

شيء اخر لم افهم ربطك بين لون بشرتك وبين لفظ سارق دائما ( ما ركبتش في مخي ) والا كان اصحاب البشرة السمراء كامل في جنوب الجزائر سراقين يعني ممكن يكون هندامك غير مرتب اوحذائك او طريقة نظرتك للناس...... اي شيء اخر هو الي يوحي للناس بذلك وليس لون بشرتك اكيد
لانو يمر علينا يوميا اصحاب البشرة السمراء ولا نخاف منهم ابدا وربما يمر بنا شخص ببشرة بيضاء ولكن نتوجس منه خيفة ان يكون لصا
يعني اخي ربطك للامور بلون بشرتك ربما يعو لحساسيتك المفرطة ليس الا
وفي الاخير الجزائر مليئة بذوي البشرة السمراء ويعيشون بشكل طبيعي جدا فلا تفقد ثقتك بنفسك اخي حفظك الله لانك لست وحدك في هذا الموضوع

[ايمان ايمانو]

الله يهديهم علاه غير السراق لي يكون لون البشرة سمراء ، من الاحسن ما تعمرش راسك بهم و واصل حياتك عادي .

[مراد سابقا]

شوف يا أخي

أنت تقول أنك لاحظت تلك الملاحظة

يعني هي موجودة

أعرف أخي أن الناس لا تنظر هل أسمر أو أبيض

لربما لديك مشكلة أخرى لربما طريقة مشيتك أو طريقة نظرك للناس أو طريقة لباسك أو غير ذلك

عدل ما يجب تعديله

وينتهي الأمر

[نايفز 55]

السلام عليكم

على جال خافت منك مراة خلاص عدة مقلق و غاظك الحال و تعقدة يوا فكك منهم راهم غير وجع راس ومرض زائد تخاف ولا تقعد

ربي يهديكم على جال هذا نساء ريحن تهبلوا

[الواثق]

لا اظن ان اللون له دور ........ممكن كاين اشخاص لهم شكل مخيف ويشبه المجرمين ههه لكن ليس لتلك الدرجة ..........حتى الملتحي يهربو منو واحد الاشخاص لكن الكثير يهربو عنده لما تحدث مشاكل ههه............لي صديق اسمر قوي البنية سافرت معه يوما ووهو يحب اللباس الرياضي فرأته امرأة في الحافلة يرفع حقيبة ظهر ويلوح بها فظنت انه سارق فصاحت وخافت منه ولما هدأت وفهمناها الامر ارتاحت له كثيرا مع العلم انه قمة في التربية والاخلاق وله يد من حديد لارجاع الحق لاصحابه

ياخي الرجل رجل بتصرفاته وشهامته واخلاقه لاغير .........اما الشكل خليه للنساء كأحد الصفات ههه

[naamane3]

روي في الحديث عن رسول الله صلى الله عليه وسلم : (يَا أَيُّهَا النَّاسُ ، أَلاَ إِنَّ رَبَّكُمْ وَاحِدٌ ، وَإِنَّ أَبَاكُمْ وَاحِدٌ ، أَلاَ لاَ فَضْلَ لِعَرَبِيٍّ عَلَى أَعْجَمِيٍّ ، وَلاَ لِعَجَمِيٍّ عَلَى عَرَبِيٍّ ، وَلاَ لأَحْمَرَ عَلَى أَسْوَدَ ، وَلاَ أَسْوَدَ عَلَى أَحْمَرَ إِلاَّ بِالتَّقْوَى ، أَبَلَّغْتُ ؟ قَالُوا : بَلَّغَ رَسُولُ اللَّهِ صَلَّى اللَّهُ عَلَيْهِ وَسَلَّمَ) رواه أحمد (38/474)
يجب عليك ان تفيس الامور بهذا الحديث ليس بآراء الناس
لأن ارضاء الناس غاية لا تدرك وارضاء رب الناس غاية لا تترك
ومن راقب الناس مات غما ومن راقب الله عاش سعيدا

[عبد الله 22]

السلام عليكم ياخي أعتقد انه ليس لون البشرة مطلقا قد تكون في حركاتك او طريقة لباسك أو نظراتك لناس لان هذه الامورهي من تخلق الشك لديهم أما لونك بشرتك فهو أمر لم تختاره أنت بالتوفيق ودير الثقة في نفسك ولا تنظر خلفك

[عائشة عطر الجنة]

سلام عليكم ورحمة الله

لا حول ولا قوة الابالله هادا المجتمع ما يرحمش يا اخي نت المهم عارف روحك ومن جيهت ربي راك عارف روحك اما كلام الناس كيما تعيا دير ما يتبدلوش وكان جاو يفهموا السارق ماشي شرط يكون سمر ولا
المهم ربي يهديهم ونت لا عليك اكثرمن الاستغفار والصلاة و قرءة القران
وربي يوفقك

[اسعى لرضى الله]

السلام عليكم

اخي متشوفش للعباد ووش يقولو هكا راح تعقد روحك , الاهم واش كاين بينك وبين ربي



وزيد على حساب واش قلت راك مكش مداير ثقة في نفسك وراك تخرج وتحوس واش يقولو عليك الناس
ربي يسهل عليهم واش بغاو يقولو يقولو


من ليوم اخرج وارفع راسك وانت ثايق في نفسك واللي معجبتوش معندك مديرلو ومعندك مدير بيه اصلا ومتحوسش واش يقولو عليك الناس ربي يسهل عليهم +

ياخي في بلادنا اللي بيض يقولك يبان طفلة واللي يسمر يقولك سراق واللي سمين يقولك نية واللي رقيق يقولو مشتاق مش شابع في كرشو وخلي وخلي

يعني كون تبع الناس راح تهبل

انت اخدم خدمتك وعيش حياتك عادي ومتشوفش للناس

ودير في بالك اللي راح يشتيك يشتيك كما راك

[داعي الله ياسين]

السلام عليكم ورحمة الله


إيه صح سـارق علاش كدبوا ؟؟
*
*
*
*
*
*
*
*
*
*
*
*
*
*
راك غير تسرق في حسناتهم .. كل ميهدروا فيك ولاّ ايشكّوا فيك ديجا راك سرقتلهم حسناتهم ولاّ راني غالط ؟؟
بصحتك هاد السريقة رب ايكمّلك على الأقل تلقى جبال من حسنات مجّانية غدوة

ياخويا الناس .. الناس ..الناس .. .. أنت الآن بيناتنا تعرف أنّك ماشي كيما راهم يتّهموك صح ..؟ تعرف أنك ماشي سارق
رب .. رب سيحانه عارف وعالم أنّك ماشي سارق .. وعلااااااااااااااااش تعمّر راسك بالناس وعلاااش
ياخويا عيش حياتك رضِّـي رب سبحانه برك وعيش la vie
يبقى الناس ... الكلاب تنبح والقافلة تسير
خلّيهم يهدروا خلّيييييييييهم أنا نعرف واش انكون ..ربي سبحانو عالم بيّا والله منشوف مورايا ومنديرش موضوع مثل هدا أصلاً
راك راجل وفحل الله ايبارك خدّام لباس عليك حمد ربي وشكره على واش رزقك وعييييش عاااادي
لأنك تبدا تفكّر في البشرة أنتاعك وتلوم نفسك عرف بلّي راك كفرت النعمة لي رزقك بيها الله سبحانه ... هدي خليقة رب إدا مشكرتوش على صحتك والله تتحاسب
أمّا الناس رب ايكثّر خيرهم على الحسنات لي راهم اصدقوها عليك بالمجان
راك خير منّا كامل
لا يسخر قوم من قومٍ عسى أن يكونوا خيراً منهم
دير هاد الآية تاج راسك ومضي في الحياة بحثاً عن إرضاء الله ولا تفكّر في متاهات الناس

وسمحولي على هاد اللهجة لأني نتفاعل على حساب نوع المشكل .. المشاكل مثل هادي كي مهدرتش بالإنجلزية قاع راكم ملاح هه ... رب معاك أخي والله منسمّيه مشكل هدا بالعكس نفتخر برجولتي ونعرف شكون أنا أمّا إرضاء الناس غاية لا تدرك وإرضاء الله مكانة لا تُـدرك من ضِعاف الإيمان ... أي أنّك في مكانة محسود بها فدعك عمّا سلف

أعتذر مرّة أخرى

[الزهرة المضيئة]

لا تكترث بهم المهم ان الله اعطاك اخلاقا فالشكل زائل
افرض وجودك بين الناس باخلاقك و عملك و سترى كيف ستتغير النظرة

[sali-sali]

السلام عليكم
لازم تكون عندك الثقة في النفس
وادا سمعت هدرة ..العبها شغل ماسمعتهاش...عربنا مايطلقوا والو
فارغيين شغل ...

[Dj BoBo]

اهلا أخي الكريم

ربي يهديهم

الثقة بالنفس هي الحل

[leila ben]

ماتتعقد ماوالو ومتعطيلهمش قيمة بصح إذا كنت من الأشخاص اللي يكثروا الحركة والإلتفات كي تكون وحدك بطل هاد العادة بسكو هي اللي تجيب التوسويس

[basma09]

يا اخي الله يهديك راك تقول انو النساء كي تكون جايز عليهم و تكون الطريق خالية يخافو منك لكن مش منك انت كشخص يعني لانو راجل اسمر لا راهو الوقت يخوف و اي واحد ممكن يشكو فيه و يخافو لما يكون في طريق فارغة معاه
انا شخصيا نخاف لما نكون في طريق فارغة و يجوز عليا شاب او رجل اسمر او ابيض ما يهمش لون بشرتو المهم اي وواحد نخاف منو و زيد بزيادة مافيها والو لون البشرة عادي انا نشوف انو ماكانش عنصرية وماسمعتش ابدا بلي هاذا انسان ابيض احسن من الاسمر بالاك في المجمع نتاعي ماكاش بصح انا تبانلي انت رك عاطي للموضوع اهمية بزيادة علاداك تتحسس

[فاطمة الزهراء.]

ياخويا راك عاطي الموضوع اهمية كبيرة ماديرش على الهدرة وماتحطش مع الناس واش راهي دير بالاك لي جاست يديروهم غير بحسن نية اما عن الشيخ راه فارغ شغل وقاعد غير للحديث ماهو طالق لا الاسمر لا الابيض
خمم في رزقك وخمم تبني دارك وخليك من هدرة العرب

ربي يهنيك في حياتك مادير والو في بالك

[حضنية28]

السلام عليكم اخي الكريم الناس اشكال والوان ومهما سعيت فلن تستطيع ارضائهم مشكلتنا ان مجتمعنا يحكم بالمضاهر والناس هذا لواش قاعدة لو كان رانا نسمعو في هدرتههم يحسراه الانسان ميتقدمش ولو خطوة للامام
بعض الناس شغلها الشاغل الكلام الفارغ ربي يهديهم انت لازم تكون عندك ثقة بنفسك متعطيش لكلامهم قيمة مادام انت راك راضي على روحك متقيمهمش ومتسمعش لهدرتهم

[أيادي الأمل]

كيما قالولك قبلي لآ أظن أن لون البشرة وحده من يسبب لك هذه المشكلة،
رآجع تصرفاتك و نظراتك وهندامك ( وانا واحدة من الناس نآخذ حذري من المظاهر المشبوهة بشكل خاص سوآء رجل أو إمرأة ،
ومن كل الرجــآل الكبير والصغير بشكل عام الله غالب الوقت أصبح صعيب )


أما لون البشرة فلآ أظن ،
و إن كان فعلآآ بسبب لون البشرة فالناس ماخلآو وآآلو لاتيين غير يراقبوا فبعضاهم و يقطعوا فيهم ،
ماتعمرش راسك بيهم الصح في الخلق الحسن والدين القويم مشي في لون ولآ شكل ،
وأصلآ عمرهم مآ يرضاو دآيمن يهدرو مالا دير لي تساعدك وخليهم



و نقولك بما انك ذكرت كلمة " لقيط" حتى لو كان الإنسان كذلك فهو بريء،
و ما يحق حتى لواحد يحتقرو ولا ينتقص من شأنو لانو فقط لقيط ولآ حتى يجبدوهالو اصلا


هاذو امور ولا احد اختارها ،
إختارها الله لنا أصلك، فصلك، وآلديك، أسرتك ، شكلك ، لونك ،وطنك ، ولآيتك ... إلخ
ولآ يحق لأحد أنو يحاسب الآخر و لا يستهزا بيه بسبب هذه الأمور

إنما أخلآآقك و تصرفاتك وأفعآلك هي من إختيارك أنت وعليها ستحاسب

[النجمة القطبية]

يا اخى الكريم اسمحلي نقولك ان هناك حلقة مفقودة فى الموضوع
كونك اسمر مستحيل ان يجعلك تحظى بهذه المعاملة او حتى تتهم انك سارق
يا اخى نحن شعب ملون الابيض والاسمر والحنطي وو صحيح ان هناك بعض الاسر التى تولي اهتماما لهكذا اختلافات شكلية
ولكن ان يصل الامر الى اتهامك بالسرقة :confused::confused:
اسمحلي اخى لكن ابحث عن سبب اخر راجع مثلا طريقة لبسك تجنب الموضة الشبابية المبالغة لان اكثرها تجذب المشاكل لصاحبها راجع تصرفاتك بلاك تمشى وانت تراقب الناس او متردد اوشئ من هذا القبيل فى هذه الحالة ممكن تجلب لنفسك الشك
اما حكاية انك اسمر اسمحلي نقولك يا اخ راك موسوس صح وما به الاسمر الاسمر راه يحكم فى العالم خو وين راك عايش
يا اخى نحي هذه المشكلة من راسك اذا حاب تعيش مليح وبدل من ذلك فكر فى النجاح والتميز وكون نفسك وهذيك الحكاية اذا بقات فى راسك راح تتعب بزاف وصدقنى االناس يحسوبطريقة تفكيرك راح توصللهم انك شاك فى روحك:confused:
اسمر =ابيض = اخضر = برتقالي رانااااا كامل ولاد الجزائر ومسلمين هذا المهم مازال تكبر وتفهم بلي كل واحد يدي نصيبو ومكان ما دخلها فى الالوان
ربي يوفقك

[khadija mayar]

قال الله تعالى: إِنَّ أَكْرَمَكُمْ عِندَ اللَّهِ أَتْقَاكُمْ {الحجرات:53}

[رحمة من المولى]

عندك شك في ربي سبحانو انو خلقنا ي أحسن صورة مهما كان لون بشرتك مهما قال الناس عنك ارفع راسك بأخلاقك و الصحة اللي مدهالك ربي سبحانو
احمد المولى عز و جل على نعمة الصحة و العمل الناس راها تعاني من البطالة و المرض
اناس ابيض ولا اسود ما يرضاوش بك
هذا الشيخ متخافش يجي نهار وين يتلقى مع ولد لحرام ويدير ثقتو فيه يحسبو ولد فاميلا و يتهلا فيه فهمتني كفاش يتهلا فيه هههههههههه
استغفر ربي سبحانو كلما حسيت بإساة الآخرين و تمتع بحياتك و شبابك و ترفع بأخلاقك
تحياتي أخي

[عماني نور]

أسمر ؟؟!! ..... و هل هناك أحلى أو أروع من رجل أسمر ؟؟

يا أخي المشكلة أكيييييييييييييد ماهيش فاللون ..... كيما قالولك كامل ... أكيييد المشكل في اللبس ولاّ التحفيفة ( قصة الشعر ) لأنها تلعب دور كبييييير ،، ولاّ المشية ،، ولاّ الحركات مثلا .... ماعلاباليش

انا شخصيا كي نمشي في طريق خالي نلقى اي راجل معايا في نفس الطريق نقطع للطريق الأخرى ،، مانخزرش في خليقتو اصلا ،، بصح نخاف ،،

يعني ماعندها حتى علاقة باللون

و زيد كاااين بزاااف ناس نعرفهوم والله غير ماشاء الله عليهم .... خَلق و خُلق بصح يبانو دي vـوايو

و خويا مثلا ،، يموووت و يدير واحد التحفيفة تع العجب ،، تشوفو تقول عليه يظل فلحباس بعيد الشر ،، حتى ماما في كل مرة يديرها تروح تخصرهالو فالليل :p ،، باش هداه ربي مع الوقت " الحمد لله "

يعني يا أخي ،، جرّب تكون أكثر بساطة ،، و اهتم بأناقتك لأنو المظاهر راهي تلعب 80/100 في حكم الناس عليك ،، و امشي باتّزان ،، و دير ساعة شييك ،، و بعد على الخواتم ولاّ السناسل خاااصة اذا كانت كبيرة ،، لأنها توحي بأنو الشخص خارج الطريق :o

و السروال الطايح :/ .... و المشية تع رومبو ... كيما نقولو احنا يمشي و يعرض

هاذو كامل حاجات يخلو الناس تحكم عليك بلا ما تعرفك ،، و انا شخصيا نديرها

قتلك ،، اعتمد البساطة في كل شي ،، و كون دايما نظيف ، أنيق ،، ساعة شيك في يدك ، و عطر خفيف يميزك

و رجعلي الخبر ;)

:) ربي يسعدك ان شاء الله ،، ماتعمرش راسك بالناس

[kmilya]

مجتمع متخلف بمعنى الكلمة
خويا ناس هادو راهم يهبلو لي ميهبلش
معليش ان شاء الله طيح في عباد ملاح
انا تاني كرهت هاد المجتمع مي ماعدتش نعيش لناس حاطتهم في ثقييل
يخي ماراهم يوكلو فيك مايشربو فيك خليهم يهدرو الهدرة بلاش
ولي يعرفك مليح او عمبالو بيك بلا تقييم من ناس
راك 44444444

[ايمان نور الجزائر]

صراحة هاذي جامي سمعت بيهاااااااا....نعرف بزاف ناس سمورااااااا وعادي وجامي لا سمعت واحد يعلق والا خايف منووووو
نظن المشكل في طريقة مشيتك ....او لي جاست لي تديرهم يبينوك هكاك فقط
ديفواااا نكون نمشي نلقى واحد يمشي ويحكي وحدو والا ما نعرف كيفاش يدير حركات نحسبو مهبول نبدل طريق
وهاذوك بيوضااا ماشي سمورا
ما تكومبليكسي روحك ما وااااااالو....والا سمعتو كاش ما يقول قول حسبي الله ونعم الوكيل