اللي قراو علوم اقتصادية اولى جامعي [الأرشيف] - منتديات الجلفة لكل الجزائريين و العرب

مشاهدة النسخة كاملة : اللي قراو علوم اقتصادية اولى جامعي

mimia-94

2013-09-17, 22:11

ديت باك تسيير واقتصاد ووجهوني علوم اقتصادية حبيت نسقسي على المواد اللي نقراوهم زعما يشبهوا للمواد اللي قريناهم عام الباك خاصة المحاسبة والرياضيات زعما تساعدني باه نعاود الباك تسيير واقتصاد وهذا التخصص ساهل ؟
حابة نعاود االباك من جهة ونقرا التخصص بلاك يساعدني في اعادة الباك لكن خايفة نتعب بزاااف واش تنصحوني ربي يحفظكم ؟؟والله راني حايرة بزاف بين نبلوكي العام ولا نقراه ونعاود الباك

mohamed rebouh

2013-09-18, 02:21

سلام ختي ........ نتي ديتي باك تسيير ننصحك كملي هاد العام و ركزي على 4 مقاييس ...... رياضيات ...... محاسبة ( راهي ساهلة على عام الباك ) ............... احصاء ( ساهل ماء ) ............ اقتصاد جزئي ( هاد المقياس تفهمي قوانين رياضية سهلة و تطبقيها عند التمارين و السلاسل ) ....................... ختي ميميا كملي و تنجحي خير ما تعاودي في باطل باسكو الباك العام جاي واعر مع الوزير الجديد و شوفي الاحتجاجات لي راهي

mimia-94

2013-09-18, 10:16

مشكور اخي لكن انا حابة المدرسة التحضيرية للعلوم الاقتصادية للأسف حرمت منها بسبب نقطة واحدة في الرياضيات الله لا تربجوا اللي صححلي الورقة تاعي كنت ضامنة كتر من 15 لقيتها 11 مالغري معدلي طالع خويا راني ناوية على هاذي المدرسة وكون منعاودش علبالي تبقى تحرقلي في قلبي ونقول كون وكون ووكيما يقول إذا أردت فأنت تستطيع
حبيت نسقسي زعما تساعدني العلوم الاقتصادية في اعادة الباك خاصة المحاسبة والرياضيات ولا منقدرش نقراها من جهة ونعاود الباك من جهة اخرى؟

yas003

2013-09-18, 11:01

اختي انا ننصحك باش تكملي لان لازم تحطي راسك و لازم تحضري les cours ou les td هي سهلة انا قريت الديت مليح و المدارس التحضيرية جد صعبة مالازمش قع تعاودي و اتمنى لكي التوفيق اتمنى ان كون افدتك

mourad ali

2013-09-18, 16:53

احسن شيئ بالنسبة ليك ابلوكي العام وعاودي بكالوريا بمعدل امليح وبدلي التخصص وديري مثلا مدرسة عليا ة ولا مهندس التخطيط والاحصاء المهم خليك من العلوم الاقتصادية ضيعي عام احسن ماتضيعي 4 ولا 5 اعوام .... واذا الزم الامر روحي للجامعة وحضري الباك ماتحضري ل tdا لا cours

charafo dz

2013-09-19, 02:03

كملي علوم اقتصادية احسن لك
المدرسة التحضيرية هم كبير جدا دراسة من 8 للخامسة يوميا
تعاود عام يطردوك
كل شيء بالفرنسية

amir-kennedy

2013-09-19, 03:04

اختي المدارس التحضرية يكملو الدراسة في ehec باش يكون في علمك الباركور يكمل في الماستر مكانش دكتوراه اكاديميك
يعني تقراي في الجامعة و تجتهدي راكي توصلي اما المدارس التحضيرية و حتى العليا غير الهدرا برك راني نعرف بزاف ناس قراو فيهم و ندمو لانها مافيهاش نفس الامتيازات الاكاديمية الموجودة في الجامعة
انا باك2007 نجحت ب 16 شعبة تسيير و اقتصاد و فضلت الدراسة في الجامعة و كاين اصدقاء راحو ل esc و enc وقتنا مكانش كاين مدارس تحضيرية يعني ديراكت فالمدرسة العليا و لكن الحمد لله انا الان تحصلت على ماستر و بصدد تحضير الدكتوراه و هوما مزالهم بليسانس المدارس العليا مدارو بيها والو ,, و حتى في الماستر مقبلوهمش و كاين منهم الي راحو يقراو الماستر بالدراهم في مدارس غير معترف بها في وزارة التعليم العالي ,, يعني متغلطيش نوصيك ختي لان المدارس هادي اسم برك و لكن الدراسة في الجامعة نفسها الدراسة في المدرسة الفرق يكمن في الطالب و في جديته في التحصيل العلمي و البحث و تقصي المعلومات الخاصة بشعبته
سلام

mimia-94

2013-09-19, 10:13

اخي شكون اللي رايح يضمنلي ندخل الماستر اختي درست تخصص تسير واقتصاد ومكانش مسابقة تاع الماستر مارحتلهاش وما كان والو وبزاف اللي نعرفهم سراتلهم هكدا حتى الكونكور تاع الخدمة وصعيب باه تنجح فيه من بين الالاف انا والله هذا التخصص منشوعة منو حتى ماما قاتلي عاودي على روحك انا حبيت نسقسي زعما كاين فرق بين الرياضيات والمحاسبة تاع الجامعة والرياضيات والمحاسبة تاع الباك ولا تاع الجامعة يساعدوني باه نحضر للباك؟؟؟وزعما نقدر نفرق بين هذا التخصص والباك؟اللي عندو اي معلومة ميبخلنيش ربي يحفظوا وينجحوا

amine9mm

2013-09-19, 12:29

انا كنت شعبة علو م قريت عامي الاول في هذه الشعبة وبلعت العام شعبة سهلة جدا اخطيك مل المدارس العليا خير خرطي برك ركزي في الجامعة وطلعي النيفو حتى الدكتورة ومادامك فتاة فلخدمة راهي مصمونة ليك عكسنا حنا الشباب

mimia-94

2013-09-20, 12:04

مشكورين اخوتي على النصائح لكن انا حابة نعاود الباك (شعبة تسيير واقتصاد) وحبيت نسقسي زعما هذا التخصص يساعدني في اعادة الباك ولا لازم نبلوكي العام

philip20

2013-09-23, 23:55

سلام عليكم
انا راني نقرا في العلوم الاقتصادية في جامعة مستغانم و انا تاني كيما نتي حبيت نقرا في المدرسة و ندمت لي معودتش الباك لان السنة الاولى كانت عبارة عن اعادة للسنة التانية و التالتة تانوي
اختي عاودي الباك و قراي في نفس الوقت و لكن نظم وقتك برك كما تعرفي شعبة تاعنا تطلب الحفظ و نفس الشيء في الجامعة و انا تاني غادي نعاود سنا الباك تاعي
و مين تنجحي نشاله في الباك تاعك و تطلعي للسنة التانية في الجامعة تاني سجل السنة التانية و ديري تجميد او بوكاج و روحي قراي في مدرسة يلا عجباتك و قريتيها و الاخص طكتي عليها ربي يوفقك كملي و يلا مطكتيش عليها عاودي رجعي للجامعة تاعك و قراي السنة التانية عادي
اي خبطي عصفورين بحجر

الوليد 89

2013-09-24, 09:00

السلام عليكم ورحمة الله
اقتصاد في الجامعة تخصص جيد
ماتسمعيش لي يقول العكس
فقط اجتهدي مليح توصلي لمبتغاك
ونصيحة ماتضيعيش عام من حياتك
انا هاذ العام انهيت الماستر تاعي في الاقتصاد
الاقتصاد فالمستويات الاعلى راحة تلقاي تخصصات اختاري لي تساعدك

موفقة