اكاد انفجر

[مشكلتي]

السلآم عليكم و رحمة الله تعالى و بركاته

أرجوكم أن تعيروا موضوعي بعض الإهتمآم لأني أكأد أنفجرْ
الحمد لله انا ناجحة في بكالوريا 2013 بمعدل جيد جدا و اخترت تخصص الطب عن قناعة وصليت صلاة استخارة و الحمد لله كنت مرتاحة جدا جدا من اختياري لكن المشكل انو
كآين نآس راهم خوفوني من الطب بزآف مكآش اللي يطلع المورال و لا غي اللي يهبطو ، و كي يشوفو كاش واحد يسأل على الدخول الجآمعي في سيدي بلعباس وقتآش يزيدو يهبطولو المورال و هوما سنة 6 طب اللي يسمعهم يقول هوما زادو قاريين و مخافوش من السنة 1 وقاعدين يتمسخروا على طلاب السنة 1 و زيد كي سألتهم اذا دراسة الطب في بلعباس جيدة ام لا قلتلهم منيش حابة نقى 7 سنين و نخرج niveau 0 قالي واحد غي niveau 0 اللي فيهافيها واش بيهم الناس دايرين هاكا هادي هدرة يقولوها لواحد حاب يدخل جديد للجامعة ؟؟؟؟

و الله تكون حاب تقرى الطب بصح كي تسمع هاكا يكرهولك الطب و يكرهولك النهار اللي جا فيه الطب و انا خلاص بديت نستسلم من الآن و ملقيتش حتى واش ندير باه يرجعلي حب الطب و الله غير راني خايفة بزاف لاتنسوني من صالح الدعاء ارجوكم

[النجمة القطبية]

يا حنونة كثرتى كلمة طب فى الموضوع خخخخخخخ
مي راهم يقولولك هكذا من الضغوط اللى راهم فيها
انا راني فى العاصمة مي نحب نقولك اولا انو سنة اولى ساهلة بزاف هكا شفتها انا برك فيها مواد بزاف واغلبهم نسيناهم دركا :1:
والمشاكل تبدى من السنة الثانية مع الاناتومي يعنى احفظي وبالصورة 3d شكل العظام مثلا راح ينطبع فى مخك تولى تعرفيه كثر من باباك :1: راح تولي رسامة ماهرة :19: ونصيحة اشري الالوان قد ما تقدري لان من كثرة الدروس راح تحتاجيها وتولي تلوني كيما الاطفال خخ
يا عزيزتي متزعفيش الطب هبلنا واغلبية الطلبة كارهين والنيفو قد ما تقراي تلقاي روحك بعيدة لان الطب دراسة مدى الحياة لا تنتهي يعني ديري فى بالك راكي مgاجية :1::1:
دوك تزيدي تكرهي مني انا تاني خخخخخخخ شوفي تحبي الصح الصح رغم صعوبات الطب الا انها اجمل دراسة تقرايها فى حياتك راح تتثقفي بزاااف فى كل المجالات وراح تتقربي من ربي بزاف لما تشوفي عجائب جسم الانسان
وراح تتوسع نظرتك للحياة بزاف وتتغير افكارك والعجايز كامل يولو يحبوك باش تنتهلاي فيهم :D:D
ننصحك اقراي من قلبك هذي امانة وارواح بشر ومتقلقيش روحك بشويا درك تدخلي يفهموك كلش
واذا احتجتى حاجة رانى هنا ابعثيلي نفهمك
ربي معاك

[بهجة الربيع]

سلام عليكم عليكم
نصيحة ليك اختي الحاجة لي عندك فيها عزيمة وصح حابة تقريها من قلبك اقريها وما تسمعيش لكلام لاخرين وثاني ما كاين حتى حاجة ساهلة في دنيا بركا لازمك المثابرة والعزيمة كل واحد وكيفاه حسب العقل واش يفهم ويستوعب اصابع الايدي ليست مثل بعض وربي يوفق

[رتيـل]

السلام عليكم

اختي لا تستمعي الى كلام المثبطين و ما اكثرهم

انا مثلك كنت اسال كثيرا عن تخصصي الجامعي بحثا عن علومات اكثر و ربما تشجيع


و لم اسمع ما يرضيني من بعضهم (لكني لم التفت اليهم)

و كأن بعض الناس مهمتهم احباط الاخرين

مادام عندك الرغبة اذن توكلي على الله و خذي بالاسباب و الله الموفق

[evaevalle]

العلم لله
ربي اعاونك

[sali-sali]

السلام عليكم
1 كي تحبي تنفاجري كيما قلتي استغفريالله احسن لك
2 ادا عندك ثقة في نفسك و عندك مستوى جيد علاش تسالي ناس ....اقراي روحك و افهمي وحدك...وانتي لي راح تعرفي ادا ساهل و لاصاعب

ربي يوفقك

[sarah1424]

الطب الطب عشقي وحب حياتي ولم لم اكن طالبة طب لتمنيت ان اكون
هو رونق الحياة روعة ميحسش بيها غير الي قراها
صراحة المستوى في الجزائر من السوء للاسوء للاسوء هده صراحة لكن انت قادرة تغيري ابداي بنفسك اقراي
ونزيدك اقراااااااي على قد متقدري معلومات بزاااااف وديما نقول الطب دراسة صعيبة وتزداد الصعوبة كل مزدتي قريتي للتميز اكبر
ان تكون طبيب فهدا حلم اما ان تكون طبيب ناجح فهدا هدف وهدف كبير
بالنسبة ليا شخصيا سنة اولى طب غير محببة الى قلبي كثرة الموااااد ولا علاقة بالطب فيزياء كيمياء كيمياء حيوية احصاء توجد مواد عندها علاقة شوية بجسم الانسان المهم هي متعبة سنة اولى
سنة ثانية ثم ثالثة تبداي تتعمقي اكثر واكثر وتحلى وتولي روعة
المهم اقراي على اجتهدي
صدقيني في 2009 كنت نبكي وماما تقلي اصبري اصبري سبحان الله هدا العام سنة سادسة حاسة روحي دخلت بالامس كلية الطب
المهم مبروك والف مبروك ربي يكملك تدكريني انا واصبري كلش يفوت والاروع هو التطبيق ربي يوفقك

[kamel76]

لا تستسلمي و لا تسمعي لكلامهم ، فهذا النوع من الناس يسمون "المثبطون" و هم فاشلون في حياتهم و لا يحبون الخير و النجاح لغيرهم . تخصص الطب رائع جدا و كم تمنيت دراسته لكن أتمكن من ذلك . لايوجد شيء سهل و لا يوجد شيء صعب . فالصعب يلين بالمثابرة و الإجتهاد ، و السهل يمكن أن يفشل الإنسان فيه بسبب استصغاره له و التكاسل في طلبه و أنا أعرف أناس كثيرون درسوا تخصصات "سهلة" و لم ينجحوا .
نصيحتي لك أدرسي الطب و ارفعي التحدي و لا تخشي شيئا

[عبد الله 22]

السلام عليكم بالتوفيق في الوقت الحالي لاتهم الجامعة بقدر مايهم الشخص إذاكان لديك إراد فالانترانات مفتوحة على اكبر الجامعات بكل أنواع الدروس ماعليك الإ الاجتهاد بالتوفيق

["المثوكلة علي ربها"]

ya okhti ma dirich 3la hadouk les etudiants rah 3endhoum un seul objectif li houwa yteyhou l moral pour les autre gue3 nhar w houma yetmeskhrou 3la les 1ere année comme si houma zedou kbar.
la medecine c'est les meilleurs etudes universitaire certe le niveau en algerie mechi 3eli bzf mais c à nous de le remonter je t'encourage et je te souhaite une tres bonne chance pour ta premier année; ana je suis une etudiante 4eme année medecine sba aussi donc si t'a n'importe quelle question n'hesite pas à me la poser et khali hadouk les gamins makhlou3on fi rwahoum

[الجواهر]

الطب مهنة نبيلة و المستوى اجتهدي و لا تتكلي على الجامعة فقط .. طالعي قدر ماتستطيعين
وفقك الله

[عبير ORAN]

تفضلي اختي تجربتي في السنة اولى ربما تفيدك

http://www.djelfa.info/vb/showthread.php?t=1406861

[علياء]

السلام عليكم



مايخوفك حتى واحد مادام انت ترغب في تخصصك هذا سيجعلك فيه متفوق لان من يرغب في شيء يبدع فيه حتى ولو كان في امر بسيط جدا
توكلل على الله ولا تسمع لهؤلاء لانهم وجدوا عراقيل وصعوبات يعتقدونها على الجميع صعبة وهي لا اغلب من يتوجهون في دراستهم ليسوا على قناعة ولا رغبة ولا مقدرة فقط يدخلون التخصص وانتهى او مفخرة ويحصلو منبعد لكن انت ستنجح لانها رغبتك

[nani hb]

لا تستمعي الى كلام الناس


فالذي يستمع الى مثل هذه التراهات لن ينجح أبدا ، أنت انوي دراسة الطب و أثبتي جدارتك

ثابري واجتهدي وقوي عزيمتك


( ما تسمعيش لكلام الناس التافه ، ما غادي يجيبلك والو اقراي على روحك وعولي و ان شاء الله تكوني طبيبة ناجحة باذن الله تعالى)

[biti]

الغيرة تهدر
مام اذا كانو يقراو طب يحبو يقراو غي هو ما ربي يوفقك

[بلسم غرام2018]

متعمريش راسك بيهم حبيبتي خلاص والي نحبيه ديريه
لاعليك منهم لانوا كاين فيهم الي مهوش داخل بارادتوا
وميحباش فيحكي هكاك

[nounoussatito]

السلام عليكم اختي العزيزة دراسة الطب صعبة و تحتاج الى الصبر اكثر من اي شيء اما هؤلاء الاشخاص الذين تحدثي عنهم فما يقولونه هو انعكاس لما يعيشونه من صعوبات التي حتما ستجدينها لكن لازم تتحديها .الطريق الى الطب ليس مفروش بالورود هو علم واسع , اما بالنسبة للمستوى فالامر بيدك لاتكتفي بما يقدمونه لكي في الكلية فقط فهي مجرد نقطة في بحر , انا الان عزيزتي سنة 6 طب وكنت دائمة التدمرلصعوبة الدراسة وعندما ارى الطلاب الجدد اقول في نفسي انهم لا يعلمون ما ينتظرهم و لكن الان انا جد سعيدة فقد قطعت شوطا مهما, لا تيأسي اجتهدي كثيرا المهم ابتغاء مرضاة الله و حب التخصص و ربي يوفقك,

[عائشة عطر الجنة]

كلام الناس ما يدي ما يجيب

ادا كنت مقتنعة بقرايتك ومقتنعة بالتخصص اقرايه وخليهم

وفيوقتنا هدا كلشي ماشي ساهلة كلشي لازملها قراية

ما تريحش وربي يعطيك من عندوا

وربي يسهللك ان شاءالله

[حوراء العيون]

هادي اسمها غاروا منك يا ختي و ما تسمعيش منهم ..ههههه اذا طب niveau 0 مالا وين راه niveau fort ..اسمحيلي انا دايرة هندسة مدنية و كملت الماستر بصح يددلوا يقولولي تقعدي فالدار خدمة الرجال ..ما نديرش عليهم

[هيا الجزائر]

إحمـدي الله علـى هآتـه الْنعمـة
و هُو تحقـيق حُلمكـ بِدرآسـة الْطب
أمنـي الْنفـس لو كُنت مكآنكـ

لآ تدعـي كلآمـ النآس يُردعكـ مـن تحقـيق حُلمكـ
و ثِقـي بنفسكـ اكثـر


بنت خآلتـي تدرس طـب ببلعبآس و إنتقلـت إلـى السنـة الثآلثـة و أمورهآ بخـيرٍ
لآ يغركـ مـن يقُول أن الدرآسـة بِوهرآن أفضـل أو العآصمـة أو.....

ألـي يبغـي يقـرى يقـرى وحـده و يُجد

ربـي يسهلكـ أختـي و يوفقكـ

[مـشتاقة للجنـة]

السلام عليكم
راني معك في نفس الكلية ....ونفس للي سرالك سرالي*سنة 3 ان شاء الله*
شوفي اختي مكاش حاجة في هاد الدنيا جي غي هك ..لازم تتعبي وتقراي وتتوكلي على ربي وأهم حاجة ماتفقديش الامل أبدا...هادي اولا
ثانيا النيفو انت تبنيه بيديك ماشي لي بروف هوما لي يبنهولك...هادي ديريها مليح في راسك...ولي بروف انواع في جميع الكليات على المستوى الوطني تلقاي المليح وللي لا ماشي غي في بلعباس ..
وأخيرا الطب راهي مهنة من انبل المهن ومين تولي طبيبة ان شاء الله حياة انسان كامل راح تكون بين يديك واي خطا ممكن يكلف حياة خاد الشي هو للي خلى قرايتها نوعا ما شاقة ....ولا سهل الا ماجعله الله سهلا......وحاجة اخرة تاني.....اللي يقرا يدي حتى وماش نقطتو ربي مايضيعش أبدا تعب اللي اجتهد
وماشي من اول عثرة تلقايها قدامك تقولي لوكان ولوكان....ماجيبيش الاحباط لنفسك...كوني طبيبة نفسك قبل ان تكوني طبيبة الغير ان شاء الله.............والصبر مفتاح الفرج...ةاللي يصبر يناااااااااال ان شاء الله