نصيحة لوجه الله

[مشكلتي]

أسعد الله أيامكم قصتي بالتفصيل مدتها أقل من أسبوع
هذا السبت عرفوني بواحد حاب يتزوج عمرو 39 و انا 31
كان يجوني خطابة لدار و مبعد ما يكتبش المكتوب
قلت نتفاهم معاه قل ما يجي لدار
هدرت معاه يومين فقط السبت و الأحد تفاهمنا حسيتو مرتاح ليا أكثر مني و أعترف بذلك و زاد قالي غير يخرجو أوراقنا لأنو إجراات يديروها يعمل في الشرطة قالي نديرو العرس
كان مقلق يشوفني منعرفو ما يعرفني
الاثنين كان عندنا عرس صدفة يماه كانت راية ليه قالي خلاص فرصة تشوفك يما تهدر معاك و المساء نتلقاو*** كان رايح نشوفو و يشوفني برك بلا منهدرو مع بعضانا***
في العرس شافتني يماه مع زوج بناتها جات هدرت معايا عيطتلي باسمحي حسيتها فرحانة بصح يما كنت محكيتلهاش
كي شافتها تهدر معايا هدرت معاها بزعاقة واش حبيتي لبنتي المرأة قاتلها بعثوني لها و تبسمت يما قاتلها اهدري معايا انا ما لقيتش كفاش نخبر يما و اللي في العرس معانا ولاو غير يشوفو و يما زايدة عليها
مبعد قعدو يحكوا و راحت يماه و قاتلي تبقاي على خير مام خواتاتو حسيتهم كي شافوني في الاول عجبتهم
كان يعيطلي مهزيتش عليه حشمت كنت مع يماه
كي خرجت يماه و بناتها حكموا الهاتف باينة عيطولو
أنا قلت يعيطلي يقولي رايهم واش قالو عليا معيطش بعد اللي قالي في هذوك يومين منقدرش نقعد دقيقة بلا بك راني مقلق وقتاش نجي لداركم
كي وليت لدارنا بييتلو معاودش
مقدرتش نصبر
ارسلتلو مسج قتلو ايلا معجتش داركم كلشي بالمكتوب
مردش عليا
غدوة من ذاك زدت ارسلتو نفس الشيء
آخر مسج قتلو الحاجة اللي كاينة قولهالي
ارسلي مسج:
قالي غير انت طلعي و تهبطي منيش مليح كي نولي صافا راني نعيطلك
و اليوم رانا الأربعاء معيطش
و أنا تقلقت لأنو فعلا ارتحتلو
هذه حكايتي كفش تفسرو ردة فعلو
يمكن يماه حكاتلو على يما كفاش هدرت معاها ؟
معجبتهومش؟ بصح هو قالي ايلا معجبتهمش الصح فيا انا
مام يماه قالت ليما هو يختار روحو انا نجيبلو برك
صح كاين مشكل عندو يخليه بعد الفرحة اللي كان فارحها معايا وحب يجي لدارنا في أقرب وقت باش يبدا في اجراءاتو تنقلب لهاذي الدرجة؟
متلومونيش اللي هدرت معاه انا كانو يجوني خطابة لدار و مبعد منتفاهمش مع الخطيب و لا هو ميتفاهمش معايا كل مرة و كفاه
هذا قلت نتفاهم معاه قبل مايجي على الأقل يومين أو ثلاثة
وليت نحشم من الدار كل مرة واحد رايح جاي
الله يخليكم نوروني انصحوني ادعولي
و اسمحولي بزاف رسالتي طويلة

["راجية الجنة"]

سلام عليكم

نقلك كثري الدعاء و اصبري ومبقتيش تتصلي به
مبروك مسبقا

[nibrasse 76]

كاين ناس يخطبو الاب والام قبل الفتاة نفسها ...وواضح ان اخواته حذروه من تصرفات والدتك العدوانية .....ان شاء الله ربي يهدي الاحوال ..ويجمعكما المكتوب ...لكن تعلمي ان تعزلي اهلك عن امورك الخاصة بعد الزواج .

[بلسم غرام2018]

سلام عليكم

نقلك كثري الدعاء و اصبري ومبقتيش تتصلي به
مبروك مسبقا

واستخيري ربي سبحانوا

[شموسة الجزائر]

اذا فيها خير رايحة تبان برك ما تقلقيش روحك وما تعيطيلوش
اذا ربي مكتبلكم مع بعض الاجابة تجيك للدار بلا ما تحوسي عليها
موفقة حبيبتي

[soso sirin]

قالي غير انت طلعي و تهبطي منيش مليح كي نولي صافا راني نعيطلك.راه على الاقل رد عليك و قالك مانيش مليح كون ماردتش كامل . الحل الي راه في يديك ضروك قيسي الموضوع في الثقيل و ماتخمميش مع انو علابالي راح تخممي مي تاكدي من حاجة اذا راه مكتوبك راح يرجع و يجي لداركم ماشي مكتوبك ربي يرزقك بوخدخر .و ماتزيديش تعيطيلو لانو راكي بعثتيلو دي ميساج و ضروك خليها عندو .ربي يريحلك بالك ان شاء الله و يرزقك بلي يستهالك سواء كان هو او غيرو

[zalamite]

لما كل هده العجلة ..عليك بالصبر و الدعاء ان كان فيه خير ان يعود و لا تتصلى ابدا في مثل هاته الاحوال دعيه يفكر و يرتب اوراقه مع اهله بهدوء فالكرة في مرماه الان ..اما انت ما عليك الى الدعاء كما قلت و الصبر فقط.
و ان شاء الله يكون من نصيبك .

[عاكف]

ربي يفرج أختي .. و متتصليش بيه حتى يتصل و ادعي ربي و قومي الليل

[assia88]

istikhara w do3aa, w lah yfaraj inchalah

[wafa16]

ما تزيديش تعيطيلو خليه هو يحوس عليك
الغلطة ديالك كنتي تقولي ليماك بلي رايحة تتلاقاي معاهم في العرس باش تاخذ حذرها و تدير حسابها
لانو الانطباع الاول مهم
الغلطة تاعك
دوك ما عندك ما تديري

[imene12]

أختي لا تتصلي به مجددا ... صلي صلاة إستخارة و ربي يسرلك إن شاء الله

[achwak.1993]

اصبري و بإذن الله ربي يكتبلك اللي فيه الخير

[L'absurde]

يا ختي, أنا واش نعرف أنو الراجل ماشي كيف لمرا , كي تكون حاجة شاغلاتو يحب يجبد روحو وي خمم مع روحو. نصيحتي ليك ماتزيديش تهدري معاه حتى هو يهدر معاك. الراجل ماعندوش غير لمرا في حياتو, كاين الخدمة, دارهم, صحابو.. لوكان تدخلي لقسم شقائق الرجال في منتدى الجلفة ممكن جدا تستفادي من مواضيع الأخت أم ظافر.

ثاني حاجة, مليح لوكان تثقالي باش تخلي روحك عزيزة لأنو ماكاش كيما الكرامة.
أنت زيدي ديري إستخارة و دعي الله سبحانه و تعالى في السجود . وما تنسايش حاجة مهمة جدا, إن شاء الله كي يجو يخطبوك, ماتنسايش تسقسو على صلاتو, سقسي مليح على كلش.

ربي يهنيك

[miinoucha25]

ختي كيما قالولك لبنات ثقلي روحك و استنايه حتى يتصل هو

[أم عابد]

ربي يوفقك و مبروك مسبقا ، اصبري شويا ويجيك خبر يفرحك بإذن الله

[KARIMA.HOPE]

سلام عليكم
اختي صلي صلاة استخارة و اقراي اذكار
و نقلك حاجة اذا ربي كتبولك يجي يجي و ما تخميش و اذا ربي ما شافش فيه خير راهو ما يجيش
انصحك بالدعاء

[mariana1]

أنا نقلك: أول حاجة أقراي كل يوم سورة البقرة .
ثاني حاجة أقراي الأذكار أنتاعك .
ثالثا صلاة الاستخارة وعاوديها.
رابعا ماتزيدش تعيطيلو الكرة راهي عندو ذرك .
إذامكتوبك واحد ماراح ينحيه وإذا لا ربي يجيب اللي فيه الخير

[marierose]

الصبري شوي وما تزيديش تعيطيلو و ما تقلقيش روحك اللي مكتبها ربي تلحق ربي يسهل

[oumhana]

السلام عليكم

اولا اختي متزيديش لا تعيطي لا تبعثي SMSبركات مشي مليح غدوا لو كان يكون بينكم مكتوب يقدر يعارك ويقول لك حرقت ليا التلفون alors شويه كرامه ياربي.
بصح انا عجبتني حاجة عجبتني بزاف هي يماك. انتقلت عندك 31 سنه مع هذا يماك هدرت في بلاصتك ونتي ماقلتي والو براك الله فيك خاطر مع لبنات تاع اليم ربي إجيب الخير حشا لمتستهلش

[" أبو عبود"]

الزواج مش قفازو او براعه او ذكاء او حسابات. انت حسبتيها مليح وقلت نغير اسلوبي وتحدثت معاه واتفقنت معاه لكن ربي اراد امرا آخر جاءت امك وفعلت ما فعلت. هذا يعني ان ربي اراد ان يتم الامر هكذا. انت شدي في ربي وخلي لي تجي من عند ربي ارضاي بيها. ومادم عدك حرم ويجوك الخطابة احمدي ربي لانه اذا راح هذا يجي غيره والخيرة فيما اختاره الله. وتأكدي ان رضا الوالدين من رضا الله.. اصبري لعل الله يريد لك خيرا من ذها او لعله يرجع اليك.

[اسمهان سلواني]

مازال ما فاتش الحال
وانشاء الله انقولولك مبروك في اقرب وقت
او ربي ما فيه الا الخير
والي فيها الخير اجيبها ربي

[zineb1987]

صلي صلاة الاستخارة وكلش بالمكتوب اذا عاد مكتوبك راه يجيك واذا عاد مش كاتبلك ربي يرزقك بزوج صالح أحسن منوا