ضاع مني كل شيء

[مشكلتي]

السلام عليكم اخوتي الكرام أنا فتاة عمري 21 سنةكنت من الأوائل في دراستي لكن في عام الباك اتخطبت مانيش عارفة واش صرالي رحت قبلت بالخاطب بالرغم اني ما نعرفوش المهم تزوجت بعد الباك بسمانة . جبت باكي ب13 في 2011 ما كتبش ربي اني نكمل مع هذا الراجل شفت العذاب بعينيا جبت معاه طفل و تطلقت مشكلتي اني ذركا ديما يحكمني الوسواس نقول علاه فرطت في قرايتي و لي كانو يحسدوني على معدلي عادو خير مني و زيد حابة نشاوركم السنة راح نقرا رياضيات بصح راني حابة نعاود باكي حرة و نجيب معدل مليح يعني نقدر نقرا في الجامعة و في نفس الوقت نجيب معدل مليح ؟ راها قعدتلي حرقة في قلبي على قرايتي اللي كنت نجيب معدلي 16 في الثانوي
ربما تقولو أني تسرعت في طلاقي لكن هذا الانسان سرقلي زهرة شبابي يسب الدين. يضرب. عاصي والديه و زيد حوايج أخرى لا يسعني ذكرها كل ما نتفكرو نقول ربي يخرجلي نيتي فيه لأنو حاسة حياتي تحطمت بسبتو ماني بقرايتي ماني بعمري اللي راح اسمحولي ربما قلقتكم

[ندى الصبح]

السلام عليكم
اختي قدر الله وما شاء فعل وان شاء الله يعوضك ربي خير
ما فهمتش مليح حابه تقراي رياضيات في الجامعه وتعاودي الباك؟
اذا راهي عاجباتك الرياضيات وعلاه تعاودي الباك
واذا ماشي عاجباتك ننصحك ديري حاجه ساهله باش تقدري تعاودي الباك لانو الرياضيات تديلك كل وقتك
وبالتوفيق

[اريج16]

اختي منيش عارفة اقراي صح وكملي قرايتك ومتنسايش بلي عندك طفل يحتاج ليماه وشوفي اذا كتبلك ربي وجاك ولد لحلال لي يقبل ولدك غير تزوجي

[csardas]

السلام عليك اختي :) ....انا ارى انك اتخذت قرار جيد بارادتك اكمال الدراسة...درك اختي ماتزيديش تخممي فلي فآات..درك ركزي على المستقبل تاعك، 13 في البكالوريا معدل جيد :) و هذا يبينلك بلي تقدي تجيبي اكثر و ديري شعبة مليحة..انا شخصيا نصحك اذا كانت عندك شعبة معينة ف راسك و راكي باغي توصليلها غير بلوكي لعام تاعك و قري 100% للباك باش تجيبيه ب نقطة ممتازة...لانك قلتي ان لديك طفل..فالطفل و الدراسة بالجامعة و الباك شوييا بزاف ....بصح لوكان ضحي بروحك عام و تقري غي للباك و تزيري روحك توصلي للهدف تاعك ان شاء الله و ربي يوفقك :)

[amel kamel]

ربي يكون معاك اختي و يصبرك و فيما يخص اعادة البكالوريا انصحك ان تلغي الفكرة فما ضاع من العمر يكفي و ركزي في دراسة الرياضيات و التفوق فيها فهي اختصاص رائع و له مستقبل باذن الله بالتوفيق اختي

[نورالهدى بيولوجيست]

اختي ما تندمي ماوالو اعتبريها تجربة و تعلمتي منها المهم ضرك ربي وليدك مليح و اقراي قرايتك و حافظي على روحك..........................ربي يفرج عليك

[kmilya]

مازلتي صغيرة كملي حياتك عادي وكملي قرايتك وان شاء الله ربي يوفقك

[يوسف الحق]

السلام عليكم
ما أصابك ما كان ليخطأك كل المستقبل أمامك ضعي ثقتك في الله و اتكلي على ربي و امصي الى الأمام ..سجلي بالبكالوريا السابقة و أعيدي البكالوريا مرة أخرى لا تضيعي الوقت الى الامام...الى الامام.

[عبد الله 22]

السلام عليكم لماذا تزيد ضيع عام اخر لباك من الافضل ان تستغل هذه السنة مع الدخول الجامعي وتربحي عام خير من عام لتحضير لباك وماعد النتائج وكل الاحتمالات وارد والحمد الله معدلك مليح يبقى التخصص حاولي تخير تخصص مليح بالتوفيق إن شاء الله

[romina_auxanne]

اختي الفاضلة صدقيني عن تجربة شخصية نقولك لا ماضاعش منك كل شي بالعكس ربي عطالك طفل كاحسن مكافئة على المعاناة ديالك القراية ماشي كلش و الحمدلله عندك فرصة ثانية تسترجعي بها دراستك و انا ننصحك تتمسكي بالتخصص لي راكي فيه و تبدلي مجهودك فيه لانه كاين احتمال متقدريش تتحصلي على معدل مليح فالباك و تنهار نفسيتك من جديد بحكم ان الجامعة + التربية + الباك حاجة صعيبة اكتر مما تتصوري ولازم تعرفي بلي هادوك لي كانو يحسدوك مازالو يحسدوك والسنين اللي تحسبيها ضاعت راكي درتي فيها انجاز اللي هو وليدك استمتعي بتربيتو و استمتعي بإعادة بناء حياتك وربي يوفقك انشاءلله

[naamane3]

كان الله في عونك

[ايمان نور الجزائر]

ربي يكون معاك
اقراي التخصص لي راكي باغياتو وحطي راسك مع قرايتك
لانو ممكن تجيك صعيبة الدراسة واعادة الباكالوريااا في نفس الوقت
لازم تخلي وقت للراحة ولتربية ابنك

[Hiba l7biba]

ربي معاك ختي لعزيزة انشاء الله مازالك صغيرة ومازالت الدنيا قدامك تقدري تكملي حياتك عاااادي ولي فات حطيه ورا دهرك وشفي للقدام

[hamzadaksi]

ربي يكون في عونك وماى تقلقيش روحك مشكلتك بسيطة جدا إذا تقبلتيها في راسك
نصارحك مشاكل الناس راهي كبيرة بزاف مقارنة بمشكلتك تعودي على الأمر وأبداي من جديد
والصلاة الصلاة الدعاء الدعاء
سلاااااااااااااااااااااام

[محمد جديدي التبسي]

من ضاعت منه الدراسة في بلادنا فلم يضع منه شيء فلا تهولي الموضوع ماذا فعل أصحاب الشهادات وأنت ترين العمل في بلادنا وحالة النساء العاملات أبعد ما يكن عن دينهن الا ما رحم ربك لذلك استغفري ربك ولا تكوني من القانطين
التسرع في الزواج بمن هب ودب ممن لا دين له ولا خلق له وعندو الشكارة هذه نتيجته في الغالب لذلك اسألي الله الزوج الصالح الذي يعرف قيمة الزواج ويدرك غاياته ربي يعوضك بما هو خير لك في دينك ودنياك ...

[alger1]

السلام عليكم

انت مازلت صغيرة الحياة امامك انسي الماضي وانطلقي ادرسي او اشغلي نفسك في اشغال يدوية تنفعك انا تدرس معي امراة في الخمسين عندها ارادة لم ار مثلها

[أم عبد الكريم]

ربي يهدي بالك المهم انك ترمي الماضي وراء ظهرك و تركزي على الدراسة و ابنك و ان شاء الله يرزقك براجل صالح تكملي معاه حياتك

[لقرع بوكريشة]

[quote=مشكلتي;1054221103]السلام عليكم اخوتي الكرام أنا فتاة عمري 21 سنةكنت من الأوائل في دراستي لكن في عام الباك اتخطبت مانيش عارفة واش صرالي رحت قبلت بالخاطب بالرغم اني ما نعرفوش المهم تزوجت بعد الباك بسمانة . جبت باكي ب13 في 2011 ما كتبش ربي اني نكمل مع هذا الراجل شفت العذاب بعينيا جبت معاه طفل و تطلقت مشكلتي اني ذركا ديما يحكمني الوسواس نقول علاه فرطت في قرايتي و لي كانو يحسدوني على معدلي عادو خير مني و زيد حابة نشاوركم السنة راح نقرا رياضيات بصح راني حابة نعاود باكي حرة و نجيب معدل مليح يعني نقدر نقرا في الجامعة و في نفس الوقت نجيب معدل مليح ؟ راها قعدتلي حرقة في قلبي على قرايتي اللي كنت نجيب معدلي 16 في الثانوي
ربما تقولو أني تسرعت في طلاقي لكن هذا الانسان سرقلي زهرة شبابي يسب الدين. يضرب. عاصي والديه و زيد حوايج أخرى لا يسعني ذكرها كل ما نتفكرو نقول ربي يخرجلي نيتي فيه لأنو حاسة حياتي تحطمت بسبتو ماني بقرايتي ماني بعمري اللي راح اسمحولي ربما قلقتكم





وعليكم السلام....... ايتها الاخت الفاظلة...وددت الرد على مشكلتك في عجالة...لاقول اسمعي بنيتي وانت تسردين لنا قصتك احسست انك ناقمة على ما اقدمت عليه..وهو الزواج....يا اخت الي اقدمت عليه والتصرف الي تصرفتيه ليس تصرفا عيبا ولا مشينا..ولم تقترفي اي ذنب...هو زواج .كما تزوجت كل البنات . انتهى لانه لم يرد له الله سبحانه وتعالى الاستمرارية....اليس هذا ربما خير...؟؟؟....اليس انفصالك وطلاقك الان ربما خير...؟؟؟ هاذي امور لا يعلمها الا علام الغيوب...يا اخت لو كنا نعلم الغيب لاخترنا الواقع الاحسن...يا اختي احمدي ربك الان على ما انت عليه...فانت احسن من الاف الالاف من اقرانك بالرغم ما حدث لك وهو مكتوب ما كان ليخطأك ابدا......اما قولك انك ضيعت مستقبلك وقرايتك...وانت ربما تقريبا في سن من هم تحصلو على الباكلوريا هذا العام....فالجامعة مفتوحة امامك ويا الله وريلنا شطارتك....ان شئت تسجلي بنفس الباك السابقة مثل ما هو معمول في بعض الجامعات وفي بدايات الدخول الجامعي وخاصة بعض الفروع..... او سجلي باك جديدة
.........شوفي بنيتي المثل عندنا يقول : ما تكسرت زجاجة وما ضاع زيت......السنة الجامعية نحن على ابوابها...الباك موجود وليس بالقديم.....السن ما شاء الله مازلت صغيرة......وبعد التعثر يكتب النجاح....................................انا ساروي لك قصة احدى جاراتنا من حوالي 7 سنوات تقريبا....تطلقت باربع اطفال ولها مستوى الثانية ثانوي... واصلت بعد طلاقها بالمراسلة واجتازت الباكلوريا لتتحصل عليها وسجلت في الجامعة وفي السنة الثالثة جامعي يلحقها ابنتها وولدها للجامعة ليكملو المسيرة وهاهي انهت دراستها منذ سنة لتسجل في العقود....ومازالت عاقدة العزم للحصول على العمل ربي يوفقها ويسدد خطاها......هاته فحلة لم تبقى تبكي على الاطلال...وتندب حضها...ولا تنسين انها ام اربعة اطفال.............وامثالها كثيرات وكثيرون..انا قصصت عليك ما شاهدت عيني......اسمعي ايتها الاخت اقول لك خاتما ردي : ومن لا يحب صعود الجبال ***** يعش ابد الدهر بين الحفر.....اسف اسف على الاطالة....ربي يحسن عونك ويقوي عزيمتك ويوفقك الى ماهو خير......امين امين.............................................. .....اقرع

[AMINA.Z]

احسن قرار اتخذتيه انك ناوية تكملي قرايتك

اختي راكي عشتي و شفتي حاجة ما دوم

حاولي تعيش حياتك على طريقتك انتي و تحققي كل احلامك

اذا راكي ناوية تديري تخصص مليح لازمك تتفرغي للبكالوريا

و اذا ماكيش دايرا حلجة في بالك حاولي تقراي تخصص مضمونة الخدمة فيه

خاصة في مجال اللغات

ربي يوفقك اختي

[samira135]

نحييـــــــــك على إرادتك القوية ، ما شاء الله

وماضيك خلآآآص انسايه و أما بخصوص دراستك ننصحك تقراي رياضيات تخصص مليح خصوصا اذا كنتِ متفوقة في الرياضيات وخلي طموحك الدكتوراه مش ثاني تخصص مش عارفة اذا تقدري تقرايه ولا لا

ربي يوفقك أخيتي

[حليمة -saloumy-]

نصحك ختي تخصص رياضيات صعيب شويا خاصة انك حبستي عامين وهادا راح ياثر لك شويا على الداكرة نتاعك و الباك لعام هادا شفتي بلي جات النسبة صعيفة انا تاني ديت لباك ف2011ب13.57 و عاودتو لعام هادا و ديتو ب10.89
و شوفي انتي ونقول لك حاجة عامي الاول درترياضيالت و ما قدرتش لها صح انا من الاول ما كنتش باغيتها وكنت دايرة على شبه طبي ونقترح عليك تديري بيه علوم التمريض احسن ليك خاصة لوكان كنتي من بجاية ولا مستغانم و الله المستعان و زيدي استخيري

[مواطنة]

السلام عليكم اختي الفاضلة
وعلاش تقولي خسرت كل شي ؟ يمكن تزوجتي بواحد معرفش قدرك ولا ماتهنيتيش معاه و الشيء الظاهر هو ان الله لم يوفق بينكم و انشاء الله فيها خير لكن الحمد لله عطاك ولد الله يحفظو يعني رغم كل المشاكل اعطاك نعمة و دافع اخر حتى تقر عينك فلا تحزني واش خسرتي ايام قضيتها تعلمتي فيها دروس من الحياة حتى تتأكدي ان هذه الدنيا زائلة والشدة في الله تعالى الباقي
اختي اتمنى ان يكون طلاقك باب ومفتاح خير ليك الله هناك واذا حبيتي تعيشي مهنية لا تلتفتي لاقوال الناس ابدا
مثلما قالو الاعضاء اقراي الفرع لي يعجبك لان الرياضيات مليحة لكنصعبة وانت وقتك رايح يتقسم بينك و بين وليدك اما فيما يخص البكالوريا انا لي نعرفو بلي امتحان الجامعة و الباكالوريا يكون تقريبا في وقت واحد يعني من الافضل ان تختاري اعادة الباكالوريا او اكمال الدراسة
اختي روحي درجة بدرجة وما تزيريش على روحك باذن الله تنجحين و اذا كان معاك وقت اضافي حاولي ديري دروس خصوصية او اي شيءحتى لا تفكري في السلبيات لان ما تخليش اللي فات يخسرلك لي جاي
و بالمناسبة فيه من يضن ان التسرع في الزواج و قبول البنت لمن هب ودب و الشكارة ونسيان الدين و الخلق في الختيار هو السبب اقول لهم الله يهديكم لان كل بنت لما تتزوج تتمنى العيشة الهنيئة ولا تعلم مصيرها مع زوجها و هذا كلو مكتوب يقدر الانسان يكون تقي و فجأة يتبدل من الاحسن ان ندعو الله ان يثبت قلوبنا على الدين .

[رحمة من المولى]

الله يفرج عليييييييييييييييييييييييييييييييييييييييييييييييك

[أمة الله 12]

ربي معاك أختي,

عادي جدا, أحسبي روحك هذا وين اديتي الباك و طيشي كلشي وراك

بخصوص الرياضيات كشعبه في الجامعة, مليحة و مطلوبة

و ع حكاية صعيبة, كلشي ف الدنيا صعيب بصح ماهوش مستحيل

[مناد بوفلجة]

السلام عليكم

حاولي نسيان الماضي
سجلي في البكالوريا
حضري و جدي و كدي و ثابري

واصلي دراستك


و ربي يجعل لك مخرج