حائرةة عاونوني في وجه ربي

[مشكلتي]

السلام عليكم
عمري ما تلفتلي كيما هاد العام
انا وجهوني شعبة رياضيات نظرا لتفوقي الحمد لله بصح المشكل نتاعي العلوم مانضمنش روحي نجيب مع اني متفوقة فيها النقاط الله يجيب مانيش عارفة علاش احيانا نجيب فيها 18 واحيانا اقل بكثير درك درت الطعن باش ندير تقني رياضي بسكو حتى التكنولوجيا نجيب فيها وخفت في شعبة الرياضيات لا قدر الله مانخدمش في الرياضيات نخدم في التكنولوجيا درك المشكل راني باغيتهم ل2 وراني خايفة من سلبيات كل شعبة قالتلي مستشارة التوجيه الملمح نتاعك رياضيات صليت الاستخارة ومابان والو عاونوني ربي يخليكم قولولي على العلوم في شعبة الرياضيات مليحة ولا لا وقادرة نجيب فيها ولا لا

[razika zouzou]

يا حنونتي والله خاطيني و معنديييييييش خبرة اتمنى من اللاعضاااااااااء يفيدوكي ان شاء الله

و نتمنالك النجاااااااااااااااح من قلبي

[فاطمة الزهراءالجامعي]

شوفي اختي انا ثاني درت شعبة رياضيات و ما تخافيش و نزيدك حاجة عاودي صلي الاستخارة مرة و زوج حتان ربي يبنلك الصح و ربي يوفقك

[A.maroua15]

انا كنت كيما انتي العام لي فات تلفتلي في الاختيار وكنت خايفة من رياضيات مي الحمد لله درتها والحمد لله لقيت روحي فيها ممتعة

[ابنة الاسلام]

اختي اتكلي على ربي وديريها ..+ملاحظة قي السنوات الماضية صحاب شعبة الرياضيات تحصلو على معدلات ممتازة في البكالوريا

موفقة باذن الله

[ريتان]

اختي توكلي على ربي وديري رياضيات

[بلسم غرام2018]

احسن حاجة اعلوم حنونتي والله رائعه علاه تخافي منها تجيبلي الانقطة وعينك مغمضة

[قدوتي رسولي]

السلام عليكــم
اولا اعرفك بنفسي
انا ادرس شعبة رياضياــت وراني طلعت للثالثة ثانوي
شوفي اختي
راح نقلك بلي انا خوفوني من شعبة الرياضيات بزااف وصدقيني كون نقلك بلي تحديت فيها بزااف ناس والحمدلله حققت معدلات مليحة
وواول اختياري لهاد الشعبة انو انا مانخدمش مليح في العلوم لاني كل ماجربت فيها مانجيبش حفظت ماجبت فهمت ماجبت وعرفت بلي المشكل في منهجية الاجابة
واكيد لاني نحب المات والفيزيك خيرت هاد الشعبة وركزي معايا انا نحبهم صح ونجيب فيهم كل مرة كيفاه وصدقيني كون نقلك ساعات فيزيك نجيب 15 مرة برك جبت19 ومات بين 16.5 و18
وثانية ثانوي راهي اسهل مايكون اسهل بكثير من الاولى في دروسها وتسلسلها وكلش فيها حلو وفيه متعة الا ان برنامجها طويل شوي بركـ
وبالنسبة للعلوم راح تقراو بنفس كتاب العلميين بصح في اخر ثلاثي راح تولو تقرو بكتاب شعبة اداب وفلسفة وتقريبا دروس تشبه للعلمييين على حد كبير واذا كنتي مليحة في هاد 3مواد راح تجيبي معدل 16 و17 بكل سهولــة ولازم ماتهملي حتى مادة ويوميا تراجعي موادك الاساسيــة
وشعبة رياضيات صدقيني اسهل بكثير من تقني رياضي واذا قتلك بلي تقني رياضي بزااف يهربو منها خاصة وانها تناسب الذكور لا الاناث
مشكلتك ليست بمشكلة بل مجرد خوف لااكثــر
اي سؤال انا حاضرة للاجابــة
لاتخافي وتوكلي على الله
اسأل الله ان يسدد خطاكـ♥
تحياتي

[أمة الله 12]

وشبيك تةسةسي في روحك؟؟؟؟؟؟

كلشي ق الدنيا صعيب بصح ماهوش مستحيل, ديريها في بالك مليح

شعبة الرياضيات فوووووووور خلاص, أنا كنت systém classique علوم دقيقة, و الرياضيات معاملها كبير و ما كان حتى مشكل

أنتي اقريها مليح و عاوني روحك ب les cours

ربي معاك

[الزهرة المضيئة]

العلوم نفسها لي في شعبة العلوم التجريبية فقط المعامل
بالنسبة للرياضيات راح تكون اصعب في شعبة الرياضيات لان وحدات يقراوهم مكانش في العلوم التجريبية
و شعبة تكنولوجيا مافيهاش اصلا علوم فقط فيزياء و تكنولوجيا لي معاملاتهم قاوية
و شعبة الرياضيات هي الاولى يعني اذا كنتي متمكنة جيدا من الرياضيات ديري شعبة رياضيات

[محبة القرآن]

يا أختي انا تان صرالي نفس المشكل

بصح الحمد لله رضيت بيها بالرغم من أنها ليست اختياري

العلوم معاملها 2 فقط وتقراوها مرة في الاسبوع

و les sujets pluuuus facil والله يا أختي ما عليك غير تركزي على المات و الفيزيك

وشوية من المواد الادبية ونوصيك أقراي في الدااااار لانو في الثانوية 20/100 على الاستاد 80/100عل التلميد

وشعبة تقني رياضي فيها 3مواد اساسية ومعاملاتها جد كبيرة بالعكس الرياضيات مادتين فقط

حاولي أن تحلي قدر المستطاع من التمارين

انا الحمد لله تحصلت على البكالوريا بمعدل جيد وكل زملائي

فقط توكلي على الله وديري لي راه فبالك

وفقك الله

[Yasmina Salah]

السلام عليكم
أنا من رأيي ما تضيعيش هاذ الفرصة خصوصا إذا راكي فوور في الرياضيات و الفيزياء
و الله يا اختي انا تمنيت هاذ الشعبة و تمنيتها من قلبي و درت المستحيل هاذ العام باش نختارها
بصح المشكل حنا في ثانويتنا غير متوفرة هاذ الشعبة
و إذا اختاريتها لازم يوجهوني إلى ثانوية في مدينة أخرى
و حنا عندنا صعوبة في النقل خصوصااا في فصل الشتاء في الصباح
لهذا ما قدرتش نختارها و راهي باقية فخاطري
خصوصا بعد ما سقسيت عليها و بحقت في النت و كامل تبينلي بلي شعبة راااائعة جدا

لهذا ننصحك ما تضيعيش هاذ الفرصة و بالتوفيق إن شاء الله

[tina rus]

برايي انو العلوم تجريبية احسن لانو هي لي فيها اختصاصت اكثر و تاني لي يقلك نقرا رياضيات و ندير طب ياو تجيه صعيبة لانو ميكونش قاري العلوم مليح يعني صحاب العلوم يدرسون الفيزيا و العلوم و الرياضيات كلها لا يجدون صعوبة في الجامعة مع اي تخصص و الله يو
فـــــــقك

[قمر الزمان رؤية]

السلام عليكم
انصحك بالتقني رياضي
في الرياضيات كاين مادتين معاملها كبير هما الرياضيات و الفيزياء ،اذا خدمتي مليح و ما غلطتيش تدي باك بمعدل ممتاز ،لكن اذا غلطتي رح يضيع لك الباك
و لكن لما ديري هندسة مدنية فهناك 3 مواد ،اذا ما خدمتيش في مادة تعوضيها في الاخرى ( شفت ناس صيف كامل يقراو وهوما شعبة رياضيات و في الاخير جابو معدل مليح لكن ما حققش الطموح ،اما العلميين او التقنيين فلم يكن لهم مجهود مثلهم و حققوا طموحاتهم بفضل المواد التي ترفع المعدل خااااااااااااااااااصة الهندسة المدنية )
و في التوجيهات تلقاي نفس المعدل للتخصصات الطبية مطلوبة على الشعب الثلاث ،يعني انتي تدي 14 رياضيات و واحد اخر 14 تقني ،الاثنين يبعثوكم طب على سبيل المثال ( باك 2013)
هذا رأيي و الراي الاخير يرجع لك

و ربي يوفقك و يسهلك ان شاء الله

[مناد بوفلجة]

ديري تخصص رياضيات

[abderafik]

sallam
choufi ngoulek 7aja la meilleur branche 7iya mathe prsk mou3adalate l9ouboul habtine bezaf
math sahla bezaf ili9lek tcontinue m3aha bach tenj7i fiha
wenzidek 7aja phisique les sujets ta3ha fel bac sahline 3la ta3 les scientifiques
ghadi nchalah liyame tfout belkhouf w min terb7i lbac ghadi ta3arfi beli fewati yamate chaba fe classa rabi yssahel

[امة الله نور]

انا خويا قاري ريايات و كان يدير دروس خصوصية و جاب روحو و تحصل على 12.90 في الباك و دار تخصص مليح
بالتوفيق ديرايها على ربي و ربي ينجحك

[imi02i]

الرياضيات أسهل من التقني والعلوم التجريبية
عندك فيها مادتين اللي لازم تقراي فيهم مليح
ومعدلك تزيدي تطلعيه بالمواد الأخرى
أنا قريت جذع مشترك علوم كنت نحلل في روحي باش نطلع ومن بعد درت شعبة رياضيات وجبت معدل هايل. مقارنة مع مستواي في الأولى ثانوي.
مادام مستواك مليح أقراي ومتخافيش بالإضافة إلى أنها دروسها في متناول الجميع
يخلعوا فيك برك

[بنت الجزائرية]

انا درست شعبة رياضات بالجد تستطعين فعل ما تريدن

[Anoir N]

إذا كنت خايفة من العلوم ديري تقني
بصح راهو على حساب ما سمعت براسك الرياضايات كيما فرع العلوم التجريبية فقط الرياضيات زيادة دروس

[realista]

السلام عليكم و رحمة الله تعالى و بركاته اختي

شوفي انا كنت دايرة شعبة رياضيات و الحمد لله نجحت هاد العام في الباكالوريا بمعدل جيد جدا

شعبة الرياضيات مليحة بزاف بصح لازم عليك تقراي الرياضيات بزاف لازم تأكليها و متخافيش منها و كل شي يسهل

هدا مكان و ان شاء الله زيدي شوفي وقرري و الحاجة اللي مليحة فيها هي معدلات القبول هابطبن مليح كيما في 2013 تدي 15في الباك يمدولك كلش

، بصح اذا كنتي حابة ديري طب في المشتقبل ان شاء الله لا انصحك بها ديري شعبة علوم احسن

لانو كاين دروس منقراوهمش في العلوم السنة الثالثة و نحتاجوهم في الطب و على هدا زيدي فكري مليح و ربي يوفقك