خطيبي ربما مجنون

[مشكلتي]

السلام عليكم
أحببت شخص و احبني بعمر لا يصدق و لم تربطنا اي علاقة الى ان كبرنا و جاو اهلو مدو كلمة فقط و بقات يكملو
في هادي الفترة حكينا مع بعض للاسف الرجل اللي احببت و كأنه مجنون يضحك دون سبب احيانا يهزأ من كلامي و مع انو ماشي وقتو
نهار يقلي مانسمحش فيك لوكان نموت و نهار اتصل و دون اسباب قالي من اليوم و رايح راكي ليبر تخلعت قوتلو واش راك تقول قالي خسارة فيك عمري ضيعتو سكتت قالي نموت عليك و ما نسمحش فيك وما كانش يمزح كان صح و جدي بكلامو لكنو تراجع و حتى كي واجهتو طلب السماح
حاول مرة الانتحار فقط لاني قررت نبعد عليه
و مرة اخرى قتلو اللي بنا خلاص لانو قريب يهبلني يتناقضاتو اتصل بي شارب للخمر و كانت صدمة لي ؟؟

رايحة نهبل اللي حبيتو عمري كامل و ماصدقت رانا مع بعض هكذا يتصرف ؟؟؟
يا ترى الخمر و اللي خلاه متناقض ؟؟ و الا ؟؟؟

انا واجهتو و يقول اوقفي معايا و لوكان تروحي انتي ما عندي والو في حياتي
احنا تربينا حتى الدخان و ممنوع في دارنا الكل يشهد على ربايتنا من الصغير للكبير

واش ندير نخليه ؟؟ زعما نظلمو ؟؟
نحمل و نوقف معاه ؟؟ و تصرفاته لي ما رانيش فاهمتها ؟

احيانا نحسو يحبني لدرجة الجنون و احيانا يتعمد يقلي نكرهك و يبينلي انو مارهش باغيني دون اسباب ؟

هو حنين معايا و كريم و يحبني لكن يطلب انا نتلقاو و نرفش يقلي مري من امامي فقط نشوفك
انا رفضت لاني جدية بتصرفاتي قتلو كملو اجراءات الخطبة و راح نتلقاو علنا علاه نمر قدامك هو اعتبرها اهمال و عدم اهتمام و اقام الدنيا و صار يستهزء من تصرفاتي

بصراحة تعبت واش ندير

الواضح اني حتى انا افكاري تشتت لوجه الله اعطوني رايكم

[/زهرة عصفور الجنة/]

وهل تقبلين برجل يشرب الخمر ان يكون زوجا لك

[ابتغي الجنة]

مجنون و لا طبيعي المشكل الان راهو في الخمر
الخمر ام الخبائث
اللي يشرب الخمر يقدر يدير كلش

[mamou love]

أخطيك و حاولي تصرفيه
شارب خمر هذا دليل على أن العلاقة فاشلة قبل أن تبدأ
كيف لك أن تستمري مع شخص شارب للخمر
أنت تضعين الحد لنفسك
شارب الخمر = تارك للصلاة صحيح ؟
هل تستطيعين الزواج من تارك الصلاة؟

[ام نسمة]

ضف على ما قالوه قبلي عن الخمر وترك الصلاة
وهل تعتبرين من ينتحر من اجل فتاة تركته ......رجلا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لالا انت لا تدركين المعنى الحقيقي للرجولة ابدا

[همسة مشاعر]

اختي خطيبك لا علاقة له بالدين والكبائر الي يعملها هذي كامل كيفاش تقبلي على روحك زوج واب اولادك سكير وتارك صلاة وزيد يحاول للانتحار؟؟؟؟؟
ربي يهديك انا كون جبت في مكانك ننفصل عنه وزيد نقول لاهلي على كلشي
ابتعدي عنه

[biti]

اشرطي انو يتعالج و يوقف الخمر
واستخيري

[سارةالتلمسانية]

حنونة الليوم يشرب الخمر ويعيطلك وغدوا يشرب الهروين ويضربك ونهار تديه تحصلي انا نقولك الليوم راكي ليبر وراكي صغيرة خير من غدوا تديه وتخسري كلش نصيحة لله خليه يروح في طريقو

[hanadi21]

طيشي عليك

اولا ماهوش نورمال وثانيا شارب الخمر

[* الحلم سكر *]

طبيــعي .. نظن لا
تأثير الخمر ام لا .. صراحة ما عندي حتى فكرة
لكن يا اختي نظن الموضوع اكبر ؟؟؟ يهزأ من كلامك و يقلك روحي و من بعد ما نسمحش فيك و من بعد ما نعرف واش ما هوش طبيعي حبيبتي
اخسري حبك ليه و حبو ليك احسن ما تخسري روحك و حياتك خاصة انكم عائلة على قولك ملتزمة و ما كمش نتاع هذا الشيئ
ربي يهديك و يكون في عونك و ينير بصيرتك يا رب

[بلسم غرام2018]

وهل تقبلين برجل يشرب الخمر ان يكون زوجا لك
وزيدي استخيري ربي سبحانو
وشرب الخمر مشي ساهل شوفي العواققب من بعد

[مناد بوفلجة]

السلام عليكم

أظن أنه مجنون فعلااااا

يشرب الخمر !!!
هل والديك يعلمون ذلك ؟

كارثة كبيرة .....

الله يهديك ... و يهديه

[imi02i]

الأسبوع الماضي فقط إلتقيت بشابة تفوق الثلاثين من العمر وكانت آية من آيات الجمال لدرجة أني لم أصدق أنها تبلغ ذاك العمر

وأحضرت معها إبنتها الصغيرة التي تفوقها جمالا
لكن ملامح الحسرة والندم تبدو على ملامح تلك الشابة التي ضيعت عمرها من أجل شاب أحبته وعشقته وأرغمت أهلها على الزواج منه بل إنها أيضا قطعت دراستها من أجله وهي كانت تعلم أنه يشرب الخمر ولو قليلا
تقول أنها في الفترة الأولى عاشت معه حياة سعيدة، لكن بعدما تقدم العمر وبدأ أولادها يكبرون أصبحوا يعون تلك المشاكل والخلافات التي أهتكت نفسيّتهم أبدا
وهي الآن تترجى من والدها أن يساعدها على الطلاق لكنه أبىَ بحجة أنها هي من اختارت لنفسها هذا الرجل.
الآن هي وأولادها أصبحوا ضحية رجل سكّير. فما الفائدة من ذلك؟
تزوجت عاطفةً والآن لا مكان للعاطفة في ما تعانيه
الزواج أمر جدي وليس كالذي نراه من وراء التلفاز فإياك أن تغرك تلك القصص
حكّمي وفكري بعقلك لا بلقلبك وانظري بعيدا إلى العواقب الوخيمة التي يمكن أن يفعلها رجل يشرب الخمر
وكما تعلمين فإن الخمر أم الخبائث فمن شربها استطاع أن يسرق ويزني ويقتل ...إلخ
بالإضافة إلى أنك قلت أنه غير ثابت على شخصية واحدة فهذا أكبر دليل على مراهقته المتأخرة
ماتلعبيش بعمرك ويلعن أبو عشق يوديك إلى مالا تحمد عقباه

[محمد جديدي التبسي]

والله حتى ولو لم يكن يشرب الخمر فهو لا يليق بك ولا ينبغي أن ترضى الفتاة بالزواج من شاب طلب منها ملاقاته وليس بينهما عقد شرعي

[كونجلي]

يا اختنا انصحك لوجه الله [ولم اعتد التعليق في هذا القسم]
ابتعدي عنه...اياك و الزواج منه...و لا يغرنك ادعائه بحبك...

نصيحتي حكمي عقلك لا قلبك...هو لا يمشي في طريق الله...كيف ترضينه زوجا

[فارس وجواد]

كيفاه تقولي ضيعت عمري معاه وماتعرفيش عقليتو صحيح كما يقال "الحب اعمى" ضرك وقع الفاس في الراس كملي وخلاص

[hattal]

نصيحة اخ مشفق
اذكرك بحديث رسول الله صلى الله عليه : اذا اتاكم من ترضون دينه و خلقه فزوجوه ... الى اخر الحديث
و هل هذا ممن ترضين دينه ؟؟؟؟ و يقول احد الصالحين : زوج ابنتك من تقي ان احبها اكرمها و ان ابغضها لم يظلمها
و هذا ما دارش الخير في نفسو يديرو فيك ؟؟؟؟
خليك من الهبل و الحمق فيقي روحك قبل فاوت الاوان

[~~ أغيلاس ~~]

شارب خمر !!!!

سيكون فطورك ضرب،

و عشاؤك ضرب،

و ستندمين ايما ندم على هذا الزواج،

مدمن الخمر في حكم المجنون و لا عقل له،

بادري بإخبار والديك أنه شارب خمر و افتسخي الخطبة،

و ليقتل نفسه سبعين قتلة،

اهتمي لحالك و لا تهتمي لحاله،

الزواج بشارب خمر ضرب من الجنوب،

ستعيشين العذاب و تندمين ايما ندم،

و الحب الوهمي المضحك الذي تحلمين به فإنه بعد الزواج بهذا السكين سترين الحب الحقيقي لما تعدين النجوم بعد أن يصرعك بالعصا لما يفقد عقله .

[salima14]

أنصك أختي أن تختاري من يعينك على طاعة الله

[iman14]

برائي انه انسان غير جدي و لازال بعد لم يصل الى مرحلة النضج و النمو و لا تنسي انا الزواج مسؤلية لا تسمعي لقلبك بل دعي عقلك و اسالي نفسك اذا كنت قد تعيشين معه في امان و طمانينة و الا سيفشل زواجك مستقبلا فكري جيدا اذا لم يكون جدي في جميع اوقات لا داعي لذلك خمي بعيد

[مواطنة]

اختي على حساب كلامك راكي عارفة واش لازم ديري بصح خايفة من ردة فعلو من جهة و من جهة غادوك الايام لي فاتت وانت تحلمي تكملي حياتك معاه امر طبيعي
تعرفي اختي اولا
اهلك لازم تعرفيهم على حقيقتو لانك مهما خبيتي عليهم يجي نهار وين يفيقو مايسامحوكش بالكثير يولو يسموك مسكينة امالا كوني صادقة معاهم الاهل هما لي يوقفو مع البنت في جميع الاحوال
*اختي مام لوكان حبيتيه 20 سنة كي تتزوجي بيه يصدمك الواقع المرير ديالو اكثر ملي صدمك دوك.
* تقولي نصبر بالك يتحسن لوكان جا زوجك لكن دوك راح خطيبك فقط و بنيت عليه احلام الله غالب تبدل و فيه ازدواج شخصية ماشي محتم عليك
*اذا راكي تشوفي بلي ما عندكش قيمة لهاذي الدرجة وحابة تكملي معاه على الاقل ديري قيمة لداركم ما يناسبوش واحد يشرب الخمر و انتي على علم
*الظلم لي راني نشوف فيه نوعين رايحة ظلمي نفسك لي تهليتي فيها كل هذا الوقت وعائلتك لي تعبو عليك
*اذا عليه هو مام لوكان يحب ينتحر انت ما دخلك في تصرفاتو خلي باباك ولا خاوتك يهدرو مع دارهم بلا مشاكل و يحبسو كل شي ويقترحو عليهم انو لازم يتعالج لانه يهدد بالانتحار وانت ما ظلمتيه ما والو غير الشفقة بعديها عليك.
يا اختي ما تفكريش واش يقولو الناس لانو في حالة ما حبستي يقولو فلانة حبست وخلاص و اذا تزوجتي بيه تسمعي الهدرة دائما في جميع النواحي ترضاي تبهدلي روحك بيدك؟ خممي في نفسك و عائلتك برك لانك على بر الامان و ماراكيش مجبرة تبداي حياتك بوجيع الراس
الانسان هذا الله يهديه و انت الله يرزقك من جهة اخرى
اختي نصيحة لوجه الله
ماديريش في بالك بلي كي تحبيه قادرة تصبري عليه و تنحيلو طبايعو ماشي ساهلة و انا لحد الان لي نعرف
زوجات كبيرات في السن وازواجهن من النوعية تاع خطيبك لحد الان مازالهم في صراع الضرب و الشتم والاولاد والجوع وسيرتهم على لسان كل من يعرفهم
قوليلي اختي راكي تزوجتي بيه لسبب واحد تاع المسلسلات *حبيتيه كل حياتك* واش تقولي لولادك كي سقسوك علا بابا هكذا؟ هذا السؤال اغلب الاولاد يسألونه كيف سيكون جوابك
اختي اعلمي انك ستسألين عن اختيارك لزوجك فلا تجني على نفسك بيدك
اتمنى لك السعادة من كل قلبي ما تزعفيش عليا

[libanarim]

الشاب شارب خمر، خليك منو ، وربي يعوضك الزوج الصالح

[algeroi16000]

يا ترى الخمر و اللي خلاه متناقض ؟؟ و الا ؟؟؟

الواضح اني حتى انا افكاري تشتت لوجه الله اعطوني رايكم




لا تتلاعبي بصحتك النفسية يا بنيتي، هذا دمر روحوا و راح يدمرك معاه حذاري !!!

[مريم الصابرة]

السلام عليكم اختي
اولا انا قريت الردود وكامل عندم الحق ومشكل الخمر مشكل كبير
لكن خليني نشوف الموضوع من زاوية أخرى هي صح الخمر امر كبير ولازمك تغامري وتهدديه الإنفصال الأبدي لو ما يتوقفش انا من رأي ولو انا في مكانك نوقف معاه ومحال نخلي عشرة سنوات تروح هكذاك كل وحدة وتفكيرها حرة لو انا محال نخليه لأنو ما راه لا مهبول لا والو راه لاباس عليه تعلق بيك بزاف من صغركم وما راهش امر ساهل عليها يتصرف هذو التصرفات إنت في وقت يكون مقلق ويقولك كلام حاولي تعتبري روحك مع سمعتيهش ولازم العلاج إنك تعاقبيه يعني تتوقفي على الهاتف وتهدديه وكل ما يدير امر عاقبيه وهو راح يوالف اما لما تتزوجو راح بالعقل يولي عادي نعرفهم خريجي سجون ويشربو الخمر وكل شي والمرا هي تسقم الراجل انا مانقولكش غامري بحياتك إنت فكري مليح راني مديت رأي لو انا محال نخليه وحتى اللي عايشين عادي وعندهم مشاكل يعني الزواج فيه فيه مشاكل شكرا لك