انصحوني

[مشكلتي]

السلام عليكم

انا فتاة ابلغ من العمر 21 سنة كنت متفوقة في دراستي الحمد لله تحصلت على البكالوريا بمعدل 14 سنة 2011 لكن مشكلتي ان لم اتقبل الدراسة الجامعية حاولت درست السنة الاولى و توقفت بعد بكاء شديد و ترجيت ابي ان يوافقني وافقني و السنة الاخرى نفس الشيئ بعد يومين من الدراسة بدأتني نفس الحالة رفض
دارلي بابا (transfer) لمدينتي لكن نفس الشيئ ماقدرتش نكمل توصلت لدرجة اني كل ما نطلع (bus) الصباح ندعي يااا ربي تصير حاجة و نموت في الطريق بصح ما نلحقش للجامعة الله غااالب يا خاوتي حاولت عييييت ما نتقبلها بدون فايدة حتى اني كل ليلة نوض مخلوعة ماقدرتش و محملتش الجامعة ايضا بلوكيت العام و ريحت في الدار و بابا طاوعني و قالي المهم راحتك و قالي نديرلك رقية اذا رجعتي الحمد لله اذا مارجعتيش منزيدش نفتح معاك الموضوع و هذا العام الثالث نورمالمون راني رايحة نتخرج و انا مابديتش بصح الله غالب فتح معي بابا الموضوع اليوم و هدي المرة تقلق مني صح و قالي ترجعي بالسيف عليك انا و والتدك ماندومولكش و ماتنعك غير شهادتك مع العلم كل اخوتي بشهاداتهم الجامعية الاستاذة و المهندسة ووووو و انا كنت من الممتازيييييييييين في دراستي و شهاداتي تشهد لحد الان بصح وش ندير الجامعة ما حملتلهاش
قتلو يا بابا اذا نتا تستطيع اعتناق المسيحية بعد الاسلام فانا استطيع الرجوع للجامعة رفضي قاااطع لدرجة هذا التشبيه الفضيع

قتلو ندير اي كونكور مراقبين او عون اداري او اي شيئ لكن الجامعة لاااااااا الا اذا كان يريد ان يحكم عليا بالموت

خاوتي الان بابا زعفان عليا و معرفتش كيفاش نرضيه وكلش الا غضب الوالدين و قالي عندك فرصة من هنا لغدوا الصباح تمديلي قرار و انا علابالي اذا نرجع للجامعة نحكم على نفسي بالموت ماقدرتش نتأقلم (عفن اعزكم الله) و يا سيدي كل واحد في حالو و يعرف قدروا لكن رفضي للجامعة قناعة مني و لوكان نرجع و انا بداخلي هذا الرفض اكيد ماننجحش او نزيد نبطل كالسابق

والقعدة وحدي في الدار ذوبتني و هذا الامر الي رفضوه والديا لان الجميع يخرج للدراسة و العمل الا انا نبقى وحدي حتى اصبحت نفسيتي مضطربة

انصحوني كيفاش نقنع والدي بلا ما يزعف مني

اسفة للاطالة

[علي بابا واللصوص]

السلام عليكم

يعني ماعطيتيناش سبب مقنع صراحة وهذا كلام لا يصدر عن شخص واعي
ماوضحتيلناش السبب ؟ المفروض كاين سبب خلاك تتضايقي
أنا العكس نعرف اغلب الفتيات يتحججن بالدراسة للخروج من المنزل ووالديهم يرفضو
انت باباك في الخير هو راه يعرض عليك باش تقراي
الجامعة صح تختلف عن الثانوية ولكن ستجدين صديقات محترمات وستتأقلمين بسرعة
انت رفضت رفضا قاطع بدون سبب
إذا درتي الدراسة في رأسك ودرتي ربي في قلبك ستنجحين وإلا كيف وصلت وربحت البكالوريا بمعدل 14
3 سنوات وستمر بسرعة

دبري رأسك وشوفي اللي يريحك

[jonasess]

الله يفرج عليك اختي العزيزة

[souso30]

xاختي ارجوكي عودي الى الجامعة و الدراسة انصحك باستغفار و الصلاة على الرسول

[محمد جديدي التبسي]

والله غير عندك الحق في هذه الكلمة
"عفن اعزكم الله"
أظن أنك على الفطرة وكلامك هذا صحيح تماما
لم نفهم الأسباب بالضبط وان كانت مفهومة عموما
هل هي الحالة الأخلاقية الموجودة؟ لا يرتاح في الجامعة من له ضمير حي
عموما أحسن ما فعلت أن تكرهي وتبغضي الجامعة ربي يبعدها عليك ويهنيك منها
أنصحك بالاكثار من الذكر والاستغفار وفهمي والديك بأنك لا تحبين الجامعة والرزق على الله وسيرزقني الله بالزوج الصالح الذي يفهمني ويعينني على طاعة الله ربي يثبتك

[رحمة من المولى]

و الله ما تصيبي غير جامعتك علاه سهرتي الليالي بل علاه دعيتي ربي سبحانو ينجحك في الباك
استغفري حنووووووووووووونة و اتكلي على ربي سبحاااااااااااااااانو و اقراي

[عبد الله 22]

السلام عليكم و ياخت الشهادة في الوقت الحالي مهمة بغض النظر عن وضع الجامعة وزمان صعيب وليس كل من هم في الجامعة فرحنين ومتمتعين بوجودهم الجامعة لكن مرغم أخاك لا بطل ، كمت يوجد جانب جميل في الجامعة وتجربة فريدة لا تكرر بالتوفيق

[تراتيـل صبــح]

لم أفهم سببا واضحا لرفضك الجامعة،
وحتى عائلتك غير مقتنعة بالأمر،
أرجو توضيح السبب الأساسي حتى يتمكن الاعضاء من مساعدتك.

[ناشدة الفلاح]

و عليكم السلام و رحمة الله و بركاته
بداية دعواتي لك بالتوفيق و السداد و أن يرزقك الله الطمانينة و راحة البال




ماقدرتش نتأقلم (عفن اعزكم الله)

إذا كان هذا سبب رفضك فالأمر هين إن شاء الله
لست مضطرة لـ"التأقلم" مع ما لا يرضيك
خذي من الأمر ما يليق بك و اطرحي باقيه
فكل من يدخل الجامعة يعش ما عشته و لكن الفارق في تعاملك مع الوضع، أنت هناك للدراسة و فقط...ركزي على هذا ووفري على نفسك عناء إرهاقها بما سواه فلن تغيري من الأمر شيئا.


والقعدة وحدي في الدار ذوبتني و هذا الامر الي رفضوه والديا لان الجميع يخرج للدراسة و العمل الا انا نبقى وحدي حتى اصبحت نفسيتي مضطربة

هذا ما يخشاه عليك الأهل و ثقي أنهم لا يرضون إلا ما فيه صلاحك و لا هم لهم سوى رؤيتك بخير حال

كيفاش نقنع والدي بلا ما يزعف مني

أعطـه سببا و لا تكتفي بالرفض لأجل الرفض
و إن كنت أنت نفسك لا ترين سببا محددا فأعيدي التفكير بروية ثم تحدثي إليه بصراحة و ستتوصلان إلى حل بإذن الله
و لن يتضايق إن اقتنع ان خيرك في الابتعاد عن الجامعة فمصلحتك مطلبه في المقام الأول.
و أولا و أخيرا الجئي إلى الله عز وجل بالدعاء و استخيريه فيما قررته
و الله الموفـــق

[ToXiC_Dz]

والديك اعذريهم راهم يخمو لعقوبة الزمان اختي
وراهم عارفين لي صاري لكن اكيد ان ثقتهم فيك كبيرة
الجامعة ماهيش حرام مي التزمي الاداب و الاخلاق و صوني روحك وكلش يفوت
و هذه واحدة من الصعوبات التي يجب ان نواجهها في حياتنا
فالهروب الى الامام ليس حلا و لا يجب ان نهرب من الصعوبات بل ان نواجهها
الهروب يعلمنا الخوف من المواجهة في حين ان حياتنا ستكون كلها مواجهات
وان لم تتقبل نفسك اعتبريه امتحانا لايمانك و ثباتك
اما ما يحدث داخل الجامعة فانتي لست مسؤولة عنه و لا تنشغلي كثيرا بما يفعل غيرك
لن اقول لكي لا تهمتي لان انكار المنكر واجب و اقله الانكار بالقلب
ربي يوفقك اختي
وربي يرزقنا بوحدة تخمم كيفك

[naamane3]

يا بنيتي ارجعي لجامعتك ولدراستك بما انه العام الأخير
لا تضيعي حلم أبيك ومستقبلك
وأصبري واحتسبي أجرك عند الله
ولا داعي لأن أذكرك بالصبر وفوائده والحكمة منه
وربما قدر لك الله في هذا العام صبرا ستتعلمين منه في المستقبل
وتصبرين على العفن عام خير لك من الندم علي عدم الصبر سنين
ويجب أن تكوني قوية على كل شيئ وخاصة على ما تكرهين
والله المستعان

[arc en ciel]

ربي يكون معاك
حتى انا فالاول التحقت بجامعة في ولاية اخرى وليت للبيت في نهاري لاني شفت حاجات .... وصلني بابا خلصت الغرفة طلعت ليها و شفت و شفت يا لطيف دخلت الغرفة بقيت حوالي 15 دقيقة و رفدت روحي و قشي و الى الدار
بصح هادا مامنعنيش مانكملش قرايتي
حولت من الشعبة الي كنت حابتها و جيت لولايتي الي مافيهاش الشعبة الي حبيتها و قريت و كملت و هذا لا يعني ان هاد الجامعة مافيهاش العفن
فيها و فيها و فيها اعزكم الله بصح كي يكون قلبك قوي و واثقة من تربيتك تنساي هاداك الشي عيشي بمبادئك و تمسكي بيها هما الي لازم يخلو الجامعة مش انتي الله يهديك
اختي روحي كملي قرايتك راهي تنفعك على الاقل تفرحي والديك بالشهادة

[laraa]

اطلبي من والدك أخدك عند مرقي وبعدها خدي القرار لي يريحك.

[نجاح 23]

أختي أنا أول ما دخلت للجامعة كنت كارهتها نروح على 8 نروح على 10 لكن مع الأيام تعرفت على أخوات ماشاء الله و عشت أيام جميلة و تخرجت و الحمد لله
ماتشوفيش غير الجانب السئ

[سوسو92]

اختي انا ديت الباك في العام انتاعك وانا في مفس عمرك وجيت للجامعة من ولا ية جنوبية الى ولاية شمالية تبعد 1600 كم وكنت كل يوم نبكي ومانيش حابة نقرى سيرتوا في هديك والولاتية المعروف نسها بالعصبية وقلت الادب سمعت كلام يجرحني بصح قاومت كل هذه الظروف باش نفرح والديا تلقيت ببنات ماشاء الله ولفتهم وهذا العام ان شاء الله نتخرج
اختي غير صبري ودي اللي نفعك من الجامعة وغمضي عينك على خوايج الاخرين

[بلسم غرام2018]

السلام عليكم

يعني ماعطيتيناش سبب مقنع صراحة وهذا كلام لا يصدر عن شخص واعي
ماوضحتيلناش السبب ؟ المفروض كاين سبب خلاك تتضايقي
أنا العكس نعرف اغلب الفتيات يتحججن بالدراسة للخروج من المنزل ووالديهم يرفضو
انت باباك في الخير هو راه يعرض عليك باش تقراي
الجامعة صح تختلف عن الثانوية ولكن ستجدين صديقات محترمات وستتأقلمين بسرعة
انت رفضت رفضا قاطع بدون سبب
إذا درتي الدراسة في رأسك ودرتي ربي في قلبك ستنجحين وإلا كيف وصلت وربحت البكالوريا بمعدل 14
3 سنوات وستمر بسرعة

دبري رأسك وشوفي اللي يريحك

قولي لباباك يرقيلك
واستخيري الله وروحي تقراي على روحك

[nounoussatito]

اذا كان اصحاب القلوب الطاهرة و النقية يتخلون عن الجامعة و غيرها بسبب البعض اصحاب القلوب المريضة او بعض التصرفات غير اللائقة الصادرة من البعض اذا نحن نترك الساحة لهم ليفعلوا بالمجتمع ما يشاؤون ويتخرج الاطباء والمهندسون وووووو لكن الاخلاق ربي ينووووووووب و اصحاب القلوب الطاهرة يلزمون البيوت يشاهدون ما تبقى من المجتمع ينهااااااااااااااار ,,,,, عفوااااا هذا ليس حلا و ما هكذا تبنى الامم اذا كان اشرافها يتراجعون الى الوراء ليتركوا الاراادل يفعلووون ما يشاؤووون ,,,,,,,,,

[wisale02]

abi ayfaredj 3lik inchaalah

[safa rayan]

اختي انت لم تذكري السبب الذي يمنعك من ارتياد الجامعة و بمكوثك بالبيت ستحطمين مستقبلك لذا على الاقل اعملي رقية و استغفري ربك و اطلبي عون الله فهو لا يخيب احدا و اكملي دراستك فالوقت يفوت مهما كان طويلا ....... وفقك الله و هداك اختي ..........

[خاطرة الامل]

السلام عليكم ورحمة الله وبركاته
اختي خممي مليح وش راكي ديري صح الجامعة فيها وعليها بصح كيما كاينجانب سلبي كاين ايجابي واتت راكي رايحة تقراي هادوش لازم تركزي فيه خممي لبعد والديك ماهمش دايمنلك وكيما قالولك حاجة ما تفيدك بخلاف قرايتك وكاين اللي يقولك اقعدي في الدار حتى يجي مكتوبك ولوكان مايجيش شويعيشك خاوتك مثلا ؟؟كل واحد دك يزوج ويرجع بمسؤولياتو وانت ترجعي عاله عليهم ويمكن حتى مايعيشوكش كيما راكي حابة وحتى اذا زوجي ماعلابلكش وش يصرا بعيد الشر يمكن وفاة يمكن طلاق واذا كنتي بولادك رح تحلو فامكم للهوا؟
شوفي انا تاني قريت في الجامعة وماعجبتنيش طول مي حملت وكملت واتخرجت وخدمت استاذة في الثانوي واتزوجت وعندي طفل دركا وراني حبست الخدمة وقاعدة في الدار مي ضامنة والضامن ربي على الاقل اذا كاش ما صرا عندي شهادتي ومن غدوا نخدم
خممي ملييييييييييييييييييييييييح عندك اختيار تخدمي ولالا منبعد انتي تقرري مي الشهادة لازمة وراكي تشوفي كيفاه رانا عايشين

[جلة نور]

سلام
اختي اسمحيلي مي راكي غالطة طوووووووول 13 عام وانتي تقراي وتتعبي وعام الباك وحدو حكاية تعب وقراية وسهر وامل وكلشي فات عليك وديتي الباك بمعدل باهي دركا تحبسي كلشي؟؟وعلاه ؟لانو الجامعة ماعجبتكش؟؟علاه شكون عاجباتو مي كيما كانين اللي ماش ملاح كاين لملاح اختي ماتضيعيش قرايتك وماتضيعيش حياتك ارجعي للقراية وسنين ويفوتو ديري رقية وفرحي والديك واقراي خير لك والله حاجة ماتفيدك بخلافها

[الوفي.]

السلام عليكم ...الحقيقة ربما سحر فعليك بالرقية الشرعية ...وان كان الأمر نفسي فغيري الاختصاص ...

ووالله عجبت من قول والدك في زمان مضى يقول الوالد ليس لك الا بيتك وزوجك والآن يقول ليس لك الا شهادتك ...سبحان الله كيف اصبح الأولياء يفكرون ؟؟؟

المهم وفقك الله أختي وان جاءك خاطب فتزوجي وانتهى الامر ...

[نسيم الإيمان]

نظن بلي لازمك تبدلي البرونش
انا عام الباك كنت مانحبش نقرا الرياضيات ماكنتش نفهمها كنت نبكي بزااااااف كي نجي نروح نقرا كور (درس خصوصي)
و ماديتش الباك عامين في سبتها زدت كرهتها كثر
بعدها درت الكوراج و بدلت الاستاذ خاطر كان يحرجني و الحمد لله ديت الباك و تخرجت من الجامعة
ربي يفرج عليك هذ الهم ان شاء الله
حاولي هذ العام على جال والديط