الى الخبيرات في صنع عين الجمل

[flora06]

مساء النور لجميع الاخوات
تعيشو ماهي افضل عجينة لصنع عين الجمل هل 4كيلات فرينة بكيلة سمن او 4كيلات فرينة بنص كيلة سمن و الله دخت ما بين الوصفات و زيد جربت عين الجمل في العيد الشكل جا تحفة ما عندي ما نقول فيه اما الطعم الله لا يشوفكم يابس علما اني جربت 4كيلات بنص كيلة و اليوم جربت 4كيلات بنص كيلة العجينة ما جاتنيش طرية و صعيب شوية باش نخدم بيها يعني تتقطع شوية علاش!!!!!!!! ربي يرزقكم الحجة عاونوني عندي مناسبة نشا الله و نحتاج الوصفة المليحة تعيشو ما تبخلوش علي و قولولي تعيشو كي نطمو العجينة بالما زهر نديرو حتى تولي طرية و لا قيس ما تحكم روحها ربي يجازيكم راني فالانتظار

[omhadil]

ولا رد
سمحيلى اختى لوكان نعرف نجاوبك
وين راكم يا الشطرات تاع المنتدى الاخت راهى محتاجة تعاونوها
نتمنى الاجابة فى اقرب وقت

[flora06]

ولا رد
سمحيلى اختى لوكان نعرف نجاوبك
وين راكم يا الشطرات تاع المنتدى الاخت راهى محتاجة تعاونوها
نتمنى الاجابة فى اقرب وقت
بارك الله فيك يا اختي شكرا جزيلا على المرور الطيب معلياش بالاك راحو يرقدو علابالي بلي نساء المنتدى فحلات و نشا الله ما يخيبونيش
راني فالانتظار اكرر شكري لكي اختي

[SEMEHE]

ا ختي هاهي المقادير هزيتها من المنتدى لكن نسيت لي حطتها جربتها في نجاح بنتي وعجب الضيوف 300غ فرينة/ 80غ زبدة دائبة / ملون ابيض تاع الميزان وماء الزهر باش تلمي العجينة الحشو 300غ لوز مرحي /100غ سكر رطب /مغرفة كبيرة زبدة دائبة /لوز بقشور هده المقادير مجربة و ناجحة 100بال100 فقط نقلك انا مانستعملش البيض في الحشو وعسليه 2او 3 مرات

[MELAB SIHEM]

أهلا أنا جربته 4 كيلات قرينه مع كيله سمن و نلمها بماء الزهر، راني خليتها ريحت نهار كامل

[امازيغية وفتخر]

انا جربتو العديد من المرات وجاني هايل والحمد ل الله
2 اونصف كيلات فرينة كيلة نشا
كيلة سمن
ربع كيلة سكر شوي ملح ونلم بماء الزهر تكون عجينة كيما انتاع لقريوش متماسكة ما نكثرش الماء لانو يقسيها ما تعجنيهاش لمي فقط
لما تعجنيها راح تقسى وتجي معلكة ومش بنينة
السر كلو في طريقة العجن
نخليها ترح اقل شيء ساعتين ولما تخرجيه من الفور سقيه مليح بلعسل مخفف بما الزهر مرتين
والمرة الثالثة سقيه بعسل شوي ثقيل
كاول تجربة جربي مقدار صغير كيلي بفنجان القهوة
والوصفة اللي تنجح معاك اعتمديها
والاخوات مشكورات حطو وصفاتهم اختاري وجربي مقدار صغير و بالتوفيق

[مولات الدار]

أختي أنا مانيش خبيرة في الحلويات لكني خدمتها مرتين قبل العيد جاتني يابسة وناشفة من الداخل مالحقش العسل للكاوكاو .أما في حلوى العيد قلت لازم تجي مليحة وبعد التفكير في الأخطاء وبعض التجارب لي موالفة نوقع فيها قررت : استعملت عجينة البحلاوة بصح طريتها شوية وفي التعسيلة الأولى خففت العسل بزاف بالما زهر وتندات الحلوى وخليتها تنشف في بلا مدة الليل كامل وغدوة من داك عسلتها بعسل ثقيل دون مازهر وجاتني روعة ربما ماتعجبش الباقين لكن عندنا مايحبوش الحلوى اليابسة والا الخطأ في اليدين هدي تجربتي مع عين الجمل واذا حبيتي جربيها أو جربي في حبة وشوفي النتيجة

[flora06]

ربي يجازيكم كل خير اخواتي كنتن عند حسن ظني بكن و لم تبخلن ربي يستركم حنوناتي راح نعاود نجربو و الوصفة اللي تخرجلي راح نعتمدها ربي يبقي عليكم الستر

[leilaz]

ياختي احسن طريقة هي 3 كيلات فرينة بكيلا سمن والحشو دري فيه شوية زيت ولا زبدة باش مايجيش يابس وديريها وعينيك مغمضين

[flora06]

شكرا اختي بارك الله فيك

[omanis]

اختي انا نظن جاك يابس ما خليتيهاش تتعسل مليح لانك لازم كي تطيب تحطيها في العسل فيه ماء الزهر و تتركيها داخلو 10 دقائق تم تقطريها

[meriama13]

خوفتوني كنت حابة نجربها في الغد نبعثها لاختي لفرنسا

[امازيغية وفتخر]

خوفتوني كنت حابة نجربها في الغد نبعثها لاختي لفرنسا
جربي وما تخافيش راهي ساهلة ماهلة

[meriama13]

جربي وما تخافيش راهي ساهلة ماهلة


نجربها و امري لله هي عجبتها قاتلي خدميهالي و نبعثهالها

مشكورة حنونة

[لينا11]

لك طلبك عسولة
http://tareklina1.blogspot.com/2013/05/blog-post.html