وش ندير مع أختي؟

[مشكلتي]

السلام عليكم
مشكلني رح نحطها بين يديكم وارجوكم ارشدوني .... انا فتاة ابلغ من العمر 26 سنة مخطوبة وعاقدة والحمد لله مشكلتي اني صرت نكره اختي المتزوجة ونكره انها تجي للدار لانها كرهتني بتعليقاتها الجارحة وتحاول تصيد الفرص حتى نتخالف معاها واخر شي البارح كي تخالفت معاها وصواتنا بدات تعلى بدات تقولي انت مالازمش تدي هذاك الراجل هو احسن منك في كل شيء وخايفة لاتبهدلينا معاه وعايلته صراحة هذا الكلام اثر فيا بزاااف وقعدت ليلة كامل وانا نبكي ومقدرتش نرقد ولي كمل عليا انه ولا من عايلتي وقف معايا ولا واحد فيهم دافع عليا وهذا الصباح مقدرتش حتى نحكي مع خطيبي ومبغيتش نحكيله على هاد المشاكل محبيتش يهز نظرة على ااختي ولا دارنا كامل بصح بيني وبين روحي حاسة روحي مخنوقة وملفيتش كيفاش ندير ؟

[halla halla]

نصيحة من عندي غير متحكيلوش على مشاكل داركم و متعمريش راسك بهدرت أختك بلاك من غيرتها قالتلك هكا ونتي علاش حتبهدليهم نقصتك يد ولا رجل هو باش جا خطبك تسما راكي عجبتيه وهدرت اختك كديريهاش في بالك هي درك راهي في دارها مهنية لباس بيها ونتي اقعدي هبلي روحك

[محمد جديدي التبسي]

يجب ان تكون لديك الثقة في نفسك
لا تسمحي لأي كان أن يقلل من شأنك
وأختك عامليها بشدة ولا تمزحي معها حتى تفيق لروحها وترجع للطريق
وأهم شيء تعلمي اللامبالاة مع أشباه أختك ممن هوايتهم احباط الناس
وخلي يحكو للصباح ما ترديش عليهم ربي يهديها

[lilyane lilyana]

راهي حكمتها الغيرة برك هاذا ما كان وماتعمريش راسك بهدرتها الفارغة وخطيبك ما تحكيلوش على المشاكل لي في داركم على خاطر راح يهز عليهم نظرة ماشي مليحة

[ranou gigi]

يابنتي واش بيك راك كبيرة و شاربة من عقلك تتغشي من اختك حطي في راسك بلي راي اختك و مهما تقلك اعتبريها تمسخيرة و فوتيها ماتبقالك في الدنيا هذه غير اختك
تظهرلي انت حساسة شوية

[sarl02]

سبحان الله اخت تغير من اختها الى هذه الدرجة....المهم انت ما اتعمريش راسك بيها وقتليها بالبارد واضحكي عليها كي تقولك مثل هذا الكلام تاكدي راح تبان لنفسها صغيرة بزاف.

[رانيا3]

اختي ما تقلقيش روحك خلاص
الله غالب اختك غايرة و ما لقاتش كيفاه تعبر على الغيرة تاعها
واهلك ما يوقفوش معاك تانيك باه ما يجرحوهاش تكون في حالة هي كثر منك
انتي مطمنين عليك راكي رايحة لعند راجلك و عروسة جديدة راح يتهلااا فيك و يقوم بيك
يعني من جيهتك راهم مهنيين
نصيحتي ليك ما تخليش تعليقات اختك و كلامها الجارح يؤثر عليك راكي في حومة عرس
حافظي على روحك و لازم تكون نفسيتك مليحة باش م ايديرلكش الحب في وجهك ;) ;) ;)
الراحة النفسية عندها دور كبير و تاثير جسدي كبير لدا اعتني بنفسك اختي
و ان شاء الله تتصالحو نتي وياها و ربي يهديها وانتي ربي يهنيك مع زوجك :)

[jemi king]

ربي يهديها وانتي ربي يهنيك مع زوجك

[سما888]

هههههههههههههههه اختي عادي ديريها في ثقيل
عندي اختي كيما اختك لكن بالعكس واختي مش مزوجة واكبر مني
انا تقولي مستواه مش مليح ومش باهي وتعايرني بيه وزوالي وفلان خرمنو وفلان خرمنو وانا نزوج فلان احسن منو..........
والله ماتهمني وكي تعود تهدر نضحك في قلبي نموت بالضحك عليها
انا وهو متفاهمين ولي نطلبها منو يجيبهالي ومش باخلني
وعلابالي الايام دوارة ويجي يوم تسلكها خطرة هو وكل ربي على لي يظلموه
وربي يهنينا مع بعض

[nasser26]

هذي غيييييييييييييييرة

[ToXiC_Dz]

لا تهولي الامر اختي لانك في نهاية الامر ستتزوجين و تعيشين مع خطيبك الذي اختارك من بين كل النساء ان شاء الله
فانتي لن ستتزوجين من اختك ههههه لما الخوف او الحزن اذن

[ندرومة49]

بيني روحك بلي راك مرا ونص و25 تعلمي من درك تغلبي على الصعاب
أحسنت صنعا عندما لم تردي على أختك هكذا أكييد تعلمت شيئ
المهم لي كتبولك ربي ماينحولكش واحد آخر
الناس كامل كيف كيف ...أختك تظن بلي راه خطيبك راهم ناس حاجة ههه.... يا مرا الناس قااع كيف كيف كالغني كالفقير
اللهم الجاهل والعالم هنا يصعب التعايش

خاوتك وكامل لي في الدار باينيين بلي حاجة فور وربي بارك ...........علابالك علاه ماتكلموش وماوقفوش معاك.....................
1لأنك حساسة فقط وفترة وتزول....... تحبي الناس كامل تكون معاك وهذا خطأ منك ...تعلمي الصبر
2ثانيا لأنهم محبوش يكبروها وماحبوش يأذوا أختك الكبيرة لأنهم يقولوا راها تعلم فيها

سيري ولاتنظريس للخلف خاوتك راهم خاوتك ووالديك راهم والديك كامل يحبولك الخير......وربي يرزقك الذرية الصالحة ياارب

[رحمة من المولى]

ري يهديييييييييييييييييها ان شااااااااااااء الله

[بلسم غرام2018]

راهي حكمتها الغيرة برك هاذا ما كان وماتعمريش راسك بهدرتها الفارغة وخطيبك ما تحكيلوش على المشاكل لي في داركم على خاطر راح يهز عليهم نظرة ماشي مليحة

[تهاليل]

الله المستعان يعني حتى لو أختها تغير منها صح علاه راكم تزيدوا في المشكلة يعني عادي اصطدامات تصرا بين الأخت واختها ومايفوتوش بعضاهم ومع الوقت رايح تنسي مرات الأخت تقسو على أختها لمصلحتها صح ولكن ماتعرفش كيفاه توصللها الفكرة يعني تصرخ عليك أختك هنا أحسن من آخر بعيد عليك ومايحبش مصلحتك وديريها خايفة على مصلحتك وهي يامات ولا اسابيع ولا اشهر وكل واحد يروح لحال سبيله وبلاك يجي الغلط منك لانك راح تندمي على أي شيء تعمليه من بعد وإذا كنت من النوع الحساس لما تحكي معاك اختك او اي أحد روحي وخليها تحكي لروحها وخلاص مش تزيدي على روحك وتعبي روحك وآخر نصيحة لبنات ككل إياك إياك ثم إياك تحكي اسرار داركم ولا واش راه يصرا لزوجك لانه راح يبدل نظرته اتجاهك وراح يعاملك مثل ماكان يعاملك اهلك وبعض الساذجات عذرا عالكلمة خلاص لما تزوج تحل فمها في زوجها وتخكيله واش دارلي واش عملي اهلي واخواني ظنا منها انه سيرأف بها ويعوضها عما عانته غاااااااااااااااااااااااااااااااااااااااااالطة وألف غلط وراني قلت وكل واحدة حرة واش تعمل وبالتوفيق لك أخيتي والله يهنيك وخلي زوجك يعرف عنك وعن اهلك كل جميل ومليح

[سوسو92]

خطيك منها وعش مهنيا راكي عروس

[salima14]

ننصحك أختي ما تعمريش راسك بيها درك تشياني ويطيح نصك من الهم
قيسيها فالثقيل تفادايها قدما تقدري و كي تهدر أسكتي وخليها تكره غير وحدها
وداركم ما يقدروش يهدرو معاها باينة مسكينة حساسة لوكان يهدرو معاها تزيد
تعاديك وأي إنتقاد توجهولك ما تزعفيش منوا مادام خطبك وراكي تحكي معاه
راه عارفك كيفاش دايرة وننصحك أتهلاي في روحك ألبسي مليح وكوافي
وإذا ما تعرفيش الطبخ إتعلمي والنظافة ثم النظافة في نفسك وفي دارك باش
تكوني خير منها ويولو ناسك يمدحوا فيك و توريلها عكس واش تقول فيك
وننصحك أدخلي قسم العرائس و الطبخ وسقسي على أي حاجة ماتعرفيهاش

[حبيبة زوجها]

متقلقيش روحك بزاافوحطي في بالك بلي راهي ختك وبالاك قالتهالك ومهيش قاصدة
وكيما نقولو كبريها تكبار صغريها تصغار ماتحطي حتى حاجة في بالك تجيك حاجة بسيطة
واذا قعدت تبكي وتكبريها رح تجيبيها غير في صحتك راكي عروس
ربي يهنيك مع راجلك وتتفاهمي مع ختك

[Angleeyes]

اختك غايرة منك ربما لان راجلك خير من راجلها ماتديريش عليها و خليها تهدر وحدها و انت ما تحكي لراجلك حتى حاجة و ربي يجمع بيناتكم و يهنيكم

[سجودي لرب العالمين]

ربي يهديها وانتي ربي يهنيك

[kmilya]

مدام هو قابل بيك وحابك هي وش قلقها
خليها تهدر كيما تحب المهم نتي مديريش في بالك
متحكيلوش على المشاكل تعمريلو راسو مسكين ههههههه