يا خبيرات نستحقكم دوك مش غدوووة ....رااح نهبل [الأرشيف] - منتديات الجلفة لكل الجزائريين و العرب

مشاهدة النسخة كاملة : يا خبيرات نستحقكم دوك مش غدوووة ....رااح نهبل

sara-89

2013-08-03, 22:17

السلام عليكم وصح فطوركم
راني غير نشوف فالنت واش حل المشكل الي درته وانا وحدي فداار مكانش لي ترايي عليا بليز سااعدوني

محتاجة ليكم دوك خاطر درت عجينة البقلاوة ومع الشغل والتدوار مرجعتش ليها حتى دوك زعما نخدمها لقيتها حجرة ياااابسة كانت فالثلاجة ومنبعد كي وليت مع روحي تفكرت بلي درت 4 عبار فرينة ل عبر ونص زبدة في بلاصة نص عبر وااش ندير راهي تتقطعلي ويابسة طريتها بما زهر بصح مهيش كيما مواالف لتتصلحلي فيدوني

راني فالانتظار دوك يجي بابا ونوض بليز..

sara-89

2013-08-03, 22:24

وينكم اخواتي في جاه ربي ردو عليا حرت واش ندير واش نزيدلها ولا نقدر ديرها عجينة حاجة اخرى؟؟؟؟؟؟

sahima

2013-08-03, 22:25

يياختي والله حبيت نعاونك بصح ماعنديش خبرة
بصح انا نعرف عجينة البقلاوة كي تريح تجي مليحة وتعاونك فالخدمة
ان شاء الله يدخلو لبنات ويعاونوك

sara-89

2013-08-03, 22:30

شكرا عزيزتي انا بصح غلطت فالمقادير نورمالمو 3 عبار فرينة+عبر ميزينة 1/2 عبر ليداام و بيضة وملح
وانا درت هاك بصح ليدااام درت عبر وشوية

ladymillion

2013-08-03, 22:32

حبيبتي صراتلي من قبل و كملت بيها عذبتني و جات خشيييينة انا نحل و هي ترجع
عاودي وحدة اخرى احسن ما تفسديش الحشو و العسل

الأمنيات

2013-08-03, 22:33

يعني لدام زدتي ما شي نقصتي ولا راني غالطة
ادا راكي زايدة لدام ما تجيش قاسحة فقط منين دخلتيها الثلاجة قساحت فقط عاودي طريها بالعجن

sara-89

2013-08-03, 22:36

شكرا لكن
اقترحت عليا الاخت هند نزيدلها شوية ماء زهر ونريحها ساعة ونشوف
شكرااا

الأمنيات

2013-08-03, 22:41

ايه زيدلها ماء زهر وخليها ترتاح ربي يعينك

نبيلة 81

2013-08-03, 22:45

عل ما أظن راهي يبستلك من البرودة تاع الثلاجة خليها تدفا و تطلق ليدام وشوفي نشا الله ترجع مليحة

maramelmess

2013-08-03, 23:00

ما تزيديش ديريها في الثلاجة علابيها نشفت زيديلها الما مشي الزهر

ما زهر كون درتيه مع ليدام

ما تعجنيهاش بزاف غير قيس ما تلميها

خليها تريح شوية و فتحيها بمايزينة

انشاء الله تصدقلك يا ختي

و ادا عندك اللوازم عاويديها

جيجلية

2013-08-03, 23:19

اختي الكيلة نورمال ما شي فرق كبير

عاودي حطيلها شوية ماء ودخليه مليح ثم حليها بالنشاء

شلال فرح

2013-08-04, 00:46

وينكم اخواتي في جاه ربي ردو عليا حرت واش ندير واش نزيدلها ولا نقدر ديرها عجينة حاجة اخرى؟؟؟؟؟؟

ديري بيها دزيريات في ليمول و احشيها حشو

مثلا نواد كوكو ضيفيلو بيض و نص باكي خميرة و فاني و شوية ماء وهر لازم يكون شوية جاري

او كوكاو مرحي و ماء زهر و زاست ليمون و بيض

و عمريهم و دخليهم يطيبو
لما يطيبو ادهني بالشكولا و لصقي لوزة

او مربى و لصقي لوز ايفيلي

*أم كوثر*

2013-08-04, 02:19

كما قاتلك الاخت ديريها في ليمول وللبقلاوة عاودي عجينة اخرى
لان 4كيلات في 1 ونص ليدام بزاف

وتعدبك في الخدمة

sara160349

2013-08-04, 09:33

والله مانيش خبيرة بصح غضتيني علابالي الخوف من تاع الدار كي تبهدل بيك الحاجة تصري كامل نحبو تجي مليحة استغفري و ابداي بسم الله غير بالشوي راهي الزبدة جمدت برك زيدي الماء و خليها تدفي و تطلق روحها و حليها

sara-89

2013-08-04, 13:40

ربي يحفظكم جميعاا والله غير فرحتوني برردودكم و اقترحاتكم

البارح زدتلها الما مع شوية ما زهر وكملت عبر النشاء معاها وخليتها على 1 تاع الليل ورحت عند جارنا كان مريض قعدنا حتى قريب السحور وليت ليها لقيتها مليحة مش كيما موالف تعاوني فالخدمة بصح لباس بيها
وخدمتها وطابت والحمد لله مصورتهااش بصح كي نحيها من البلا نصورها لكم بااه تشووفو بقلالاوة الي دتلي المشااكل
والله غير بغيت نعاودها اليوم بصح عندنا صدااقة منا على سااعة نبدا نطيب وعلابالي منريحلهااش

سلااااااااااامي الحار ليكم وصح رمضاانكم

biba-lola

2013-08-04, 14:21

الحمد لله الخلعة اكتر حسيت روحي في بلاستك

sara-89

2013-08-04, 14:34

هههه مرسي يااقموورة وانا هذا وين ولاتلي رووح منقبلش حاجة تخسرلي وسيرتو من التعليقات ههههههههههه