ضيق في صدري

[مشكلتي]

السلام عليكم.مشكلتي هي زوجة والدي ربي يهديها من نهار جات للدار نحسها كارهتني و باغضتني دون سبب.انا راني فتاة عندي 20 سنة و اخي 24 سنة كمل دراسته توفات امنا الله يرحمها و الوالد عاود الزواج.كي تكون هي متخاصمة مع الوالد ديما نبادر باه نصلح بيناتهم و كي تشوفني انا مشني متفاهمة مع الوالد تقولي وش راحلك فيه خلي يغضب على روحو. اعوذ بالله من عقوق الوالدين.راهي مادية جدا جدا تموت على الدراهم.كي تشوف الوالد عطانا مصروفنا ميعجبهاش الحال.في الشهر الفضيل و تعمل فيا المنكر.تخيلو طيب الماكلة ماصطة بالعاني باه الوالد متعجبوش الماكلة و انا لي نحصل في الطبخ و هكذاك كان رمضان كامل انا لي نطيب و نغسل ونقدي و نمسح و نقول معليهش على وجه الوالد و خويا العزيز.الحمد لله علمتني امي علمتني كلش الله يرحمها. تخيلو وش تقولي؟؟؟تقولي لبنات لي طلعو للجامعة كل عملوا صديق غير انت.كوني شاطرة و اعملي واحد انت تاني.ربي يسترنا انا كان جيت عيني نعمل مش حتى تقولي هي ولا نشاورها و لكن نخاف ربي العالي.حتى المصروف لي مدهولي والدي مستكثراتو عليا.تقولو مدلها 10 الاف تكفيها في اليوم. وانا نقرا في جامعة بعيدة على الدار 35 كلم.متخافش تروح عليا الحافلة تع النقل الجامعي نحصل.خاطر ال10 الاف ماتكفيش باه نرجع للدار.حتى خالاتي كي نحكيلهم ميصدقونيش يقولولي مزال ما والفتيش برك.قررت نروح عند وحدة من خالاتي لكن ترددت مش كي دارنا مش كي دار زوج الخالة ولا وش رايكم؟؟ حتى الوالد مبقاش معانا كيما زمان تبدل.والله نهار ماقستها ولا عايبتها متربيتش وديما انا لي نتنازل و نقول معليهش هي كبيرة و انا صغيرة.ديما نقول درك ربي يرزقني بزوج صالح يعوضني و يهنيني.راني صابرة.غير الوالد و خويا العزيز يكونو مهنيين برك.ضاق صدري حبيت نحكيلكم ربي يعافينا و يعطينا طولة البال و الحمد لله في كل الاحوال.شكرا لتفاعلكم

[امة الله نور]

السلام عليكم اختي
انا ننصحك نصيحة اختك كبيرة عليك
اقعدي في داركم يماك ماتت و خلاتك فيها اقعدي في داركم متروحي لحتى مكان حتى لعند خالتك متروحيش تبقاي بنت الناس مشي بنتها و مهما رايحة تعاملك خالتك رايحة تحسي بالنقص احسن حاجة بيتكم عيشي فيه كيما يكتبلك ربي بحلوها و بمرها رايح يجي يوم و
يفتح عليك ربي و تكملي دراستك و تتحصلي على عمل او على زوج صالح
بالنسة لزوجة الاب حاولي تكسبيها و تكسبي ودها مثلا و ما تلوميش على باباك طيعيه مهما يدير فيكم
يبقى باباك بالنهاية
وانا ندعيلك من كل قلبي يسرلك امورك كوني بنت طيبة و صالحة متخليش الناس يضحكو عليك باه في يوم من الايام رايحة الناس تقول يماها ماتت وخلات امراة ونص موراها
موفقة في حياتك ان شاء الله

[leila ben]

ديري ربي في قلبك ومتعمريش راسك بزاف كملي قرايتك وبإذن الله تلقاي خدمة ويجي مكتوبك تتزوجي وتتهناي
والله اللي تحكيلو شوية يحكيلك ماكثر لدرجة أنك تستغفري ربي وتقولي مرانيش كامل صابرة أقعدي في دار باباك سيي معاهم غير بالضرافة والملاحة وإن شاء الله تكسبيهم وإذا ملقيتيش إستجابة أخدمي شغلك وتهلاي في قرايتك وخلي الباقي على ربي .
ربي يفرج عليك ويرزقك الزوج الصالح

[spremshoot]

ربي يرحم الوالدة الكريمة و يسكنها فسيح جنانه و يلهمكم الصبر و السلوان
يا أختي شدي في مبادئك و ربي يقويك و يكون معاك و زوجة والدك ربي يهديها أكيد أنو مع المعاملة الطيبة من طرفك راح تحن و تلين
والله نعم التربية و حسن الخلق

[Angleeyes]

ربي يفرج عليك اختي اصبري وربي يجازيك خير إن شاء الله

[~رآقية بأخلآقي~]

لآ حول و لآ قوة إلا بالله،

وسعي بالك أختي الكريمة و ان شــآء الله ربي يفرج عليكم،

واحمدي ربي أنو مشكلتها جات غير في الماديات أفضل من أنها نكرتكم والا اصبحت تفتعل لكم في المشاكل،حالتك هــآته كاين اللي أسوأ منها بكثير و قصص زوجــآت الآباء مع ربائبهن كوااااارث راهي حاصلة،،المهم ديما تفكري يماك بالرحمة وكيما قلتي على وجه ربي أولا ووجه باباك وخوك ثانيا لازم تصبري و ان شاء الله بالوقت كي تشوفك نتي مش تكافي فيها رايحة تبدل المعاملة معاكم و ربي يهديها تفكري ديما كل شيء يفوت وربي يفرج عليكم ان شاء الله ^_^

[l'étoile]

الله يهديها في هذا الشهر الفضيل . ربي يفرج عليك اختي

[wiwi la blande]

rabi yfaradj aliik inch okhti rabi mafih rir el khiir

[أسير الطموح]

ربي يهديها

[Barcelone 4]

انا رجل لو كنت مكانك نطيعها و خلاص و لكن في حدود المعقول لانو راني ناكل في الخبزة ... فما بالك و انت بنت ؟ اذن ماذا بيك انتي تكوني عاقلة و تشكي همك للاب نتعك فقط من
دون الاحتكاك معها ... لانو باباك اذا كان راجل نتع الصح يسمع اهتماماتك و يقول للزوجة نتاعو بش تتهلى فيك و يفرض عليها هاد شي
اذا ماكانش باباك راجل نتع الصح انتي ما تخشنيش راسك و روحي معاه فلخط وكلي امرك ربي
حاولي تتقربي من زوجة ابوك بلاك فيها الخير لانو المظاهر خداعة احيانا الواحد يبان شرير و لكن قلبو بيض
والله اعلم

[محمد منير علي]

باينة بنت فاميليا الله يرحم اللي رباتك احتسبي أمرك لله وبري بوالدك وأدعي ربي يرزقك زوج حلال وتتهناي منها الله يهديها

[salah abdoune]

اصبري وربي يجازيك خير إن شاء الله

[djilani_soufi]

ربي يرحم الوالدة الكريمة التى أحسنت تربيتك أختي الكريمة ويسكنها فسيح جنانه
لا تقلقي أختي هذه المشاكل كثيرا ماتحتدث مع زوجة الأب
إصبري من أجل روح أمك الطاهرة من أجل أخوك من أجل الوالد ربي يخليهالك
ومتهزيش على الوالد ياسر أختي هو أكيد يبحث عن مصلحتك ومصلحة أخيك
ربي يرزق الزوج الصالح ويصلح حالك

[loufa]

ماشاءالله عليك ونعم التربية والاخلاق الله يرحمها عرفت تربي وانت باينة رزينة ربي يكملك بعقلك
اولا متخرجيش من دار باباك انتي الاصل فيها وزيد الناس حتى ويقومو بيك عمرك ماتلقاي راحتك
مرت باباك ربي يهديها عمرك متعطيها سرك وتعاملي معها برسمية ومتكثريش معاها انتي شابة الله يبارك يمكن تكملي قرايتك وتتزوجي وتتهناي لهذا خلي القدر بيناتكم وربي يهنيك

[أمة الله 12]

ربي معاك أختي, ماديريش في بالك خلاص, صحتك بالدنيا و ما فيها

والدتك, الله يرحمها و يوسع عليها, هم السابقون و نحن اللاحقون, ربي يلاقيك بيها في الجنة

مرت باباك, وكلي ربي برك, ردي بالك من هدرتها هاديك تاع ديري صاحب, باينة خلاص راهي حابة تفسدها خلاص بينك و بين باباك و

خوك, اقتليها بالقدر و ساعفيها على قد ما تقدري

و ابقي في داركم, تروحي وين تروحي ما كانش كي دارك

ان شاء ربي يبعثلك ولد الحلال اللي يفرحك و ينسيك اللي فات عليك الكل

صح فطورك

[wafa16]

هادي على حساب واش فهمت حيلية و حابة تفسد علاقتك بباباك و لما لا يطردك
لانها لما تتخاصمي معاه تقولك خليه يزعف باش تقعدو متعاديين
وتنصحك اديري صديق لوكان جيتي بنتها زعما تنصحك هكدا
راهي حاباتك اديري علاقة و هي اللولة اللي تبيع لباباك و تعمرو عليك
ما تخليلهاش الفرصة و حداري تحكيلها سرك و الا تفتحيلها قلبك
اما عن الشغل نقولك راكي في داركم ماعليش ما تحاسبيهاش دير كلي ماراهيش معاكم اخدمي شغلك و ما تقيميهاش باش ما تجيبيش المشاكل لروحك مع باباك
و حداري تخرجي من داركم لانو ديار الناس مايرفدوش اقعدي في داركم حتى يجي مكتوبك

[رحاب الجندي]

ربنا يرزقك بزوج صالح عاجلا وليس آجلا يعوضك عن كل حزن عشتيه يا رب, وأنت كمان ادعيلي, وربنا يسعدك ويفرج كربك يا رب.

[ولد حمد الباتني]

ان بعد العسر يسر
ولا حاولي اتكلمي وحدك مع باباك وفهميه مليح وفرغي قلبك لعل الله يحدث امرا

[hakeem]

هذ المشكل موجود دائما و أسبابه كثيبرة و عميقة و النتيجة في أغلب الحالات ان النساء ما يتعاشروش بيناتهم و إتفاقاتهم في أغلب الحالات تكون مؤقتة لمصلحة آنية ما و تتحول إلى عداوة مباشرة بعد غنتهاء المصلحة و لا دواء لهذا المشكل إلا بالإفتراق و حتى إن تغيرت زوجة والدك و تزوج غيرها فإن المشكل سوف يعود

[zaki4]

اصبريييييييييييييييييييييييييييي احتاه وادعي الله ان يهديها

[mimi jiji]

ربي يفرج عليك اقعدي في دارك دار باباك ماتروحي حتى لبلاصا بانسبة لمرت باباك سايريها واديها على قد عقلها يجي النهار اللي تروحي فيه وتستقري اصبري برك ماكانش واحد في الدنيا هاذي مرتاااح100بال100 كل واحد وكيفاه المشكل تاعو اصبري برك ماهو الا ابتلاء وامتحان