الزواج ولا الباك

[مشكلتي]

الســــــلام عليــــــكم و رحـــــــمة اللـــــه تعالى

ما قصدتكم هنا حتى خلاص ما قدرتش نزيد راني في حالة نفسية منهارة عيييت و سبابي الباك ديالي جوزت الباك هاد العام و بعد شقاء و تعب كبير و ليالي لي سهرتهم ما يعلم بيهم غير ربي و في الاخير ما نجحتش لحد الان دمعتي ما نشفتش
ما نكدبش عليكم باش نقدر نعاودو مستحيل كل من حولي يقولولي عاوديه و مازالكي صغيرة و جيبيه او او او .......راكم تعرفو لكن انا خلاص كرهت باش نقدر نزيد نولي لليسي نقرى و نعاود عام بكمالو ما نقدرش و التخمام لي راه يدور ي راسي خلاص نقعد في الدار و نتزوج هكدا راني نخمم لكن ما لقيتش شكون لي نقولو واش راه في راسي و ينصحني يقولي ايلا معي حق و لا لالا راني حابة نستقر مع ولد الحلال لي جا المهم زوج صالح و انتم واش رايكم لاني ما نقدرش نقول لدارنا هكدا علابالي لي ما يتفهموش واش راني نمر بيه و يفهمو حاجة واحدة اخرى ويلا نصحوني ينصحوني بطريقة تاع راني ناوية على جريمة لهدا قصجتكم ارجوكم انصحوني باغية نتفنع يا راني في صواب يا راني خاطئة

السلام عليكم

[/زهرة عصفور الجنة/]

اختي لم اتحصل على شهادة البكالوريا حتى اعدتها 3 مرات وعزمت ان اعيد اجتياز الامتحان حتى انجح
نصيحتي اعديه كمترشحة حرة وربي ينجحك ان شاء الله

[imene12]

أخي تحصل على شهادة الباكالوريا بعد 11 محاولة .. و أختي تحصلت عليها بعد 4 محاولات .. لا تيأسي و لا تجعلي الياس يعرف طريقه إلى قلبك إذا كان النجاح هو حلمك.
أما إذا إقتنعت بأن الزواج أفضل لك و أنت طبعا أدرى منا بما يناسبك فأخبري والدتك أو أختك بقرارك... و لو أني أفضل أن تظفري بالزوج الصالح إذا تقدم لك و تعيدي البكالوريا مرة أخرى .
لا تتخذي قراراتك المصيرية في حالة نفسية سيئة ... إنتظري حتى تهذأ نفسيتك و تستقر و من بعد يرحمها ربي.

[kaderkader1541]

لي أخت كحالتك
اجتازت البكالوريا لعامها الاول و رسبت فما كانت نصيحتي لها
سوى انها تمكث في البيت
بعدها بعام تزوجت و هي الان في بيتها مع اولادها ما شاء الله عليها
صدقيني حتى لو نجحت كانت ستبقى في البيت
نصيحتي ان تمكثي في البيت و حافظي على نفسك و سيأتي الخطاب لا محال
و أقبلي بالذي يخاف الله فيك

[بسمة تحدي]

اختي لماذا كل هذا اليأس؟؟؟؟

اين ايمانك بالله عزوجل اين توكلك على الله

يعني كي منجحتيش فالباك خلاص نهاية العالم لالا يا اختي راكي خالطة بزاف

واذا كان هذا ابتلاء من عند ربي سبحانو ؟ لازم تحمديه وتشكريه لانه انعم عليك بنعم كثيرة اخرى

امسحي دموعك يا اختي وقولي الحمد الله على كل حال

وتخذي بالاسباب وربي يوفقك مرة اخرى

اكثري من الدعاااء وخاصة رنا في ايام مباركة

ربي يقدملك الخير ان شاء الله

[abdelhamid24]

المؤمن القوي خير من المؤمن الضعيف

قمة المجد ليست في عدم الإخفاق والفشل
بل في القيام بعد كل عثرة
**نيلسون مانديلا**
يا أختي ما شي من الباك تستلمي و تقولي هنا النهاية.
لازم تكوني قوية ..تفكري واش عندك: صحتك.. عافيتك ..والديك قدامك ...أهلك ..سنك الصغير ... ما تقدريش تعرفي واش عندك حتى يروح عليك.
المشكلة أننا نحط كل قوتنا وارادتنا في الباك ونتوقع النجاح دون افتراض الفشل و في الاخير قد تكتب الخسارة وتحدث الصدمة .
الانسان اللبيب لا يضع كل ثروته و عصارة حياته في حساب بنكي واحد.و المقصود ما تربطش مصيرك أي سعادتك وحزنك بشيءواحد قد يكون اقل منك.
الدنيا ماشي غير باك والا زواج والا عمل والا...
لازم تقتنعي بلي الباك مكنوب و الزواج ثاني مكتوب و عليه لازم تواجهي مشكلة الخسارة وما يهمكش نظرة الناس قاع خسرنا وعاودنا ماشي غير الباك .كاين لي عاود حياتو كامل .المهم أنو فاق وشاف لروحوا ماشي للناس .
مواجهة المشكل هي الحل ماشي الهروب منها. باش ما تبقايش غير عند الباك والزواج .........
نفسك أثمن من ان تضيعيها بين الحزن والندم .....
صح فطوركم

[حواء نادين]

استخيري اختي.............. انصحك باجتياز الباكالوريا مرة اخرى....... ستندمين ان ضيعتي دراستك.. انت تفكرين في حالة يأس سرعان ما تزول..................

[جلة نور]

اختي ما تروحيش بعيد وتقولي ما نيش قادرة نقرا بالعكس وش رح ينفعك اكتر من قرايتك
انا رح نجوز العام الجاي الباك واذا ربي ما كتبليش نديه رح نقعد نعاودو مرة وزوج وثلاثة وعشرة تاني هدا مستقبلك لازم تامني على روحك ويكون عندك على الاقل الباك منبعد ولد الحلال كي يجي راكي تزوجي واذا ربي ما كتبلش الزواج وش راح ديري رح تقعدي في داركم هوما اللي يصرفوا عليك ولوقتاش انتي حطي في بالك باللي في هاد الدنيا كلشي بالمكتوب يمكن تزوجي ممكن لالا ممكن تدي الباك ممكن تاني لالا مي انتي ديري وش تقدري وخلي الباقي على ربي

ربي يوفقك

[(الانسان الوفي)]

السلام عليكم ...والله أصبحت لا أفهم هذا المجتمع ...الشاب الذي مصيره بالبكالوريا لا يبكي ولا يحزن والفتاة التي في النهاية مكانها بيت وزوج تبكي وتنوح ...لا أعرف أختي ان كان بكائك على البكالوريا او الزواج ...طبعا ان جاء الزوج فأرمي كل شيء وراء ظهرك ...أما ان لم يطرق الباب أحد فأعيدي البكالوريا ...بل بالعكس الذي يعيد أحسن ..لأنه يصبح ذا تجربة ويهضم البرنامج جيدا وبدلا أن تنجحي بمعدل ضعيف هذا العام تنجحي بمعدل كبير العام القادم ....شكرا

[السي محمد]

انا ثاني فوت الباك و ما نجحتش العام الاول

و عاودت و نجحت

و لما وصلت للجامعة قريت عامين و خرجت بسبب ظروف


و انقطعت عامين عن الدراسة

ثم رجعت و بديت من الصفر

و تخرجت بشهادة ماستر الحمد لله

لازم تكون عندك إرادة و ثقة في الله

=================

تفكيرك في الزواج هو هروب من مواجهة المشكل و الحياة

يعني تهربي من فشل البكالوريا للزواج

مع انه لم يتقدم لك اي شاب؟؟؟؟

يعني عقلك برك راه يهرب من الباك للزواج حتى تريحي نفسك

انا ننصحك تعاودي و تقراي و إذا جا وليد الحلال مرحبا بيه

[شَمعة أملْ]

لي أخت كحالتك
اجتازت البكالوريا لعامها الاول و رسبت فما كانت نصيحتي لها
سوى انها تمكث في البيت
بعدها بعام تزوجت و هي الان في بيتها مع اولادها ما شاء الله عليها
صدقيني حتى لو نجحت كانت ستبقى في البيت
نصيحتي ان تمكثي في البيت و حافظي على نفسك و سيأتي الخطاب لا محال
و أقبلي بالذي يخاف الله فيك


بارك الله فيك
لكن ما قصدك؟؟؟

[شَمعة أملْ]

أخي تحصل على شهادة الباكالوريا بعد 11 محاولة .. و أختي تحصلت عليها بعد 4 محاولات .. لا تيأسي و لا تجعلي الياس يعرف طريقه إلى قلبك إذا كان النجاح هو حلمك.
أما إذا إقتنعت بأن الزواج أفضل لك و أنت طبعا أدرى منا بما يناسبك فأخبري والدتك أو أختك بقرارك... و لو أني أفضل أن تظفري بالزوج الصالح إذا تقدم لك و تعيدي البكالوريا مرة أخرى .
ماشاء الله تبارك الله
عندما يمتزج الامل مع العزيمة و الاصرار
نحقق المحال
اؤيدكي في كل قلته
بالتوفيق

[khawlita.dz]

الســــــلام عليــــــكم و رحـــــــمة اللـــــه تعالى

ما قصدتكم هنا حتى خلاص ما قدرتش نزيد راني في حالة نفسية منهارة عيييت و سبابي الباك ديالي جوزت الباك هاد العام و بعد شقاء و تعب كبير و ليالي لي سهرتهم ما يعلم بيهم غير ربي و في الاخير ما نجحتش لحد الان دمعتي ما نشفتش
ما نكدبش عليكم باش نقدر نعاودو مستحيل كل من حولي يقولولي عاوديه و مازالكي صغيرة و جيبيه او او او .......راكم تعرفو لكن انا خلاص كرهت باش نقدر نزيد نولي لليسي نقرى و نعاود عام بكمالو ما نقدرش و التخمام لي راه يدور ي راسي خلاص نقعد في الدار و نتزوج هكدا راني نخمم لكن ما لقيتش شكون لي نقولو واش راه في راسي و ينصحني يقولي ايلا معي حق و لا لالا راني حابة نستقر مع ولد الحلال لي جا المهم زوج صالح و انتم واش رايكم لاني ما نقدرش نقول لدارنا هكدا علابالي لي ما يتفهموش واش راني نمر بيه و يفهمو حاجة واحدة اخرى ويلا نصحوني ينصحوني بطريقة تاع راني ناوية على جريمة لهدا قصجتكم ارجوكم انصحوني باغية نتفنع يا راني في صواب يا راني خاطئة

السلام عليكم

يا اختى ما المشكلة معظم الطلبة و الطالبات يرسبون بالبكالوريا فيعيدون و يعيدون الى ان ينجحوا
ما كل هدا التشائم وارجح انها الصدمة فلما تزول ستفكريين بعقلك اكثر
اظن اعيدى و اعيدى حتى تنجحى فانت صغيرة و ماهو الا عام و تحققين حلمك و حلم اهلك و تنجحين انشاء الله و تكملين مسيرتك الدراسية
اما قولك اتجه للزواج فى هده السن الصغيرة فاظنه ليس بالحل وانما محاولة للهروب من الفشل او تعويضه ربما
لكن يبقى المصير مصيرك فان تقدم لك من ترضينه و تقبلينه فلك دلك وانما نصيحة لا تتركى دراستك ابدا فاضن ستندمين لا محالة
لكن ابدا لا تضعى شيئا مكان شىء ولا تخلطى الامور فالانسان يحتاج لبناء مستقبله لدراسته لزوجه لاهله لهواياته لدينه و كل بنصيب فلا اظن شىء يحل محل شىء
والداسة و النجاح مكتوب و الزواج مكتوب وكل ما يحدث لنا مكتوب
المهم بعد ان تهدئى و تتجاوزي قصة الفشل فكرى بعمق و اختارى ما يناسبك
بالتوفيق فى حياتك

[رُوح طِــஐـــفلة]

السلام عليكم اختي
عدم نجاحك فالبكالوريا ليس نهاية العالم .نعرف بزاف اشخاص ماجابوهش في العام الأول لكنهم الآن اطارات فالمجتمع
متكونيش ضعيفة للدرجة هاذي ,مجرد انك منجحتيش فالباك المرة الاولى خلاص فشلتي وقلتي مانعاودش ونتزوج ومنعرف واش
يا أختي توكلي على ربي وعاوديه مادام عندك فرصة تولي لليسي هاذي حاجة مليحة
والزواج نهار يتقدملك الانسان لي مكتبوهلك ربي راكي تتزوجي
وبالتوفيق

[Angleeyes]

هدا غير العام الاول!!!!و الله غير حسبتك عاودتيه 4 و 5 مرات،اختي مازالك صغيرة تقدري تزيدي تعاوديه نورمال و بالاك تديري حاجة و تندمي عليها لغدوة ماتلقاي غير قرايتك و شهادتك .

[اناناسة]

السلام عليكم ، الزواج يا اختي أمر ان لم يأتي اليوم سيأتي بالغد لكن الشهادة هي التي ان ذهبت فلا عوده لها شهادتك هي قيمتك و من ترفع رأسك ان دارت بيك الدنيا ذات يوم و لقيتي روحك وحدك لذا لا تنهزمي هكذا و حاولي جهدك ان لم يكن في البكالوريا ففي مجال اخر المهم ما تقعديش بدون دراسه ... صراحه لا احب حتى ان يقارن العلم بالزواج لكن مجتمعنا الله ينورو يشوف العلم حاجا زايده للمرأة و كأنها تخرج غير باش يجيها خاطب و كي خلاص تلقى واحد أيا تتخلى عن كل شيء و الله يؤسفني حال من هكذا يظنون :(

[AMINA.Z]

عقليتك دراري

مانجحتيش في الباك حبيتي تبطلي

هادي قراية و ما قدرتيش تكوني قد المسؤولية تاعها

كيفاه معولة ديري دار و تتحمل مسؤولية زواج

امالا المرة الاولى اللي يعيط فيها عليك راجلك تهزي حوايجك و ترجعي لداركم

كبري عقلك يا اختي

نعرف وحدا كانت من الممتازين هادي المرة الرابعة اللي تفوت و ما نجحت مالغري

القراية اللي تقراها غير ربي اللي عالم بيها

هاكاك و تبقى تعاود و بربي ان شاء الله تجيبو العام الجاي

كوني قوية و بركايك الزواج ماهوش ملاذ تهربي ليه

تعياي و تلقاي غير قرايتك

و الله نهدر و ننصح فيك من قلبي

[hana94]

السلام عليكم و رحمة الله و بركاته
اختي في الله اقول هذي الكلمات من قلبي فانا احس فيك لم يكن النجاح حليفي هذا العام و لكن ابدا لم اياس و لم افكر ابدا في ترك مقاعد الدراسة بعدما قرات حكمة لابن القيم **عاش الناس على مرادهم فهلكوا و اللهلو عاشوا على مراد الله لفلحو و نجحوا **صحيح انت مازلت شابة و صغيرة و على تحمل المسؤولية و عليك بالدراسة و تحصلي على الشهادة لتكوني باذن الله فردا في خدمة المجتمع ولكي ترفعي راس واديك واخوتك اجعلي هدفك واضحافي الحياة فالصخرة التي لاتقتلك تقويك
توكلي على اللهو التزمي بالصلاة و قراءة القران
عيدسعيد وان شاء الله سنفرحقريبا

[الوجہ البَشوش]

هذااا جهل
و فشل
وعدم الثقة بالنفس
يا أختي ما انت تودين فعله خطأ كبير و ستندمين عليه بعد فوات الأوان
انت في حالة نفسية صعبة معك حق و لكن لا تتهوري كي لا تندمي في وقت لا ينفع فيه الدم
عاودي الباك و اسهري و راجعي و حفظي لازم تكون عندك عزيمة و اصرار
+ يمكنك اعادته بالمراسلة وهذا احسن لك



ربي يكون معاااك

[نسيم الإيمان]

اختي انا عاودت الباك 3 مرات باه ديت
و قريت و تخرجت و راني مخطوبة
ماتستعجليش ان شاء الله ربي يجيبلك لي فيها خير
انا من رايي كملي قرايتك

[kmilya]

ختي وقتنا هذا لي معندوش نيفو يعفسوه مجتمعنا ميرحمش قرايتك وقرايتك وقرايتك ومبعد زواج ساهل ومكتوب ربي
والله عاودي العام ليامات يجريو كي والو معليش بلاك ربي يقدرهولك دجيبيه العام الجاي وبمعدل مليح ربي ينجحك ويرزقك بزوج صالح

[hakeem]

يا أختي بصراحة خصك غير تحطي الباك قدامك و تصليلو و تشهدي بيه ؟؟؟ ثم أحييني اليوم و أقتلني غدوا ...كاش ما جاك خطاب باش تهدري على الزواج ؟؟؟ اليوم امامك الدراسة تاعك أقراي و احمدي ربي على النعم الكثيرة التي انعم عليك بها و القرايا ماهيش غير الباك و اللي اداو الباك ما داروش بيه جناحتين ؟؟؟ نحن لا ندري وين راهو الخير و لا نعلم غن كان الباك خير ليك أو شر ؟؟؟ و ربما تدي الباك و تموتي في السنة الأولى ؟؟؟؟؟؟

أخطيك من كل هذ الحسابات و عيشي كل نهار في وقتو و إذا جاء الخير مرحبا بيه و لمعلوماتك الباك تم تضخيمه من طرف المجتمع و انت ضحية هذا التضخيم و يا ما قراو و ما إستفادو والو لا خدمة و لا فهامة

[أسير الطموح]

ربي يوفق ان شاء الله

[sara2012]

ماداميك تعبتي يااختي ماتخليش التعب نتاعك يروح فالباطل عاودي الباك نتاعك بربي انشاء الله رايحة تديه وماتخمميش في الزواج على خاطر راهم يزوجو ويندمو القراية هي الخيار عاود