يهددني بالقتل ماذا افعل ؟

[صرخة ألم]

السلام عليكم و رحمة الله و بركاته
دون مقدمات اخبركم قصتي و التي كنت سابقا وضعتها في قسم مشكلتي بعنوان حب ام انتقام و الللي هي
ابن جيرانا كان يظهرلي حبه منذ كنا في الابتدائي و كنت نرفضه لاني مستحيل نخمم في العلاقات يا لوكان مع واحد روحي فيه هو فهمها حقرة
كبرنا و بعث اخته باه يخطبنب وافقت لاني كانتش ضدو كشخص انما ضد العلاقة لكن هو تمتطل بالخطبة رسمي و حتى معايا كان غير طبيعي كل يوم بحال و لعدة اسباب انتهى اللي بينا خاصة انهم ماداروش حل رسمي و كل يوم حجة و عرفت اللي عندو علاقة قديمة مع جارة اخرى لينا يعني كان يكذب عليا او هكدا فهمت
وحتى هو في روحي مضطرب و ماهوش ملتزم انما خفيف بزاف و حساس من اي تصرف مني
المهم تفارقنا و كان يطلب السماح و نرفض حتى نحكي معاه لانو كان غير طبيعي حتى معايا
تخطبت بعد عامين لشخص آخر و ما كتبش المكتوب بطلنا هو سمع متأخر و رجعلي قالي ندمت و سامحيني و بيضي قلبك صدقتو و قبلت بيه رد عليا : كيما انتي تخطبتي انا خطبت اخرى و الايبوع المقبل عرسي كرد فعل مني قتلو راح تندم و حسبي الله و نعم الوكيل فيك و حتى انا راح ننسى و ندير حياتي
ثار جنوني و صار يقسم اني راح نخلص واش درت فيه عمري كامل (لاني حقرتو كي رفضتو من الاول) اقسم انو لليوم مازال يبحث على اللي كان خاطبني و راح يقتلو
و اقسم انو كل واحد يتقدملي راح يقتلو و يبعدو عليا في حين هو راح يتزوج
و بكل العبارات يبعثلي يقلي اقسم بالله راح ندير حاجة تندمك
هو في العسكر و هدا الاسبوع جاي و انا خايفة يعمل حاجة في واحد عزيز عليا مانيش خايفة على روحي
حاسة كلامو ماشي تهديد لانو فعلا صار مثل المجنون عندو حالة هستيريا كلامو نتاع واحد ماهوش في عقلو متخيل اني ليه وحدو .. و انو اول واحد حبني .. و لازم نبق ليه .. جن جنوني لاني تخطبت لغيرو مع انو ما كنتش معاه غير في خيالو
هو مفبرك قصة في مخو و مصدقها و يهدد و يقسم انو قلبو محروق و حياتو تدمرت بسبتي و لازم نخلص
واش ندير

[مشطوب]

أخبري

الجديد عنه ليتقي حذره

وغذا فعل شيئا ما

فالسجون بنيت لذلك النوع

خاصة انهفي العسكر

والله يفوتوه للمحكمة العسكرية يضرب حتان يكره

[جزايرية و أفتخر]

يا ربي
ربي يعينك و يبعده عنك
ماراح انساك بالدعاء يا اختي

[الباتنية 19]

لا اله الا الله محمد رسول الله
ما نقدر غير نقولك الدعاء وثم الدعاء ربي يحفظك ويسترك
يا ترحلو وتبدلو البلاصة يا تروحي تسكني عند خالتك ولا عمتك حتى يجي مكتوبك يا تعيشي معاه وتحمليه وبالاك يتبدل
ربي يهنيك يا رب

[Ouided]

أختي العزيزة قصتك خوفتني بزاف عليك ردي بالك وخبري أهلك بكل حاجة ولو كانت صغيرة هكذا ياخذو حذرهم وما تلقايهش كي يجي مهما كانت الأسباب ردي بالك تخرجي معاه والله راني خفت عليك خاطر غير في الشتاء لي فات عندنا في عنابة جار قتل جارتو كيف هكذا كانت مخطوبة ليه وبعد سنوات ما تقدم ما توخر ربطها وخلاها وهي حبت أدير الدار قاتلو دير حل رسمي ولا خليني نشوف حياتي فسخ الكلمة لي عطاها عليها جابلها ربي واحد خير منه بألف مرة ، واش دارها هو كي بقى أسبوع على حنتها تقرب من زوج بنات صحباتها راحولها قالولها نخرجو نحوسو شوية قبل ما تمشي عروس وتنساينا ، خرجوهالو من الدار هزها في طوموبيل لبلاصة ينشطو فيه ناس الفسق والعياذ بالله قتلها وجردها من ملابسها وكتب على جسمها بالسكين ناس يقولو كتب اسمها وعنوانها وناس يقولو حاجات أخرى الله أعلم ، المهم أختي لا تثقي في أي أحد وما تعمليش كيف هذي الطفلة سرها عند صحباتها لي خانوها أحكي للوالدة تيعك لخوك أو حت باباك مادام علاقتك بيه ما كانتش سر بينك بينو ولو كانت سر أحكي لأمك هي تلقالك حل أحنا هنا في المنتدى مهما نقولو وندبرو عليك ماشي كيما أهلك ونوصيك ونزيد نوصيك ردي بالك تخرجي معاه ، وربي يحفظك من كل سوء ولي نواه ليك ربي يجعله في نحره انشاء الله

[مواطنة جزائرية]

ربي يستر عليك

والخوف غير من ربي الحاجة اللي كاتبتلك هي اللي تصيبك

المهم عليك بالحدر منه

ونزيد نقلك اللي كيفو أولئك هم أضعف خلق الله لداك ديري ربي ديما في بالك

[صرخة ألم]

أخبري

الجديد عنه ليتقي حذره

وغذا فعل شيئا ما

فالسجون بنيت لذلك النوع

خاصة انهفي العسكر

والله يفوتوه للمحكمة العسكرية يضرب حتان يكره

شكرا اخي على الرد انا الثاني ما عندي بيه حتى علاقة و حتى هو الان مستقر و متزوج يعني هدا المجنون راح يبحث عليه من مدة طويلة و ماراحش يوصلو و المشكل يهدد بامور مبهمة
هو ماهامو لا سجن لا والو على قولو حياتو فضت نهار خليتو (يعتقد اني خليتو و بداتو ؟؟) يعني ما همو والو غير انو يدمرني باي طريقة

[صرخة ألم]

لا اله الا الله محمد رسول الله
ما نقدر غير نقولك الدعاء وثم الدعاء ربي يحفظك ويسترك
يا ترحلو وتبدلو البلاصة يا تروحي تسكني عند خالتك ولا عمتك حتى يجي مكتوبك يا تعيشي معاه وتحمليه وبالاك يتبدل
ربي يهنيك يا رب
حكاية نرحلو مستحيلة نعيش معاه بالاك يتبدل انا كنت موافقة عليه لكن طلع خاطب و الشهر المقبل عرسو
و حتى الثقة ماكانش و ماهوش حاب يكمل معايا لا حاب ينتقم و يبرد قلبو

[صرخة ألم]

أختي العزيزة قصتك خوفتني بزاف عليك ردي بالك وخبري أهلك بكل حاجة ولو كانت صغيرة هكذا ياخذو حذرهم وما تلقايهش كي يجي مهما كانت الأسباب ردي بالك تخرجي معاه والله راني خفت عليك خاطر غير في الشتاء لي فات عندنا في عنابة جار قتل جارتو كيف هكذا كانت مخطوبة ليه وبعد سنوات ما تقدم ما توخر ربطها وخلاها وهي حبت أدير الدار قاتلو دير حل رسمي ولا خليني نشوف حياتي فسخ الكلمة لي عطاها عليها جابلها ربي واحد خير منه بألف مرة ، واش دارها هو كي بقى أسبوع على حنتها تقرب من زوج بنات صحباتها راحولها قالولها نخرجو نحوسو شوية قبل ما تمشي عروس وتنساينا ، خرجوهالو من الدار هزها في طوموبيل لبلاصة ينشطو فيه ناس الفسق والعياذ بالله قتلها وجردها من ملابسها وكتب على جسمها بالسكين ناس يقولو كتب اسمها وعنوانها وناس يقولو حاجات أخرى الله أعلم ، المهم أختي لا تثقي في أي أحد وما تعمليش كيف هذي الطفلة سرها عند صحباتها لي خانوها أحكي للوالدة تيعك لخوك أو حت باباك مادام علاقتك بيه ما كانتش سر بينك بينو ولو كانت سر أحكي لأمك هي تلقالك حل أحنا هنا في المنتدى مهما نقولو وندبرو عليك ماشي كيما أهلك ونوصيك ونزيد نوصيك ردي بالك تخرجي معاه ، وربي يحفظك من كل سوء ولي نواه ليك ربي يجعله في نحره انشاء الله
هو فعلا مصر انو يشوفني و انا عمري ماخرجت معاه لا قبل لا درك اهلي صارو يخمو و خايفين عليا امي ما خبرتهاش مريضة و خاوتي الذكور خايفة عليهم لانو فعلا 24 ساعة متفرغلي و يقولي عندي غير انتي و لازم نبرد قلبي و مازالني نحبك و نموت عليك و مانيش متهني في حياتي و راح تخلصيها ؟؟؟

[صرخة ألم]

ربي يستر عليك

والخوف غير من ربي الحاجة اللي كاتبتلك هي اللي تصيبك

المهم عليك بالحدر منه

ونزيد نقلك اللي كيفو أولئك هم أضعف خلق الله لداك ديري ربي ديما في بالك

و نعم بالله فوضت امري لربي سبحانه ..

[صرخة ألم]

يا ربي
ربي يعينك و يبعده عنك
ماراح انساك بالدعاء يا اختي
آمين يا رب شكرا ليك

[sali-sali]

السلام عليكم
هدا وراه مخوفك...باين انتي راكي تبينيله انك خايفة منه وهو يستمتع بهدا

ماتحكيش معاه وين ماتلقايه بدلي طريقك
+ خبري داركم ولا اشكي بيه خاصة ادا عندك دليل رسائل ولا سجلي الهدرة نتاعه
وبلا خوووووووف

[souso30]

اختي راه غير يخوفك انا نعرف وحدة صرلها هكدا و كان يهددها باي واحد يزوجها لكن كان يكدب لانه خواف هي تزوجت وولدت بنت و راهي عايشة مليح لكن هي اخبرت ابوها و دهب عنده و وقفوه عند حده متخافيش من هد الكلب و انت لي غلطتي نخطبتي ليه و قبلتي بدها رخيص تتقلقو على زواج منيش عارفة علاش

[مريم الصابرة]

السلام عليكم اختي
ألوا لازم تكوني حذرة هذا مرض نفسي وقادر يدير واش قالك من رأي لو حكيتي مع اهلو وقومي بتحذير الشخص اللي راكي خايفة عليه لازم يكون يعرف وإنت لازم تخبري اهلك إنو يهدد فيك لازم توقفوه عند حدو لأنو محال تبقاي عايشة هكذا هو يتزوج ويعيش حياتو وإنت خايفة وقفيه عند حدو وهذا بتدخل اهلك وأهلو وخوفيه قوليلو نشكي بيك او باباك يدخل او خاوتك ما تخليهش يحس إنو حاكمك في يدو لازم تبينيلو ما تخافيش منو وإنك وصلتيها لأهلك وبعدي عليه قد ما تقدري ما تهدري معاه وما ترديش عليه وخلي اهلك يعرفو لازم يدخلو قبل ما يفوت الوقت ربي معاك

[نورسين سوف]

لا اله الا الله محمد رسول الله

[Angleeyes]

هذا الانسان مريض نفسيا ردي بالك منو

[imene12]

شوفي يا أختي ... أكاد ن أجزم لك أن هذا الشخص جــبــــــــــان و لن يفعل شيئا .. فقط هو يدري تماما أن لا علم لأهلك بتهديداته لذلك تمادى و تلذذ بها..
أو لست على إتصال به؟؟ إذا كيف تأتيك كل هذه التهديدات؟؟ هل تتحدثين معه في الهاتف؟؟ أم تلتقين به خارجا؟؟ و إلا من أين تسمعين تهديداته؟؟؟ بففففففففففف
إقطعي كل إتصالاتك به و لا تعيريه إهتماما... لأنه يتلذذ بإرعابك حتى تبقي على إتصال به.. إمحيه من رأسك و كأنك لا تعرفيه و لم تريه أبدا... و إذا ما جاءك منه أي تهديد فورا تروحي انت و والدك او اخوك للشرطة و تبلغي عليه صدقيني راح يهرب زي الفأر و راح يعرف بللي تمثيليتو خلااااااص كملت.
المهم بالاكي تزيدي تسمعيلو بالاكي راه غير يخوووووف فيك و يستمتع بالشئ هذا ... يعني هدفه الوحيد و متعته كي يشوفك خااااااايفة و مرعوووووبة. احكي للوالدة باش تكون على علم .

أنا شخصيا صرالي موقف مشابه مع واحد يخدم معايا .. ما كان بيني و بينو واااااااااالو و هو كي المهبول .. تخيلي انا مخطوبة لغيرو و هو يقول في الخدمة راهي خطيبتي... قريب عام و هو مجنني .. يتبعني كي نخرج ... يعطلي و ما نعرف منين جاب رقم هاتفي.. لي ميساح نتاع الحب .. أنا خفت لا يسمع خطيبي و تولي مصيبة نتاع مشاكل و الله خفت يقتلو .. و أنا كنت نهدر معاه بالعقلية و نقولو اتقي مولاك روح أخطاني راني مخطوبةو هو غير انتي لي نديك؟؟ تخيلي .. كي خممت مع روحي قلت أنا علاه راني خايقة منو و مخبية على خاوتي؟؟ ياخي مابيني و بينو والو؟ خبرت خويا الكبير و وريتلو لي ميساج و قتلو على كلش .....راحلو مرمدوووووو هو اللي فرالي المشكل و الله ما زاد دار بيا و عاد قريب يبكي لخويا يقولو غير اسمحلي مانزيدش نعاود ههههه ... الان في الخدمة كي يشوفني يبدل الطريق.


خلي الجراثيم هاذو يعرفو بللي عندنا الرجال اللي تضرب علينا

[قَاسِمٌ.قَاسِم]

سلام عليكم
لا تلتفتي ولا تسمعي ولا تخافي
هذا مجرّد حشرة هل تظنّين أن القتل سهل إلى هذه الدّرجة
ثم إنه عامل بالجيش ولو سمع مسؤولوه في الثكنة لفصل من ساعته
والله حشرات..

[أمة الرحمان رقيّة]

السلام عليكم و رحمة الله و بركاته

ربي يعاونك أختي
خبري الشرطة و ماتسنّايش
كاين ناس ما تخافش ربي
هذا باين انسان مجنون او مريض نفسيا يعاني من الشعور بالنقص
لازمك تلقاي حل , معندكش باباك خاوتك او عمومك يدافعو عليك؟

[khawlita.dz]

السلام عليكم و رحمة الله و بركاته
دون مقدمات اخبركم قصتي و التي كنت سابقا وضعتها في قسم مشكلتي بعنوان حب ام انتقام و الللي هي
ابن جيرانا كان يظهرلي حبه منذ كنا في الابتدائي و كنت نرفضه لاني مستحيل نخمم في العلاقات يا لوكان مع واحد روحي فيه هو فهمها حقرة
كبرنا و بعث اخته باه يخطبنب وافقت لاني كانتش ضدو كشخص انما ضد العلاقة لكن هو تمتطل بالخطبة رسمي و حتى معايا كان غير طبيعي كل يوم بحال و لعدة اسباب انتهى اللي بينا خاصة انهم ماداروش حل رسمي و كل يوم حجة و عرفت اللي عندو علاقة قديمة مع جارة اخرى لينا يعني كان يكذب عليا او هكدا فهمت
وحتى هو في روحي مضطرب و ماهوش ملتزم انما خفيف بزاف و حساس من اي تصرف مني
المهم تفارقنا و كان يطلب السماح و نرفض حتى نحكي معاه لانو كان غير طبيعي حتى معايا
تخطبت بعد عامين لشخص آخر و ما كتبش المكتوب بطلنا هو سمع متأخر و رجعلي قالي ندمت و سامحيني و بيضي قلبك صدقتو و قبلت بيه رد عليا : كيما انتي تخطبتي انا خطبت اخرى و الايبوع المقبل عرسي كرد فعل مني قتلو راح تندم و حسبي الله و نعم الوكيل فيك و حتى انا راح ننسى و ندير حياتي
ثار جنوني و صار يقسم اني راح نخلص واش درت فيه عمري كامل (لاني حقرتو كي رفضتو من الاول) اقسم انو لليوم مازال يبحث على اللي كان خاطبني و راح يقتلو
و اقسم انو كل واحد يتقدملي راح يقتلو و يبعدو عليا في حين هو راح يتزوج
و بكل العبارات يبعثلي يقلي اقسم بالله راح ندير حاجة تندمك
هو في العسكر و هدا الاسبوع جاي و انا خايفة يعمل حاجة في واحد عزيز عليا مانيش خايفة على روحي
حاسة كلامو ماشي تهديد لانو فعلا صار مثل المجنون عندو حالة هستيريا كلامو نتاع واحد ماهوش في عقلو متخيل اني ليه وحدو .. و انو اول واحد حبني .. و لازم نبق ليه .. جن جنوني لاني تخطبت لغيرو مع انو ما كنتش معاه غير في خيالو
هو مفبرك قصة في مخو و مصدقها و يهدد و يقسم انو قلبو محروق و حياتو تدمرت بسبتي و لازم نخلص
واش ندير


احتاطى اختى و اخبرى اهلك
ويمكنك التبليغ عنه بالتهديد حتى ان اصابك شىء يعاقب عليه من جهة ومن جهة اخرى يدير حسابو
الله يستر عليك

[~~ أغيلاس ~~]

السلام عليكم،

رانا في رمضان بصح حبستيلي مخي،

ملقيت وش نقلك،

غبية و لا خوافة و لا جايحة ؟

بدون نقاش و بدون كلام،

خبري يماك و خريها تخبر خاوتك و باباه يروحو يهددوه و إذا حل فمو يشبعوه عصا،

إذا ما عندكش خاوتك كبار و باباك شيخ كبير شوفي كاش ولاد عمك و لا خالك، خوالك و لا عمومك،

( لكن خاوتك و باباك أفضل )،

و مباشرة تقدمي مع باباك للشرطة خبريهم بأنه هددكم بالقتل،

ـــــــــــــــــــــــــ

و بعدها شوفي النتائج،

و شوفي هاذ الصرصور كيفاش يولي،

ــــــــــــــــــــــــــــــــــــ

اسمحيلي بصح حبستيلي مخي،

بنات آخر زمن،

يطَلْعُو و يْهَبْطُو و حدهم شغل ما عندهم لا إخوة لا أب لا عائلة،

بففففففففففففف،

ربي كيما فرض الولي في زواج البنت فيها حكمة، المرأة مهما تعاملت مع الرجال إلا أنها لن تعرف عقليتهم كما يعرفها الرجال،

خلي المسألة بين الرجال و اقعدي في دار باباك مهنية،

تستاهلي طريحة لأنك مخبرتيش رجال عائلتك و الشرطة،

تخلي صرصور يخوفك ؟

اصلا بعض الفتيات يخفن من الصراصير،

فإذا لا عجب،

ــــــــــــــــــــــــــــــــــ

صحا فطورك،

رمضان كريم .

[مناد بوفلجة]

أستغرب في قصتك كثيرا

تتحدثين و كأنك الوحيدة في عائلتك

أليس لك إخوة ، والد ، أعمام ، أخوال ، أبناء عم
أقارب رجاااال

أليس لك أحد تلجئين له لتحكي له قصتك و يتحدثون مع ذلك المريض النفسي

تأكدي بأنه لن يقوم بأي عمل

هو مثل الطرطور كثير الكلام و التهديد و الوعيد .. فقط

[Ouided]

هو فعلا مصر انو يشوفني و انا عمري ماخرجت معاه لا قبل لا درك اهلي صارو يخمو و خايفين عليا امي ما خبرتهاش مريضة و خاوتي الذكور خايفة عليهم لانو فعلا 24 ساعة متفرغلي و يقولي عندي غير انتي و لازم نبرد قلبي و مازالني نحبك و نموت عليك و مانيش متهني في حياتي و راح تخلصيها ؟؟؟

أختي إذا كان عندك أس أم أس ولا لابال تيعو ولا هددك قدام شهود روحي قدمي بيه شكوى وخليه يمضي على محضر عدم التعرض لك هذا هو الحل لي يحميك ويحمي عيلتك خاصة خاوتك الرجال باه ما يجرش عليهم هذا المجنون

[loufa]

حل وحيد اخبري اهلك بكل شيء يديرولو جماعة يوقفوه عند حدو
هو عايش حياتو وانتي رايحة تمرضي في جالو زيد ماعندو مايديرلك اذا عرف بانك عندك كتاف اللي هما اهلك والا يشكيو بيه عند الشرطة ويكفيه هذا لانو عسكري
ربي يفرج عليك

[z.abdo]

اين اخوتك او والدك من القصة ؟؟؟؟؟

لو تقدمي شكوى للدرك الوطني عن فكرة التهديد والله ما يزيدوز يسمعو خبرو

لكن اذا تساهلتي معه سينفذ ما يقول اختي .........قدمي شكوى وهناك رجال امن يعملو عملهم

[محمد...عبد النور]

اختي الكريمة لي عتاب عليك فاسمعيه
انت تقولين راه يهدد فيك و يقول و يقول و و و و و
اذن ما زلتي في علاقة معه او لازتي على اتصال معه لحد الساعة
انصحك لا تكلميه
بدلي شريحة هاتفك نهائيا
ان كان هو يهدد و يريد بك الشر ففي السماء رب اقدر عليه و على كل الخلق فلما الخوف
امر اخر .....اذا كان عندك دليل على التهديد اي دليل مادي .........ابعثي من يقول له اما تبعد عليا او اشكوك الى الشرطة .........و الله اذا كان مجنون يستعقل لان الخبزة نتاعه تولي في اللعب و ما نظنش يستطيع يلعب بعمله لانه عسكري
المهم المشكل فيك ما زلتي تصدقيه و تاركة له مجال ليتصل بك
ربي يرزقك من بابه الواسع و يهدينا و يهديك
ســـــــــــــــــــــــــــــــــلام

[حكاية منسية]

اشكي بيه
و قولي للعائلة ديالك

[الملهمة]

شوفي يا اختي ربي يحفظك منو اولا وثانيا ماتزيديش تحكي معاه وتقيميه وديري بانو مراهش في هاذ الدنيا خلاص وكملي حياتك عادي وهو ماعندو مايدير ماتبينيلوش خايفة منو وخرجيه من حياتك وقوليلو الي تقدر عليه ديرو ...... هكذا تتحرري منو وتعيشي حياتك

[hakeem]

كون إحترمت أهلك و ولي أمرك من الاول ما تدخليش في لعب اطفال
تهديداتو ليك خطراش انت إمراة و إذا راهو راجل يروح يهدر مع باباك و ألا هذا اللي خطبك

أغلقي كل أبواب الإتصال معه حتى لن يجد طريقة ليبعث تهديداته الجايحة التي لا يستعملها إلا معك خطراش علابالو بيك خوافة ما تقدري أديري والو و عدا التهديدات فإعلمي أنه لن يفعل أي شيء ...

[thawizat]

يا أختي يقال أنّ الكلب الذي ينبح كثيراً لا يعضّ، هو فقط يستغل ضعفك و خوفك
هذا جبان لن يفعل شيئا
أنت برك قيمتيه أكثر من اللازم
اقطعي علاقتك به و ما عندك ما تزيدي معاه و إذا مازال يهدد أخبري رجال العائلة وهما يوقفوه عند حدو
قريبتي حدث لها ما حدث معك كان يريدها وهي رفضته فكان يهددها دائما و يتبعها لمكان الدراسة و هي لم تقل شيء لإخوتها لأنها خافت منه إلا أن وصل به الأمر أن ضربها في الشارع
هنالك أخبرت اخوتها والله حطولو سعدو ف يدوا
والأن ذلك الجبان الصرصور الطرطور كما سماه الاخوة لم يعد له أثر حتى أنه في الأيام الاولى هرب من المنزل

[hakeem]

واحد يهدد بالإنتحار و واحد بالقتل ... يلعبوها سبوعا قدام النساء برك بصح قدام الرجال كيما هوما أرانب

[samira135]

أوااااااااه راكي عطيتيلو قيمة كبيرة ياسر نورمالمو كامل ماتسمعيش لتهديداتو وزيد لي حاب يدير حاجة يديرها وهو ساكت مايبداش يكثر في الهدرة هذا باين جايح فيه غير الهدرة و حاب يخلعك وانتي اجيح منو مصدقاتيه ماتزيديش تهدري معاه و اذا قلقك كاين لابوليس بكف ينساك و ينسى اسمو ديجا باين ذري

[imane bela]

hada bayen khawaf 3la rohou lazem tbeynilou makich khayfa menou si nn yeb9a haka ykhawef fik
ana sahebti sralha kima enti wsel hata win drabha w khtefha b la voiture mais fi la fin khtebha w rahi 1tik m3ah berk hadi sahebti tellement kan yhabha hata 9rib hbel
takhdi rayi choufi papak w khawtek yewo9foulou psq hada ma nes3aw f had edenya gheir khawetna yewo9fou fi ktafna
rebi m3ak
♥

[هدايات26]

نفس الشئ واكثر ما حدث لفتاة في عائلتنا.هددها واقسم لها يمينا انها لن تكون لغيره تجرا

وضربها بعد ان ترصد لها امام العمل.ووقعت لها ازمة نفسية حادة وعند زيارة احدى صديقاتها لها

نصحتها بالرد على مكالماته وتسجيلها وفعلا طلبها مرة ليشبعها كلاما بذيئا وسبا وتهديد كعادته

فسجلت كل كلامه وتقدمت بشكوى ضده ومعها التسجيلات فحدث له ما لم يكن ينتظره اذ اوقف من

طرف رجال الشرطة واشبع ضربا وما كان له الى ان يتعهد بعدم التعرض اليها

انها تقسم انه منذ ذلك اليوم اصبح يغير الطريق اذا راها فيه .ارجو ان لا تخافي انت من شخص

ضعيف يستقوى على امراة .وصدقيني انه يستمد قوته من ضعفك وسكوتك على تصرفاته

فلا تدعيه يهزمك اخبري اهلك وخطيبك واوقفوه عند حده لكي يكون عبرة لغيره من مرضى

النفوس

[hakeem]

يسعى إلى إيصالك إلى مرحلة متقدمة من الخوف فترضخين لكل مطالبه و يجعل منك جارية له

سيدتي الفاضلة

اللي يلعبها واعر قدام النساء تجدينه اذل خلق ربي قدام الرجال
و لمعلوماتك القيام بأي تصرف يتطلب شجاعة فائقة إذ انه سوف يقف في مواجهتك و مواجهة السجن المؤبد و مواجهة اهله و مواجهة ضياع مستقبله و مواجهة من لا يعرفهم من رجال في عائلتك مواجهة العدالة و مواجهة خالقنا ....و هذا كله يتطلب شجاعة من رجل ما يبعثش أختو باش تشوفلو وحدة ؟؟؟؟

كون جاء راجل ما يستعملش اختو وسيلة للوصول لأغراض دنيئة ؟؟؟ و ما تعاوديش حاب يخطبك خطراش الخطبة ساهلة و عندها قواعدها و هو لم يظهر أي شيء من هذه القواعد و الإلتزامات

تعرفي كون يسمعو بيه زملائه في العسكر باللي يبعث اختو باش تشوفلو وحدة ........(ما نقلكش خير)

[imene12]

يسعى إلى إيصالك إلى مرحلة متقدمة من الخوف فترضخين لكل مطالبه و يجعل منك جارية له

سيدتي الفاضلة

اللي يلعبها واعر قدام النساء تجدينه اذل خلق ربي قدام الرجال
و لمعلوماتك القيام بأي تصرف يتطلب شجاعة فائقة إذ انه سوف يقف في مواجهتك و مواجهة السجن المؤبد و مواجهة اهله و مواجهة ضياع مستقبله و مواجهة من لا يعرفهم من رجال في عائلتك مواجهة العدالة و مواجهة خالقنا ....و هذا كله يتطلب شجاعة من رجل ما يبعثش أختو باش تشوفلو وحدة ؟؟؟؟

كون جاء راجل ما يستعملش اختو وسيلة للوصول لأغراض دنيئة ؟؟؟ و ما تعاوديش حاب يخطبك خطراش الخطبة ساهلة و عندها قواعدها و هو لم يظهر أي شيء من هذه القواعد و الإلتزامات

تعرفي كون يسمعو بيه زملائه في العسكر باللي يبعث اختو باش تشوفلو وحدة ........(ما نقلكش خير)

يـــــــرحـــــــم فـــــــــــمـــــــــــك :19:

[dz2727]

يا ربي
ربي يعينك و يبعده عنك
ماراح انساك بالدعاء يا اختي

[عبدالرحيم75]

السلام عليكم احتراماتي أختاه الكريمة
أما بعد
تأكدي بأن هذا النوع من أشباه الرجال قوتهم في ألسنتهم فقط نما يقدر يدير والو وراهو يخاف حتى من زوجته ،فقط هو ناقم عليك لأنك كنت حبه الاول على حسب زعمه ،وهي هيستيريا الثكنة والغربة و حكايته مع أصحابه الذين يتكلمون عن خطيباتهم وصديقاتهم فيما بينهم هو لا شئ يخطر على باله في الثكنة إلا انت لذلك جن جنونه تجاهك ،كما أنه لو تقفين امامه سوف لا يحرك ساكنا
وتبقى أختاه الكريمة الحيطة والحذر من شيم المسلم الكيس الفطن ( ربي ينصرك ويعينك ويهنيك )

[أسير الطموح]

هذو هوما الذكور اللي ملازمش يكونو في هاته الدنيا لا يتمتعون بذرة رجولة .... ربي يهديه و ربي يفرج همك ان شاء الله

[صرخة ألم]

السلام عليكم جميعا .. عيدكم مبارك و كل عام و انتم بألف خير
شكرا لكل كلمة قيلت بموضوعي انا فعلا عشت الرعب بسبب انو فعلا كان شبه مجنون هو رد فعلو معايا نفسو مع اهلو اقام الدنيا و عذبهم
المهم انا خبرت اهلي و سجلت كلامو و تهديدو و وقعتو بالكلام على اساس اللي ما كان بينا والو خوفا من يقول كاش ادعاءات يوم آخر
هو اقسم انو ماراح يتركني مهما صار و انا فوضت امري لربي سبحانه و لأهلي لانهم على علم بالموضوع من الاول

المهم اللي حبيتو نقولو شكرا لكل كلمة و و الله العظيم حسيت بكل كلمة لوم و ان كان فيها شيئ من القسوة بالعكس حسيتها خوف اخ على اخته و خوف اخت على اختها عدم ردي كان لظروف اقوى مني

جزاكم ربي كل خير و دعائي لكم في هذه الايام المباركو ان يبارك الله ايامهم و يرزقكم خير الدنيا و الآخرة

ربي يحفظكم كامل و مهما قلت ماراحش نوفيكم حقكم ..

[فافا مينوشة]

ختي شدي فربي
هو معندو ما يدير مادام ربي واهلك معاك متخميش ختي تفرا كي اليوم

[سنة4]

ربي يبعد عليك لبلا و الشر و يبعد عليك مثل هذا الناس ربي يفرج همك

[اريج الاخلاق]

اختي ماذا ساقول لك عجزت عن الكلام ولم اجد حلا
لكن الحل عند الله سبحانه
اختي ردي بالك وانا من رايي لو تخبري اخواتك وتقوليلهم خلي يوقف عند حده
فعلا عجزت راح نفكر وباذن الله نلقاو الحل
اسفة
تهلاي في نفسك مليح وتقربي لربي اكثر واكثر

[اريج الاخلاق]

اختي علاه ماتديش التسجيلات للبوليسيا
اكيد راح يلقولك حل
لكن ممكن يكون هذا الحل خطير ويزيلك المشاكل
ربي معاك وانا معاك
اختي علاه ماتبدلوش داركم لولاية اخرى وتتهني منو

[باك 2013]

أختي هذا مريض نفسي ادعي ربي يهديه ويحميك واقاربك منه