مهنة خطيبي

[مشكلتي]

السلام عليكم

انا فتاة مخطوبة لشاب قمة في الاخلاق و يحبني و نحبو

لكن مهنته دارتلي مشكل وين ما نروح يسقسوني واش يخدم راجلك نقولهم طباخ يبداو يسخرو مني

انا مكملة دراستي و قارية الحمد لله لكن هو ماحصلش حتى باكالوريا

لكن انا قابلة بيه ونحبو ومانلقاش كيفو

كيفاه ندير مع اهلي و الناس الي مرة على مرة يجبدولي الموضوع تاع طباخ

يقولولي كيفاه تدي طباخ مالقيتي غير هو وانت قارية و فاهمة وشابة و كلام لا معنى له

عاونوني كيفاه نير معاهم

[sweet sabrine]

يا أختى وشبيه الطباخ ياخي خدمة شريفة ويجيب قوتوا من عرق جبينوا ويقدر يعيشك نت وولادك مستقبلا
اما بالنسبة لفرق التعليم هدا مش مشكل خصوصا كي تكون المرأة هي لي قارية على الراجل نفرضوا راكي ديتي واحد عندوا دكتورة ونتوما ماشي متفاهمين ويكرهلك حياتك واش تديري بيه (وزيد يكون حاسب روحوا عليك )
أختى لكان بناتكم انجداب وتفاهم غير توكلي على ربي وبالبراكة انشاء الله

[samirovich]

ماتقوليلهمش طباخ
قوليلهم موظف في المطعم
المهم يجيب رزقه بالحلال
وقادر يصرف عليا

[nouna-or]

شوفي أختي الفايدة يكون تفاهم و انسجام و لعباد تاعنا ما يسكتوش و كي تجيهم فكرة في بالهم يروح المنطق والدين و القيم و قدما تفهميهم ما يحبوش يفهموا أقتليهم بالبارد و ما تبينيلهمش بلي تأثرت بكلاهم و كي يسقسيوك أعطيلهم إجابات ساخرة حتى يحبسوا و الله عن تجربة (قوليلهم مثلا باه نتهنى من الطياب و أضحكي)

[SKYALGERIA]

و هل مهنة الطباخ مهنة حرام ؟؟؟ اتقي الله و ساعدوا بعضكما بأن تقيما سنة الله و رسوله و تحفضا فروجكما .

[اصيل الشرق]

لهذه الاسباب ارتفعت نسبة العنوسة بالجزائر

[KHAWLA STAR]

ماتسمعيلهم خيتي خليهم يهدرو المهم نتوما تكونو متفاهمين مع بعض وراضيين ببعضاكم خلي هدرة الناس بعيد تعيشي

[أمة الله 12]

المهم انتي تاكدي من انه حقا قمة في الاخلاق و متدين و الباقي ما يهمكش

ما ديري والو في بالك, الهدرة راهي ببلاش,

بردي قلبك و خليهم يهدرو على راحتهم خلاص

[charoza]

الناس دائما هكدا كل شيى ينتقدوه انت اخترته لانك راضية بكل صفاته خاصة اخلاقه كملي المهم هو الهناء و الدنيا فانية كونى قوىة الشخصية

[مامارجاء2]

السلام عليكم و رحمته تعالى و بركاته
انا اقول خير الكلام ما قل ودل
و هو * لو كنت فعلا مقتنعة به لا تضعي هنا شيء يخصوك و تسمينه مشكلة لانك لو احببته لا تضعيه صوب مشكلة لك

[baalache]

راكي قولتيها اذا انت قارية وخليتي ناس اخرين يقررو في مكانك معناته شخصيتك ضعيفة جدا ثم رواحي نقولك نهار يديرو الحصص تاع الشيفان في لا تلي يتفرجوهم قاع هما وبناتهم وكي يجي واحد يخطب يبانلهم طباخ نفاق كبير والله ما فهمنا هد المجتمع

[السي محمد]

يعاونك في الطبخ هاذي نقطة ايجابية



انا متاكد انه يطبخ افضل من البنات اللي ينتقدوك

ربما لانهم غايرات ( الغيرة) منك


ياودي المهم راه خدّام و ياكل رزق حلال ....كاين آلاف الشباب يتمناو خدمتو يتعلموها

[nouna l maghbouna]

اذا انتي عاجبك و متفاهمين
هدرت الناس ماتسمعيهاش خلاص
الناس هذي هي خدمتهم

و كي يسقسيوك سمطيهم ماديريلهمش قيمة

ربي معاك

[faty05]

عندي اختي عندها ماجيستير
ديما تقولي انا ان شاء الله نزوج طباخ
اختي نقولك حاجة خطيبك تحبيه امالا حبيه كيما راه و كلام الناس بفففففففففف لوكان نتبعوه خلات
ربي يهنيك اختي

[charaf life]

السلام عليكم

انا فتاة مخطوبة لشاب قمة في الاخلاق و يحبني و نحبو

لكن مهنته دارتلي مشكل وين ما نروح يسقسوني واش يخدم راجلك نقولهم طباخ يبداو يسخرو مني

انا مكملة دراستي و قارية الحمد لله لكن هو ماحصلش حتى باكالوريا

لكن انا قابلة بيه ونحبو ومانلقاش كيفو

كيفاه ندير مع اهلي و الناس الي مرة على مرة يجبدولي الموضوع تاع طباخ

يقولولي كيفاه تدي طباخ مالقيتي غير هو وانت قارية و فاهمة وشابة و كلام لا معنى له

عاونوني كيفاه نير معاهم

لا تسمعي كلام ناس ...ارضاء الناس غاية لا تدرك

اصلا لازم يكون انسان متواضع في حياتوا ...رسول ص مهنته كان يربي ماشية .......ليس عيب هادو ناش غايرين منكم و حابين يفسدوا و متسمعيش ليهم مهم كي راه يخدم خدمة شريفة و يجيب بيها عرق جبينوا هاديك هيا

[Angleeyes]

شعب متخلف صح مستحيل هذا المجتمع يتحضر خلاص،اختي ماتديري على حتى واحد بالاك تفرطي فيه بويسك هو طباخ و لا راكي تولي جاهلة و متخلفة كيفهم المهم راه يكسب في خبزتو بالحلال ربي يهنيكم.

[بسمة تحدي]

وين راه العيب منيش نشوف حتى مشكل

[naamane3]

هذا الطباخ شكون راه يديه انت ام هم
هاذ الطباخ مدخوله حرام ام حلال
هذا الطباخ ذو خلق ودين ام لا
اخطيك من التفكير السلبي واخطيك من كلام الناس
وواحد ما يغرك ويقولك انت قارية وفاهمة ومقثفة
ما تديش طباخ القراية والفهامة وحدها والزواج وحدو
انت اديه واللي ما عجبوش الحال يروح ينفجر بعييييد
والله المستعان

[l'étoile]

عندي زميلة لي أستاذة و ما شاء الله و خطيبها طباخ ..نورمال .. ...........ماكانش حتى مشكل ياك انت مقتنعة بيه خلي الناس تهدر من الغيرة
قولتي عنو ناس ملاح اذن الغيرة هي مشكل هادوك الي يهدرو هكدا و بالكي تتوسوسي ....مهنته ماشي عيب و لا حرام ..... و الله يوفقك معاه

[nabi1 m]

ماتقوليلهمش طباخ

قوليلهم موظف في المطعم
المهم يجيب رزقه بالحلال
وقادر يصرف عليا

لا أوافقك الرأي لابد أن يكون ردك عليهم بفخر خصوصا أنه خلوق ويخاف الله.
للتذكير مهنة الأنبياء كانت الرعي وبها أمكن لهم قيادة الأمم..
ربي يباركلكم ...

[مريم سلمى الجزائرية]

السلام عليكم و رحمته تعالى و بركاته:
أختي الكريمة،أما عمل زوجك و هو الطبخ فإن كان بالحلال زكاه الله و باركه فهو كغيره من الأعمال البسيطة التي لا زال مجتمعنا المريض ينظر إليه نظرة دونية و الحال هذه أختي و حيث أن الموازين انقلبت فلا تنزلي منازل من لم تفتح المدارس و الجامعات و مدرسة الحياة عقولهم، و لا تجعلي ما مكنك الله من العلم يزحف تحت جهل هؤلاء هذا من جهة.
من جهة أخرى كم رأت عيني من أمثلة مشرفة تدمغ بالحق باطل ما يحاول الجاهلون تثبيته و لو أن كل واحدة رفضت زوجا متدينا و خلوقا لأنه يعمل سمكريا أو بناءا أو طباخا أو ............ لوجدت العنوسة و تبعاتها تلعب بهذا المجتمع.
اقتنعي أنت أولا بعمل خطيبك لأن ما فهمته أن رأي المجتمع قد زلزل رأيك أختي و ما عليك إلا أن تستخيري الله وافعلي ما تطمئن له نفسك و قبل هذا أرجو أن يكون ولي أمرك على علم بالقصة لأن بمقدوره أن يرى ما لا ترين أي أن يتأكد من دين و أخلاق هذا الخطيب.
و إذا ما وفقكما الله و تزوجتما كوني لزوجك السند وادفعيه إلى تكملة دراسته وارضي بما قسمه الله لك و لا تعيري اهتمامك لمجتمع غلبت عليه المادة فعمت الأبصار.
تقبلي أختي مروري و دعواتي لك بأن يسدد الله خطاك فيما يرضاه في الدنيا و الآخرة.

[maya bouharoun]

اول خطوة للنجاح ان تتعلمي كيف لا تتأثرين بكلام الناس لماذا تهنمين لرأيهم؟هل يهمهم رأيك ؟وليس كل حامل لشهادة مثقف و متخلق؟اذا بقيتي تسمعيلهم و تتاثري راح تدخل الفكرة في راسك و تشوفي روحك عليه هو بالاك احسن منك و مثقف عليك نقوللك حاجة انا خدمت مع دكاترة كاين فيهم لمليح باش ما نعممش و كاين فيهم لي ما يسواش بصلة حاط روحو حاجة كبيرة و يجري مور بناتو و هو متزوج في بالو مكانتو رايحة تخليه مرغوب من الجميع ارضاي بلي عطاك ربي ما تدري كيفاش يرزقو ممكن بحاجة ما تتوقعوهاش انا نعرف طبيبة راجلها خضار و رغم انها ناجحة ما قاتلوش بدل خدمتك و هو لانو شخصيتو قوية باقي فيها و مايتأثرش بالناس لي كامل يعيطولو راجل الطبيبة كذا لي يقلقك قوليلو خادم الناس سيدهم و لوكان جا خطبك واحد عندو دراهم بزاف و مصدرهم مشبوه لوكان راهم عاجبهم الحال انت وحدك ادرى بمصلحتك و جامي توصليلو واش يقولو حتى و كنت تشكيلو لانك راح تجرحيه و تحسسيه انو ناقص و ما تصريش عليه يكمل دراستو ادا ما حبش لانو راح يحسك حشمانة بيه ربي يهنيك

[imene12]

الله غالب هذا هو مجتمعنا يا لطيييييييف قداه و لينا تافهين و نهتمو غير بالمظاهر ... شوفي راح نحكيلك حكاية واقعية .. عندي بنت عمي قارية الله يبارك و خدامة ما شاء الله و متزوجة بواحد ماشي قاري خلااااااااااااص بصح خدام الله يبارك و خلوق الحمد لله .. هو يخدم جزار و كي يسقسوها راجلك واش يخدم تقولهم تاجر مواشي هههههه .. طي قلتلها علاه تقوليلهم هكذا قاتلي باش ما يكسروليش راسي .

[نبيلة المهبولة]

اختي مديريش على كلام الناس كل واحد ومكتوبو طباخ واش خصو المهم خدام واخلاق ديالو عالية مديريش عليهم

[luky]

طباخ مهنة شريفة جداااااا + راح تستفادي من فن الطبخ وتتذوقي احلى وافضل الاطباق ههه
واخطيك من كلام الناس يا اختي

[NADJIB-90]

مادمت ترين نفسك احسن منه فاتركيه وارتبطي بمدير او صاحب شركة حتي لا تخجلي به امام الناس ولكن هؤلاء يطلبون معايير عالية في زوجاتهم اذا كنت الان تفكرين بهذا التفكير فكيف بك بعد ان تري مصاعب الزواج ومشاكله ستعايرنيه يوميا الافضل ان تختاري شخصا من مستواك
الشئ الذي يحيرني الم يخبرك بمهنته عندما تقدم فاذا كنت تخجلين به فلماذا قبلت اصلا

[tateb]

طباخ ............. نجار ...........حلاق
المهم الاخلاق اقول و اكرر المهم الاخلاق

[هدايات26]

يقولولي كيفاه تدي طباخ مالقيتي غير هو وانت قارية و فاهمة وشابة و كلام لا معنى له

راكي تقولي كلام لامعنى له فلماذا تهتمين له.واعلمي بنيتي ان ارضاء الناس غاية لا تدرك
وزيدي خدام الرجال سيدهم اذا كان فعلا بالاخلاق التي وصفته بها. ويقولوا طباخ ولا سراق

ربي يهنيك

[❀عنْفُوَاפּ طُمُوحْ❀]

يا اختي التغيير يبدا منك ، انت لازم تقتنعي في قرارة نفسك بلي مهنة شريفة ،
و لازم توضعي حد لكل واحد يهدر ديك الهدرة الزايدة ، اوضعيه في حدو و بينيلو بلي راكي راضية
و راح تشوفي ان واحد ما راح يتجرأ يحكي عليه او يستهزأ بيه ،

[سرور]

لا تسمعي كلام ناس ...ارضاء الناس غاية لا تدرك