خطيبي كان يعرف بنات هل اثق فيه؟

[مشكلتي]

السلااام عليكم ان شاء الله راكم لاباس
حبيت نسمع راايكم في موضوعي و عاونونيي راني محتارة
هو خطيبي مازال ما مديتش الكلمة الاخيرة ( هو من العايلة ماما وافقت و مازال ما جاش للدار يعني رانا فقط قاعدين نتفاهمو انا وياه)
هيه في الاول قالي راني نصلي نخاف ربي ما نتبعش لبنات و راهو يحكي وحدو ما سالتوش ع حكاية بنات ما بنات
حتى نهار اعترفلي قالي اني كنت بصح ما خالطش بزاف علما انو سالني كان عرفت قبلو قتلو لا
و مؤخرا قالي هاي وحدة ديرونجي فيا.. قتلو من وقتاه تعرفها.. قالي قديمة ...
قالي اني راح نبدل شريحة الهاتف علاجال ديرونجمو
قتلو و هذه المخلوقة علاه ما كملتيش معاها.. قالي لاه ارواح و كمل
قتلو ماكملتيش ع خاطر خرجت معاك؟ قالي لا مسالة ارتياح برك
قتلو كنتي تعقب في الوقت.. قالي هيه و يضحك
و قالي حطي في بالك بلي م نهار نويت زواج طيشت حكاية لبنات
قالي هاو ماكانش راجل ما عرفش
مع العلم انو الوالد تاعو يتبع النسا لدرجة فففف العبد ما يقدرش حتى يهدرها
انا قبلت قلت هو وش ذنبو ماحبيتش نظلمو
اااه درك قولولي كيفاش نحط فيه الثقة
قلولي هل هو امر عادي؟
وش ندير باه نعرف هل هو صادق بالتوبة ؟
خصوصا الرجاال رايكم يهمني
راني نستنا هيا سلام

[loulou02]

لوكان جيت في بلاصتك منقبلش بيه ،

خرج لباباه .

[z.abdo]

بما انه كان دمو بارد وضحك لما قلتيلو كنت تجيب في الوقت بالنبت الأولى ...........أظنه انسان غير صالح والله اعلم

[مراد12345]

سبحان الله

إلى أين وصل الأمر ببناتنا

أن يقبلن بزوج غير صالح

والله لهذا شيء عجاب

[loufa]

اختي ابدئي بصلاة الاستخارة فهي ستساعدك كثيرا في القرار
اما رايي فهو معظم الرجال اقول معظم كان عندهم ماضي وليس بالضرورة ان يؤثر على علاقتكم المستقبلية فانت من سيرسمها وانت من سيحاول كسب قلبه وعقله ولما لا تقولين انه كان يخرج مع البنات كيما معظم الشباب وقرر يستقر في الحلال واختارك انت من دون كل هاذ البنات
انا لا احاول التاثير عليك برايي لكن ساعطيك مثال انا زوجي كان مع بنات و وكنت عارفة لكن بمجرد خطبني خلاص كي جا يحكيلي قلتلو توقف الماضي نتاعك ربي يسهل واصلا مانحاولش حتى نذكرو بالماضي هذي فترة ومرت اعتبريها مراهقة او نزوة
اضف الى هذا عندك اهلك هم ادرى بمصلحةك وهم سيقررون معك
ربي يوفقك

[aminerag]

(قتلو كنتي تعقب في الوقت.. قالي هيه و يضحك )

(مع العلم انو الوالد تاعو يتبع النسا لدرجة فففف العبد ما يقدرش حتى يهدرها)


نصيحة مني انسايه اتركيه لا ترتبطي معه حذاري

[Angleeyes]

العرق دساس،اخطيك منو نعرفوهم ماشي نتاع نسا و يولو ربي يستر.........مابالك واحد خالط و شاف بزاف!!!

[مريم الصابرة]

السلام عليكم اختي
الناس تورث المال والبيوت وخكيبم ورث حب النسا على باباه وراه باين يعني سبحان الله يهدر على بنت الناس إنو يلعب بيها وزاد ضحك بارد قلب يعني شوفي الماضي نتاعو هو حر فيه قبل ما يعرفك لكن يحكي معاها وهو يحكي معاك هذي ماكانش منها ويمدلك في حجج واهية اختي من رأي اخطيك منو لأنو قادر يكون عندو شعال من وحدة وإنت معاه وقادر يتزوج بيك ويولي كي بابها من مرا لمرا الصراحة ما تقدريش تقبلي وإنت عندك شك ما تقدريش كل الوقت تظلي تشكي وربي عالم خمي مليح شكرا

[صالح مبروك]

هههههههه عندك ديري غلطة عمرك ختي العزيزة


ابتعدي عنه ولا زيدي سقسي عليه مليح وخبري يماك باش تتناقشو مليح ومن بعد ساهل الحال

[kawtar koukou]

نصيحتي لك اختي الحبيبة صلي صلاة استخارة...
مسالة البنات مجرد طيش الشباب
لكن قبل ما تشوفي الولد برايي شوفي الاسرة واساسها الاب كيفاش يتعامل مع زوجته واولاده لانه يمثل القدوة لمن سترتبطين معه ...
اي الاسرة هي الاساس

الولد يروح وين يروح يرجع للاصل لذا حذاري
موفقة

[ندى النسرين]

شكون لي درك من الشباب لي معندوش علاقة مع بنت او بنات
مكانش
ممكن الان راهو تبدل لاني نعرف اشخاص كانت عندهم علاقات عابرة
لكن من بعد ما خطبو وعادت حاجة رسمية تغيرووووووو

[سرور]

لو كان جيت بلاصتك ما نقلبش بيه راح دور وين يدور ويرجع اصل نتاعو

[Assouma 93]

شوفي اختي كامل الرجال عندهم ماضي مع البنات قبل ما يتزوجو اتحدى اي شاب يقولك لالا محكيتش مع الفتيات من قبل لكن انت اختي المشكل ماهوش هنا تخافي من بعد الزواج يرجع لطبايعه و يبقى سامح فيك و يتبع في النساء المهم اختي صلي صلاة الاستخارة و ادعي ربي و ان شاء الله يسهلك امورك

[مراد12345]

شوفي اختي كامل الرجال عندهم ماضي مع البنات قبل ما يتزوجو اتحدى اي شاب يقولك لالا محكيتش مع الفتيات من قبل لكن انت اختي المشكل ماهوش هنا تخافي من بعد الزواج يرجع لطبايعه و يبقى سامح فيك و يتبع في النساء المهم اختي صلي صلاة الاستخارة و ادعي ربي و ان شاء الله يسهلك امورك

أنا محكيتش صافي أنا معقد

ولا مستحيل في نظرك

[○•ميسون•○]

أختي لو كان جيت في بلاصتك ما نقبلش بيه

إنتي طاهرة و نظيفة و شريفة واش ذنبك تقبلي بواحد كيما هاذا قاعد غير للتمسخير++راه خرج لباباه يا لطيف

ننصحك ما تقبليش بيه

[○•ميسون•○]

أنا محكيتش صافي أنا معقد

ولا مستحيل في نظرك


ياخي حالة ياخي


هي رأيها هكذا

بصح مازال كاين العباد الصالحين ماراكش معقد

هي تقصد الهدرة ماشي التعارف

[nibou]

شوفي يا أختي لاكان عدتي قادرة تتحملي هاد الشي أقبلي،خاطر قادر لاشتا تتزوجو و يبقى هك و لا مرات مرات تزعفيه و بروح يرجع لهادوك البنات،يعني ديري في حسابك بلي ماهوش ملاك و قادر في أي لحظة يرجع لماضيه بالرغم من أني منتمنالكش ذلك,
و زيدي أستخيري و شوفي و ربي يجيبلك اللي فيه الخير

[sisi souad]

يا اختي ان كان بينكما شك فانا ما بي الا ان انصحك بان تلغي الخطبة كي لا تندمي وقت لا ينفعك الندم فاذا كان قد تلاعب بكثير من الفتيات فقد ياتي دور.ك او دور ا.خرى من بعدك فليس لك الا ا.ن تتركيه و ما بنيتي ان افرق بينكما و ارجو ان تفيدك نصيحتي :)

[hakeem]

كيما قالك الأخ بارد قلب لا يؤنبه ضميره و لا تلومه نفسه ثم من المفروض يحافظ على الإحترام من جيهتك لا ان يتباهى بعلاقات حيوانية ...؟؟ ثم يا سيدتي واش راكم تتفاوضو راح أطلعوا صاروخ ؟؟؟؟ كل الكوارث كانت باسم الزواج و عليك مشاورة ولي أمرك و ليس التفاوض و من ثم إحضار الولي شكليا ...... أين حق الولي عليك و الا ما يستاهلش يسمع و يساعد في إتخاذ القرار

[nouna l maghbouna]

اختي ابدئي بصلاة الاستخارة فهي ستساعدك كثيرا في القرار
اما رايي فهو معظم الرجال اقول معظم كان عندهم ماضي وليس بالضرورة ان يؤثر على علاقتكم المستقبلية فانت من سيرسمها وانت من سيحاول كسب قلبه وعقله ولما لا تقولين انه كان يخرج مع البنات كيما معظم الشباب وقرر يستقر في الحلال واختارك انت من دون كل هاذ البنات
انا لا احاول التاثير عليك برايي لكن ساعطيك مثال انا زوجي كان مع بنات و وكنت عارفة لكن بمجرد خطبني خلاص كي جا يحكيلي قلتلو توقف الماضي نتاعك ربي يسهل واصلا مانحاولش حتى نذكرو بالماضي هذي فترة ومرت اعتبريها مراهقة او نزوة
اضف الى هذا عندك اهلك هم ادرى بمصلحةك وهم سيقررون معك
ربي يوفقك

نفس رأي الاخت
ربي معااك

[amine0007]

شوفي اختي كامل الرجال عندهم ماضي مع البنات قبل ما يتزوجو اتحدى اي شاب يقولك لالا محكيتش مع الفتيات من قبل لكن انت اختي المشكل ماهوش هنا تخافي من بعد الزواج يرجع لطبايعه و يبقى سامح فيك و يتبع في النساء المهم اختي صلي صلاة الاستخارة و ادعي ربي و ان شاء الله يسهلك امورك

راكي غالطة يا اختي ماهمش كامل الرجال كيف كيف .كاين فئة معينة فقط وعلاه نحصلوا الكل

[mohamed160]

استخارى الله