خبيرات المطلوع ساعدوني

[fatalim]

تعلمت مؤخرا عجن المطلوع الحمد لله العجينة تجي هايلة بصح هناك مشكلة مانقدرش نقرصها مليح وزيد كيما تخمر مانقرش نرفدها للطاجين عجوزتي مسكينة تكملها بصح هي عيات حابة نتعلم وحدي خصوصا زوجي وولدي يموتو في المطلوع في رمضان ارجوكن ساعدوني:sdf:

[oum anas 69]

عزيزتي مدام العجين يجي مليح هذاك هو الصح و التقراص كي تقطعي الكويرات خليها تريح باش تساعدك و تعطيك الطوع باش تقرصيها و إستعملي الحلال و ماتكبريش القرصة و قرصي بالفرينة باش كي ترفديها ماتلصقش في يديك و ديها خلي القرص قدام الطاجين باش ترفديها و أقلبيها بسرعة في الطاجين و كمليلها الطياب عادي

[fatalim]

شكرا هنا في العاصمة يديروها كبيرة ويقرصوها بالسميد نجرب نقرصها بالفرينة

[نسيم الإيمان]

اذا ماعرفتيش تهزيها
ديري serviette تاع الكوزينة و قرصي فوقها
و ديري وحدة اخرى فوقها باه تقلبيها وماتلسقلكش كي تكملي خليها تخمر
و كي تجي تلوحيها في الطاجين هزي المطلوعة مع الserviette و قلبيها في الطاجين و نحي serviette
ان شاء الله تكوني فهمتيني

[fatalim]

اخت نسيم الايمان اسمحيلي والله مافهمت

[Basketteuse]

كيما قالتلك الاخت قرصيها بالحلال قرصة صغيرة فوق serviette ونغطيها بserviette اخرى وخليها شوي .. وكي تحبي تطيبيها نحي الserviette لي لفوق .. واقلبي القرصة فوق يديك بدون ما تنزعي serviette باه تبقى مسقمة حطيها في الطاجين ثم انزعي السارفيات..

[ميار صهيب]

كيما قالولك الاخوات
كوريها و حطيها فوق serviette لا خفت تلصق ديري القليل من الفرينة فوق serviette وكي
تقر صيها دايما كوني حذا الطابونة
او هزي serviette مع القرصة وحطي القرصة فوق الطاجين ومبعد نحي serviette بلعقل
راح تتنحي معاك
لوكان لصقت وماتلصق ماوالو لان درنا الفرينة لكن اذا
حطي قطرات من الما البارد جدا فوق المكان اللاصق راح تتنحي

[maria fareh]

تاني حاجة قلتلي عليها ماما متتريش الماء في العجين انتاع المطلوع باخ متعدبكش كيترفديها للطاجين

[amouna18]

انا صراحة لا علاقة مع المطلوع ,, أصلا في دارنا ما يحبوهش ,,

نتمنى الخبيرات يفيدوك أختي

[نسيم الإيمان]

اخت نسيم الايمان اسمحيلي والله مافهمت

حنونة هذا وين شفت ردك
ان شاء الله تكوني فهمتي من الأخوات وش قتلك
صحة فطورك

[حياتي نبع امل]

شوفي حطي سارفيات قرصي فوقها الخبزة وكي تخمر اقلبيها فوق السيار او الغربال يعني حطي فوقها السيار واقليي السارفيات برفق تولي الخبزة فوق السيار حطي الطرف تاع السيار مع الطاجين يعني يكونو كيف كيف. واقلبي هنا كوني خفيفة في القلب وماتخافيش هدا اهم شىء

[TATA SOUSOU]

كي تقرصيها ماتكبريهمش باش تنجمي تحكمي فيها

[mereyoucef]

حنونة المطلوع انتاعك دريه بالفرينو او سميد

[lamiak1]

راهي تتباع اللوحة الخاصة بالمطلوع و السكرة. La planche عند الي يبيعو لعقاقر استخدميها باش تهزي المطلوع. الشكل انواعها دائري نظن فهمتيني

[محبة الكتاب]

الله يعيينك اختي شوفي ادخلي ثاني شوفي ردود لبنات الله يجازيهم كل خير في الموضوع هذا
http://www.djelfa.info/vb/showthread.php?t=1334503
وثاني
الفيديو ايزيد ايوضح اكثر خصوصا الدقيقة تقريبا العاشرة و34 ثانية هذا كيهزت المطلوع والدقيقة يمكن 13 و34 ثانية في الفيديو كيقلبت المطلوع
http://www.youtube.com/watch?v=tQdAF3OSvbs
انا ماعنديش اللي هزت بيها بعد ماشفت الفيديو جربت بغطاء انتاع برمة كبير مسطح والحمد لله صلحلي

[fatiha83]

الله اسهل ليك إن شاء الله