طنجرة الفخار

[ritel dz]

السلام عليكم يا خاوتي أنا شريت طنجرة الفخار باش نستعملها في رمضان :19: بصح قولولي كيفاش نحضرها قبل ما نستعملها ؟؟؟؟؟؟ :sdf::sdf::sdf:

[عنابة أبوها]

يا اختي الاحسن تدهنيها بالزيت مليح وخلي فيها الزيت على الاقل يومين باه يتشرب وتكون قابلة للاستعمال وهناك من يدهنها بالشحمة وانت كيما تبغي

[ritel dz]

شكرا على الرد يا أختي بصح في علمي كي يديرو الشحمة تولي دخن و لا لا ؟؟؟؟

[عنابة أبوها]

انا اقصد الشحمة تذوبيها وتدهني بيها الطنجرة مثل الزيت غير باه يتشرب اول مرة ومن بعد يسهل عليك الطياب فيه ان شاء الله تكوني فهمتيني اختي

[أم أسامة 07]

أظن انه يجب أن تفيظي فيها الحليب أولا
ومن بعد أغسليها مليح وطيبي فيها بصحتك أختي

[ام ملاك.]

فيضي فيها الحليب برك ومن بعد طيبي فيها
نصيحة
ماتحطيهاش في الفريجيدار ومن بعد ديراكت للنار خاطرش تتطرطق
وكي تطيبي فيها نقصي للنار مليح خليها تطيب بعقلها باش ماتلصقلكش الماكلة وتجيك ماكلتك بنينة ومجمرة

[السيدة ام سارة]

يا اختي ديري فيها الماء عل الاقل 3 ايام كي تشرب هذاك الماء طيب مليح

[ritel dz]

يعطيكم الصحا خوتاتي شكرا على المساعدة ^^

[oum sarah abdou]

diri elkadra ta3ak dakhal bassina ta3 maa khaliha tbat lili oumamba3d nahiha malma ahkmi hbila ou une lavette hakiha maldakhal bach ila k3ad fiha trab yatnaha apres diri fiha zit ou diriha fouk elnar ou dans Lefour tib apres sta3mliha

[Wunderbare fehlt]

انا يا اختي من الاحسن انك تفيضي فيها الحلييب قبل ومبعد اغسليها وطيبي على روحك باه ترووح الريحة برك

[omallae]

بصحتك حنونة انا تاني عندي وحدة نستعملها من سنين اول مرة فيضت فيها لحليب من بعد غسلتها بعد ما بردت واستعملتها عادي كنت ندير فيها الشربة بصح عدت ندير فيها المرقة البيضا لانها ولات صغيرة على عائلتي نصيحة اختي ما تمرقيش بالما بارد بعد ما تقلي البصلة حتى وقت الصيف ما تقوليش الما راه سخون غلي الماء ومرقي باش ما تطرطقش وبصحتكم اختي وصح رمضانكم

[سامية حكيم]

اختي فيضي فيها لحليب كيما قالولك الاخوات ونصيحة مني ماتخليش فيها الماء مدة طويلة غير اغسليها بالخف وخليها تقطر مليح باش تقد صحيحة

[amina92]

أنا ثاني شريت وحدة وقالولي فيضي الحليب بالصح فيها la peinture من الداخل خوفتني مانيش عارفة اللي عندها وحدة كيما تاعي تفيدني.

[LEBLOUBA]

أختي أنا موالفة نغلي فيها قشور الخضر باش ينحيولي ريحة الطين منها وندهنها بالزيت ياش يتغلقو المسامات وما تتكسرش