كيفاه ندير؟

[مشكلتي]

السلام عليكم انا متزوجة منذ عام و ابلغ من العمر 25 سنة ،بدون اولاد اتفقنا انا و زوجي انو شهر رمضان المبارك ما نفوتوهش غير راسي و راسو كل يوم (هادا رمضان ديالنا الاول تحت سقف واحد) نفوتوه مع العايلة انا قلت نعم ماشي مشكل قلت نهار في دارهم و نهار في دارنا مثلا، بصح البارح قالي بلي نفوتوه كل يوم في دارهم يعني 30 يوم مع العلم انو ساكنين وحدنا انا و ياه انا ما رانيش ضد الفكرة و لكن كل يوم؟؟؟؟؟؟ بزاااف خصوصا انو شهر العبادات و العايلة ديالو يحبو يسهرو و يحوسو بين العائلات يعني ما نختم مصحف ما نصلي نوافل و في النهار الشغل و الطياب و الزوج مع العلم انو في الايام العادية لازم كل عطلة اسبوع نروحو لدارهم الجمعة و السبت si non يماه تزعف و تشنف بصراحة انا نضجر كي نكون في دارهم خاطر يحطني و يروح مع صحابو نبقي غير انا و يماه و تبدا تهدر على الناس و تمنشر فيهم و تغتابهم و انا ما نحبش هاد العادة انصحوني من فضلكم

[نورسين.داية]

السلام عليكم

نصيحتي قد لا تعجبك ....لكن هذا أمر واقع ......

اولا السؤال الذي يطرح نفسه .....هو لما فكر في هذا الموضو ع ...........و يظهر لي أنه يشعر بفراغ ....و يبحث عن ...كيما نقولوا اللمة ....
ثانيا : مسألة رأيك أو نقدك لوالدته .....خليها تحكي واش تحب أنتي لا تجلسي في دلك المجلس و السلام ........

مسألة الدخلات و الخرجات ...........و من اجبركي على المثول لقواعد غيرك ..........طبقي قانونك و بطريقة ديبلوماسية .....يعني ماتدخلي ما تخرجي ...................

وشنو و الأهم هو تقسيم الواجبات المنزلية .....حتى لا يحدث أي تصادم .....................و الصراحة شخصيا بطبيعتي لا أحب العمل في المطبخ بشكل جماعي .......................نتقلق .............
بالتالي عزيزتي ..............وجب ان تتكيفي مع الوضع أن لم تجدي حل للرجوع عما قرره الزوج

وفقكي الله أختي

[wafa16]

1-اختي كي عمبالك نهار في داركم و نهار في دارهم ما زعفتيش و ما خممتيش في القران و النوافل و كي سمعتي بلي 30 يوم في دارهم بانولك كل هاد المشاريع
2-ادا يماه ما تدناش ليك بالكلام و تعاملك مليح خليها تهدر كيما كل العجائز لكن لا تجاريها في هده الاحاديث و الغيبة كي تشوفك ساكتة و حدها تسكت و الا انصحيها بدبلماسية و الا ادكريلها احاديث عن الغيبة و النميمة بالاك تفيق لانو كاين عجايز مايحسوش بروحتيهم كي يكونو يقطعو
3-حاولي تجيبي اولاد باش يملؤو الفراغ اللي راكم عايشين فيه لانو زوجك عندو الحق ماكانش اللي يحب يجوز رمضان وحدو رمضان عندو نكهة خاصة مع العائلة و ربما كي عامكم الاول ماشي حاب يحسس امو باللي بعد عليها
و الا اقنعي زوجك اديرو عرضات في داركم و هنا تاني شغل الدار كلو يطيح عليك
ساعفي اختي هدا عامك الاول و مع السنوات و الدراري تعودو ما تلحقوش لهاد العرضات و الملمات و رمضان تجوزيه في دارك

[جزائرية امازيغية]

اختي لا تاخدي موقف عدائي تجاه امه فكري في تعب الام على اولادها وغيرتها من الزوجة لكن حاولي تفهميه ان والدتكي ايضا عندها حق فيكي وهدا قطع للرحم وهكذا ولا تناقشي كل مشاكلك الخاصة على العام لا يجوز
ربي يوفقك

[achwak.1993]

حاولي تتأقلمي مع الوضع ما عندكش حل آخر

[NADJIB-90]

ان تقضي رمضان عند عائلته امر عادي لكن فكرة ان تقضيه عند عائلتك فانا اقول لك في هذا الزمن اهل الزوجة لا يحبون ان ياتي الزوج ويجلس عندهم 30 يوم كاملين مهما يقولولك الناس عائلة الزوجة ما تحملش الزوج يجي سمانة تحملوا 30 يوم اما عند عائلته فهو حقه ان يقضي رمضان عند والديه

[نور الهدى 98]

حاولي تتفهمي الوضع وان شاء الله تلقاي الحل
(http://www.djelfa.info/vb/showthread.php?t=1340191&goto=nextnewest)

[محمد جديدي التبسي]

ربي يعينك، ما به هذا الرجل؟!!
أظن أن هناك ما ينقصك لذلك يبحث عن جو مغاير وتغيير للروتين بالافطار مع عائلته
حاولي تغيري هذا الروتين وتكسبي زوجك بتغيير سلبياتك والبحث عن ما يُرضي زوجك ربي يهنيكم

[moha75]

بلا ما نتعبك ونكثر عليك،
طاعة زوجك أهم من كل شيئ ،
وجنة الزوجة تحت قدمي زوحها ،
إلا في ما حرم الله فهنا لا يمكنك طاعته،
معليش اصبري وكل شيئ يفوت،
اهم شيئ حافظي على زوجك وبيتك ،
ورمضان في داركم ولا في بيت أهلو كيف كيف،
المهم الأعمال الصالحة في هذا الشهر،
وخير الأعمال عند الله أدومها وإن قل،
والعبرة ليست بكثرة الصلاة والصيام ،
بل العبرة بالقبول،
فمثلا الزوجة تصلي وتصوم وتزكي ،
ومش طايعة راجلها واش من فائدة؟؟؟
والابن يصوم ويزكي ويحج ،
وعاق لوالديه واش من فائدة؟؟؟
إذا أطيعي زوجك وأنت مأجورة إن شاء الله على ذلك.
ربي يديم بينكم العشرة بالخير.
ورمضان مبارك .

[z.abdo]

ربي يعينك، ما به هذا الرجل؟!!
أظن أن هناك ما ينقصك لذلك يبحث عن جو مغاير وتغيير للروتين بالافطار مع عائلته
حاولي تغيري هذا الروتين وتكسبي زوجك بتغيير سلبياتك والبحث عن ما يُرضي زوجك ربي يهنيكم

ليس بالضرورة بها سلبيات .........فقط هو حاب تكون اللمة في شهر رمضان وأكيد دايما الراجل يحن للدار الكبيرة

اللي فيها الوالدان

[aminabil]

انا من رايي انكي انت المخطئة لازم عليك تطيعي زوجك وين راح تكوني معاه و ما تبينيلوش بلي ماراكيش باغية تقعدي في دارهم لانو الرجل يكره المراة التي لا تحب والديه

[sarah1424]

سلام
نجاوبك ومتزعفيش
صراحة رمضان مليحة اللمة والعائلة بصح نهار في دارهم ونهار في داركم هذه مهيش هدرة خلاصمعليهش روحي نهار لداركم بصح مش نهار بنهار
انا معاه وكي شفتي روحك بلي شهر عبادة وحابة تنعزلي كون صمتي في دارك راسك راس راجلك

[دلال 30]

الله يهدييييك اختيي

[naima40]

Ana fi rayi okhti rohi maah w simou maa waldih w gir blakal mara ala mara goli lih lyoum waldiya ardina naftro andhom ma ndonech rayeh ykolek non pasque raki mwafkatou ala leftor fi dar waldih w rabi yjib lkheir okhti

[hammoudi54]

اعلمي ان صلة الرحم وإدخال ا لبهجة والترابط بين أفراد العائلة فيه الثواب ربما أكثر من النوافل واعلمي أنه فرع من أصل وما دمت تقرئين القرآن وتصلين النوافل فلتكن تعاملاتك تتسم بالتسامح والمحبة ونكران الذات

[ايمان نور الجزائر]

انا من رايي لو تقضيو رمضان في بيتكم ومرتين في الاسبوع تروحو لاهل زوجك
هكا لانو شهر مبارك وما يتعاودش
والبقاء وسط الغاشي ودار اللمة متعب قليلااااا.......خصوصا مع السهرات والخرجات
من الافضل التزام البيت ليتسنى لكما الوقت للصلاة وقراءة القران واداء مناسك الشهر الكريم براحة
وتقدري تطيبي بالزيادة وتبعتي يوميا لاهل زوجك يذوقو مع داركم ايضااااااا

[sarl02]

يا اختي بالطبع اتجوزو رمضان مع اهلو كيفاش نهار بنهار هذه؟؟ومرة او مرتين عند اهلك بدعوتكما مسبقا طبعا هذه الاصول .

[usb206]

السلام عليكم انا أقترح عليك الحل الآتي
10 أيام عند عائلته
10 أيام عند عائلتك
10 أيام الأخيرة في منزلكما
و هكذا الكل راض

[naamane3]

هذا زوجك ولازمك تطيعيه
واما بخصوص امه
كلما تخوض في الغيبة والتمنشير
غيري الموضوع وستأجرين باذن الله

[ميمي سمية]

اصبري وفرات

اطيعي زوجك وزيدي حاولي تخلي نفسك توالف على الاقل تبدلي الجو شوي

[bichaz810]

السلام عليكم
اختي العزيزة انت لازلت عروس جديدة لم تتعرفي بعد على اهل زوجك جيدا وعاداتهم وتقاليدهم
لا تستبقي الاحداث ولا تحكمي عليهم قبل التجربة
ربما يجعل الله منك سببا لصلاح اهله ( انت تتعلمي عادات طيابهم الي يحبو اي زوج وهوما يتعلمو منك)
خذي ام زوجك الى التراويح كل ليلة ولن يبقى الكثير من الوقت عند العودة للحديث او غيره وتكوني ضربتي عصفورين بحجر
تعاملي معهم بما يرضي الله كلش يعدي ويفوت ومحسنك يا فاعل الخير
ضعي بصمتك وسط اهل زوجك بطريقة لبقة اثناء تحضير الفطور تحدثي عن الدين عن الاحاديث والصحابة عن عادتك في ختم القران والتراويح فسيعرفن من اي طينة انت وسوف يستحيين من فتح مواضيع النميمة امامك وان حدث قولي فقط ربي يهدي ولا تشاركيها وان كانت ثلاثون يوما ولم تذهبي الى التراويح معها او مع زوجك يمكنك الاستئذان والاختلاء بنفسك للتراويح قوليلها نصلي ونجي
عاونيها واطيعيها واهديلها واعرضيها تحبك خير من بناتها
ربي يسهلك هذا ليس مشكلا اختي العزيزة خذي الامر ببساطة لا تعطيه اكثر من حجمه ودعي الامور في اوقاتها ربي يجعل لكل يوم رزقه
اام الزوج ما تغضبش من الكنة كيما تخدم معاها وتعاونها وتهديلها ترضى عليك