انصحوني

[مشكلتي]

السلام عليكم
اخوات خطيبي و تصرفاتهن من وراء الاهل
اخوتي هاته المشكلة تؤرقني

انا مخطوبة و درنا العقد الشرعي و العام الجاي عرسي ان شاء الله خطيبي انسان طيب و خلوق و الحمد لله

كيف اتعامل مع الوضع اذا كانت اخت خطيبي الكبرى 30 سنة تعرف العشرات في الهاتف مدعية امام اخوتها الذكور انها لا تملك هاتفا تظن ان العلاقات في الهاتف هي من ستزوجها اما اخت خطيبي الصغرى 23 عاما تعرف شابا من ولاية اخرى

و انا على علم بكل هذا و ما باليد حيلة اخاف ان يفضح امرهن و تقلن لخطيبي ان خطيبتك تعلم
لا استطيع اخباره لان كل ما يحصل تعلم به ام زوجي و تتكلمن عادي امامها و اخاف المشاكل

ما ازعجني و ما جعلني اكتب لتنصحوني
انه في تخرج اخت خطيبي الصغرى كنت مدعوة فذهبت بمفردي و هناك التقيت والد خطيبي فبقيت بجانبه طول الوقت
لان اخت خطيبي الصغرى التي تخرجت جاء حبيبها لحفل التخرج و تظاهرا كانهما لا يعرفان بعضهما
اما اخت خطيبي الكبرى حضرت مع شاب كذلك تعرفت عليه منذ اسبوعين و وعدها بالحضور لخطبتها هذا الاسبوع لكن لا جديد يذكر

و الاثنتين تظاهرتا انهما لا تعرفان الشابان و انا جالسة مع والدهما و انا في قرارة نفسي اتحسر على الوالد

و مازاد الطينة بلة انني كنت جالسة انا ووالد خطيبي حتى احضرو الكسكسي في كل طاولة و بما ان الكراسي كلها كانت محجوزة قامت اخوات خطيبي باحضار الشابان للجلوس معنا في نفس الطاولة و ووالد خطيبي المسكين لا يعلم شيئا و ياكل معهما في نفس الصحن

و كل هذا و ام خطيبي عاجبها الحال و لاعبتها عقلية متفتحه لكن انا خطيبي و والده لوكان يسمعو يقلبو الدنيا لانو خطيبي معروف و هم انتهزو الفرصة لغيابه بسبب عمله في ولاية اخرى
انا كنت طوال الوقت مع والد خطيبي حتى ما يقولوش كانت معانا او ما شابه
منذ ذلك الوقت و انا في حيرة

لا استطيع التكلم و لا استطيع حتى النصح لانهن سيقلن انني اغار او او او

[aviare]

حاجة خاطياتك اخطيك من تكسار الراس ربي يسهل على كل واحد طبقي سياسة النأي بالنفس المهم راكي معاه لاباس

[هبة الله اريج]

السلام عليكم
اختي اخطيك من المشاكل و ما تهدري ني والو لا تصبحي انت الظالمة

[wafa16]

و انتي واش دخلك فيهم
ادا يماهم اللي هي ام خطيبك و زوجة حماك علابالها و ماشي خايفة
انتي علاش تتحملي المسؤولية
نصيحة مني خليك منهم يدبرو ريسانهم انت ادا كثرثي انصحي لبنات
لانك ادا فضحتيهم بالاك تتسببي في كارثة للعائلة
و خاصة كي عجوزتك علابالها و راضية
ادا كاش ماصرا لبناتها تحملك المسؤولية و تقولك خسرتيلي عائلتي و علاقة ولادي مع بعضاهم و انت مازال ماجيتيش
و انت شيطانة و خرابة بيوت ..............
و يحقدو عليك و كي تروحي ينتقمو منك
انت ديري روحك ما علابالكش و ادا قالك خطيبك قوليلو ماكنتش عارفة و لا نصحتهم و وعدوني باش يقطعو علاقاتهم
راني نوصيك ما تبدايش حياتك معاهم بالمشاكل
ووعلاش يحطوك غرتي منهم بما انك تاني مخطوبة
الا ادا كانت نيتك اخرى

[sarah1424]

تخطي راسك وتسيح
الله يسهل عليهم

[ayaamira666]

اول مرة نعرف بلي في حفل التخرج يجيبوا الكسكسي
اختي احفظي الميم تحفظك
و لا تكثري الكلام مع اخوات خطيبك
و لا تشاركيهن الموضوع و تظاهري بعدم سماع شئ
ياك يماهم علابالها
ربي يسهل عليهم

[nouna l maghbouna]

حاجة خاطياتك ماتدخليش و ماتحيريش روحك

ربي معاك

[Assouma 93]

ya khti khtik yemahom 3labalha khlass matkasrich rasek

[Assouma 93]

ygoulou raki ghayra khtik menhom w matkhabrich khatibek

[hakeem]

لست مسؤولة عنهن ثم إنه لن يسمع بهن احد (قادرين على شقاهم)
من المفروض تفكري في نفسك و مستقبلك و مستقبل راجلك...راكي تضيعي في الوقت لمجرد انهن في رسك

[amine eco]

بعد الزواج اكشفي المستور

[loulou02]

و أنت واش دخلك فيهم ؟ نصيحة : تلهاي بزوجك فقط .

[ميمي سمية]

بصراحة اختي انتي في وضع لا يحسد عليه
ربي يكون في عونك

[samia2014]

اختي وعلاش راكي مقلقة روحك المهم انو اخوات خطيبك خاطينك

[الفاتحة]

اللي أنا حايرة منو راكي عارفة كلش عليهم وأنت مازال مدخلتيش لدارهم وتعرفي الامور بالتفاصيل ، يعني البنات وأمهم راهم دارو فيك الثقة ويحكو قدامك كلش ، واللي حيرني تاني كيفاش عرفت هذه الأمور أنت راكي تروحي لدارهم وتقعدي معاهم سبحان الله وين وصلنا راح الحياء من بنات الاجزائر ، زمان الراجل مايشوفش مرتو غير يوم الدخلة واليوم رانا نشوفو العجب العجاب ...كون جيتي ماتكتريش الدخلة والخرجة راكي متحطيتيش في هذا الموقف .......نصيحتي ليك ماعندك واش دخلك فيهم اتهلي في روحك ، وتاكدي طريقة وضعك للموضوع تدل على انك تحوسي على المشاكل والتفرقة بين البنات وخوهم، ربي يهدي البنات ويرزقهم الأزواج الصالحة وأنت ربي يهديك ويخليك تتلاهاي بروحك ، ماعندك واش ديري غيري ادعيلهم دعوة خير.

[الرڨيڨ]

السلام عليكم
اخوات خطيبي و تصرفاتهن من وراء الاهل
اخوتي هاته المشكلة تؤرقني

انا مخطوبة و درنا العقد الشرعي و العام الجاي عرسي ان شاء الله خطيبي انسان طيب و خلوق و الحمد لله

كيف اتعامل مع الوضع اذا كانت اخت خطيبي الكبرى 30 سنة تعرف العشرات في الهاتف مدعية امام اخوتها الذكور انها لا تملك هاتفا تظن ان العلاقات في الهاتف هي من ستزوجها اما اخت خطيبي الصغرى 23 عاما تعرف شابا من ولاية اخرى

و انا على علم بكل هذا و ما باليد حيلة اخاف ان يفضح امرهن و تقلن لخطيبي ان خطيبتك تعلم
لا استطيع اخباره لان كل ما يحصل تعلم به ام زوجي و تتكلمن عادي امامها و اخاف المشاكل

ما ازعجني و ما جعلني اكتب لتنصحوني
انه في تخرج اخت خطيبي الصغرى كنت مدعوة فذهبت بمفردي و هناك التقيت والد خطيبي فبقيت بجانبه طول الوقت
لان اخت خطيبي الصغرى التي تخرجت جاء حبيبها لحفل التخرج و تظاهرا كانهما لا يعرفان بعضهما
اما اخت خطيبي الكبرى حضرت مع شاب كذلك تعرفت عليه منذ اسبوعين و وعدها بالحضور لخطبتها هذا الاسبوع لكن لا جديد يذكر

و الاثنتين تظاهرتا انهما لا تعرفان الشابان و انا جالسة مع والدهما و انا في قرارة نفسي اتحسر على الوالد

و مازاد الطينة بلة انني كنت جالسة انا ووالد خطيبي حتى احضرو الكسكسي في كل طاولة و بما ان الكراسي كلها كانت محجوزة قامت اخوات خطيبي باحضار الشابان للجلوس معنا في نفس الطاولة و ووالد خطيبي المسكين لا يعلم شيئا و ياكل معهما في نفس الصحن

و كل هذا و ام خطيبي عاجبها الحال و لاعبتها عقلية متفتحه لكن انا خطيبي و والده لوكان يسمعو يقلبو الدنيا لانو خطيبي معروف و هم انتهزو الفرصة لغيابه بسبب عمله في ولاية اخرى
انا كنت طوال الوقت مع والد خطيبي حتى ما يقولوش كانت معانا او ما شابه
منذ ذلك الوقت و انا في حيرة

لا استطيع التكلم و لا استطيع حتى النصح لانهن سيقلن انني اغار او او او

يا اختي لا تتدخلي فيهم حتى و ان كنت زوجته ليس لك اي دخل فيهم كل واحدة عندها و لي امرها

[سرور]

ختي ما عدك ما دخل فيهم خليهم نتي كوني خارج موضوع

[نسمة تفاؤل]

حااااااااااااااااااااااااجة خاطياتك الله يسهل علييييييييييييييييييييييهم ادعيلهم ربي يهديهم وبااااااااااااااااااااالاك تغلطي وتخبري خطيبك الله يسهل عليهم

[hadjerbb]

شوفي يااختي كل واحد وحياته كل انسان يعيش على طريقته ماتدخلي فيهم مايدخلو فيك راكي قاعدة تحوسي على البلا برجليك والله راهم كبار وواعيين وزيد امهم عمبالها يعني اخطيك درك يقولي هده قبل ماتتزوج راهي قاعده تعمل في المشاكل اجبدي روحك واهتمي في امورك وخليك من التدخل في الحياة الخاصة للاخرين وعلمي ان حرية كل شحص تنتهي عند بداية حرية الاخرين

[naamane3]

مشكل عويص تخبري خطيبك توقع مشاكل كبيرة
ما تخبريهش تبقاي في دوامة
انا لو كنت في مكانك نخلي الوضع على ماهو
ونكثر من الاستغفار والدعاء بالصلاح لهذه العائلة
لانها ستكون عائلتك في المستقبل
والله المستعان

[gana djamel]

لكن كيف بالوالد لا يسأل عن هؤلاء وهما يتناولان معه الكسكسي على الاقل كان يسأل من هؤلاء ان هو يغار عن بناته ام ان المسألة هم اصدقاء ويدرسون مع ابنته لذلك فإن الوالد والوالدة هما من يتحملان المسؤولية خصوصا اذا كانتا بناته من النوع اللواتي يتبرجن فهذا بدون شك ان الوالد والوالدة راضيين بما يفعلن بناتهن وحتى خطيبك يشاركهن فلا تنخدعي ان كان خطيبك لا يعلم امر اخواته وبالتالي فأنت الان مرتبطة من عايلة هايلة

[manels]

السلام عليكم

اسفة لكن تتدخلي فهذا امر لا يعينك


تحياتي

[loulou02]

اللي أنا حايرة منو راكي عارفة كلش عليهم وأنت مازال مدخلتيش لدارهم وتعرفي الامور بالتفاصيل ، يعني البنات وأمهم راهم دارو فيك الثقة ويحكو قدامك كلش ، واللي حيرني تاني كيفاش عرفت هذه الأمور أنت راكي تروحي لدارهم وتقعدي معاهم سبحان الله وين وصلنا راح الحياء من بنات الاجزائر ، زمان الراجل مايشوفش مرتو غير يوم الدخلة واليوم رانا نشوفو العجب العجاب ...كون جيتي ماتكتريش الدخلة والخرجة راكي متحطيتيش في هذا الموقف .......نصيحتي ليك ماعندك واش دخلك فيهم اتهلي في روحك ، وتاكدي طريقة وضعك للموضوع تدل على انك تحوسي على المشاكل والتفرقة بين البنات وخوهم، ربي يهدي البنات ويرزقهم الأزواج الصالحة وأنت ربي يهديك ويخليك تتلاهاي بروحك ، ماعندك واش ديري غيري ادعيلهم دعوة خير.
بارك الله فيك :19: