مساعدة

[مشكلتي]

السلام عليكم
مشكلتي هي اني منذ عام كنت على علاقة بشاب يكبرني بسنتين
وبصراحة أحببته وفي البداية لم اشك بحبه إطلاقا
حيث انه اخبر كل اهله كبيرهم وصغيرهم عني
والكل من اهله صار يعرفني ويسأله عني ويطمئن عني ويبلغوني سلامهم ماعدا امه"بحكم انها واعرة وهو صارحني بهاد الشيء"

بعد مرور عدة ايام حيث تفارقنا ونرجع لبعضنا
وكم مرة نتفارق ويرجع هو من يطلب السماح ونرجعو لبعض عادي
في اخر مرة

طلبت منه اثبات انه يحبني
فلم يجب على سؤالي
وبعد مرور عدة ايام وانا في ظروفي لاتحمد عقباها وطبعا هو بعدما سمع بظروفي رجعلي

ولما كنت انا في فترة عصيبة طلب مني نتفارقو
قلتلو انا لعبة عندك ترجعلي وقت ماتحب وتجبد روحك وقت ماتحب؟
وانا في وقت صعيب واقل شيء كنت قادر تأجل كلامك هدا حتى تمر ظروفي بخير
قالي انا رجعتلك حبيت نوقف جنبك برك
قلتلو منيش محتاجتك توقف جنبي كاين اللي واقفين جنبي
قلتلو هكدا راك زدت كملت عليا
مهم بعد كلام مطول
بدا يهدر
قالي حكيت لماما عليك
وقلتلها راكي عاجبتني وحبيتها تجي تخطبك هي رفضت وقالتلي راني مديت الكلمة على بنت خالتك
وتشاجر معاها يومين ماحكاش معاها
قلتلو وانا وش دخلني في الوسط؟
بعدها انا حسيت ممكن حب يثبتلي انو يحبني حب امه تجي تتقدملي

قلتلو واجهها وقولها مانديهاش
قالي مش حاب ندير كي خويا تزوج بالسيف عليها
ونهار كي كان يموت ماحبتش تسامحو
صراحة انا مش عارفة
علاش منيش قادرة نصدقو
الله غالب في داخلي شعور مش قادرة نصدق كلامو
وبالرغم من انو ياما ناس حكاو معايا وخبروني انو يحبني برك انا لازم عليا نفهمو
بصح انا مش قادرة نصدقو الله غالب
والاكثر انو في داخلي نية الانتقام
وحابة ندمرو
صراحة

في رايكم هاد الانسان يحبني؟
ام انو نكمل فكرة الانتقام؟

[*أم كوثر*]

وعليكم السلام اختي
الصراحة من بداية الحكاية توقعت النهاية لاني حافظتها عن ظهر قلب لكثرة تداولها بين شباب اليوم
في رأيك شكون في وقتنا مازالت امه تخطب له؟؟؟؟
اقطعي علاقتك به فورا وتوبي الى الخالق
ولاتفكري في الانتقام لان الله وليّ ذلك وحسبه
وربي يقدرلك الخير

[أم لجيـن]

اذا مزال عندك وقت روحي توبي فيه مش تنتقمي منه
هو الي عليه داره سواء كان كلامه صادق ولا كاذب في كلتا الحالات اقطعي علاقتك بيه
اذا كان صادق ووالدته رافضاتك فالاكيد راح تقطعو العلاقة
اذا كان كاذب واش بش يجيك من واحد كذاب
(مش دليل كافي على انه يحبك كي يروح يحكي للكبير والصغير بلي راهو يحبك)

[nouna l maghbouna]

خليك منو
الثقة و الصدق مكانش بيناتكم
غير اخطيك

[hadjerbb]

واش من انتقام الي راكي تحكي عليه يا اختي درك كل واحد كان مع وحده وماكتبش ربي بيناتهم يولي حاب ينتقم لازم تكوني انسانه واعية ما ضيعيش عمرك في الانتقام و الافعال الي ما عندها حتى معنا كلشي بالمكتوب ماكانش مكتوب ماكانش بالعكس تفكري الجانب الطيب في العلاقة الي عشتوها مع بعضاكم ش انتقام ومارانيش عارفة بالنسبة ليه انا جاني صادق لانه راهو خبر كل اهله عليك كون جا مايحبكش مايخبرش اهله عليك ويدير لروحه شوشرة انتي بلاك راكي في حالة عصيبة راكي قاعدة تفكري بقلبك لا يااختي لازم تفكري بعقلك لازم تشوفي وتحاولي تلقاي حل مع امه الي راغمتو يتزوج بنت خالته موفقة اختي

[Assouma 93]

واش من انتقام اختي ربي يهديك اخطيك منو اصلا علاقتك بيه كانت غير شرعية و هذا الشي حرام انسية و توبي لله احسن ما تندمي من بعد الله يهدينا

[بثينة 123]

السلام عليكم
اتقي الله يا اختي وابتعدي عن العلاقات المحرمة لان الله لايبارك فيها

[سرور]

ما ديرش ثقة في تواحد قصتك تشبهلي تماما من قبل عندها قريب2عامين مي درك راني حمد الله ابتعد عنها ديرا في بالك كي ديرا في بالك تنسياه تنسياه مش صعيب خطيك لي حبك يجي لباب دراكم

[نسمة تفاؤل]

انسايه والسلام لاانتقام لهم يحزنون اصلا هاذ العلاقات المحرمة دايما نهايتها فاشلة لازمك خيتو تتعظي من هاذ الحكاية وماتزيديش تدخلي في علاقات انسايه وخلاص ماكان لاه تخممي

[soumi7]

كيما قالت الاخت شكون اللي يماه راه تخطبلو فهاد الوقت و+ بلا ما يعرف هو يا اختي العزيزة سالتينا هذا ميحبكش وراه يفوت فالوقت حتى يلقا اللي توالمو ويقولك بايباي شاد بيك يدو كيما نقولو ébain ديري قيمة لنفسك و عززيها وصلي وادعي ربي وعلى قدر نياتكم ترزقون ونحي فكرة الانتقام لانو المنتقم راهو الفوق و هو اللي يجيبلك حقك منو او من غيرو واللي يستهالك يجي و لو بعد حين سلام

[الفاتحة]

ربي يهديك يا ختي ، حب حرام نتيجته ضياع الكرامة ، توبي إلى الله وصدقيني ربي راح يعوضك بأحسن منه ، أما حكاية الانتقام اخطيك منها ومتزيديش تبعثري كرامتك وتهيني روحك أكثر مما فعلت ، شوفي يا ختي لومي روحك قبل ما تلومي السيد، يخي كان كلش برضايتك مادربكش على يدك وموش بالسيف، عموما ربي يهديك ويفرج عليك ويرزقك وكل بنات وشباب المسلمين الازواج الصالحة

[ميمي سمية]

السلام عليكم ختي
اولا نحي من راسك فكرة الانتقام وشبيكي؟؟ طفلة تنتقم من راجل؟؟ والله يرجع فتات ونتي حية ماكالاه تخممي في حاجة كيما هذي

في رايي تقطعي علاقتك بيه وقوليلو اذا راك باغيني ارواح اخطبني منيش نطايش انا باه يلعبوا بيا كامل الرجال

وحتى نتي اختي اعرفي كيفاه تصرفي ديري قيمة لروحك وماتخلي حتى واحد يوصلك حتى بكلمة نشتيك

[wafa16]

اللي ضرباتو يدو ما توجعو
انت من الاول في علاقة محرمة
دوك يحبك ما يحبكش من المفروض تتوبي لربي و تكملي حياتك
هو جوز معاك وقت شباب و دوك حاب يخطب بنت خالو حاب وحدة تخيرهالو يماه و مادارتش علاقة معاه
تساليلو ???
خلينا من الانتقام و المسلسلات التركية و خودي العبرة

[amina04000]

الانتقام مش حاجة مليحة ليك انت قبل منو لانك راح تدمري روحك اولا

[kmilya]

السلام عليكم ختي
اولا نحي من راسك فكرة الانتقام وشبيكي؟؟ طفلة تنتقم من راجل؟؟ والله يرجع فتات ونتي حية ماكالاه تخممي في حاجة كيما هذي

في رايي تقطعي علاقتك بيه وقوليلو اذا راك باغيني ارواح اخطبني منيش نطايش انا باه يلعبوا بيا كامل الرجال

وحتى نتي اختي اعرفي كيفاه تصرفي ديري قيمة لروحك وماتخلي حتى واحد يوصلك حتى بكلمة نشتيك

هيه اذا حبك يجي لباب دار مايقولك لمو لا والو تبالي لا اكراه في الزواج في شرع
مالا بعدي عليه وقوليلو باب دارنا تعرفو نرحبو بيك وقت ماحبيت والا حاب تدخل من طاقة اغلقيها بويسك مايدخل من طاقة غير سراق

[naamane3]

يعني علاقة غير رسمية
من الاحسن قطعها
مرضاة لرب العالمين

[سيرين شوب]

يا اختى الزواج نصيب وانتي نصيبك الله اعلم وين
من الاول ماكانش لازم تطول علاقتك معاه المفروض من اول ماعرفتيه
كنتي تقوليلو اذا ناوي فيا ارواح للدار
وماكانش لازم تخلي نفسك تتعلقي بيه وتتفرقو وترجعو الف مره
نحي فكرة الانتقام منه
لانه هو موش الوجيد اللي غالط انتي ثاني غالطه لانك دخلتي في علاقه مبنيه على وهم من البداية
الاحرى تنتقمي من نفسك ميش منه بانك تتوبي وتستغفري وتوعدي ربي انك ماتزيديش تدخلي في مثل هته العلاقات
اذا جاك واحد يجيك من الباب ميش لقاءات في الشارع وبالجحده

[Assouma 93]

Rabi yahdina

[hakeem]

هذ الأم و على الرغم من انها ام إلا انها ما لقاتش الرجال اللي يحطوها في بلاصتها فبعض النساء بإسم الأمومة يديرو حالة في ولادهم و رجالهم أما عن مشكلتك فلا ادري ما هو الحل و علاقتكما تبقى دائما بين المد و الجزر و اعتقد ان هذا الشخص إما مغلوب و لا كلمة له في بيته أو أنه غير مقتنع بفكرة الزواج منك لانه إن كان مقتنع و لديه وزن في العائلة لما تجرأت والدته في الوقوف في وجهه

ربي يكون في العون