دوامة

[مشكلتي]

السلام عليكم
مشكلتي دون اطالة تحتاج الى آرائكم بكل جدية و بكل صراحة من فضلكم
أنا أستاذة أعشق مهنتي لأنني أعشق التعامل مع تلاميذي و الحمد لله الكل يشهد نجاحي رغم المدة القصيرة لي بهذا المجال ... قبل عملي عرض علي العمل بادارة منصب و مرتب أعلى و رفضت لأن لا أرغب بغير التعليم على الأقل علاقتي بتلاميذي الصغار و فقط و فعلا جازفت كما قيل لي و وصلت الى حلمي
تقدم لي شخص متدين قريب تلميذتي و الكل يشهد بأخلاقه و لكن : أقل مني بالمستوى الدراسي يعني هو متسواه 4 متوسط و عمله حر و لكن أخبروني اهله انه بعد شهر باذن الله سيمسك عمل بمصنع كما وعده عمه و يسكن ببلدية قريبة من ولايتي
فكرت كثيرا و استخرت و مع اني أرفض جدا الفارق بالمستوى الثقافي الا أنو تمسكهم بدينهم كعائلة ككل و أخلاقهم خلاوني نقبل و جات أختو قاتلي هو شرطو تتوقفي على العمل أنا صارحتها اني نحب عملي و لكن في حالة واحدة راح نبطل اذا لقيتو راح يأثر على بيتي و أولادي يوم آخر لكن اذا استطعت نوفق بينهم لا * و فعلا هذا تفكيري حتى قبلو *
قاتلي راح نقلو و قاتلو و عادي طلب رؤية شرعية و تمت و يا ريت خاوتي نحكيلكم و احكمو من فضلكم :

بصراحة ارتحتلو كثير و هو ثاني و وافقت على حجاب شرعي مع انو حجابي محترم و وافقت بكل شروطه مثلا يسكن مع عايلته و خدمته و مستواه و الأخذ برايو و طاعته و بالعكس مقتنعة لكن :
و انا نتحدث معه و اخته غلطت ان كانت غلطة و قلت كلمة بالفصحة بحكم عملي ربما او بحكم اني نطالع كــثيــر قاتلي أختو ** حتى أخي يعرف يتكلم فصحة و قاري ** تحكمت في أعصابي و سكتت و هو أنقض الموقف بصراحة
تطرقنا لموضوع العمل و قتلو رأيي اني ما نقدرش نوعدو لكن مستعدة نوعدو قدام الجماعة اذا يوم لقيت دارك و الا انت و الا ولادك ناقصين حاجة نبطل في لحظتها لأني حاليا نخدم ساعات تعد على الأصابع و مانيش حاسة بالوقت لكن ربما الحياة الزوجية شيئ آخر قالي نديرو خطبة و نهار تجي لداري نقلك على الخدمة ايه و الا لا
رفضت لأني نحب الصراحة و طلبت منو نحطو نقاط على الحروف قبل الخطبة هو سكت و لما بقيت غير انا و اختو قاتلي نصارحك احنا كعائلة نرفضو الخدامة مهما تكون و كمثال اخي المتزوج جاب زوجته في عامها الاخير بالجامعة و من بعد قالها انساي تكملي قرايتك و هي مازالها غير عام ؟؟؟؟؟؟؟؟؟
بالمقابل قريبهم اللي جاء معاه قال لأخي المشكل في والده هو لي رافض الخدمة راح نتشاورو و نرجعولكم

بعد أيام قريبهم قالنا خلاص راه والده و هو تاني و راه فرحان و مرتاح وافق و قالو العكس خليها تخدم لأنهم يعرفونا كامل و يعرفو أخلاقنا الحمد الله
المفاجأة اتصلت اختو و قاتلي ايه واش رايك قلتلها الراي رايكم قاتلي هو قالك نفس الكلام اللي قلتهولك وقت مخطوبين اخدمي عادي نهار تجي لداري نقلك ايه و الا لا
حسيت روحي راح ننفجر و نقلهم واش هدا التمسخير ؟؟؟


خـــاوتي واش رايـــكم أنا اعتــبرتو غيـــر صريـــح يعــني حاب يديــرلي واش دار خــوه لزوجــته ؟؟؟
علاه قريبــو أكدلــنا موافقته هو و والده ؟؟ و علاه هو قال لا و رجع لكلامو الأول ؟؟؟؟؟ مع العلم نأكدلكم صدق قريبو و ما يكدبش ؟؟؟
ما نعرف الا فهمتو واش راني نخمم
لكن بحكم متدين تنازلت على عدة أشياء و مقتنعة لكن هل ردة فعلو منطقية أم أسلوبه أناني أم ماذا ؟؟؟؟؟؟

لو كنتم مكاني كيفاه تفكرو ....
لو احتكم يا رجال كيفاه تنصحوها .....؟؟؟؟
و أخواتي يا ريت تكونو فهمتوني و تنصحوني .....
سلام الله عليكم جميعا أنتظر آرائكم بفارغ الصبر

[z.abdo]

السلام عليكم اختي

شيء جميل ان تجدي رجل متدين وخلوق لكن من الصعب ان تنقص الصراحة خصوصا في البداية

كذالك هو لم يصارحك عن عملك لا ايه و لا لا يعني اكيد رافض العمل


كذالك هم عائلة محافظة يعني يحكم فيها الأب والأم وممكن يتدخلو في قرارت زوجك


وحتى لو سمحو لك بالعمل فمذا يكون شعور الكنة الاخرى و زوجها سيكون ضغط على زوجك

أنت طلبت المشورة وأنا رأيي اخطيك من هذا الزواج والله اعلم اختي

[doba]

صراحة أختي أخطيك منو وشوفي مكتوبك

[ايمان نور الجزائر]

يا اختي الزواج يبنى بصراحة وهذا اسمه اللف والدوران
واذا هوما كعائلة ما يقبلوش الخدامة ما راحش يغيرو رايهم
انتي شادة كلمتك وهوما راح يديرو رايهم وتاني ما راحش يفرقو بينك وبين الكنة الاولى
ضف الى ذلك فرق المستوى الذي له تاثير كبير ايضاااااااا
فديري حسابك تتزوجي تبطلي الخدمة ويمكن تحصل مشاكل
من الافضل تفاديها قبل فوات الاوان

[نبراس الصداقة]

والله يا اختي في رايي العيش مع الأهل يكون مقبول في حالة وحدة برك الي هي يكون وحيد أبويه
والا يكونو كبار وماعندهمش شكون يرعاهم
لكن في هكذا وضع اسمحيلي اذا الوالد هو الي يتحكم في شكون الي تخدم وشكون الي لا
قرار العمل تاعك من عدمو لازم يكون باقتناع منه هو فقط لا سواه
وانت تشوفي الي يساعدك
صح من واجبه بر والده لكن انه يسمحلو باش يتحكم في حياتكم في قرار مصيري كيما هذا لا
ومادامك استخرتي اعملي وش يقلك قلبك برك
وماخاب من استخار الخالق
لازم الصراحة تكون من الاول والرجل معروف بمواقفه وكلمته فأن غابت غاب الاحترام مستقبلا
لا استطيع ان اقول اقبلي او لا
لكني لو كنت في مثل حالتك فلن أقبل
وانت توكلي على ربي واعملي الي تشوفيه صالح
قادرة تعيشي مع الوضع هذا كملي
مش راح تقدري ماتدمريش حياتك
وتاني الغلطة الي قلتي عليها انك قلت كلمة بالفصحى
وتحسست منها اخته يعني كي تولي عندهم في الدار
ممنوع تجيبي سيرة الخدمة والا ماتصلحيش اوراق التلاميذ هذه حساسية مفرطة
ربي يقدملك الي فيه الخير والصلاح

[موج و صخر]

اختي الصراحة هي اساس الزواج
ماشي يكلخ لك : يقول لك في الخطبة اخدمي و بعد الزواج نشوف....؟
علاه الخطّاب ما يخطبوش البنات الي بلا شغل ؟؟
لازم يعني يروحوا يخطبوا الخدامات و يشرطوا عليهنّ التوقف عن الخدمة.....بفففففف
اختي نقول لك : لازم يحدد موقفه من الشغل قبل الزواج : إيه و لا لالا حتى تتخذي قرارك انت

بما انّ مهنة التعليم مهنة نبيلة و فيها العطل كثيرة يعني من حقك تشتغلي
و توفقي بين شغلك و بيتك
و الله المستعان

[lynoor]

انا رايي التعليم مهنة جد مشرفة للمراة و خصوصا اذا كنت تحبي عملك .....موضوع العمل لازم يحسم من البداية ما شي كي تتزوجي تلقاي روحك امام الواقع يحبسك من الخدمة وانتي ما يكون عندك ماتديري و خاصة لن زوجة خوه حبسوها حتى من القراية
خمي مليح و حتى واحد مايعرف صلاحك خير منك و ربي يسهلك

[ام نسمة]

مرحبا ..............صراحة موقفك يستدعي منكي 1من 2 .............اي انو لازم هو يجي ويجيب معاه ابوه مش حد اخر ويحضر ابوك وخوك وتقولو اخر كلمة قدام جماعة شهود هي اكيد مش راح تقولو راح نشهدو عليكم ناس ولا حاجة يعني بدون مايحسو انكم راح تشهدو عليهم اعرضوهم عندكم غذا ولا عشوة ويحكو الرجال بكل ووضوح عن هاته النقطة بالتحديد يعني ابوكي و اخوكي او وكيلك في الزواج يطرح هاته النقطة ويستفسر بوضوح ان قبلو توكلي على الله وان رفضو ..............فلا تفرطي في عملك واكيد راح يجيبلك ربي مكتوب اخر وكلمة من بعدد الزواج يقرر راها واضحة وضوح الشمس انو راح يحبسك فهمتي هذا ليس قادرا حتى ان يعطيك وعد لانو مايحكمش في روحه لذا قلتلك لازم لازم ابوه يحضر ويسمع ولا هو اللي يقول اخر كلمة بالنسبة لموضوع العمل ................ولاتنسي الاستخارة ايضا فهي مهمة جدا وتنور لك قلبك
..........حظ موفق اختي .................

[عبد الله 22]

السلام عليكم ، نظن المشكل لكبير كثرة الناس ليدخول في قرارات هذا الخاطب ، ،ظن هذا أخطر لان الرجل لميحكم مباشرة في عايلة أي واحد من العائلة الكبيرة يقدر يأثر أو حتي يدمرها

[wafa16]

باينة يا اختي راه حاب يدير كيما خوه بعد الزواج يبطلك من الخدمة لانهم عندهم قانون يمشو بيه و ما شي على جالك يبدلوه
و باباه هو اللي راه يقرر يعني تعيشي في دار الغاشي و يتحكمو فيك
و ايظا قلتيلو ادا صبتني مقصرة بعد الزواج حبسني
يا اختي هدي ماشي هدرة لانو مستعد يلقالك الف سبة و ادا ما لقاهاش يختلقها و يقولك ماراكيش قايمة بدورك امالا ما تخدميش
امبعد يا اما تحبسي يا اما تخشني راسك و تولي مطلقة لداركم
و نقطة اخرى المستوى حتى ادا هو ما حسش بيه راكي تقولي اختو دخلت روحها على حاجة تافهة و قالتلك خويا تاني قاري كانك راكي تزوخي عليهم
انت استخيري و اللي فيها خير ربي يقربها
لكن لازم هوما تاني يحسمو امورهم يا ايه يا لالا و ما يتلاعبوش

[الفاتحة]

بداية احييك على حبك لمهنتك السامية،وإن شاء الله تكوني سبب في تنشئة اجيال المستقبل ، بالنسبة لمشكلتك فيها من الجوانب الكثيرة التي تحتاج التمعن فيها....كما فهمت أنك لا تشجعي الفارق في المستوى ثم توافقي على السيد لأنو متدين ، اوكي متدين حاجة مليحة لكن مادمت مبدئيا لا تشجعي الفارق في المستوى يعني فيما بعد لن تكون لك القدرة على تحمل عقليته يعني الدين نتاعو لن ينفعك لأن الرجل إذا احس أن المرأة تحقره سيبغضها وهو محق في ذلك وهنا تبدأ المعاناة .....ثم حكاية العمل شوفي يا أختي يعني انت عندك مبدأ واضح أنو موش راح تخلي خدمتك وهو حسب مافهمت ناويلك على أنو يحبسك عن العمل ، هنا اختلاف كبير بيناتكم وأنت ماراح تبدليلو عقليتو وهو ماراح يبدلك عقليتك بشان هذا الموضوع وزيد تدخل العايلة في شؤون زوجك مرة تتدخل الأخت وتحاول تشعل النيران وتقول حتى خويا يعرف الفصحى وكانها بدات من قبل بداية حكايتكم تفسد في قلب خوها عليك هذا اللي قدامك مانعرف واش تقولو من وراك ، هاذ والده يتدخل في شؤون ولدو ، هاذ العايلة محافظة ، هاذ العايلة ماتحبش الطفلة تخدم...شوفي يا ختي معليش العايلة تعطي رايها لكن لازم الانسان يكون عندو شخصية، والخاطب راه ضعيف الشخصية حسب ماحكيت

عموما رأيي اخطيك منه وربي يعوض عليك خير منه

[سلاف26]

لو كنت مكانك أظل على كلامي و إما عليه أن يقتنع بعملك أو يذهب لخطبة أخرى ماكثة في المنزل
صراحة شاوري عقلك مليح و واش يخرج عليك انت و يريحك انت ديريه حتى لا تندمي يوما ما
و ربي يسهلك و يرزقك بلي فيه خير ليك انت

[manels]

السلام عليكم اختي

نقولك الراجل كان صريح معاك راهو رافض الخدمة جملة وتفصيلا يعني ما تكذبيش على روحك وتقولي قالي ايام الخطبة اخدمي ومن بعد لالا راهو واضج اي واحد يقدر يفهمها يعني قالك عند والديك اخدمي نهار جي لداري انساي الخدمة ورايح تسكني مع عائلتي ورايحة تولي ربة بيت تربي ولادك وتخدمي زوجك يعني حكاية باباه قبل او هو رفض من المفروض انو هو الي يقرر انت وهو مستقبلكم .

الان كوني واضحة مع نفسك هل تقبلين بهذه الوضعية المكوث في البيت حسب شروطه او ان ترفضي وتكملي عملك وربي يرزقك زوج صالح

يعني القرار يعود اليك ولد الناس كان واضح واختو فهماتك الوضعية

تحياتي

[بلسم غرام2018]

والله بيدك الحلللللللللللللللللللللللللللل

[darkangel]

انت طلبتي المشورة أختي : ما تخطيش صلاة الإستخارة
كدلك لازم مادامك حابة تخدمي تحطي شرط من شروطك العمل و ابقاي متمسكة بقرارك قبل ما توقع الفاس فالراس
ما عجبتنيش العفسة لي دارهالك كي تجي لداري نقولك تخدمي و لا لا
هادي معناتها ما تخدميش بالاكي تريسكي مع واحد كيما هدا اختي
و ما تدي غير لي كاتبوا ربي

[ranou gigi]

موقف صعب اختي و راني حاسة بيك لسبب راح نحتفظ بيه لنفسي اتبعي نصيحتي و انشاء الله راح اكون غير الخير
قلت انه اقل منك مستوى هذا شئ عادي لانه درسنا في الجامعة و رأينا الفئة المتقفة كيفاه تفكر يعني لافرق بين الي قرا و الي ماقراش
ثاني حاجة قالك بطلي خدمتك هذا الشئ مالازمش توافقي عليه لانك معلمة و راك تربي في اجيال و عند ربي راك من احبابه لانه كاد المعلم ان يكون رسولا لذلك اختي لاتوافقي على الخطوبة الا اذا وافق هو على خدمتك طول حياتك يعني ماتخليشوا ائثر عليك و اذا ماقبلش بناقص منه هذا الزواج
و بالنسبة انك تسكني مع العائلة معليش لكن بشرط انوا تخليه اديرك بيت وحك في المستقبل لانه في المستقبل و انا متأكدة انك راح تندمي انك ماخليتشوا ادير دار
موفقة في حياتك اختي الحبيبة و لي طلب فقط ان تخبيرينا بالتطورات

[angel_girl]

إذا كان بالفعل ذو خلق و دين لكان صريح منذ البداية معك خاصة في أمور الزواج

[مريم الصابرة]

السلام عليكم اختي
انا من رأي هذا اختو هي راهي تسير فالأمور وهذا ما عندوش شخصية يعني كان يقول ديركت إيه او لالا من رأي اخطيك منو او يبين روحو ديركت موافق او لا لانو الراجل يمد كلمة فالاول من بعد رجع فيها هنا لعب الذراري رأي اخطيك وربي يعلم موفقة

[السي محمد]

ارفضيه هو يرتاح و انتي ترتاحين

هو يجيبله ربي من طريق و انتي يجيبلك ربي من طريق آخر

انا و صديقي الانتيم جدا ( اصدقاء منذ اكثر من 16 سنة) وضعُنا المالي و الاجتماعي متشابه لحد كبير جدا ( بلا عمل او مسكن خاص )

تقدمنا لفتاتين ايضا صديقيتين من نفس المدينة و تدرسان نفس التخصص تتخرجان العام المقبل ماستر

التي تقدمتُ لها وافقت على ترك العمل و قالت لي (( انت اغلى من العمل و من الدنيا))

التي تقدم لها صجديقي رفضت و قالت **ان العمل هو اساس حياتها و لا تتنازل عنه **

و ها أنا ذا ساعقد بعد رمضان إن شاء الله بينما صديقي مازال يبحث ؟؟؟؟؟.

انا افهم اصرارك على العمل و اتفهّمُه كما تفهَّمَ صديقي شرط تلك الفتاة و تم الرفض

و أبعث بتحية الى الشاب الذي تقدم لك لانه لا يريدك عاملة او اهله كما حيّيت صديقي من قبل
( ابلغيه تحياتي...امانة )

انا برأيي حتى لو تزوجتما فلا هو يرتاح معك و لا انتي ترتاحين معه

أصلاً انتي ترين انه أقل منك ؟؟؟؟ و هذا اكثر ما يقتل الزوج و العلاقة الزوجية

ربي يسهّل عليكم

أما موضوع الاخت ههه ربما غيرة نسوان او هي تريد له فتاة اخرى أو او أو ...

[نسمة تفاؤل]

اختي ننصحك نصيحة اخت مادام متدين ويوفرلك كل شيئ خليك من الخدمة اتزوجي خير ومستقبل المراة يكون روعة لما تصيب راجل متدين ويتهلا فيها من رايي خليك من هذه الوساوس وماتنسايش الاستخارة ربي يوفقك

[حميد.ص]

اختاري بين الزواج و العمل

[amine0007]

اختي هادا راهي باين نواياه بلي بعد الخطبة رايح يقلك حبسي الخدمة.مالا ماتتسرعيش وزيدي فكري مليح