خطيبي والرسالة

[مشكلتي]

السلام عليكم
عندي 6 اشهر ملي تخطبت ( عقد مدني + شرعي) وبقاو شهرين
لكن خطيبي خرج بخرجة جديدة كل اسالته عن الماض مهوووس باي حاجة تثير الشك
وسبق وسقساني وقلت له انت اول واحد في حياتي ومصدقش
وحب يحلفني وقلتله هذا هوالكلام والمصحف منحلفش وهو دارها زكارة فيا
مالا مشيتي بكري ودرتيهم للروضه

وقبل مده جا زارني ووجه مقلبه عليا ويهدر بالغواث ويحمق وقالي شكون محمد هذا
قتله المحمدات وش كثرهم ربي واي فيهم
قالي مليح بصح نقصد محمد الـــ هذاك الي بغيتيه

يا خاوتي هذا واحد جارنا كي كنت نقرا 2 متوسط بعثتله رساله وقتله نشتيك
لكن سي خطيبي كثر فيها وقال وضهرنك بديتي الطريق المعدووله من الصغر
وانا والله العظيم كان محمد هذا اول واخر واحد عرفته والله حتى الهدرة مهدرتش معاه
بعثتله البريه هذيك وانتهينا قبل ما نبداو

سي خطيبي هذا ضرك قافل كلش واتصل قبل اسبوع وقالي وش ما بيناتنا انساي
وانا رديت عليه ربي يجيب الي فيه الخير والصلاح


بصح للوقت الحالي ما بان والووو والعرس وتفاصيله ماشيه الا مول المول
موش باين عليه حتى حاجه
وكل ما اتصلت به ميهزش عليا

والحل معاه
يعني يخليني ع جال بريه بعثتها في الصغر

ا

[Napia]

حنونه إن شاء الله تتصلح الأمور
أدعي ربي وستخيري أللي فيه الخير يجيبوا ربّي
وتفاهمي معاه دك ماشي من بعد ينكّدل عيشتك
زعما هو ما دار والوا فحياتو؟؟؟؟؟؟؟
ربي يسترك أختي و ما يفضحكش على والوا
اللهم استرنا فوق الأرض وتحت الأرض ويوم العرض

[Assouma 93]

انا من طبعي امقت الرجل المشكاك او الغيار فوق الحد لازم تحكي معاه و تفهميه بلي ماكيش لعبة في يدو اسفسري منو اذا حاب يكمل معاك ولا لالا متبقيش معلقة هكذا ربي معاك اختي

[حميد.ص]

إن شاء الله تتصلح الأمور بيناتكم في القريب العاجل......ان كان من نصيبك فربي يجمع بيناتكم بالحلال....و ان صرفه الله عنك فهو الذي سيرزقك باحسن منه مئة مرة....عسى ان تكرهو شيئا و هو خير لكم...............ربي يعطيك الخير

[naamane3]

هذا انسان موسوس سامحيني على اللفظ
ادعي ربي يصلح امرك
واكثري من الاستغفار وربي يجيب اللي فيه الخير

[ايمان نور الجزائر]

هذا انسان موسوس يا ختي
والعلاقة الزوجية الحقيقية تبدأ بالصدق والثقة فان اختفت الثقة فلا داعي للمضي

اكثري الدعاء والاستخارة وان كان اهلا لك...سيوفقكما الله

[amelabdou]

يا درى و شبينا حنا و لا وش بيهم رجال؟؟؟؟ صدقيني رانا في نفس المشكل شوفي نقول لختي حاجة كاين الواحد الأحد لي يقدر يحاسبنا و فقط و كل واحد يشهد عليه فعلو حنا عند ربي شريفات و نقدرو نثبتو هذ الشيئ و لي باعني بالفول نبيعو بقشورو كيما يقولو و مكتوب حد مايديه حد فوضي أمرك لربي هو قادر على كل شيئ نبقاو حنا مجرد بشر يخطيئ كثيرا و يصيب قليلا و ربي يصلح إن شاء الله.

[الفاتحة]

لا حول ولا قوة إلا بالله ..شر البيلة مايضحك ،شوفي يا ختي الكرة راها في ملعبه ، والسبب العقد المدني اللي درتيه ، هو ماراح يخسر والو أما انت فتخسري بزاف وتتعذبي بزاف وكلام الناس ما يرحمش، شوفي يا ختي العزيزة راني حاسة بيك ، ونعطيك نصيحة وديريني كي خيتك، حطي كرامتك تحت رجليك، وحاولي بكل الطرق ترضيه ، لانو انت اللي غالطة في الأساس، عطيتيه الفرصة باش يخرط عليك ويدخل في خصوصياتك، انت من تعلم الناس كيف يعاملونك، عموما إذا تعرفي مكان خدمتو روحي واهدري معاه وكوني حازمة وقوليلو يزينا من التمسخير ، وخليه هو الاول يحلف بلي ماعرف حتى وحدة قبلك، والله وصلنا البعد عن الدين لأتفه الأمور ، شوفي أختي هذي نصيحتي ليك لانو حسب مشكلتك حسيت انك انسانة ضعيفة وقليلة الحيلة ، وإذا أنا غالطة وانت قادرة على شقاك فلا تبالي به وخليه يدير واش حاب والرزق على ربي موش على العباد، دوكى أنت تعرفي روحك وخيري الطريق اللي يخرج عليك ، ربي يفرج عليك عاجلا غير آجل.

[صفــاء]

وكيـــــــــــف عرف بأمر الرسالة؟؟؟ غريبـــــــــــة

أختى الغالية أنا نظن لو كانت نيتو يتركك كان اتصل بأهلك وخبرهم بالامر

وبما ان امور العرس ماشية فأظن أن نيته ليس تركك

الكرة في ملعبك مثلما قالت لك الأخت

حاولى أن ترضيه وتقنعيه

وربي يجيب اللى فيها الخير

[السيدة كرمين]

منين عرف بقصة الرسالة ؟؟ هذا هو السؤال وعلى أساسه تقرري
ان كان من نوع مشكاك و لدرجة يسأل وراك هنا اسمحيلي نقلك
هذا راح يتعبك غدوة يااااااااااااااااااااااسر ،ليتك حلفتي من الأول
كان ربما انتهى الموضوع لكن قدر الله انك ما تحلفي حتى تعرفي
مستوى شكه وين واصل ، انصحك بالاستخارة في موضوع الطلاق
لأن خسارتك اليوم أهون من خسارة الغد فهناك من يصل للضرب
و الاهانة و القتل وووو فالغيرة شئ و الشك شئ آآآآآآآآآآخر

[العهد الرائع]

لا كان كل راجل يحوس في الماضي تاع كل فتاة
يمالا حنا تاني نديرو نفس الشي
.و نشوفو وين توصل

[ام نسمة]

والرسالة اللي لقاها مافيهاش تاريخ ههههههههههههههه والله هم يبكي وهم يضحك انا في نظري خطيبك يحبك بزاف ويغير عليك بزاف انا نحب الراجل اللي يتبع كل صغيرة وكبيرة في حياة شريكتو لانو اول مايكرهك لن يهتم او يسال على ادنى تفصيل في حياتك حتى ولو كان من جانب الحب والغيرة ..........................الراجل اللي مايغيرش مايحبش وماشي راجل ...............روحي حاوليه واحكي معاه وخبريه شحال تحبيه ومادام راكي عاقدة راه زوجك على سنة الله ورسولو راكي عارفة انتي انثى استعملي الاسلحة الفتاكة اللي تملكها كل انثى ......................اقصد الكلام الحلو بلاك تفهمي حاجة اخرى ............ربي يخليه لك يارب ويخليك ليه .............لوكان جا عينه يفحتك لوكان قال لاهلك ماشي ليك وترجع الهدرة تاع الرجال ماشي انتي وهو هو راه زعفان امالا رضيه

[dotnet]

والرسالة اللي لقاها مافيهاش تاريخ ههههههههههههههه والله هم يبكي وهم يضحك انا في نظري خطيبك يحبك بزاف ويغير عليك بزاف انا نحب الراجل اللي يتبع كل صغيرة وكبيرة في حياة شريكتو لانو اول مايكرهك لن يهتم او يسال على ادنى تفصيل في حياتك حتى ولو كان من جانب الحب والغيرة ..........................الراجل اللي مايغيرش مايحبش وماشي راجل ...............روحي حاوليه واحكي معاه وخبريه شحال تحبيه ومادام راكي عاقدة راه زوجك على سنة الله ورسولو راكي عارفة انتي انثى استعملي الاسلحة الفتاكة اللي تملكها كل انثى ......................اقصد الكلام الحلو بلاك تفهمي حاجة اخرى ............ربي يخليه لك يارب ويخليك ليه .............لوكان جا عينه يفحتك لوكان قال لاهلك ماشي ليك وترجع الهدرة تاع الرجال ماشي انتي وهو هو راه زعفان امالا رضيه


بوركتي أختي فهذا عين الصواب

الرجل شديد الغيرة وكلما كان شديد الغيرة فهو شديد المحاسبة وشديد المحبة

وأقول لك شيئا، هو يريد منك امرا ولكن لم تفهمي مقصوده وهو أنه يريد إثباتا صريحا بأنه لم يحدث أي شيء بينك وبين جارك و بأن علاقتك بذلك الشخص لم تكن أصلا علاقة من الاساس وإنما هي مجرد خطأ وشعور عابر لم ينتج عنه أي شيء

فزوجك يحتاج منك حجة بينة لاثبات أنك لم تقومي بالوقوع في الخطأ ومعصية الرحمان لهذا فأنا أقول بأنك لا تملكين الدليل لكن الحل معك .. كيف؟؟؟

الحل هو أن تقسمي له بأنك بريئة من كل هذا وأن الله شاهد على ذلك (وكفى بالله شهيدا) ألا يكفي أن يكون الله شهيدا عليك وأكثري عليه بأنه لم يصل الى قلبك غيره وانها مرحلة المراهقة ..الخ ولكن بأسلوب أنثوي راقي ولا تنسي أهم شيء وهو أن تكثري من طلب السماح منه حتى لو لك تكوني مخطئة فهو الامر الذي لا يستطيع الرجل أن يتخطاه في نفسه حتى لو أنكره أمامك.. لانه فعلا يحبك ومهتم بك.

وكما ذكرت الاخت سابقا أن الرجل اذا كره المرأة لن يهتم بها ولا بتفاصيلها بل يتركها مباشرة.

اعذريني اختي ان كان في كلامي ما يجرح لكن هذا هو مانجنيه من البعد عن التعاليم الربانية.

[soumi7]

يا ناس وشبيكم كيفاش تقولولها حاولي ترضيه الله يهديكم هكذا تثبتلو بلي شكو حقيقي هذا انسان موسوس يا اختي انت درتي اللي عليك الانسان كي يحب يسقسي خوه على حاجة واش يتوقع اجابة هاذي الاجابة تكون قاطعة وتغلق الموضوع ولكن كي يجي يسأل وهو داي فكرة علاه يسقسي ماللول هو هكذا سقساك جاوبتيه ébin المفروض كان الموضوع ينغلق تم وديجا لنفرض انك عرفت واحد قبلو هو واش دخلو معندوش حق يحاسبك على ماضيك وانت تان ونعطيك راي اختي لابغات راك عاقدة ويلا راك متزوجة يا سيدي واوالدة عشرة معاه بالاك تذلي روحك كي يكون هو المخطئ ومتتساهليش وقيلونا من هاديك الفكرة انت مرا و تخسري وبلابلابلا ,,,,,,احنا خاسرين بكافة الاحوال ويبقا علينا نخرجو بأقل الأضرار ليس الا اضعف الايمان وحدة متخسرش صحتها وسكوت المراة عن خطا الرجل والله عن تجربة سكوتها او تجاهلها كيما يوصونا ديري روحك مشفتيش فوتي راك وليه و هو الراجل و و و والله والله والله يخليه يتمادى يتمادى وكل مرة يزيد فلادوز تسمحي مرة يحسبك راضية بالوضع يزيد يسي روحو و هكذا حتى تولي نشاف عندو ونزيدك اختي ياوالله الراجل الموسوس صعيب صعيب صعيب تعيشي معاه حطيلو حد قبل الزواج وبلا منحكيلك العواقب ,

[wafa16]

هدا راه موسوس و مريض بالشك اعطيه فرصة اخيرة للحوار و ادا ماقبلش خليك منو لانو بعد الزواج قادر يعايرك و يحتقرك و يقعد يعاودلك في هاد الحكاية تع البنات الصغار

[amina260]

السلام عليكم ورحمة الله وبركاته
اختي الكريمة ل اداعي للقلق او التوتر ما دمتي على حق و ان لم تفعلي شيئ سوى رسالة الصغر تلك ( lمع انو كان لازم تصارحيه بيها فسبب المشكل من مرحلة الخطوبة حتى الزواج هي انعدام الصراحة من البداية كنتي انتي كي خطبك حكيتيلو على كلش بالباء والتاء هاكا العلاقة تكون خالية من الشك وميكونش فيها هذا النوع من الخلافات انا راي الخطأ الاول ل يعملتيه مخبرتيهش بهذي
رغم ذلك انا أرى انه ليس لديه ادنى حق على محاسبتك عن ماضيك لانه بالأصل لم يكون موجودا فيه اي لا تعتبر لا خيانة له ولا اهانة له يعني كون درتيها درك الحق معاه )

واختي انصحك ان لا تفسري هذا الامر من ناحية واحدة فقط بلا استفرغي لناحية الرب سبحانه ربما جعل الله هذه الرسالة او هذا الامر سبب لك لأن هذا الرجل ليس من نصيبك ربما انها اشارة من الله سبحانه ونصيبك مع رجل اخر ومتزعفيش خلاص حنونة لانو هذي المرحلة هي تجي هاكا بعض العلاقات تنجح والاخرى تتحل وتخلاص بالفراق بصح قولي الحمد لله لي ربي راه يوريلك في طبايع هذ الشخص من ذرك هذو قع ديريهم في عين الاعتبار وشوفي اسكو من بعد مراحش تكونلك عثرة في حياتك ولالا

ويا حبيبتي الغالية خمي ملييييييييح ومتتقلقيش وربي يكون معاك ان شاء الله ويسهل لك ويحفظك
ارق تحية اختي

[سدرةالمنتهى]

السلام عليكم

عجبا تفكير الخاطبين الى الوراء لا عوض يفكرو في المستقبل و يخطولو يظالو ينبشو في الماضي و يبحثو في رسائل المراهقين

الله يهدينا جميعا

[ام عبد السلام]

اسمعيني مليح يا اختي
هذا انسان موسوس
و عارف بالرسالة قبل ما يتزوجك
على هادي سقساك
و كي ما قلتيش
حكم بحكمو بلي انت تخلطي
هذا انسان يكرهك في حياتك
كون جيت في بلاصتك
نحبس ما دامنا على البر
لانو حياتك يقلبهالك
نكد و طول يبقى يفكرك
بالبرية هادي
ادا ما زادش خرجلك حاجة اخرى
و زيد كي ما يردش عليك
خلاص باينة

[khaoula khouloud]

اليلان عليكم اختي
انا قرات ما كتبتبه وفهمت وانصحك انك تحاولي تتكلمي مع يماك ونفهميها كل واش كاين وهي تعاونك وتنصحك للخي إن شاء الله وماتنسايش الحاجة الاولي تتوكلي علي ربي وتدعي بزاف
وربي يكون معاك اختي

[achwak crazy girl]

ختي انا رايي انو مكاان مدخل البرية بااسكو هدي في الصغر وربي يهدي ما خلق

[امجد الامين]

يا ناس وشبيكم كيفاش تقولولها حاولي ترضيه الله يهديكم هكذا تثبتلو بلي شكو حقيقي هذا انسان موسوس يا اختي انت درتي اللي عليك الانسان كي يحب يسقسي خوه على حاجة واش يتوقع اجابة هاذي الاجابة تكون قاطعة وتغلق الموضوع ولكن كي يجي يسأل وهو داي فكرة علاه يسقسي ماللول هو هكذا سقساك جاوبتيه ébin المفروض كان الموضوع ينغلق تم وديجا لنفرض انك عرفت واحد قبلو هو واش دخلو معندوش حق يحاسبك على ماضيك وانت تان ونعطيك راي اختي لابغات راك عاقدة ويلا راك متزوجة يا سيدي واوالدة عشرة معاه بالاك تذلي روحك كي يكون هو المخطئ ومتتساهليش وقيلونا من هاديك الفكرة انت مرا و تخسري وبلابلابلا ,,,,,,احنا خاسرين بكافة الاحوال ويبقا علينا نخرجو بأقل الأضرار ليس الا اضعف الايمان وحدة متخسرش صحتها وسكوت المراة عن خطا الرجل والله عن تجربة سكوتها او تجاهلها كيما يوصونا ديري روحك مشفتيش فوتي راك وليه و هو الراجل و و و والله والله والله يخليه يتمادى يتمادى وكل مرة يزيد فلادوز تسمحي مرة يحسبك راضية بالوضع يزيد يسي روحو و هكذا حتى تولي نشاف عندو ونزيدك اختي ياوالله الراجل الموسوس صعيب صعيب صعيب تعيشي معاه حطيلو حد قبل الزواج وبلا منحكيلك العواقب ,

معكي حق أختي لكن هذاالرجل زوجها يجب عليها أن تعالج الأمور وتقنعه بالحكمة وحديث الناس مايرحمش إذا بطل عليها الناس من الحبة إديروا قبة

[AMINA.Z]

هادا دراري و الله

خليه هو اللي غلط و هو اللي راح و هو اللي يرجع

كاين حدود لازم يحترمهم و لازمو يكبر عقلو شوية

الله يهديه