اعطوني حل

[مشكلتي]

السلام1

منذ اسبوع شرالي بابا هاتف ب 5 ملاين و نص مسكين شراهولي و مخلاهش في قلبي و قالي اسمحيلي ماشريتلكش اللون اللي تحوسي عليه
البارح قاتلي حبيبتي بيعيه و اشري سلسلة ذهب
و اليوم عيطتلي قاتلي نتبادل انا و انتي الهواتف و نزيدك مليون
و حلتني حشمتني
انا من جهة عجبني الهاتف تاعها و من جهة كان يفيق بابا علابالي نقيسوا
اصلا هدية من عندو

نتبادل معاها???
واش نقولها??
غاضتني من الصباح و هي تحلل فيا

[basma09]

انا اختي ما نقلك والو انا لوكان كنت في بلاصتك ما نبدلهاش باسكو بابا مسكين بالاك نحاها علا روحو و شراهولي و راكي تقولي برك ما يخليهش فخاطرك ومبعد تروحي تبدليه معا صحباتك
ما جاياش كامل
و باباك اكيد راح تقيسيه لوكان تبدليه و لا تبيعيه نورمالمو بلاما تخمي ديريكت قوليلها سمحيلي ونتي عزيزة عليا مي الله غالب ما نقدرش

[salsila]

هدا ماشي جاست اختي والله حشومة عليك تبدليه هدالي شراهولك باباك ماشي واحد اخر لوكان انا في بلاصتك نحطو في عينيا
لالا اختي ماكلاه تبدليه

[زاجـل الفـرح]

أي شيء يشريهولي ... بــابــا ...

ما نبدلوش بكنوز الدّنيا

الصديقات يجيو و يروحو ..... مبصح بابا ..... وشكون غادي يكون كيفو ..

و تحللني مليار في الساعــــة .... ما نبدّلش


بابا مشي كل يوم يشريلي حاجة ...

و لو تكون بــ 200ألف و بورتابلها بــ 5 ملايين .... ما نبدلش

الصّح في الشخص لي جابلي الحاجة من في الحاجة في ذتها


القيمة الحقيقية و المعنى لي يقيس بزاف ... في حب الشخص لينا و في الفرحة لي يكون ينتظرها منّا لما يقدمنا الشيء... مش في الحاجة لي يجيبها

أكيد رح تقيسي باباك ... و توجعو بزاف
و يحس روحو ما عندوا ذوق ..و ما عرفش يشري


لوكنت أنا في بلاصتك نخبيه و يقعد عندي العمر كلو

نشري حاجة خلاف لمّا يكون عندي الفلوس
و نخبيه ... كأحلى ذكرى من عند بابا الغالي .

[NADJIB-90]

لما تعطي هدية قدمت لك من طرف شخص ما بسهولة فهذا يدل علي قيمة الشخص عندك الجواب واضح قولي ببساطة منقدرش هدية من عند انسان غالي عليا ومنقدرش نفرط فيها فاكيد ابوك تعب حتي استطاع ان يقدم لك هذه الهدية القيمة

[sali-sali]

هدي هدية من باباك
ولو كانت حاجة صغيرة و لكن قيمتها كبيرة
وهديته راهي غالية
كون انا حتى و يخسرلي نخبيه لانو هديه من اغلى الناس

[سيرين شوب]

لو تاخدي بنضيحتي ماتبيعيهلهاش لانو هديه من باباك والمسطين جابولك وهو فرحان بيه وخايف ثاني مايعجبكش اللون يكفي برك انو اتفكرك وشقى على جالك زخمم فيك وجابلك واش تحوسي انا لو في بلاضتك نحتقظ بيه للابد


عموما هدا رايي وانتي حره

[بثينة 123]

السلام عليكم
انا لوكان جيت فبلاصتك نقولها بمنتهى الاخلاق والادب اسمحيلي هذي هدية من ابي والهدية لا تهدى واصلا لازم كل واحد يرضى برزقوا قادر يكون الهاتف تاعها يخسر بلخف والله اعلم

[سيرين شوب]

لو تاخدي بنصيحتي ماتفرطيش في هدية بابك يكفيكي برك انو خمم فيك وشقى على جالك واشراهلك بثمن باهظ برك باش يفرحك وكان خايف ما يعجبكش اللون هدي برك تسوى الدنيا وما فيها
صحبتك مهيش اغلى من والدك وهدية والدك لا تقدر بثمن

هدا كان رايي والاختيار ف يالنهايه ليك

[هدى الجيجلية]

الهدية
لا تهدى

[سامو حنان]

اختي ننصحك ماتبدليهش هذا باباك قبل صاحبتك ،، مسكين ماخلاهولكش في قلبك و انتي تبدلي هديته بهذه السهولة ،، ماعليش ياك غالي و تاني الهاتف ماهو الا وسيلة اتصال علاش اتشوفي لتاع صاحبتك ،،، انا مانكذبش عليك بابا غالي بزااااااف عليا و الله مانبدل واش يمدلي بكنوز الدنيا ،، استحفظي عليه ،، و ماتجرحيهش ،، الوالدين تقيسهم حاجة صغيرة وربي يشدهوملك

[{ حديث الوجدان }]

كل وحدة تحكم هاتفها يا اختي

واش هذي باباك ينحي من لحمو ودمو وانت تبدلي باش ترضي صاحبتك

اعتذري منها وقوليلها هدية بابا ما نقدرش نبدلها باي ثمن وحتى وكون تزيدك 10 ملاين

وبالزيادة برتابلك ب 5 ملاين باين عليه حاجة شابة ( الله ابارك )

واش تحتاجي كثر من هك ؟

ربي يعينك

[أم دارين]

السلام عليكم

واهذي صاحبتك واشبيها تدبر عليك مرة بيعيه واشري سلسلة ومرة نتبادلوا
لالا يا أختي قوليلها بللي أنتي شراهولك باباك ومتقدريش تبيعيه ولا تبدليه
وهي قولها تبيع تاعها وتشري واحد كيما هو ولا تدبر راسها

المهم الأعضاء اللي قبلوا وفاو وكفاو أضم صوتي لهم
و الله أعلم

هدية والدك حطيها في عينيك وادعي ربي يحفظه لك وجميع الآباء يا رب العالمين

وصل اللهم وسلم وبارك على سيدنا وحبيبنا محمد عليه أفضل الصلاة والسلام

[salam algeria]

حيرتيني انت و صديقتك و كانو المصنع خدم هذا الهاتف و قفل ابوابو تروح تشري من برا تبيع الفون تاعها و تشري واحد عادي و انت احتفظي بهدية باباك

[بلسم غرام2018]

انا اختي ما نقلك والو انا لوكان كنت في بلاصتك ما نبدلهاش باسكو بابا مسكين بالاك نحاها علا روحو و شراهولي و راكي تقولي برك ما يخليهش فخاطرك ومبعد تروحي تبدليه معا صحباتك
ما جاياش كامل
و باباك اكيد راح تقيسيه لوكان تبدليه و لا تبيعيه نورمالمو بلاما تخمي ديريكت قوليلها سمحيلي ونتي عزيزة عليا مي الله غالب ما نقدرش

[موج و صخر]

كيفاش تفرطي في حاجة شراها لك باباك ، بالاك نحاها من فمه و اشرى لك هذا البورتابل
ما تبدليهش و لو كان بالذهب ، و حبيبتك قولي لها : هذية بابا راهي كنز نستحفظ به يا لو كان يتكسر نخبيه مكسر و ما نرميهش
لو كان تبيعيه و لا تبدليه و يفيق ابوك رايح يزعف و يغيضو الحال

تعرفي انا بابا اعطى بورتابل تاعو لابني و انا نحيته لابني و اعطيته و احد اخر و خبيت تاع بابا بيه بالشارجور
و اهذي مدة خمس سنين و انا مخبيته لا بغى يفسد مش مهم المهم انا عايشة في الغربة و نحب بابا نموت عليه
و هذاك البورتابل مين داك نطل عليه و نسلم عليه نحس بابا معايا ...
مالا لا تبيعي و لا تهدي هدية باباك

[مرام سيرين]

هدية بابا ما نبدلهاش بمال قارون على خاطر عزيزة وغالية

[~~ أغيلاس ~~]

تُراعين مشاعر صديقتك و لا تراعين مشاعر والدك ؟

غريب أمرك،

شخصيا لو أهديت شخصا عزيزا علي هدية و وجدته تخلى عنها بسهولة لآلمني ذلك، كيف و هو أبوك ؟

مقولة أن الهدية لا تُهدى و لا تُباع باطلة،

ــــــــــــــــــــــ

احتفظي بهدية والدك، أما صديقتك فأخبريها أنه لا يُمكنك جرح مشاعر والدك بتصرف كهذا .

[mitrochka]

ما تبادليهاش بيه لوكان تزيدلك مليار
هذه هدية باباك
و زيد هو راهو نحاها من لحمو خمس ملاين مالقاهومش منزلين

[HADIL2044]

لا هدا الهاتف هدية من اغلى الناس
الهدية لا تعطى ولا ترد فما بالك بحاجة شراهالي بابا

[adlan18]

أولا هذه هدية من الأب ان بعتها يعني أنك لا تقدري أباك حق قدره
ثانيا صديقتك هذه حسب كلامها مرة تنصحك ببيع الهاتف وشراء سلسلة ذهبية و مرة تقترح عليك المبادلة وتزيدك مليون و على الأرجح هاتفها لا تصل قيمته ل 4 ملايين من المفروض راكي فهمتي نيتها و غايتها من ذلك

[amine0007]

مادام باباك شراهالك وتعب عليه غير مكالاه تبيعيه وصاحبتك قادرة تبيع بورطابلها وتزيد عليه وتشري كيما نتاعك ياك مكانش واحد برك كيفو فالعالم معناتها صاحبتك راهي حابة تكلحك واسمحيلي على الكلمة هادي

[دكتور دولار]

ادا كانت حبيبتك صح من المفروض تحترمك ومترضالكش تبادليها بالعكس نزيد نقلك حافضي عليه لانه هدية م ابوك

راها استغلت ضعف شخصيتك

هدا ادا اخبرتيها بلي راه هدية من عند باباك

[سماح 2]

وعلااه
باباك خرج قلبو بااه يشريلك البورطابل
ومبعد تمديه لا لا