نصيحة ارجوكم

[مشكلتي]

المهم طرحت سابقا حول تقدم شخصعرفته لخطبتي المشكلة ان ابي وافق و لكن امي عارضت بداية لان امه كبيرة في السن يعني خافت عليا يلا نرفد العجوزة و انا مازلت صغيرة 21 سنة و قالتلي مازلت تقراي و تخدمي و مين لقاتني مصرة تقبلت الامر الا انا اللي راني خايفة لانو امه شوية تهدر هدارة و تقيس الكلام فالوجه كارصاص كيما يقولو و انا الطفل ما عندي ما نقول فيه بصح امه لابغات كبيرة بصح راني حاسة غادي تغبني و تبهدلني قدام الناس لخاطر هي تمتم ترد الكلام و تحشم اللي يكون معاها انا علابالي باللي هادي امه و راني متقبلتها بصح خفت مبعد تولي فالزواج و مسؤولية تولي دايرتني طوط بين الحيوط لخاطر من عادتها انها تروح لناس و تحكيلهم على ولادها و تشتكيلهم مابالك انا عروستها انا نبغي وليدها و نموت عليه بصح راني خايفة قلبي راه مزير الحب بعد الزواج ما يوليش حب يولي عشرة و مشاكل و صوالح بزاف استخرت الله مرتين و ادعولي ارجو النصيحة لاني قررت اعطي قرار نهائي في الغد و الله الفل متعلم مثقف متدين لكن راني حاسة باللي مسؤولية اكبر مني راهي جايتني و خايفة نندم مع ارتباطي بعجوزة صعيبة و ربي يسسرلي ان شاء الله

[pharma-93]

يا ختي لوكان جيت في مكانك اكيييييييد نقبل بالراجل ليحبوا قلبي وهادوا اسباب تافهة لي تخليك تخسريه نتي احتارمي يماه وخليها تهدر واش تحب ياك راهي كبيره الأعمار في يد الله ياك فهمتي

[المنديل الابيض]

توكلي على ربي و اقبلي بيه يماه ماشي مشكل
ديريها كيما يماك و شوفي كيفاه تولي تحبك خير من بنها مهما كانت صعيبة
ربي يسهل امورك

[نسمة تفاؤل]

اختي اقبلي اما يماه حاولي قدر المستطاع تحترميها وتعتبريها كيما يماك واذا عاملتيها مليح اكيد رايحة تحبك وخييييير من بناتها ربي يوفقك

[حميد.ص]

توكلي على ربي اختي و الي فيها الخير ربي يجيبها............ربي يجمع بيناتكم في الحلال

[سماح 2]

أنت صغيرة في السن

لكن ادا كنت تحبيه فارضي به لان لا أحد يدووم في هده الحيااة ومن بينهم امه وانت قلت انهاا كبيره في السن

والله أعلم

سلاام

[*نآدرة~]

صعيبة بزاف والله،قبل نقولك حاجة هي عمرها الحاجة ما تجي كاملة بزاف ناس اهل راجلهم ملاحوالراجل ماهوش مليح ولا العكس كيما حالتك،رايي انو تقبلي مادام هاذ الراجل راهو عاجبك ومافيه حتى حاجة تتعيب بالعكس راهو راجل كامل مكمل بسلامتو معناها مالازمش تفرطي فيه،وامه ربي يهديها بالاك كون تشوفك انت ناس ملاح وتعامليها بالمليحة تسكت شوية وماتظلش تهدر فيك انت ثاني كوني طيبة معاها وعامليها بالحسنى ومنين ذاك ودليها راكي عارفة الكبار يبغو نعاملوهم كيما الذراري الصغار خطرة وشريلها حاجة،جيبلها واش تحب ...،ارضيها في وجه ربي وفي خاطر راجلك
ربي يوفقك وييسرك زواجك ويهنيك مع راجلك وعجوزتك

[nawelasom]

السلام عليكم
بالنسبة ليا انا نقولك اختي ما يهمك يماه يهمك هو و ادا هو يحبك كلش يهون ياك انت راح تتزوجي بيه هو
امالي يماه خضرة فوق طعام ساعفيها و ما ترديش عليها ما يدوم حال يجي النهار اللي ربي يهديها او يديها
المهم انت تزوجي الانسان اللي حبو قلبك و ارتاحلوا ممكم ما تتكررش هذي الفرصة
ربي يسخر
ليلة سعيدة فكري مليح و ديري استخارة

[KHAWLA STAR]

سلام اختي اول حاجة مبروك عليك
مادامك نتي تحبي هاد الشخص وهو يحبك وقابلين ببعضاكم ماتهمك لايماه لا ختو يهمك هو بويسك راح تبني معاه الاسرة الزوجية ويماه ساعفيها برك وحاولي تتقربي منها باه تحبك وديريها كيما يماك اغسليلها حوايجحا ساعة ساعة اشريلها حاجة مديلها تاكل خرجيها معاك المهم ديريها كيما يماك وزيد هي كبيرة فالعمر والاعمار بيد الله المهم ارضيها وارضي زوجك وان شا الله مايكون غير الخير اختي وماتنسايش ابقاي تستخيري حتى بعد الخطبة وان شا الله اللي فيه الخير ربي يجيبو ..

[امونة الشاوية]

اختي انتي ديري المليحة معاه ومعا امو وفي دارك وخليها تهدر على روحها ما تلقا ما تهدر ربي يسرلك

[ام يمينة]

مبروك عليك
ان شاء الله ربي يكمل بهناء والسعادة والبركة
الحمد لله انك وجدتي شخص بهذه الاوصاف
المشكل الان مع الام والله اذا دخالتي بالنية والحب وتعطيها الحنان وتعطفي عليها وتسمعي ليه كيما قلتي انها تحب تحكي لذلك تروح عند الناس لانها مكانش لي تفرغ ليه قلبها
لذلك كوني عطوفة وفشيها واسمععي لكلمها نورمال كل شيء يجوز كي تشوفك امرا ونصف مانضنيش تقيسك
ربي يكون معاك وتوكلي على ربي سبحانه

[farouk55]

انا راي تاعي اقبلي و و خلي راجلك يتصرف ما امو
بالتوفيق:o

[biks]

السلام عليكم

إذا رايحة تسكني وحدك أقبلي أما إذا رايحة تسكني مع يماه ما تقبليش لأن حياتك رايحة تتحول إلى جحيم

أنا أتكلم من تجربة شخصية

[assia81]

السلام عليكم ورحمة الله وبركاته
شوفي اختي ان كنتي لا تريدين الزواج مخافة المشاكل اعذريني اختي ان اقول لك انك مخطئة المشاكل حتكون حتكون حتى وان كنت في دارك ما واصلة حتى واحد ان كان الرجل لا يعيبه شيء ومادمتي تحبينه ومقتنع به فلاتجعلي امه سببا لرفضه يقول الرسول صلى الله عليه وسلم ان اتاكم من ترضون دينه وخلقه فزوجوه الا تفعلوا تكن فتنة في الارض وفساد كبير
اما ان كنت تعتقدين انك مازلتي صغيرة وربما يتقدم من هو احسن منه فهذا شانك اما عن المشاكل فلا يوجد دارمافيهش مشاكل كيما قال الرئيس الشاذلي ربي يرحمو البلاد لي فيهاش المشاكل ماهيش بلاد والجزائر مافيهاش المشاكل هههه امزج فقط لا اريد ان اهين اي احد

[فاتن 89]

توكلي على ربي و اقبلي بيه يماه ماشي مشكل

[بثينة 123]

لازم تبيني روحك قدامها بللي انت ماركيش سايبة اللي جا يقطع فيك ويهدر عليك ولازم ما تقوليلهاش حاجات خاصين فيك كيما الاسرار وهذا رايي والله اعلم اتمنى من الاعضاء الاخرين ان يفيدوكي بارائهم اتمنى لك التوفيق اختي في حياتك

[lalila22]

انشاء الله تكوني قلت نعم وحاسني عجوزك ومتخليهاش تعرف اسراركما وادا اداتك قولي حسبي الله ونعم الوكيل وما تحقديش عليها وما يهمكش كلام الناس واحسني لزوجك في كل الحالات ربي يقدملك لفيه الخير و يسعدك

[Assouma 93]

madamek t7abi wlidha khlass l'essenciel l'amour w lazem tat7amli yemmah w matab9ich m3aha 7atta tosal tanch3ak

[*بيتي مملكتي*]

السلام1


أختي الفاضلة برأيي إذا كان هذا الشخص ممن ترضين دينه و خلقه فلم الرفض أما عن أمه ليس عيبا إن مرضت لاقدر الله أو طاحت بيها كيما نقولو أنك ترفديها بل على العكس راهو في أجرك

ياو لوكان كانت أمك هل كنت راح ترميها أو تقبلي من زوجك مجرد نظرة في غير محلها لأمك ربي يخليلها صحتها على الدوام

عزيزتي إذا كنت ذات عزيمة على تحمل مسؤولية الزواج و أعباء الزواج فتذكري أن زوجك هذا لم يأت من فراغ بل هو إبن لهذه الأم
لن أقول لك أكملي او لا تكملي و لكن فقط أردت وضع بعض النقاط على الحروف حتى يتبين لك أن الزواج مسؤولية كبيرة و تقع على عاتق المرأة أكثر من الرجل لأنها من تعتني بزوجها و بمنزلها و بأطفالها خاصة و كذا أهل زوجها لذلك عزيزتي إذا كنت قد المسؤولية فأنت لها أكيد

المهم ربي يوفقك لما فيه الخير و الصلاح

[.¸¸۝❝ سليم المحترم ❝۝¸¸.]

اعقليها وتوكلي