مشكلة صديقتي و زوجة ابيها

[مشكلتي]

السلام عليكم


صديقتي طلبت مني ان انزل مشكلتها


صديقتي تبلغ من العمر 15 سنة


امها توفت و تزوج ابيها مرة ثانية


بامراة قاسية ... تحرش عليها باباها كل يوم


تخبي الدراهم و تولي تبكي داولي دراهم سرقوني


بباها يضبرها يزرقها والله انا شاهدة خطرا مسكينة جاو عينيها


منفخين و زروقا


وكي جي تحفظك تقول لباباها شوف متعاونيش كامل


يجبرها باباها باه تنوض تغسل


كل شي عليها الماعن التنشاف تقريبا كل اعمال البييت


حتى سمحت في قرايتها مسككينة مع انها تلميذة ممتازة



و خطرة رمات لورق في صالون و كي جا باباها قاتلو شوف شوف


كيفاه رماتلي الورق


قتلها بالضرب


كل يوم تحرشوا .........البنت متقدرش تهدر مع باباها تحشم


والاب يخاف خاوتها يخليهم حتى يخرجو و يضربها


البنت راهي حابة تهرب من الدار وانا منيش موافقتها بصح ملقيتش كيفا نقنعها و لا


نعطيلها حل لذا ارجوكم


افيدوها بالله عليكم افيدوها


كل يوم تنضرب اذا كانت حجرة تتكلم

[Assouma 93]

يا حرام مسكينة كيف لابيها ان يقسو عليها دون ان يسمعها و الكل يعلم ان زوجة الاب قاسية و الله عقابها شديد عند الله لانها ستتسبب في هروب فتاة من منزلها المهم يا اختي انت بارك الله فيك على وقوفك جنب صديقتك انصحيها بالصبر و تمسكها بالصلاة و سيتبين يوما امر هذه المراه لا حول ولا قوة الا بالله

[تاجر حر]

استغفر الله

هدا الشخص من الكائنات التي لا رحمة في قلوبهم يضربون ابنائهم ارضاءا لزوجته حتى الحيوانات ليها رحمه
قلتي انه يخاف خاوتها و هنا يبين انه اب جبان
حسب خبرتي لا يوجد حل مع هدا الاب عليها بمواجهته وجها لوجه و ان لا تخاف منها
و الحل الثاني مع انه صعب لكن احسن من ان تهرب من بيتها و تقع فريسة لدئاب المتوحشه و هو ان تغادر المنزل نحو اقرب مركز شرطه و تخبرهم ان والدها يقوم بتعديبها ارضاءا لزوجته في اول مره سيتلقى تحدير قاسي لهجه و سيتم تحديره انه اي خدش يحدث لفتاة بعد مغادرتها للمركز سيكون مسؤولا عنه و اضن ان لن يقترب منها ثانية لانه جبان ادا يخاف اخوتها فاضن انه سيموت خوفا

[imene12]

ما عليها إلا بالصبر و الذكاء و الحيلة... يجب أن تحاول تحسين علاقتها مع زوجة والدها و كيما يقولو ناس زمان " مرت باباها خير و اللي في القلب في القلب" قوليلها قاتلك أختك إيمان راني فات عليا واش فات عليك... ديري بنصيحتي .. تحاول تتقرب منها و تتحملها بصح ماديرش فيها النية و الامان و ما تحكيلهاش كلش لازم تكون معاها حذرة بزااااف .. قوليلها كي يدخل باباك اطلقي كلش من يدك و روحي عاونيها .. لازم تبين لباباها بللي راهي تحب مرتو و تحترمها... الله غالب لازم دير هكذا باش تعيش .. و ياويلها عند ربي مرت باباها.. يجيها نهار تندم فيه

[الجزائرية 1995]

تشوف كيفاه تكسب مرت باباها وتحنن قلبها ليها ومتعاندهاش باش متزيش عليها وتقلها نحبك وهنا الكذب يجوز المسكينة راح تموت من الضرب .
المهم نقول لهذ زوجة الأب رب ؤاح يعمل في ولادك كيما راكي إديري
في هذيك اليتيمة وهذاك الاب رب راح يعاقبو هو تاني غلي ضيع الامانة
قلها متفكرش في الهروب علخطر راح تلقى وحوش ابشع من زوجة باباها ويفترسوها في الشارع وتضيع شرفها عذاب زوجة الأب ولا الشارع اللهم عافينا رب يفرج عليها

[doba]

ربي يهلك زوجة باباها حسبي الله ونعما الوكيل فيها

[عبد الله 22]

السلام عليكم : تحاول تروحو إلى ولدين زوجة ابوها و أقربها والامام المسجد، لكن في الاول يجب تشكو وتوجه ابوها بالوقع، كا أن تسمعها دروس في مثل هذا المجال و الشيوخ المؤثرين كنصيحة ( الشيخ خالد الراشد ) ، وفي الاخير مهما كانت قصوة هذه القاصية هدها الله، فهي أرحم من وحوش و ذائب الشارع و الذي قصى على الالف من مثلها الله يفتح عليه، أورجوا ان يتم طرح جديد مشكلتها
رابط وقفة مع اليتم خالد الراشد http://www.emanway.com/*******/637/

[thawizat]

لا حول و لا قوة إلى بالله ما كل هذه القسوة الله يسترنا ، بعض الناس قلوبها كالحجارة أو أقسى
المهم الهروب ليس حلا أبدا إذا باباها مرحمهاش شكون ليرحمها الشارع
ثم أن مفهمتش وشنو هاذ الحشمة يعني هذيك متحشمش او هي تحشم
سمحيلي كاين الحشمة و كاين الخوف و الضعف، تقول لخواتها معندهاش لسان خايفة تدير المشاكل لهذه القاسية لي ماتخافش ربي في اليتيمة
الله يهديها هاذ المرا

[mohamed160]

ربى يهديها

[imene12]

ربي يصلح احوااااااالها يارب

[ميمي سمية]

لاحول ولا قوة الا بالله

طفلة في العمر 15 سنة ؟؟ !!!!

مسكينة والله، ثاني جاي الضرب من باباها

قولها تنحي الحشمة وتحاول تقرب من باباها

واذا مالقات حتى فايدة قولها تمسكي بقرايتك حتان تكباري وتلقاي كاشي خدمة ان شاء الله وماتنسايش الصبر والصلاة والدعااااااااااااااااااااااااااااااااااااااء مايقدر يحل المشكل هذي غير ربي

[ام عبد السلام]

السلام عليكم و رحمة الله و بركاته

شوفي بنتي انا في روحي زوجة اب
مع اني ما نحبش هاد الاسم يتقالي
لأن بناتي 2 يعيطولي ماما
و الحمد لله متفاهمة مع أهل والدتهم
الله يرحمها مع انهم في الاول اعترضو
زواجي بيه لأني صغيرة و خافو نمرمد دراري
نقولك الطفلة هادي في مرحلة مراهقة
تشوف الامور بمنظور مختلف
البنت مع أمها و تحس انها محقورة في مرحلة
المراهقة ما بالك بنت راجلها الناس كامل
تزيد عليها
الشيء اللي حكيتيه الا سلبيات يسما هادي
موش انسان ما عندهاش ذرة احساس
و زيد غسيل الماعن ما فيها والو بنت كبيرة
كون جات يماها حية و تغسل و تسيق موش عيب
تاني الهروب خطأ خطأ خطأ
واش تلقاي يا بنتي في الشارع
من غير ذئاب بشرية تنهش لحمك و عرضك
ادا كانت زوجة باباك قاسية جربي اكسبيها
بكلام مليح بالاك تخاف ربي و تحن
و ادا ماكانش اصبري اصبر ي اصبري
ياجرك ربي و الا روحي عند عمتك خالتك جداتك
.................
و الله ما نزيد كلمة مي الحمد لله بناتي 2 لاقية روحي
معاهم و العكس انا نضربهم على القراية
نوصيهم اللي ما تقراش واش تلقا غير تسياق و تنشاف
و غسيل ماعن ما نقولش الشغل عيب مي قراية مهمة في هاد وقت
و دايما نخرجهم في احلى حلة واحدة 8 سنين و واحدة 10 سنين
و ابني عام
..................
و الله ما تلقاي الا اخرتك في الشارع
ديري عقلك في راسك
تحملي ذل مرت باباك و لا ذل الشارع و الناس
تاكدي باباك يحبك
بالاك مرت باباك متجبرة عميتلو عينيه
نقولها اليتيم واعر واعر واعر وين تروحي من ذنوبو
ربي يسمعنا خبار الخير عليك

[amina04000]

أنا في الحقيقة نقولك ربي يقويك انت لانك انت اللي لازم توقفي مع صديقتك ولازم أول حاجة تقنعيها بأنها تنحي فكرة الهروب من راسها وثم تشوفي كيفاه تعالجي المشكلة وبالمناسبة أنا عندي نفس الاشكال لكن مع تلميذتي وانشاء الله نحط المشكلة وكيفاه راني نعالج فيها

[madjid93]

حسبي الله ونعما الوكيل فيها

[malak annaba]

ياجمعت الخير واش بيهم الناس معدتش فيهم قلب ولا وش واش هاذي معندهاش انسانية وعلاه هيا كون تطلب تروح تعيش مع جداتها ولا جدها والله الرحمة معدتش في قلوب الناس انا راني متفهما وضعها علي خاطر خالتي ورجلها مطلقين وبنت خالتي كل متروح لدار باباها زيارة تجينا بدموع تبكي وتعيط بنت خالتي معدبتها ملرت باباها يااااااااسر بصح الله غاالب الديفو مش في مرت لاب الديفو في رجلتنا تع دزاير تقيدي فيهم مرااء يعني مش الكل طبعا بصح اغلبهم وربي يهدي النساء الي تخلي روححها تتحكم في راجل بمسطاشو ورجال الي يخلو مرااء تكوموندي فيهم وربي الطف بدراري الي معندهم حتي ذنب

[lilyann]

حسبيا الله ونعم الوكيل في كل زوجة اب ظالمة وحقارة
قلها اصبري وادعي ربي فرج عليك وعلينا الكل
انا تاني عندي مرت بابا لكن انا كبيرة عليك وكانت هكا دير زعما منعاونهاش تحش بابا عليا بصح انا ديما نشكيلو نبكيلو نقلو كي عادت ماما ميتة انتي تاني ديري هكا مين يهدر معاك ابكي واشكي وقلو بلي مراك شايف والو انا اللي معاها في الدار واحكي لخواتك اذا عندك كبار عليك
وديري بروحك متعرفيش تخدمي شغل الدار وديري النية فلهبال احكي معاها وعاونيها ديري بروحك تحبيها وف الليل ابكي وادعي عليها

[علة الكيان]

ربى يهديها

[zaki4]

في هذه الحالة يب ان نرى قول الزوجة لنحكم بالعدل.
فان كنت على حقيقة فاتصلي بامام المسجد وهذا ليس عيب

[عبدالقادر222]

لازملها تشكي لاخوانها وهم يحاولوا يفهموا باباهم وتجعلهم سند ليها

[rma]

شوفي صديقتك ماراهاش طفلة صغيرة إيلا مراة باباها تستعمل الحيلة جاني حتى هي راه بنت و ما نشقاش نقولك واش تقدر تدير بزوج دمعات لخاطر حاشا ليسمع بابها مشي راجل و كيما نقولوا بودينات و أخوتها لما صابتهمش اليوم فاوق تصيبهم حتى تتزوج أما لا تنوض تنفض روحها و توريها الزنبع فين ينبع و راني مع لأخت lilyann