إستغاثة من فرنسا [الأرشيف] - منتديات الجلفة لكل الجزائريين و العرب

mari_boutole

2013-05-23, 22:21

اخواتي حبيباتي انا في امس الحاجة اليكم انا متزوجة جديد بفرنسا اقل من شهر وقرر زوجي ان نعمل عزومة لمعارفه عددهم بين النساء و الرجال الاطفال٢٠ شخص من اجل ان يتعرفوا عني وهو يريد طبعا ايضا ان يزوخ بيا امام اهله وانا ايضا بجد اريد عزومة تحمر الوجه لدا اريد ان تساعدوني بوصفات لاكلات واطباق تصلح في عزومة وسلطات وتحليات و اي افكار اونصائح تنظيمية لا تبخلوني وساكون ممتنة لو اعطيتوني الوصفات مع الصور وطريقة الاعداد اخواتي كلكم ساعدوني وخاصة اخواتي الشاطرات وطعامهم يحمرالوجه انا في الانتظار

ام الهضاب

2013-05-23, 22:42

انا مجربة لاموس انتاع الليمون والله خير تخرج تحفة خفة و بنة أنصحك اديريها راهي ساهلة و تقدري اديريها مع الصباح بكري و اتخليها في الثلاجة لحين التقديم و كذلك خبز الدار انتاع نينافرات راهو ساهل و يصلح من اول مرة وهذا من عندي بوراك مغربي خفيف و بنين تشرشمي البيض و اترابيه في لاراب الرقيقة ثم اطيبي الكفتة ثم الفرماج رابي و تعمليهم بالطبقات فوق البوراكة و اتبرمي و تقليه وربي يوفقك ان شاء الله

mari_boutole

2013-05-23, 22:45

شكرا جوبلا لكن كيف اعد لاموس انتاع الليمون

ام الطيب

2013-05-24, 08:21

السلام عليكم
القهوةمع اي حاجة
الخبز اشريه متعييش روحك
طبق اساسي شربة فريك بقطع صغيرة من ضلوع لحم الخروف الصغيرهي لي تنفعك مع جماعة كبيرة
طبق ثانوي الجلبانةبدوائر الجزر والدجاج من بعد اقليه
طبق ثانوي الحمص مع البطاطة المقلية من الاطراف وكرات اللحم
السالطة اورداف يعني من كلش شوية اوحبة مسكرفش وتسمغي كل حاجة وحدها
وسلطة خضرة اكيد مع الزيتون و مع البوراك اخدميه قبل بيوم وحطيه في الثلاجة
طاجين الحلو برقوقة اسحبي العلفة وحطي اللحم مرحي في بلاسها +زبيب وطيبيهم في الصباح
طبعا قازوز وجي
ودييسير سلاد دو فخوي يعني من كل الفواكه الي تعرفيها 2حبة +جي +قرفة وسكر العنب 1كغ الموز قطعيه في اخر لحضة+قطرات من الليمون
لبن مع الدقلة
وفي الاخير شاي مع الغريبية
ملاحضة السلطات والشاي اخدميهم الصباح وفي التقديم سمقي وحلي

oum shaima

2013-05-24, 08:43

السلام عليكم أختي راني حاسة بيك أنا تاني كي طلعت لفرنسا صرالي هكا بصح عزوماتي ماكانتش هكا كبيرة....كل مرة شوية من الناس.. المهم ديري الشربة مع البوراك.. إذا قدرتي ديري لحم لحلو ليلة من قبل باش تربحي شوية وقت... escalope pané هذا عبارة عن شرائح dinde ديري في وسطهم جبن rapé أوtranche أغلقي جوزيها في la chaplure وأقلهم.... ديري سلطة تكون منوعة(بيض مغلي، زرودية râpé،طماطم،زيتون،ماييس،cornichon،جبن خاص بالسلطة هاو جاي مكعبات، أدخلي لقوقل شوفي الديكور تاع السلطات... ديري l'avocat أقسميها على زوج بالطول نحي العظمة أمسحيهابالقارص وعمريها بهذا الحشو(طون nature+مغرف مايوناز+مغرف كاتشب وخلطي وعمري مكان العظمة) بصح ماتوجديش l'avocat حتى وقت التقديم باش ماتكحالش
ديري شوية مقبلات أنا كنت نشري pain de mie نقطعو بطابع مدور ندير فوقو شريحة فرماج نقطعو هو تاني مدور ونزيد فوقو قطعة كاشير مدورة وفوقها نص حبة زيتون كحل وشديهم بالعود الخشبي (رشقيه في الوسط) وحمري الجاج أو شطيطحة جاج بالحميصة وكرات اللحم مرحي .. أي سؤال أنا جاهزة و وصفة لاموس الليمون هاهي: تحتاجي 3بيض+200غ سكر+قشور قارص+ 2فاني+ مغرف ونص نشا+عصير ليمونتين
ضربي صفار 3بيض مع 3مغارف سكر وباقي المقادير خلطي مليح +كاس ماء وخلطي وحطي فوق النار وحركي حتى تعقد ثم ضيفي مغرف كبيرة زبدة وحركي وخليها تبرد
ضربي بياض البيض وخلطي 2فاني مع السكر المتبقي. وضيفيه للبياض... ثم ضيفي هذا مع الكريمة الي خليتيها تبرد وحركي غير بلعقل... ديريهم في كاسات شابين وحطيهم في الثلاجة حتى وقت التقديم انشاء الله نكون أفدتك على الأقل بحاجة.. بالتوفيق:19:

mari_boutole

2013-05-24, 09:11

ششششششششششكرا لكني قلي لي انت لان في فرنسا واين بالظبط وايضا اريد ان اسالك عن زيدة التوريق تخيلي رحت لاكتر من محل ولم احدها

oum shaima

2013-05-24, 09:32

ششششششششششكرا لكني قلي لي انت لان في فرنسا واين بالظبط وايضا اريد ان اسالك عن زيدة التوريق تخيلي رحت لاكتر من محل ولم احدها
أنا نستعمل مارغرين عادي مكتوبة pour cuisine وتجي مليحة.. راح تديري la pâte feuilleté ؟؟؟:19:

mari_boutole

2013-05-24, 09:41

wallahi tji normal haya bien merciiiii

oum shaima

2013-05-24, 09:53

wallahi tji normal haya bien merciiiii

إذا حبيتي أفكار أخرى أدخلي la liste مكتوبة وصفات أم أماني في ملف واحد.. فيه أفكار مليحة..:19:

randy fatima

2013-05-24, 10:00

الله يعاونك من فرنسا ياكلو غير الحاجة الخفيفة و ادا كنت حابة توري روحك من الافضل ان تتقيدي بالماكولات التقليدية الجزائرية من الالف اي الزاد و الله اعلم

oum ibrahim

2013-05-24, 10:01

تفضلي اختي هاذي بعض الافكار ممكن تفيدكhttp://www.djelfa.info/vb/showthread.php?t=1305723

mari_boutole

2013-05-24, 10:07

ششششششششششششششششكرا

oum shaima

2013-05-24, 10:14

http://www.djelfa.info/vb/showthread.php?t=984259
فكرة هايلة

mari_boutole

2013-05-24, 10:20

بجد انتي رائعة وحاسة بيا ربي ينورك لكن مقلتليش انتي من وين من فرتسا

oum shaima

2013-05-24, 10:28

بجد انتي رائعة وحاسة بيا ربي ينورك لكن مقلتليش انتي من وين من فرتسا

:mh92:Lille

mari_boutole

2013-05-24, 13:27

oui bien mais loin pour moi rouen

oum shaima

2013-05-24, 15:05

oui bien mais loin pour moi rouen

المهم وش تحتاجي راني هنا..:mh31::mh31::mh31:

mari_boutole

2013-05-24, 15:44

شكراااااااااااااااااااااااااا

ام الهضاب

2013-05-24, 16:40

احكمي صدور دجاج و احشيهم باي حشوة ثم اخدميلهم صوص خاثرة متكونة فطر كرام فراش مثلا و كبيها اعليهم مع شوي روز و من الأحسن تختميها بقطع لحم بشاشي محمرين مليييح

melissa lola

2013-05-24, 20:39

السلام الأخت بما انك رأكي وحدك لازم حاجة ماتشدش اليد وجدي اللحم الحلو نهار من قبل ديري البوارك وكونجيله نهار العرضة جبديه صباح بكري وستفيه في منشفة واقليه اخر لحظة يبان جديد دائماً نديرها ديري شربة فريك شطيطحة جاج دولمة بيضاء جلبانة وقرنون سلاطة خضراء و الديسار فاكهة وقازوز وديري لاتاي قطائف ولا خبزة تونس وايلا حبيتي زيدي شرمولة إنتاع كبدة رأهي سهلة اي حاجة راني هنا

mari_boutole

2013-05-24, 21:39

شششششششششششششششكراااااااااااااااا

Tamalou

2013-05-25, 22:50

ديري أطباق 100/100تقليدية جزائرية باش تظمني نجاحها و ما تغامريش بأطباق أوربية لانه أكيد حينتاقدوك عليها .

mari_boutole

2013-05-26, 23:03

لكن انا اتسال عن تحلبة و سلاط فروي جميلة ساعدوني

oum shaima

2013-05-27, 07:38

لكن انا اتسال عن تحلبة و سلاط فروي جميلة ساعدوني

اشريهم يتباعو ملاح بصح ديريهم في كاسات شابين وشبحيهم بla crème chantilly

ماتضليش تخدمي كاين أشياء تتشرى خير... وأنت وَرّيلهم شطارتك في الطياب... وla présentation تاع la table وطريقة التقديم...bon courage.... وقتاش العزومة؟؟؟وإذا راح ديري أتاي أخدمي قريوش نهار من قبل:mh31:

oum shaima

2013-05-27, 07:42

هاكي بعض الصور

oum shaima

2013-05-27, 15:28

:dj_17::dj_17::dj_17:

mari_boutole

2013-05-27, 17:29

فكرة رائعة ساشتريهم لكن كيفاش يكوانو دايرين عل هم بودر ام مادا ومن اين اشتريهم باه كي نروح نعرفهم ارجوطي وضحي لي بيا نخرح و نشوف لكن لا اعرف اي شىء مما اراه وياريت لو عندك سكيب لكي اتواصل معكي بشكل مباشر في المستقبل

oum shaima

2013-05-27, 18:30

روحي للرف تاع المعلبات والمرطبات فيauchan أوcarrefour كاين des boites مكتوبين salade de fruit أنا نشريهم من Aldi لأنه صغير ونبقاش ندور ونحوس نلقى وش نحب بلخف جايين des boites بلاستيك وصغار وحلوين ماتضيفيلهم والو يبقى غير تزينيهم بla chantilly

mari_boutole

2013-05-28, 10:33

حسننا بالنسبة لرولي اللحم المفروم لما احطه في ورق الالمنيوم اثقبه واضعه في انا به ماء احسن ام اناء به زيت احسن من ناحية الدوق وهل توحد نصائح في رولي اللخم المفروم

oum shaima

2013-05-28, 13:36

http://forums.fatakat.com/thread589987حسننا بالنسبة لرولي اللحم المفروم لما احطه في ورق الالمنيوم اثقبه واضعه في انا به ماء احسن ام اناء به زيت احسن من ناحية الدوق وهل توحد نصائح في رولي اللخم المفروم

oum shaima

2013-05-28, 13:37

حسننا بالنسبة لرولي اللحم المفروم لما احطه في ورق الالمنيوم اثقبه واضعه في انا به ماء احسن ام اناء به زيت احسن من ناحية الدوق وهل توحد نصائح في رولي اللخم المفروم

http://forums.fatakat.com/thread589987

oum shaima

2013-05-28, 13:39

http://www.lakii.com/vb/a-7/a-570214/
شوفيهم بالاك يعجبوك:19:

oum shaima

2013-05-28, 13:40

http://****2all.com/?ad_listing=%D8%B7%D8%B1%D9%8A%D9%82%D8%A9-%D8%B9%D9%85%D9%84-%D8%B1%D9%88%D9%84-%D8%A7%D9%84%D9%84%D8%AD%D9%85-%D8%A7%D9%84%D9%85%D9%81%D8%B1%D9%88%D9%85-roll-ground-beef-%D8%B9%D9%84%D9%89-****2all

mari_boutole

2013-05-28, 17:43

عزيوتي الغالية اريد ان اسالك لو حضرته قبلعا بليلة وفي يوم العزومة حطيته في الفرن لا يوجد مشكلة في رائيك وايضا بالنسة لصاجين اللحو ايضا ممكن احضره قبلها بليلة مو مشكل صح ونخطة في الثلامة ام مادا واش رائيك بالنسبة اعجبني شكل ورود من البطاطش خدمته ايضا بشكل جيد لكن مستحيل اعمله في يوم العزومة لو عملتهم قبل و حطيتهم في ماء بارد بالثلاجة http://forum.hawaaworld.com/showthread.php?t=3227295
وشا رائك جاوبوني

mari_boutole

2013-05-28, 17:45

و شكرا لكي طبعااااااااااااااااااا

oum shaima

2013-05-28, 18:47

طاجين لحلو موالفة نديرو من قبل ووقت التقديم نسخنو ونشبحو بلوز محمص... أما البطاطا نخاف تكحال... علاش ما تدوزنيش في المساء والغد من ذاك ديريهم برك يطيبو ووجدي روحك... ماتنسايش راح تلبسي وتشبحي...

mari_boutole

2013-05-28, 18:54

رولي باللخم المفروم والدجاج والفرماج لا يوجد بطاطا ممكن اخضره مسيقا ولا ساغامرة بدلك

amiramirna

2013-05-28, 19:24

http://www.4shared.com/account/dir/r3ibwLwt/_online.html#dir=GRyn2x8X
(http://www.m5zn.com/u/?m5zn-gyBvGurYeQVLQVJsUISVisvkXTByGTtm)
هاذا ملف السلطات اسفة عن التأخير
لعزومة متى ؟؟
افرغي علبة الرسائل تاعك

oum shaima

2013-05-28, 19:26

وجديه ماتخافيش لمديه في ورق ألمنيوم وفي الثلاجة

mari_boutole

2013-05-28, 22:50

شكرااااااااااااااااااااااااااااااااااااااااااااااا ااااااااااااااااا

ام شرفو

2013-05-29, 00:09

oum shaima

2013-05-29, 07:49

صباح الخير شوفي هاذو بالاك كاش حاجة تعجبك
http://www.djelfa.info/vb/showthread.php?t=1289417

oum shaima

2013-05-29, 08:32

هاهم المقبلات اللي درتهم مايشدوش اليد ويشبحو الطابلة

ماحبوش يطلعولي؟؟؟؟؟
إذا حبيتي أبعتيلي e-mail تاعك نبعثلك الصور مع الطريقة

oum shaima

2013-05-29, 09:09

بعد بحث طويل لقيت الكتاب اللي راح عندي ودرت منو مقبلات أيام كنت جديدة بالاك يعجبوك:19:

http://www.bayt4.com/vb/showthread.php?t=108757

كنت ندير: مقبلات بالجبن، ومقبلات الطون،مقبلات ببيض السمان(بصح ندير بيض عادي ونقطع شريحة من فوق ماشي نص حبة

mari_boutole

2013-05-29, 18:00

oum shaima

2013-05-29, 20:49

صديقتي العزيزة شكرا على تعاونك ويعطيك الصحة اصلا حكيت عنكي لزوجي وفرح كي حاس كاين شخص نقدر نحكي معاه والله غير راني ندعيلك من قلبي بالنسبة لي اميلي daifadila يا هو فر حسنا عندي سؤال لكي عن احسن نوعية شاي ممكن اشتريها من هنا وكيف اعددها لو اعطيتين الكيلات يكون احسن لانني لا اعرف كيف اعمله اصلا

أنا كنت مانعرفش نديرو بصح الآن وليت نديرو يوميا تحت طلب زوجي بعد ماكان يعايرني بيه.. شوفي راح نعطيلك قيسما تعري تيرموس.. أحكمي ربطة نعناع كبيرة شوية ويكون جديد وريحتو اممممممم تضرب للراس...أقسميها على زوج نص في كسرونة معمرة ماء ونص في طاس التقديم أو ترموس أحكمي فنجان كبير شوية ديري قيس 3أو4 مغارف كبار أتاي (أشري شاي صيني أخضر) كي يسخن الماء تاع النعناع لي في الكسرونة أحكمي غراف من هذاك الماء وفرغيه على لتاي لي في الفنجان وخليه حوالي 10دقائق وصفيه تلقاي ماء كحل وعاودي رجعي للفنجان وفرغي فوقو مرة أخرى وخليه شوية وسيحي وزيدي نفس العملية هكا راكي درتيها 3مرات أو 4 حتى يروح الماء لكحل كي تصفيه ديري لتاي في الكسرونة يغلي مع النعناع ماشي بزاف غلية أو زوج... أرفدي بالغراف وعاودي سَيحي شغل راكي تلعبي(هذه المرحلة تقدري تستغناي عليها) ومبعد ديره في الطاس.. أنا ندير في تيرموس باش يبقى سخون..ماتنسايش الطاس فيه نص ربطة نعناع ماتنحيهاش قد مايكون النعناع يجي هايل...
ملاحظة: كيسان تاع لتاي عند التقديم حطي في كل كاس ورقة نعناع...
أي سؤال راني جاهزة:19::19:

oum shaima

2013-05-29, 21:01

راني بعتلك e-mail نوع لتاي لي عندي شريتو منا ماحبتش تخرج هنا la photo

mari_boutole

2013-05-29, 21:02

فرغيه على لتاي لي في الفنجان وخليه حوالي 10دقائق وصفيه تلقاي ماء كحل وعاودي رجعي للفنجان وفرغي فوقو مرة أخرى وخليه شوية وسيحي مزلت مفهامتعاش ممكن تشرحلي اكثر

oum shaima

2013-05-29, 21:23

فرغيه على لتاي لي في الفنجان وخليه حوالي 10دقائق وصفيه تلقاي ماء كحل وعاودي رجعي للفنجان وفرغي فوقو مرة أخرى وخليه شوية وسيحي مزلت مفهامتعاش ممكن تشرحلي اكثر

لتاي لي في الفنجال كأنك راح تغسليه بماء النعناع لي راه فوق النار... فرغي فوقو لماء وهو سخون خليه شوية تلقاي لتاي تنفخ شوية سيحي هذاك الماء (يبقى لتاي) زيدي فرغي فوقو مرة أخرى يزيد يطلق شوية زيدي سيحي الماء هذاك وعاودي مرة ثالثة تلقاي أوراق لتاي تفتحت زيدي سيحي الماء يبقالك هذاك لتاي صافي ديريه يغلي في الكسرونة

mari_boutole

2013-05-29, 21:24

نصفيه يبقى الشاي في الفنجان نزيد تفرغ الماء فوقع يتعمر ام كيف

mari_boutole

2013-05-29, 21:27

الان فهمت شكرا لكن من اين ساشتري هدا الشاي اكيد نلاقاه هتا

oum shaima

2013-05-29, 21:48

الان فهمت شكرا لكن من اين ساشتري هدا الشاي اكيد نلاقاه هتا

كاين فcarrefour;auchan خصوصا محلات تاع لعرب :19::19:

mari_boutole

2013-05-29, 21:56

شكرا نروح في الوكاند وانشاء الله نلقاه شكراااااااااا جزيلا شكرااااااااااااااااااااااااااااااااااااااااااااااا اااااااااااااااااااااااااااااااااااااا

oum shaima

2013-05-29, 21:59

شكرا نروح في الوكاند وانشاء الله نلقاه شكراااااااااا جزيلا شكرااااااااااااااااااااااااااااااااااااااااااااااا اااااااااااااااااااااااااااااااااااااا

راني هنا وش سحقيتي :19::19:

fofol

2013-05-29, 22:08

allah ikon fi 3awnik

mari_boutole

2013-05-29, 22:11

الله يسلمك

mari_boutole

2013-05-31, 21:58

oum shaima صديقتي العزيزة عند استفسار جديد لكي فيما يهص كورني المنيوم حبا نشري واحد في رائيك من اين نشتريه من هنا

❀•بَـهَـآءُ الْـرُوًحْ•❀

2013-05-31, 22:57

نقول ن شاء الله و ليس إنشاء ..

oum shaima

2013-05-31, 23:02

oum shaima صديقتي العزيزة عند استفسار جديد لكي فيما يهص كورني المنيوم حبا نشري واحد في رائيك من اين نشتريه من هنا

سلام هذي غيبة انشاء الله تكوني :19:بخير وضحيلي السؤال لم أفهم:confused:

mari_boutole

2013-05-31, 23:23

http://www.djelfa.info/vb/showthread.php?t=1276254 كورني مثل الي في الثورة
الله يسلمك

oum shaima

2013-06-01, 07:21

http://www.djelfa.info/vb/showthread.php?t=1276254 كورني مثل الي في الثورة
الله يسلمك

قصدك le moule اللي تديري فيه شكل السلطة....المهم أنا نشري هذه الأمور من الجزائر... بصح في حال الضرورة كنت نروح لAuchan ندخل في جهة الأواني نلقى les moules وحتى بعض الطوابع بصح حوسي مليح لأنه دايرينهم في الرفوف .... إذا عندكم magasin إسمو UM تاني عندو بزاف أمور المطبخ... :mh31:

mari_boutole

2013-06-01, 09:59

oum shaima

2013-06-01, 10:08

اوكي نروخ مساء ونشوف لكن اريد ايضا ان اسالكي بالنسية لطاجين الحلو لو طبخته قبلعا بليلة نحط طبعا في الثلاجة ام كونجيلاتور وايضا في وقت التقديم ادا يبس شوي نسخنوا ونزيدلو اسح ماء زهر او ليمون ام ماء لكي لا يتغير دوقة

ديريه في الثلاجة عادي...علاش ييبس؟ كيفاش تديريه؟؟؟ l'après midi نكتبلك طريقتي في تحضيرو ماييبسليش أنا في رمضان ندير كمية قيس3أو 4أيام....نشرحلك ان شاء الله لأني قا مشغولة الآن..:19:

mari_boutole

2013-06-01, 11:58

اوكي ياريت

oum shaima

2013-06-01, 13:05

بسم الله
أول شيء قطعي اللحم قطع صغيرة ديري مغرف كبيرة سمن أومرغرين ضيفي مغرف قرفة وكوكتي مليح ثم ديري الماء وخلي اللحم يطيب مليح(إذا درتيه في cocotte أحسن لأنه ماياخذلكش وقت في الطياب ومايحتاجش بزاف الماء) لاحظتي بلي مانديرش هنا السكر لأن هذه الطريقة تخلي اللحم طري وماييبسش قدما تخليه..
من جهة أخرى ديري كسرونة كبيرة شوية( تاع جواز) فيها الماء يسخن مع قشور القارص (ماشي مبشور، كيما تقشري البطاطا) ديري في les bols: العينة، الزبيب،المشماش كل واحد وحدو وفرغي عليه كمية الماء الساخن تاع الكسرونة لي فيها القارص وخليهم حتى تشوفيهم تنفخو وسيحي الماء هذاك وديريهم(الكل) يطيبو في هذه الكسرونة مع قشور القارص وديري السكر حسب الذوق أنا ندير كمية مليحة نحبو حلو.. وشوفي اللحم إذا طاب ديريه معاهم يطيب مع شوية ماء الزهر وإذا شفتيه يحتاج سكر زيدي.. كي يبدا يثقل شوية ديري فاكهة لي حبّيتي أنا نفضل أناناس (اشريه مقطع في علب) باش ماتتعبيش وحبات كيوي يجي الشكل شباب وعند التقديم شبحي كي تديريهم في الصحون بحبات لوز
ملاحظة: كي تطيبيه ليلة من قبل ماتديريش الفاكهة خليها حتى الغد منذاك كي تسخنيه كي يبدا يغلي ديري الفاكهة زيدي مغرف ماء زهر
إن شاء الله واضح:mh31::mh31:

mari_boutole

2013-06-01, 22:57

مرحبا انا ظريقتكي رائعة ساجريها غدا وهي مختلفة عن طريقتي انا ندير زيدة مع اللخم يغلي شوي مباعد نزيد السكر ثم الماء ثم الفرقة وقرنفل ونخليه يغلي شوي انا منحطش قشور بل نحط حبات قراص كاملة بقشورعا ونهليشها شوي ثم نزيد زبيب والعينة ولما بثقل شوي نزيد ماء الزهر ويحي مليح لكن كما قلتي اللكو يجيني يابس ممكن تعلقي على طريقتي وبالنسبة لطريقتكي اريد ان استفسر على فكرة لماديريهم(الكل) يطيبو في هذه الكسرونة مع قشور القارص وديري السكر حسب الذوق أنا ندير كمية مليحة نحبو حلو.. عل تضيفين الماء ام لا واللخم طبعا تعزيز بلاصوص نتاعه هاك صخ

oum shaima

2013-06-02, 08:19

سلام...:dj_17:
كي تشوفي العينة و الزبيب والمشماش تنفخو سيحي الماء اللي نقعتيهم فيه وديريهم يطيبو في الماء لي فيه القارص تكوني عمرتيه من قبل تكون كمية الماء مليحة قيسما يطيبو(ماياخذش وقت لأنه اللحم راه طايب والعينة،الزبيب،المشماش يكونو طريين نوعا ما لما تنفخو) زيدي ضيفي اللحم معاهم وديري السكر وخلي كلش يغلي...:19:

mari_boutole

2013-06-04, 22:15

جد توحشتك وعلى فكرة انا جربت طريقة طاجين الحلو نتاعك جاني هايل شكرا جزيلا وغدا وعدا ندير طريقة شاي نتاعك واصلا راتي شريت الشاي الي قلتلي عليه انشاء برك يجي مليح لقد ساعدتني كثيرا انت امراة رائعة وطيبة ربي يعطيك ماتتمناي ويكثر من امثالك شكرا

mari_boutole

2013-06-05, 13:03

انا هنا من جديد اردت ان اخبركي انني جربت طريقتك في الشاي مع تغيير بسيط في الوصفة انا طيبته في البراد الخاص به لكن انا طيبته على نار هادئة جدا مثل اهل الصحراء وايضا لم اغرف وارجع بل عندنا كملته رحت نفرغ فيه من براد الى اخرى حتى جاتني رغوة تقريا نصف البراد صار رغوة حتى لما حطيته بعد الغداء لزوجي في فتجان شاي كان تقريا ربعه رغوة حتى دوقه كان رائع لان اصل كل شىء من عندك يجد راكي شاطرة بزاف اكيد زوجك راه فرحان ومحظوظ بيكي وايضا بالنسية لفكرة نحط ورقة نعتاع في فنجان الشاي نخكها من تحت وفوقها الشاي ام كيف ومن الاستطلاع اريد ان اسالكي ادا حبيتع يكون ثقيل اكثر شوي نزيد كمية الشاي ام نطبخه اكثر ام مادا وادا جاني مر هدا دلالة على مادا وادا رايحة نطيبيوا في صباح نديرلو عادي السكر ام السكر نديره في اخر لخضة اعرف انها اسالئلة كثير كبري قليك معايا وشكراااااااااااا

oum shaima

2013-06-05, 13:46

أوراق النعناع حطيهم في الكيسان فارغين في السنيوة باش كي تسربي لتاي تطلع الورقة..
النسبة للسؤال إذا تحبي لتاي تقيل زيدي كمية الشاي وأغسليه مليح (طريقة تفرغي عليه ماء النعناع الساخن وتسيحي)
إذا ما تغسلش مليح هذا السبب لي يخلي لتاي يجي مر
بالنسبة للسكر كي تفرغي في البراد كيما قلتِ حليه بشوية سكر وعند التقديم حطي سكرية في السنيوة لأنه كاين لي يحبو حلو بزاف... راكي فحلة الله يبارك...
إن شاء الله دايما يكون زوجك فخور بيك

mari_boutole

2013-06-05, 14:34

ان شاء الله انني احاول من اجله ان شاء الله يقدر برك وشكرا جزيلا لكي

أم ماجد

2013-06-05, 15:22

ربي يقدرك ماري واحنا مالناش في الحب جانب ؟هههههههههه

بثينة 123

2013-06-05, 15:56

السلام عليكم
انا عندي الحل اكتبي في قوقل موسوعة الطبخ وستجدين هناك اطباق من مقبلات وسلطات وشوربات وووو الكثير ومع ذلك هناك اطباق لمقدمي برامج فتافيت ادخلي هذا الموقع وستدعيلي ان شاء الله

بثينة 123

2013-06-05, 16:02

http://www.qassimy.com/lesson/

mari_boutole

2013-06-07, 12:41

عزيزتي الغالية لو طيبت كورتي بالغجينة المورقة قبل العزومة ليلة قبل نةنشمل ان يتغير طعمها لوحطيتها قي الثلاجة اريد ان اتاذك منكي

oum shaima

2013-06-07, 12:53

سلام
لا أنصحك بذلك لأنه كانو كي يبقاولي ونسخنهم غد منذاك مايعجبونيش... ماشي كيما يكونو جدد...
أنت جهزي كلش( العجينة، الحشو،) وفي الغد أخدميهم وإذا كان عندك أعمال بزاف يوم العزومة ديري المقبلات اللي بعتهم لك تقطعي pain de mie من قبل واللوازم ديالو وفي الغد تشبحيهم...

pomaria_aindefla

2013-06-08, 09:34

http://www.djelfa.info/vb/search.php?searchid=9561961
http://www.djelfa.info/vb/search.php?searchid=9561969
http://www.djelfa.info/vb/search.php?searchid=9561959
http://www.djelfa.info/vb/search.php?searchid=9561957

pomaria_aindefla

2013-06-08, 10:07

http://www.djelfa.info/vb/showthread.php?t=1226333

ام شرفو

2013-06-10, 06:49

واش درتي فيها
وين راكي

mari_boutole

2013-06-11, 07:13

جات هايلة بجد قالوا اني ستار درتلهم اطباق رائغة مش موالقين هنا ياكلوها لكن بعدها ديت مرضة كبيرة اريد ان اشكر جميع اخواتي على المساعدة شكرا شكرا شكرا ربي يخليكم

نادين كول

2013-06-11, 09:56

ربي يهنيك طول عمرك انتي وزوجك

ام شرفو

2013-06-11, 12:53

bon courage
كي ترتاحي احكيلنا كلش

ام مريم اسراء

2013-06-11, 16:41

الحمد لله اختي mari_boutole ووالله دعيتلك لاني مريت بنفس التجربة و كتفوت تحسي بتعب كبير و زيد تقول راكي مشيتي 100 ميل المهم نتمنالك الر احة و الحمد لله راكي كسرتي الخوف ....... اااه متنسايش تعطيني لادريس راني جايبتلك ضياف ماشي بزاف 40 واحد برك ..ههههههههههههههه