مشكلتي في الزواج

[مشكلتي]

السلام عليكم
اخواني اليكم قصتي
قبل ايام ختي المتزوجة جات وراجلها لدارنا وجابو وليدهم لطبيب جا معاهم وليد لوست ختي بمعني وليد خت راجل ختي ههههه سمحولي خلطتهالكم
المهم هو 28 سنة بوليسي المهم نهار جا ودخل للدار شافني عجبتو لانو طبيعتي انا ندير خمار لما نشوف راجل ختي او اي انساناجنبي على محارمنا
المهم هدر لخالو لي هو راجل ختي وقالو عجبتني بزاف واني خايف الا ميمدوليش راجل ختي قال لختي ختي قالتنا
ما ابدينا حتى معارضة بصح انا رفضت دوك نقولكم ونتوما احكمو
اولا لانو علاش مكلمش اهلو وكلم خالو؟ هاد السؤال طرحتو وختي قتلي بلي عندو دي بروبلام مع اهلو
ثانيا معندوش سكنى حاشا لله منيش نتكبر بصح هو عندو الله يبارك 11 اخ كامل ذكور و3 بنات دارهم ضيقة
ثالثا يماه نهار لي رحت لسبوع وليد ختي وقاعدة نعاون بدات تعيط عليا وتعاملني معاملة سيئة والحاجة لي نديرها تقول بنتي تاني مع انو بنتها كبر مني ب 3 سنوات انا 24 سنة
وتاني جداتو لي هي عجوزة ختي قاتلو مرة اتزوج بنت عمك خير معنتها مكالاش البراوية المهم
انا طلعت حبطت وخممت لقيت بليك منيش حايبة نتزوج زواج فاشل بزوج بعيد على اهلو يمكن السكنى فيها حل الكرية او ما شابه كلشي عندو حل بصح منحبش نتزوج برجل اهلو مهمش راضيين بيا يعني يكون بعيد عليهم وانا نكون مكروهة
زواج راح يكون مليء بلمشاكل
وانا ضد الي يقول الراجل هو الصح صح هو الصح بصح يماه وباباه هما الاصح عليه ومنحبش نكتر لي بروبلام انا نحب نجمع بين الناس مش نفرق
وتاني نخاف بلوتاغ تكبر المشاكل وتخسر ختي معايا وراجلها يزعف منها
انهيت الامر ورفضت ختي زعفت وراجلها تاني بصح هاد الشي لازم يكون
بقا رايكم نتوما اسكو معايا الحق ولالا
وسمحولي على الاطالة

[سماح 2]

وااو والله دوختيني هه
بالسيييف فهمت
المهم
نت وااين عمبلااك اهلو مااش رااضيين علييك بلااك امو كي شاافتك هااديك النهاار قااتلوو علييك
وهوو كي شاافك عجبتييه حب يخطبك
وهو اصلااا اصلاا
اختي ماا داام قلبك هرب منو من المره الاولى
لا دااعي لتماام دلك
واصبري ستفرج بادن الله
بالتوفييييق

[nadoouuch]

اختي ادا كانت مشكلتك مع اهله فقط فانت مخطأة، انا عجوزتي فرشتلي الدنيا ورد و ياسمين ههههههههههه حب واش نقولك في فمها فرد كلمة لي يحبها ولدي انا نحبها، و النتيجة بعد ماعشت معاها ما تحملنيش وديري غير في لحوايج لي ماش ملاح و لكلام غير لي يقيس بصح واش ندير حاملة و ساكتة و انا راجلي بعيد مايكونش ديما، المهم حبيت نقولك العجايز مايعجبهمش لعجب وتبالي مستحيل تلقاي وحدة ديرك كي بنتها الا من رحم ربي ، نصيحتي ليك ،تحبك ولا لا هادي حاجة تخصها، انتي شوفي للراجل بما انو جا من الباب وعجبتيه بعد ما شافك بالحجاب و خدام لاباس بيه واختك عاجبها و شكرت فيه، خمي مليح في الراجل ماشي ماليه نصيحة من مجربة

[جمال المهاجر]

اختي ..
كيما فهمت انا .. راكي دركا مخلطا .. و في هاذ الموضوع كاين الف حكاية في حكاية . ..
اختي كاين حل واحد
صلاة الاستخارة .. و ربي يسهلك
عندك ديري حاجة تندمي عليها و تخسري سنوات و سنوات
الغلطات الصغار يجيبو الغلطات الكبار ..
السلام عليكم

[nouna l maghbouna]

ديري صلاة استخارة
و ماتخميش غير في السلبيات
زيدي سقسيو عليه

ربي معااك

[amine0007]

أختي مادامك ماكيش مقتنعة بهاد الزواج فقد اخترتي مايساعدك.وماتراعي لختى واحد هادي حياتك نتي برك وخليهم هوما يتقلقو

[الفاتحة]

يقولو عندنا جبدان السيف عار ورده عارين

شوفي أختي درست الموضوع من عدة جوانب كما تقدم وقرات وكان قرارك الرفض ، فلا داعي للوقوف على الأطلال أو ترك باب للندم والحسرة واصلي حياتك وإن شاء الله يرزقك ربي واش تتمني عزيزتي

[خديجة13]

ختي و الله اذا كان انسان لاباس بيه اقبلي و اذا على اهلو و السكنى نقولك بما انه يعمل في الشرطة يعني الاغلب يخدم بعييد على دارهم و يعطولو سكنة وظيفية ثما و بالتالي اهله قاع ماتسمعيش بيهم اذا كان هو شخصيا يستاهل ماتفرطيش فيه و ماتنسايش صلي الاستخارة و خبرينا واش صار معاك بالتوفيق

[z.abdo]

بارك الله فيك أختي وارى ان قرارك صواب ولم تتحكم فيه العواطف

أما عن الذين غضبو من قرارك فهذا قرار شخصي ولا يحق لهم ان يتدخلو


ربي يعينك اختي

[doba]

ربي يعينك اختي

[قَاسِمٌ.قَاسِم]

((ما سمعنا بهذا في الملة الآخرة))

[khawlita.dz]

جاتنى تصرفك سليم و مدمت مكيش متعلقة بيه و عادى فاتركيه احسن واشري هنا بالك من الواضح فى مشاكل عائلية والله يعوضك بالاحسن مع انه هدا راى شخصى يبقى استخيرى الله و شوفى لى يساعدك دريه بالتوفيق

[سراب06]

متخافيش على أختك المهم خمي مليح في قرارك أنت

[السيدة كرمين]

نظن أن الموضوع إنتهى برفضك.
ضرك مشكلتك مع أختك قنعيها بوجهة نظرك ما دمتي مقتنعة بها
وهي صائبة في جزء كبير لأنك الأدرى بمشاكله مع أهله

[صابرة لله]

تمسكي بحلمك واستخيري والله معك

[wafa16]

انا يبانلي قرارك صائب و ما كانش اللي تدي الراجل و حدو عائلتو تاني مهمة و ادا ما حبوكش و لا بانولك صعاب و واعرين ما ترميش روحك و ما تخاطريش بالمستقبل ديالك

[slaheddine]

يا اختي الزواج مؤسسة رائعة تحتاج الى اعداد وتأهيل ، السكن المنفرد الخاص بالزوج و الزوجة هو الاساس و لا نتازل عنه ابدا ، وإلا فالمشروع مهدد من بدايته

[gana djamel]

انا عجبتني كلمة دي بروبلام هايلة هههههههههه
انا نقولك كلمة نهار ليفوتك القطار احرزي تندمي وتقولي ياليتني قبلت بيه
هذه الدنيا فرص ولعل هذه الفرص تكون واحدة او اثنين في الحياة فاغتنمي هذه الفرص قبل ان تضيع ليس بمعنى انك تقبلي كل من هب ودب ولكن اختاري الراي السديد والنظرة المستقبلية ولا تجعلي تفكيرك مبني على اشياء خيالية هذا رأييي والمفروض انك طبقي القاعدة من جاءكم ترضون دينه فزوجوه سلام

[كلمات مبعثرة]

عندك الحق اختي راهي باينة مخلطة من الاول يماه تعيط عليك بلا ماتعرفك وماشي متفاهمة مع وليدها كيفاش حبيتي تتفاهم معاك ؟

وقلتي ماعندوش دار ياختي الدار هي الصح في هاد الزمان لي مايرحمش وزيدي امر زواج المفروض يهدر مع يماه قبل خالو حتى لو كان بيناتهم خلافات واش نقولك ان شاء الله ربي يعوضك ماخير ...

[كلمات مبعثرة]

انا عجبتني كلمة دي بروبلام هايلة هههههههههه
انا نقولك كلمة نهار ليفوتك القطار احرزي تندمي وتقولي ياليتني قبلت بيه
هذه الدنيا فرص ولعل هذه الفرص تكون واحدة او اثنين في الحياة فاغتنمي هذه الفرص قبل ان تضيع ليس بمعنى انك تقبلي كل من هب ودب ولكن اختاري الراي السديد والنظرة المستقبلية ولا تجعلي تفكيرك مبني على اشياء خيالية هذا رأييي والمفروض انك طبقي القاعدة من جاءكم ترضون دينه فزوجوه سلام

والدين ماقالكش سبق خالك على يماك وهي حية ..ثم علاش يفوتها القطار؟؟؟ وتندم؟؟؟؟؟ الزواج ربي لي يقدروا لا قطار لا طائرة . ثم زواج كيما هدا يفوتها القطار خير من لي تركب وتحبط ولا ترمي روحها في كاش بلاسة

[soumeya_cons]

المهم أنك تكوني قانعة برأيك و مرتاحة مع نفسك لأنك انتي اللي رايحة تتزوجي ماشي هوما ديري اللي يخرج عليك و مايهمك حتى واحد هادي حياتك واحد ماعندو الحق يتدخل فيها

[أم عبد الرحيم2]

على الاقل صليتي صلاة الاستخارة قبل ما تقرري
دركا خلاص رفضتي و المياه رايحة تولي لمجاريها مع اختك حاولي برك تفهميها الحقيقة اللي بداخلك
قدر الله و ما شاء فعل انسي الموضوع الآن و ربي يطيحك في ولد الحلال الذي يخاف الله و متنسايش الاستخارة المرة الجاية

[ام ملاك.]

عندك علاش عليك تكسار الراس كلشي من اللول باين
اصري يجي مكتوبك ان شاء الله