مشكلة مع خطيبتي

[مشكلتي]

السلام عليكم و رحمة الله
خطيبتي فتاة في قمة التربية و الأدب و هي فتاة متعلمة و مثقفة
إلا أني أعاني من مشكلة معها أرى أنها من الخطوط الحمراء
وهي أنها ما تفرغش قلبها و ما تحبش تحكي واش بيها
حتى نولي مانفهمهاش ودايمن كي تقلق تسكت وما تقولش واش بيها
وكي نواجها بأخطاءها تسكت وما تحب تقول والو
المهم هيا مخليتنا منعرفوش نتفاهموا كتومة جدا
أنا نشوف بلي هذا رايح يديرلي مشاكل كبار في المستقبل كي نزوجو و و و
كي عدنا ما نقدروش نتفاهمو
واش الحل معها نظلم روحي ونبقى ولا نظلمها
مع العلم أني حاولت نفهمها بزاف

[moooooda147]

شوف خويا امشي معاها غير بالعقل
وحاول تفهمها بلي راكم واحد
وبلي مشاكلها هوما مشاكلك
وربي ييسرلكم اموركم

[جمال المهاجر]

خويا .. اعطاك الله فتاة خجولة ، ليست متسلطة طويلة اللسان ، لا تتكلم كثيرا ، .. و انا احسبها ' بنت حلال ' .. تهلا فيها .. و بشويا تتنحالها الحشمة و تولي تهدر بزاف ماتسكتش ههه .. توكل على ربي .. و تهلا في الطفلا .. السلام

[نورة مروان]

ما تخاف والو خويا انا كنت كيما هي و دوك تزوجت و راني عايشة مع زوجي حبيبي حياة ما كنتش نحلم بيها اتهلى فيها و روح معاها غير بلعقل و ربي يسهلك انشاء الله

[موج و صخر]

يا بني لقد انعم الله عليك بان رزقك ابنة حلال
خجووووووووووووووووولة نعم هيتسكت لانها خحولة و تحترمك لا تريد الدخول معك في مناقشات ......
احمد الله تعالى لانها كتومة ، مرة اخرى بعد الزواج لا تفشي اسرارك و لا تصرخ في وجهك لكي تدافع عن نفسها مثل بعضهنّ
حافظ على جوهرتك و ربي يكملكم

[ورقة بيضاء]

الخجل نعمة تتميز به القليلات في زمننا هذا
تحدث معها بحنان و فهمها بلي انت و هي واحد ...و قلها خذي راحتك في الهدرة
قلها متحشميش انا زوجك
و الله المستعان

[سراب06]

والله راني خايفة تكون نوع من النساء الكتومات نعرف وحدة كره منها راجاها هو بحبوح ويحب يحكي وهي لا طابت ولا اتحرقت تقول روبو خويا هناك فرق بين الحياء
والخجل ادرس الموضوع جيدا واستخر الله واحكي معها

ولي فيها الخير رب يجيبو

[sam016]

يا خو الطفلة باينة بنت حلال ما تظلم روحك ما تظلمها حاول تساعفها بشوية بلاك حشمانة منك .. حاجة باينة بعد الزواج تتبدل العقلية و تصارحك ب كلشي انت حاول ما تزيرهاش و ربي اسهل انشاء الله .

[نسمة تفاؤل]

غير بالعقل خويا اصبر وحاول معها غير بالهداوة وان شاء الله تولو متفاهمين مليح ربي يوفقكم

[aminabil]

خويا انا تاني كنت كيما هي لكن بعد الزواج تبدلت لان زوجي هو اللي بدلني

[Napia]

hada mahouch mouchkoul

sa3afha bark

[salim789]

يا أخي هذا نفس مشكل خطيبتي و قد سبب لي مشاكل عديدة معها، إلا أنني دائما أحاول جعلها تتكلم بما استطعت، كي أكون دائما على علم بالأمور التي تفكر فيها أو تتضايق منها، و قد وصلت لدرجة أنها تخبرني بأمور تزعجها مع العلم أنها لا تخبر أهلها بها. عليك الصبر و المحاولة المتكررة.
هذا النوع حساس جدا لأبسط الأمور لا تضغط عليها و عاملها معاملة خاصة. لأنك حتى و إن جرحتها فلن تظهر ذلك و لكن ستتأثر فوق ما تتصور.

[nouna3]

شوف خويا انت سقسى اداكان هدا هو طبعها مع الناس فهي ماشاء الله عليها واداكان غير معاك برك عندها معنى اخر
كاين احد اقاربي كان خاطب وحدة ونفس السلوك نتاع خطيبتك ماتهدر ما تطلب ماوالو وانا نقولو تحشم مليحة امها تقول تحشم بزاف ولما تزوجو العيوب السبعة بانو فيها كانت ماتهدرش باش مايعرفوش عقليتها وانت توله وربي يوقكم

[ايمان نور الجزائر]

يبدو ان الفتاة لم تتعود بعد عليك وتظن انها اذا فرغت قلبها
سيكون امرا غير جيد وانك ستفهم بانها تشتكي او غير ذلك
اضافة على ما اظن الى عنصر الخجل
فحاول يا اخي الكريم ان تحسسها بوجوب المصارحة وساعدها في ذلك

[سدرةالمنتهى]

السلام عليكم
اخي حاول ان تفهم منها و ان تحلل طريقة التي توصل افكارها بها هناك شخصيات قوية خجولة لكن لا تمتلك الاسلوب المناسب للوصول اليك
حاول ان تسال طبيب نفسي عن نوع هذه الشخصيات الكتومة و كيف التعامل معها لعلك تجد الجواب الشافي

[الفاتحة]

بادئ ذي بدء أتمنى أن تكون قد عقدت على خطيبتك عقدا شرعيا حتى تصبح حلالك ويباح لكما الخروج والتعرف على بعضكما دون محرم ...فالخطبة لا تجيز لكما شيئا وتعتبر خطيبتك شخصا اجنبيا عنك...


فترة الخطوبة هي فترة سابقة على الزواج وهي فرصة لمعرفة هل الطرف الآخر مناسب أم غير مناسب لان الزواج خطوة كبيرة وحياة كاملة ستُقضى بين الزوجين بحلوها ومرها ....

خطيبتك كتومة ومتحفظة كما صرحت حضرتك ، أعتقد انها ليست بعيوب بقدر أنها لم تعتد عليك بعد، ، تمهل ...تريث ...حاول حضرتك كسر ما سميته بحواجز ، عاملها بلطف واحترام ومودة ورحمة ... اذكر محاسنها ...اجعلها لا ترى سواك ، صدقني حينها ستسكن اليك وستتخلى عن تحفظها وكتمانها ....جمع الله بينكما في الحلال عاجلا غير آجل


اكرر أخي إذا كانت مجرد خطبة ، الحقها بعقد شرعي ..الفاتحة ... والله الموفق

[حميد.ص]

كلامي من كلام الاخت الكريمة نورة مروان: اتهلى فيها و روح معاها غير بلعقل و ربي يسهلك انشاء الله

[نورالهدى**]

حشمة برك

كي تداصرك مليح تهدرلك كلش واش حايب وواش ماحايبش

[sali-sali]

السلام عليكم
خويا راني نشوف فيك انت لي راك تحوس على المشاكل
حاول معاها غير بالعقل....مش بالمشاجرة
وان شاء الله تفهمك اكثر
ربي يهنيكم

[benham]

نفس طريقة خطيبتي , هذا ما أدى الى مشاكل بيننا لسوء فهمي لتصرفتها لدرجة انها كانت تستحى ان ترد عليا فالهاتف

لكن مع الوقت اصبح الوفاق التام بعدمافهت شخصيتها وكسبي ثقتها. و حرصنا على الصراحة

الاكيد الشيء الذي يخيفها هي ردت فعلك .. اشكرها بعد كل مصارحتها لك.

بهدوءبدون ضغط .. عليك ان تكسب ثقتها

انزع من رأسك انه ستكون مشاكل بعد الزواج لأنك فطريق معرفة شخصيتها

خصوصا لا تضغط عليها..بل ابذل انت مجهود لفهمها.. حتما ستصلان الى توافق

انا احب هذه في زوجتي هدوءها رزانتها و حياؤها اصبحت عملة نادرة

[ميمنة الجزائر]

احمد ربي انك طحت في وحدة عاقلة ومن بعد الزواج ربي يكمل على خير ان شاء الله

[amine eco]

مع الوقت تبدى نورمال في بداية قاع هاك يحشمو هنا لا يوجد اشكال

[سلاف26]

انصحك أخي الكريم بشراء هذا الكتاب او تحميله من النت هو كتاب رائع جدا سيجعلك تفهم الطرف الآخر و يعلمك طريقة التعامل معه عنوان الكتاب "الرجال من المريخ والنساء من الزهرة"
و ربي يسهل

[أمة الله 12]

السلام عليكم

يا اخي على ما حساب حكيتي, راهي بنت فاميلا و ناس ملاح,

اذا ضيعتيها من ايدك صعيب تلقى كيفها,

بما انها كتومة و خجولة, انت حاول انك على دراية بحياتها, و ابدأ بتفاصيل صغيرة و سطحية

مثلا, سقسيها على اهتماماتها, علاقتها بوالديها و اخوتها,

وشي هي مخططاتها, خليك قريب منها,

و كي تلقاها مقلقة و ما هيش حابة تقول,

على حساب وش كانت تحكيلك, أكيد ع الأقل تكون عندك فكرة مقربة على مصدر ازعاجها

و احكي معاها بالسياسة, فهمها اللي راك تحب تشاركها ف مشاكلها

و بما انها مزالت خطيبتك, من المستحسن ما تكثروش المكالمات دون الحاجة

[مراد الأمل]

السلام عليكم أخي أولا: ربي يكملك زواجك ثانيا: الحشمة أو الحياء في الطفلة زينة و احمد ربي كي جات تحشم؟؟ أنت تعتبرها مشكلة و اظن انك من النوع الفضفضي يعني تحب الكلام و الأخذ و العطاء فيه..مشكلتك ساهلة روحلها بشوية برك و حاول تفهمها بلي أنت و هي واحد ..موفق أخي

[سماح 2]

بالعكس اخي
ربماا هي خجلة منك بعض الشيء او شيء من هدا القبيل
مع الوقت ستتعودك
بالاضاافه
يووجد الكثيير من النااس الدين لا يحكون ما بداخلهم واناا واحدة منهم
سلام