زوجي قرر الانفصال

[خديجة 1010]

السلام عليكم ورحمة الله وبركاته
راني رجعت ليكم اليوم بحلقة جديدة من مشاكلي التي لا تنتهي مع زوجي عنده سمانة تفريبا قالي نخرجو بالسبت باش نكملو نشرو فش تع الدار تفاهمنا بالخميس عيطلي قالي راني عند الحانوت باش نشري قلتلو اشري الحاجة لي عجباتك قالي راني هدرت مع السيد وخلصتو وكومونديت وش لازم نهار السبت نروحو نجيبوهم قلتلو انا منروحش مرانيش خضرة فوق الطعام بدا يعاير فيا ويكفر عليا وسمعني كلام عمري ماسمعتو في حياتي وهادي ماشي اول مرة نداربو موالفين هكا درك ولا يعيطلي ويستفزني بكلامو انا كرهت منو وقلتلو بهاد الطريقة وهاد العقلية مراناش رايحين نروحو بعيد البارح قالي صيبي الحل قلتلو معندي حتى حل انا بديت في طريق وتوركت فيها ماعليا غير نكمل قالي مكالاه تكملي نحبسوها هنا انا تقلقت قلتلو امالا بيني وبينك القانون وغدوا المحامي يهدر معاك مبقاتلك حتى هدرة معايا واحنا من المفروض عرسنا مزالو شهر
قولولي كيفاش ندير نصارح والديا ولا نصبر ولا نروح عند المحامي ولا نسن

[ام البنوتة]

اختي خديجة انا من قبل ما شفتش مواضيعك السابقة لي حكيتي فيها بصح و الله تفاجات محامي و خلاص بيناتنا و السبب انو شرا قش الدار وانت ما خيرتيش
شوفي ختي كيما يقولو ناس بكري خد الراي لي يبكيك و ما تاخدش الراي لي يضحكك الموضوع بسيييط و ما يستاهلش كل هاذ العصبية و القلقة.
شرا وحدو و ماداش برايك غدوا راكي ندخلي دارو و تبدلي و تشري كيما تحبي .و نزيدك حاجة هذا الانسان يظهرلي واضح و ممكن كاين لي يزن على راسو افرض رايك و خلي روحك واجل و ما تحللهاش عينيها من الاول و هو راهو يطبق بلا تفكير هادي تصلح و لا ولالا
حنونة اذا راكي في خطوبة لانو مازال ماراهوش زوجك حتى تدخلي دارو على الاقل عرفا انت راكي تتعاملي كي شغل راكي تزوجت و عيشتي معاه و هو مادارلكش قيمة.راكي مخطوووووبة تعاملي على هذا الاساس باش ما تخسريهش اذا كان انسان مليح و التفاهات هاذو يروحو و يتنساو و من بعد تولي تضحكي على روحك.غدوا ان شاء الله تتزوجي كيفاش تديري و تسيري حياتك كل مشكل و كل سوء تفاهم هيا نتطلقوا.
الحكاية تاع يسبك و يكفر عليك هادي انا معاك فيها هاذي حاجة ماشي مليحة و ممكن تغيريها ماشي بالعياط و التهديد لكن بالدفع بالتي هي احسن و الكلمة الطيبة كما قال الرسول الكريم"ما استعبد القلوب الا الاحسان"
رايح يحشم بروحو قدامك لما يشوفك متربية .
ما تتسرعيش و حاولي تردي المياه الى مجاريها بطرق غير مباشرة .
نحكيلك عندي واحدة من العايلة هي مخطوبة و عاقدة و هي تتدخل في كلش حتى السبيغة تاع الدار و هاذ الدار كاريها باش يتزوجوا فيها و تتشرط على المواعن و الريدوات الخ....الراجل كره و الله طلقها و هو باقي شهر و يتزوجوا و خطب وتزوج و عندو ولد و هي راهي تضرب في الغايطة
خممي بعقلك و كبري قلبك شوية باش الحياة تمشي....oooook

[SKYALGERIA]

هل أنتما متزجان بعقد أم أنتما متزوجان عادي ؟؟؟

[أمة الله مروة]

الظاهر انكما قمتما بالعقد الشرعي والمدني
بالتالي أنا أوافق صاحبة الرد الأول...إذا الخطأ منك فحاولي التجاوز والتفهم بالطريقة التي ذكرتها صاحبة الرد الأول
فهي الحق
أما في حال كنتما لا تصلحان لبعضكما....فمن الآن...نصيحة عن علم وخبرة....قومي بالانفصال عنه...أفضل من أن يتم الزواج
ثم يكون بعده شر...
أنصحك بصلاة الاستخارة قبل ذلك....ثم مشاورة والديك واهلك...واخبريهم بالامر...ثم ان وُجد حل للمشكلة فبها ونعمت...أما إذا الامر لم يتضح تماما...فالانفصال الان أفضل من أن يكون بعد مشاكل الزواج والخسائر المادية والمعنوية
وفقكما الله

[kika85]

اختي العزيزة
السبب جد جد جد تااااااااااااافه باش يصرا بيناتكم هكدا
انا في رايي اتصلي بيه واشريلو هدية حتى وتكون صغيرة معليش واطلبي منو السماح بطريقة لبقة وما تخليش هاد الزعاف يدوم بينكم على خاطر الزواج مسؤولية كبيرة فادا كان مشكل كيما هكدا يهدم علاقة الزواج لو كان كامل بيوتنا انخربت لازم كل طرف يسمح من حقو شوي باش المركب يسير
اتصلي ما تطوليش الزعاف
ومرة تانية اتعلمي كيفاش تزعفي وكيفاش تخليه يحس بالغلط ديالو بلا ما تخسريه وتاني اتعلمي كيفاش تصالحيه
ربي يوفقكم وطمنينا عليك اختي

[haytoo82]

انت قلتي عيطلك وقلتيلو اشري اللي تعجبك وبعدها قلتيلو مش خضرة فوق الطعام انا نضن كبرتيها شوي هذي الامور تافهة ما تسحقش طلاق والحياة جايةومشاكلها اكثر من فرحها نقلك في الحياة الزوجية لازم كل مرة يتغاضى طرف باه المركب يسير بليس شاطر وماكنش اللي تلقى راجل 100 بالمئة كيما تحب وزيدي كيتزوجو انت رايحة تغيري فيه طباع وهو كذلك هذي سنة الحياة
ونزيدك حاجة ماتسمعي لكلام الناس وهو كذلك راهم يهبلوكم وعندي وحدة صحبتي عندها طفل عمره عامين هي شوي خفيفة وما تتنازلش طلقت بسبة خفيتها وكيحب راجلها يرجعها قالو صاحبو انا نخطبك اللي تهنيك وتريحك مع انه مندم وهي مندمة في زوج يحبو بعضهم ولكن ما ثقلتش وعقبت ادوسو على امرتافه كيماانت هاك نقلك اذا كان يقدرك وصاحب دين اعتذري وقلو من قبلها كنت زعفانة وصاحبتي ادوسو على امه وقاتلي وكان يرجعني نخدمها بعينيا ونرجع نسكن معاها ونطيبلها لكن الان تزوج وزادلو طفل منذ شهر وهي قلبها معاه وهو كذلك بصح بليس شاطر كلمة تافهة تدمر مستقبل انا حبيت نحكيلك واقع استفدت منه ياريت يفيدك انت كذلك ربي يهنيك
صلي صلاة الاستخارة

[جنان26]

انا من راي الاخوات لازم تتعقلي وما تخربيش على روحك وهدي هي الحياة ادا حبيتي المركب يسير لازم تتصرفي بحكمة لان الحياة مثل السفينة لازم يقودها واحد ماشي زوج والا تغرق وبالتالي تكلمي معاه بكلام طيب وباذن الله يكون غير الخير

[sabaro]

الحمد لله الذي جعل في هذه الحياة بنات و نساء مثل الموجودات في هذا المنتدى

[rayhane16]

أختي باين عليك راكي ما تعرفيش تتعاملي مع الرجل و راكي تعامليه كأنو ا ختك و لا جارتك
أنصحك تقراي كتاب الرجال من المريخ و النساء من الزهرة
رايحة تفهمي بلي الرجل لا يرى الأمور كما تراها المرأة

و نصيحتي ليك ثانيك اقراي تحفة العروس للإسطنبولي راح تتعلمي كيف تتعاملي مع زوجك لأنو واضح جدا أنو راكي خارج التغطية في هذا المجال

لأنو إذا بسبب شي تافه كهادا أقمت الدنيا فغدا كي تولي حكايات العجوزة و اللوسة و الدراري كيف راح تتصرفي
و اعلمي أنو المرا اللي تحب تدير الدار قدما تثقل روحها مليح

ربي يصفي القلوب

[doba]

ربي يجيب الخير

[هدى الجيجلية]

السلام عليكم
خيتي
ما بقى لزواجك شهر
من المفروض
تتحضري
وتتهيء
لزواج
ومن المفروض تكوني مع زوجك
في كل صغيرة وكبيرة
إستهدي بالله
واطلبي منه السماح
وإمشي في طريقك مع زوجك
المستقبلي